ពលរដ្ឋនៅរតនគិរីត្អូញពីតម្លៃថ្លៃនៃការប្រើប្រាស់ថាមពលអគ្គិសនី
2014.03.06
ការប្រើប្រាស់ថាមពលអគ្គិសនីនៅខេត្តរតនគិរី បច្ចុប្បន្នត្រូវបានទិញពីប្រទេសវៀតណាម ដើម្បីបំពេញតម្រូវការប្រជាពលរដ្ឋប្រើប្រាស់ក្នុងខេត្តបានងាយស្រួល ក៏ប៉ុន្តែបណ្ដាញចែកចាយថាមពលអគ្គិសនីនៅខេត្តនេះ មិនទាន់ពង្រីកទៅគ្រប់បណ្ដាស្រុកនៅឡើយ ជាពិសេសក្រុមហ៊ុនអគ្គិសនីកម្ពុជា បានលក់ថាមពលអគ្គិសនីទៅឲ្យអ្នកជាវដុំ ហើយអ្នកជាវដុំបានលក់ចែកចាយបន្តទៅឲ្យប្រជាពលរដ្ឋប្រើប្រាស់ក្នុងតម្លៃខ្ពស់។ បញ្ហានេះ បានធ្វើឲ្យមានការតវ៉ាពីប្រជាពលរដ្ឋជុំវិញតម្លៃអគ្គិសនីនេះជាបន្តបន្ទាប់។
ប្រជាពលរដ្ឋជាង ៥០០គ្រួសារ រស់នៅស្រុកបរកែវ ខេត្តរតនគិរី នៅថ្ងៃពុធ ទី៥ ខែមីនា ស្នើសុំជាថ្មីឲ្យមន្ត្រីអាជ្ញាធរអគ្គិសនីកំណត់តម្លៃលក់អគ្គិសនីសម្រាប់អ្នកជាវដុំលក់ជូនប្រជាពលរដ្ឋ ឲ្យនៅទាបក្រោម ១ពាន់រៀលក្នុងមួយគីឡូវ៉ាត់ម៉ោង។
តំណាងប្រជាពលរដ្ឋ លោក ឈៀង ប៊ុនថា រៀបរាប់ថា បច្ចុប្បន្នតម្លៃអគ្គិសនីដែលអ្នកជាវដុំលក់ចែកចាយទៅឲ្យប្រជាពលរដ្ឋ មានតម្លៃរហូតដល់ ១.២០០រៀលក្នុងមួយគីឡូវ៉ាត់ម៉ោង ជាតម្លៃខ្ពស់។ លោកបន្តថា ប្រជាពលរដ្ឋបានស្នើសុំឲ្យបញ្ចុះតម្លៃអគ្គិសនីនេះចំនួនពីរលើក តាមរយៈវេទិកាសាធារណៈរៀបចំដោយអាជ្ញាធរស្រុក ក៏ប៉ុន្តែមកទល់នឹងពេលនេះ មិនឃើញមានដំណោះស្រាយជូនប្រជាពលរដ្ឋនៅឡើយ៖ «មេដៃប្រជាពលរដ្ឋប្រហែលច្រើនជាង ១ពាន់នាក់ នៅតាមមេភូមិ សុំចុះថាក្រោមពី ១ពាន់ឥឡូវហ្នឹងក្នុងមួយគីឡូវ៉ាត់ម៉ោង។ អ្នកវិនិយោគអគ្គិសនីនៅបរកែវ ហ្នឹងគាត់ថារង់ចាំតែអាជ្ញាធរអគ្គិសនីចុះមកគាត់ចុះឲ្យដែរ។ បើគាត់អត់ឃើញចុះមក គាត់នៅយកតម្លៃពេញដដែល»។
ដូចគ្នានេះដែរ ប្រជាពលរដ្ឋស្រុកបរកែវ មួយរូបទៀតសុំមិនបញ្ចេញឈ្មោះបញ្ជាក់ដែរថា អគ្គិសនីដែលអ្នកជាវដុំទិញបន្តពីក្រុមហ៊ុនអគ្គិសនី គឺជាថាមពលទិញពីវារីអគ្គិសនីពីប្រទេសវៀតណាម មានតម្លៃប្រមាណ ៣០០រៀលក្នុងមួយគីឡូវ៉ាត់ម៉ោង។ ហេតុនេះ អាជ្ញាធរអគ្គិសនីគួរកំណត់ឲ្យអ្នកលក់បន្តលក់ក្នុងតម្លៃក្រោម ១ពាន់រៀល ដើម្បីសម្រាលបន្ទុកប្រជាពលរដ្ឋមានជីវភាពទាបអាចប្រើប្រាស់អគ្គិសនីបានគ្រប់គ្នា៖ «មតិប្រជាពលរដ្ឋលោកថាអស់សង្ឃឹមហើយ ពីព្រោះបីដងហើយ ចំណាយពេលមួយថ្ងៃទៅអង្គុយស្តាប់វេទិកាសាធារណៈហ្នឹង។ បើទៅធ្វើការឲ្យគេមួយថ្ងៃ បានពីរម៉ឺនដែរ ហើយគាត់និយាយថា ថ្ងៃក្រោយគាត់ឈប់ទៅ»។
ក្រុមហ៊ុនអគ្គិសនីបានទិញថាមពលអគ្គិសនីពីប្រទេសវៀតណាម ហើយលក់ជូនប្រជាពលរដ្ឋនៅខេត្តរតនគិរី ដោយផ្ទាល់តម្លៃ ៦៧០រៀលក្នុងមួយគីឡូវ៉ាត់ម៉ោង ជាតម្លៃសមរម្យដែលប្រជាពលរដ្ឋអ្នកប្រើប្រាស់ទទួលយកបាន។
ម្ចាស់សេវាកម្មចែកចាយថាមពលអគ្គិសនីបន្ត ស្រុកបរកែវ លោក សំរិត ហន មានប្រសាសន៍បញ្ជាក់ថា តម្លៃដែលលោកលក់ចែកចាយជូនប្រជាពលរដ្ឋនេះ គឺអាជ្ញាធរអគ្គិសនីបានចុះសិក្សាវាយតម្លៃ និងជាអ្នកកំណត់តម្លៃ ហើយក៏ជាតម្លៃសមស្របទាក់ទិនទៅនឹងទុនវិនិយោគ ការចំណាយខ្សែបណ្ដាញចាកចែកដល់មូលដ្ឋាន លំនៅឋានប្រជាពលរដ្ឋ និងការចំណាយលើបុគ្គលិកកម្មករ រួមទាំងចំណាយលើសេវាកម្មថែទាំ ជាដើម។ យ៉ាងណា លោកបន្តថា ការស្នើសុំរបស់ប្រជាពលរដ្ឋស្ថិតលើមន្ត្រីអាជ្ញាធរអគ្គិសនីជាអ្នកសម្រេច៖ «គាត់ធ្វើក្រដាសសុំទៅខេត្តៗបញ្ជូនទៅអាជ្ញាធរ ហើយតើខ្ញុំមិនដឹងធ្វើម៉េច។ ប្រសិនបើអាជ្ញាធរកំណត់ថា ឥឡូវឲ្យចុះទៀត ខ្ញុំចុះទៀត មិនដឹងធ្វើម៉េច បើយើងធ្វើការក្រោមអាជ្ញាធរដូចគ្នា»។
វិទ្យុអាស៊ីសេរី មិនអាចទាក់ទងមន្ត្រីអាជ្ញាធរអគ្គិសនីសុំអធិប្បាយបញ្ហានេះបានទេ នៅថ្ងៃទី៥ ខែមីនា។ ចំណែកនាយកក្រុមហ៊ុនអគ្គិសនីកម្ពុជា លោក កែវ រតនៈ មន្ត្រីលេខាលោកបញ្ជាក់ថា លោកមិនមានវត្តមាននៅក្នុងប្រទេសទេ។
យ៉ាងនេះក្តី ប្រភពមន្ត្រីក្រសួងថាមពល សុំមិនបញ្ចេញឈ្មោះឲ្យដឹងថា មន្ត្រីអាជ្ញាធរអគ្គិសនីទទួលបន្ទុកបញ្ហានេះ កំពុងប្រជុំកំណត់គោលការណ៍រួម និងដោយឡែកតាមតំបន់ស្ដីពីតម្លៃសម្រាប់អ្នកជាវដុំទិញថាមពលពីអគ្គិសនីពីក្រុមហ៊ុនអគ្គិសនីកម្ពុជា និងលក់ទៅឲ្យប្រជាពលរដ្ឋនេះហើយ។ គោលការណ៍នេះ នឹងត្រូវផ្សព្វផ្សាយជូនប្រជាពលរដ្ឋអ្នកពាក់ព័ន្ធតម្លៃប្រើប្រាស់អគ្គិសនីនេះ៕