លោក រ៉ុង ឈុន ស្នើក្រសួងបញ្ចូលមេរៀនប្រវត្តិសាស្ត្រស៊ីជម្រៅក្នុងកម្មវិធីសិក្សា
2014.09.02
សមាគមគ្រូបង្រៀនកម្ពុជាឯករាជ្យ ស្នើដល់ថ្នាក់ដឹកនាំក្រសួងអប់រំ យុវជន និងកីឡា ពិចារណាដាក់បញ្ជូនសៀវភៅមេរៀន ស្ដីពីប្រវត្តិសាស្ត្រនៃទឹកដីប្រទេសកម្ពុជា ឲ្យបានស៊ីជម្រៅចូលទៅក្នុងកម្មវិធីសិក្សារបស់ក្រសួងអប់រំ យុវជន និងកីឡា នាថ្ងៃអនាគត។
សំណើនេះ កើតឡើងនៅគ្រាសមាគមគ្រូមើលឃើញថា សិស្សានុសិស្ស ឬយុវជនកម្ពុជា មានការយល់ដឹងតិចតួចអំពីប្រវត្តិសាស្ត្រនៃទឹកដីប្រទេសកម្ពុជា ពីអតីតកាល។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ មានប្រសាសន៍ថា បានដាក់លិខិតជូន លោក ហង់ ជួនណារ៉ុន រដ្ឋមន្ត្រីក្រសួងអប់រំ ស្នើជួបពិភាក្សាអំពីស្ថានភាពកំពុងកើតមានក្នុងវិស័យអប់រំ ទាក់ទងជាមួយមុខវិជ្ជាមួយចំនួន ក្នុងបំណងចូលរួមកែលំអវិស័យអប់រំកម្ពុជា ឲ្យបានប្រសើរនាថ្ងៃខាងមុខ។
លោកបន្តថា សវនាការនេះក៏នឹងស្នើឲ្យក្រសួងអប់រំ ដាក់បញ្ចូលនូវប្រវត្តិសាស្ត្រកម្ពុជា មានដូចជា ទឹកដីកម្ពុជា កោះត្រល់ ឬទឹកដីខ្មែរសុរិន្ទ ជាដើម ចូលទៅក្នុងកម្មវិធីសិក្សារបស់សិស្ស ចាប់ពីកម្រិតបឋមតទៅ។ ព្រោះបច្ចុប្បន្ននេះ យុវជនកម្ពុជា មានការយល់ដឹងតិចតួចអំពីប្រវត្តិសាស្ត្រពិតនៃទឹកដីកម្ពុជា ព្រោះគ្មាននៅកម្មវិធីសិក្សាច្រើនទេ៖ «កម្មវិធីសិក្សាសព្វថ្ងៃហ្នឹង បានបញ្ចូលនូវប្រវត្តិសាស្ត្រខ្មែរស្បោលៗ គឺមិនបានស៊ីជម្រៅទេ។ យើងចង់ឲ្យក្រសួងអប់រំ ធ្វើម៉េចរឿងប្រវត្តិសាស្ត្រខ្មែរ គឺទាក់ទងខ្មែរក្រោម ខ្មែរសុរិន្ទសព្វបែបយ៉ាងហ្នឹង ឲ្យបានស៊ីជម្រៅ ដើម្បីឲ្យកូនខ្មែរយើងស្គាល់ពីប្រវត្តិខ្លួនច្បាស់លាស់ ថាខ្លួនជាខ្មែរ ហើយមកពីប្រភពណា និងមានដែនដីពីណាដល់ណា? អាហ្នឹងត្រូវតែរៀនឲ្យស៊ីជម្រៅ បណ្តុះបណ្តាលនូវឆន្ទៈរបស់កូនខ្មែរឲ្យមានឆន្ទៈជាតិនិយម។ ជាពិសេស យើងចង់ឲ្យមេរៀនប្រវត្តិសាស្ត្រ កំណត់យកពិន្ទុស្មើទៅនឹងពិន្ទុមុខវិជ្ជាខ្មែរ ក៏ដូចជាគណិតវិទ្យា ដើម្បីទាក់ទាញឲ្យយុវជនយើងហ្នឹង ខំយកចិត្តទុកដាក់រៀនសូត្រទៅលើមេរៀនប្រវត្តិសាស្ត្រហ្នឹង»។
ផ្ដើមពីបញ្ហានេះ លោក រ៉ុង ឈុន បានស្នើជួប លោក ហង់ ជួនណារ៉ុន រដ្ឋមន្ត្រីក្រសួងអប់រំ នៅថ្ងៃទី១៦ ខែកញ្ញា ខាងមុខ ដើម្បីចូលរួមផ្តល់យោបល់កែលំអវិស័យអប់រំ ៤ចំណុចសំខាន់ ឲ្យស្របតាមកំណែទម្រង់របស់ក្រសួងអប់រំ ដាក់ចេញ។
លោក សន ជ័យ តំណាងសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វិក បានគាំទ្រការស្នើដាក់បញ្ចូលមេរៀនប្រវត្តិសាស្ត្រកម្ពុជា ចូលទៅក្នុងកម្មវិធីសិក្សានាថ្ងៃអនាគត។ ព្រោះលោកយល់ថា យុវជនខ្មែរចាំបាច់ត្រូវដឹងអំពីប្រវត្តិសាស្ត្រទឹកដីខ្លួនឲ្យបានត្រឹមត្រូវ។
ទន្ទឹមគ្នានេះ លោកក៏ស្នើដល់ក្រសួងអប់រំ ត្រូវផ្តល់សៀវភៅសិក្សាគោលឲ្យបានគ្រប់មុខវិជ្ជា នៅតាមសាលានីមួយៗ ព្រោះសព្វថ្ងៃនេះ សិស្សានុសិស្សនៅតាមសាលាស្ទើរទូទាំងប្រទេស មិនមានសៀវភៅសិក្សាគោល ដើម្បីរៀនឲ្យបានគ្រប់មុខវិជ្ជានៅឡើយទេ។ លោកបន្តថា កាលពីឆ្នាំ២០១៣ សង្គមស៊ីវិលរកឃើញថា មានសិស្សជាង ៨៥% នៅកម្រិតមធ្យមសិក្សាទុតិយភូមិ មិនមានសៀវភៅសិក្សាគោលដើម្បីរៀនទេ៖ «ជំរុញមុខវិជ្ជាសង្គមហ្នឹងដូចជាប្រវត្តិសាស្ត្រអីហ្នឹង គួរជាមុខវិជ្ជាដែលមានការរៀនសូត្រច្បាស់លាស់ និងគ្រប់គ្រាន់»។
ទាក់ទិនបញ្ហានេះ សិស្សានុសិស្សរៀននៅវិទ្យាល័យមួយនៅស្រុកឈូក ខេត្តកំពត ក៏ចង់ឲ្យក្រសួងអប់រំ ដាក់បញ្ចូលប្រវត្តិសាស្ត្រទឹកដីកម្ពុជា ចូលទៅក្នុងកម្មវិធីសិក្សាឲ្យបានស៊ីជម្រៅនាថ្ងៃអនាគតដែរ។ សិស្សានុសិស្សមួយចំនួនបញ្ជាក់ថា សព្វថ្ងៃនេះ ពួកគេមិនបានយល់ដឹងទាល់តែសោះអំពីប្រវត្តិសាស្ត្រនៃទឹកដីប្រទេសកម្ពុជា ពីអតីតកាលឲ្យបានស៊ីជម្រៅទេ។
ទោះយ៉ាងណា លោក រ៉ុង ឈុន ថ្លែងថា មន្ត្រីក្រសួងអប់រំ មិនទាន់ឆ្លើយតប ឬកំណត់ថ្ងៃអនុញ្ញាតឲ្យរូបលោកដឹកនាំប្រតិភូគ្រូបង្រៀន ចូលជួបពិភាក្សា និងផ្តល់យោបល់កែលំអវិស័យអប់រំ នៅថ្ងៃណាមួយឲ្យពិតប្រាកដនៅឡើយទេមកដល់ថ្ងៃអង្គារ ទី២ ខែកញ្ញា៕