ពលរដ្ឋនៅខេត្តក្រចេះចោទអាជ្ញាធរថាមិនអើពើដោះស្រាយពាក្យបណ្ដឹងរបស់ពួកគាត់
2016.12.09
ផែនទីខេត្តក្រចេះ។
Photo: RFA
ពលរដ្ឋរស់នៅឃុំស្នួល ស្រុកស្នួល ខេត្តក្រចេះ រិះគន់អាជ្ញាធរមូលដ្ឋាន និងមេប៉ុស្តិ៍ស្នួលថា មិនយកចិត្តទុកដាក់បម្រើសេវាសាធារណៈជូនពលរដ្ឋនោះទេ។ អ្នកភូមិលើកឡើងថា អ្នករងគ្រោះដោយអំពើហិង្សាបានប្ដឹងទៅសមត្ថកិច្ចមូលដ្ឋានជិតមួយខែហើយ តែពុំមានចំណាត់ការ។ មន្ត្រីឃ្លាំមើលសិទ្ធិមនុស្សចាត់ទុកបញ្ហានេះថា ជាទម្រង់នៃវប្បធម៌និទ្ទណ្ឌភាព ដែលជាប្រភពអសន្តិសុខសង្គម។
ពលរដ្ឋរស់នៅភូមិថ្ពង ឃុំស្នួល ស្រុកស្នួល ចោទមេប៉ុស្តិ៍ស្នួល លោក ថៃ លីថុន និងអាជ្ញាធរមូលដ្ឋានថា កំពុងមើលរំលងបទល្មើសព្រហ្មទណ្ឌដែលកើតមាននៅមូលដ្ឋានពួកគេរស់នៅ។ ពួកគេសម្តែងក្តីអស់សង្ឃឹមចំពោះភាពព្រងើយកន្តើយរបស់អាជ្ញាធររដ្ឋាភិបាល និងសមត្ថកិច្ចពាក់ព័ន្ធថា មិនយកចិត្តទុកដាក់បម្រើសេវាសាធារណៈជូនពលរដ្ឋ។
ពលរដ្ឋម្នាក់ក្នុងចំណោមពលរដ្ឋជាច្រើនទៀត រស់នៅឃុំឃ្សឹម គឺលោក សឹម ពៅ ចោទប្រកាន់ថា មេប៉ុស្តិ៍ស្នួល លោក ថៃ លីថុន និងមេភូមិថ្ពង លោក ចេត សុខា គ្មានឆន្ទៈដោះស្រាយបញ្ហាពលរដ្ឋនោះទេ ធ្វើឲ្យពលរដ្ឋអស់ជំនឿលើសមត្ថកិច្ចពាក់ព័ន្ធទាំងនោះ។ លោករំឭកថា កាលពីដើមខែវិច្ឆិកា ឆ្នាំ២០១៦ ស្ត្រីម្នាក់ឈ្មោះ អឿន ស្រីអន ត្រូវបានប្ដីរបស់ខ្លួនឈ្មោះ យេន ខ្លី ប្រើកាំបិតកាប់ត្រង់ចង្កេះបណ្ដាលឲ្យរបួសធ្ងន់ ហើយសាច់ញាតិជនរងគ្រោះបានប្ដឹង មេប៉ុស្តិ៍រដ្ឋបាលឃុំស្នួល តែរហូតមកទល់ពេលនេះ ពុំឃើញមានចំណាត់ការនៅឡើយ។
លោករំឭកថា កាលពីថ្ងៃទី២ ខែធ្នូ បុរសម្នាក់បានយកកាំបិតដេញកាប់សម្លាប់លោក នៅគ្រាដែលលោកបានជួយសម្របសម្រួលអ្នកភូមិមួយគ្រួសារកើតអំពើហិង្សា ហើយលោកបានប្ដឹងករណីនេះទៅសមត្ថកិច្ចមូលដ្ឋាន តែពុំមានដំណោះស្រាយ៖ «ច្បាប់ចែងមកដើម្បីឲ្យអាជ្ញាធរបម្រើប្រជាពលរដ្ឋបើអាជ្ញាធរមិនបម្រើប្រជាពលរដ្ឋតើឈ្មោះជាអាជ្ញាធរមានន័យថាម៉េច? ឲ្យប្រជាពលរដ្ឋរងគ្រោះរហូតដល់ស្លាប់ចាំយកខ្មោចទៅកប់ ឬយ៉ាងម៉េច?»។
ដូចគ្នានេះដែរ ស្ត្រីដែលត្រូវជាម្ដាយជនរងគ្រោះ គឺលោកស្រី ឃឹម នឿន រិះគន់ភាពព្រងើយកន្តើយរបស់សមត្ថកិច្ចពាក់ព័ន្ធ ដែលមិនចាត់វិធានការច្បាប់ចំពោះជនល្មើសដែលកាប់កូនស្រីរបស់លោកស្រីអោយរបួសធ្ងន់។ លោកស្រីសង្ស័យថា មូលហេតុដែលសមត្ថកិច្ចមិនចាត់វិធានការករណីនេះ ដោយសារលោកស្រីគ្មានប្រាក់បង់ឲ្យសមត្ថកិច្ចទាំងនោះ ដើម្បីជាថ្នូរនឹងការអនុវត្តច្បាប់៖ «កន្លែងប្លង់ហ្នឹងវា សេរីណាស់ អាណាចង់កាប់អាណាទៅ។ វ៉ែតាមចិត្តក៏គ្មានពីណាគេដឹងឮដែរ លោកគ្រូអើយយ៉ាប់ណាស់!»។
ឆ្លើយតបការចោទប្រកាន់នេះ មេប៉ុស្តិ៍រដ្ឋបាលឃុំស្នួល លោក ថៃ លីថុន បានបដិសេធចំពោះការលើកឡើងនេះ ដោយលើកហេតុផលថា ក្រោយពីកើតមានបាតុភាពភ្លាម នគរបាលមូលដ្ឋានបានចុះអន្តរាគមន៍ផ្ទាល់ តែជនសង្ស័យបានរត់គេចខ្លួន។ តែយ៉ាងណាលោកសន្យាថា នឹងប្រឹងប្រែងអនុវត្តច្បាប់ករណីនេះបន្តទៀត ប្រសិនបើជនសង្ស័យមានវត្តមាននៅមូលដ្ឋាន។ លោកបញ្ជាក់ថា ប្រសិនបើសមត្ថកិច្ចចាប់ខ្លួនជនសង្ស័យបាន សមត្ថកិច្ចនឹងអប់រំ និងធ្វើកិច្ចសន្យាបញ្ឈប់ ព្រោះអំពើហិង្សានេះកើតមានចំពោះប្តី និងប្រពន្ធ៖ «យើងទៅភ្លាមវាគេចបាត់ទៅ ព្រោះយើងតាមវាអត់ទាន់ទេ តែទើបឮដំណឹងម្សិលមិញហ្នឹង។ មេភូមិប្រាប់ថា វាមកវិញហើយ ខ្ញុំនឹងមេភូមិសហការគ្នាថា ចាំស្អែកចុះទៅ ហៅវាមកធ្វើការអប់រំ»។
អ្នកគ្រប់គ្រងបច្ចេកទេសការិយាល័យស៊ើបអង្កេត នៃអង្គការសិទ្ធិមនុស្សលីកាដូ (LICADHO) លោក អំ សំអាត ពន្យល់ថា ប្រសិនបើមានបទល្មើសព្រហ្មទណ្ឌកើតឡើង សមត្ថកិច្ចពាក់ព័ន្ធត្រូវតែអនុវត្តច្បាប់ ហើយជនប្រព្រឹត្តត្រូវទទួលទោស មានន័យថា សមត្ថកិច្ចត្រូវកសាងសាងសំណុំរឿងបញ្ជូនទៅតុលាការដើម្បីអនុវត្តនីតិវិធី មិនអាចព្រងើយកន្តើយ ឬធ្វើការសម្របសម្រួលណាមួយក្រៅប្រព័ន្ធតុលាការបាននោះទេ។ លោកបញ្ជាក់ថា បើសមត្ថកិច្ចព្រងើយកន្តើយមិនអនុវត្តច្បាប់ ឬសម្របសម្រួលក្រៅប្រព័ន្ធតុលាការ នឹងនាំឲ្យមានវប្បធម៌និទ្ទណ្ឌភាព និងបង្កឲ្យជនល្មើសមិនខ្លាចច្បាប់៖ «អាហ្នឹងមន្ត្រីនគរបាលយុត្តិធម៌ត្រូវតែកសាងសំណុំរឿងបញ្ជូនទៅតុលាការ ដើម្បីឲ្យតុលាការលោកនឹងចាត់វិធានការតាមផ្លូវច្បាប់ ឬចេញដីកាចាប់ ឬចេញដីកានាំខ្លួន ឬក៏កោះហៅទៅដើម្បីអនុវត្តតាមច្បាប់។ យើងមិនអាចផ្អឹបទុកចោលយូរបានទេ»។
ក្រមព្រហ្មទណ្ឌថ្មី មាត្រា២១៧ ចែងថា អំពើហិង្សាប្រព្រឹត្តដោយចេតនាលើអ្នកដទៃ ត្រូវផ្ដន្ទាទោសដាក់ពន្ធនាគារពីរមួយឆ្នាំទៅ ៣ឆ្នាំ និងពិន័យជាប្រាក់ ២លានរៀលដល់ ៦លានរៀល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
សង្គម
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់
- សារជូនពរឆ្នាំថ្មី ២០២៤
- ពលរដ្ឋចាញ់បោកអ្នកស្រី ឡេង ចាន់ណា ព្រមានឡើងមកតវ៉ានៅមុខផ្ទះលោក ហ៊ុន សែន បើតុលាការខេត្តសៀមរាបពន្យារពេលដោះស្រាយ