ពលរដ្ឋនៅជាប់ព្រំដែនខ្មែរ-ថៃនៃខេត្តឧត្តរមានជ័យនៅតែរងគ្រោះដោយសារគ្រាប់មីន
2014.12.15
រូបភាពគ្រាប់មីនជាច្រើនប្រភេទ ដែលគេឃើញមាននៅក្នុងទឹកដីកម្ពុជា។
កាលពីចុងខែវិច្ឆិកា និងដើមខែធ្នូ ប្រជាពលរដ្ឋ ២នាក់ នៅក្នុងភូមិដងទង់ សង្កាត់កូនក្រៀល ក្រុងសំរោង បានរងរបួសដាច់ជើង ដោយសារជាន់គ្រាប់មីនសេសសល់ពីសង្គ្រាមដែលកប់ក្រោមដី។
មន្ត្រីមជ្ឈមណ្ឌលសកម្មភាពកំចាត់មីនកម្ពុជា (CMAC) ឱ្យដឹងថា ក្នុងរយៈពេល ៩ខែ ឆ្នាំ២០១៤ គឺចំនួនអ្នករងគ្រោះដោយសារគ្រាប់មីនបានកើនឡើងជាង ២០% បើប្រៀបធៀបទៅនឹងឆ្នាំ២០១៣ កន្លងទៅ។ ខេត្តដែលនៅតែមានអ្នករងគ្រោះដោយសារគ្រាប់មីនច្រើនជាងគេ គឺតំបន់ជាប់ព្រំដែនកម្ពុជា-ថៃ ដូចជាខេត្តបាត់ដំបង បន្ទាយមានជ័យ និងខេត្តឧត្តរមានជ័យ។
មន្ត្រីសាខាកាកបាទក្រហមកម្ពុជា និងអាជ្ញាធរមូលដ្ឋានខ្លះក្នុងខេត្តឧត្តរមានជ័យ នៅតែព្រួយបារម្ភអំពីបញ្ហាគ្រាប់មីន និងអាវុធយុទ្ធភណ្ឌមិនទាន់ផ្ទុះ ដោយសារតែបច្ចុប្បន្ន ប្រជាពលរដ្ឋនៅតែរងគ្រោះដោយសារគ្រាប់មីនជាបន្តបន្ទាប់។
អាជ្ញាធររដ្ឋាភិបាលឱ្យដឹងថា នៅតាមភូមិ ឃុំ មួយចំនួនរបស់ខេត្តឧត្តរមានជ័យ ដែលជាអតីតតំបន់សង្គ្រាមជិត ២ទសវត្ស ជាប់ព្រំដែនខ្មែរ-ថៃ គឺនៅតែមានគ្រាប់មីនសេសសល់ក្រោមដីដែលមិនទាន់បោសសំអាតនៅឡើយ។ បញ្ហានេះ បានបង្កឱ្យប្រជាពលរដ្ឋស្លាប់និងរបួសដោយសារផ្ទុះមីនស្ទើរតែរៀងរាល់ឆ្នាំ។
មេភូមិដងទង់ នៃសង្កាត់កូនក្រៀល ក្រុងសំរោង គឺលោក សៅ ប៊ុនថេង។ លោកមានប្រសាសន៍ថា កាលពីថ្ងៃទី៧ ខែធ្នូ កន្លងទៅ ក្មេងប្រុសម្នាក់នៅភូមិរបស់លោកឈ្មោះ តួ ប៉ោង អាយុ ១៤ឆ្នាំ បានដើរជាន់មីនដាច់ប្រអប់ជើងម្ខាង នៅពេលដែលគាត់ចូលទៅក្នុងព្រៃចន្លោះបង្គោលព្រំដនខ្មែរ-ថៃ លេខ១០ និងលេខ១១ ដើម្បីរើសកំណាត់ឈើធ្នង់មកលក់ដូរ៖ «កន្លែងហ្នឹងបងប្អូនដឹងថា មានមីនហើយ ក៏ប៉ុន្តែដោយសារខ្វះខាតជីវភាព ក៏ចូលទៅរកកំណាត់ឈើធ្នង់ ដើម្បីយកមកលក់ ឬក៏ដូរអង្ករ»។
លោកមេភូមិដងទង់ ឱ្យដឹងថា ក្នុងរយៈពេល ២ខែជាប់គ្នានេះ អ្នកភូមិរបស់លោកចំនួន ២នាក់ហើយដែលរងរបួសដោយសារគ្រាប់មីន។ កាលពីថ្ងៃទី២៣ ខែវិច្ឆិកា កន្លងទៅ បុរសអ្នកភូមិរបស់លោកម្នាក់ទៀតឈ្មោះ ងឹម បឿន អាយុ ២៨ឆ្នាំ ក៏បានដើរជាន់មីនដែលកប់ក្រោមដីដែរ នៅពេលចូលព្រៃដើររើសកំណាត់ឈើធ្នង់មកលក់ដូចគ្នានោះ។
មន្ត្រីសាខាកាកបាទក្រហមកម្ពុជា ឱ្យដឹងថា បច្ចុប្បន្នខេត្តឧត្តរមានជ័យ ដែលមានផ្ទៃដីសរុបជាង ៦៦ម៉ឺនគីឡូម៉ែត្រក្រឡា គឺ ២០% ក្នុងចំណោមនោះ ជាតំបន់ដែលសង្ស័យថា នៅមានគ្រាប់មីនកប់ក្រោមដី និងអាវុធយុទ្ធភណ្ឌមិនទាន់ផ្ទុះ។
ប្រធានសាខាកាកបាទក្រហមកម្ពុជា ខេត្តឧត្តរមានជ័យ លោក ស សៀកហៀង ទទួលស្គាល់ថា បច្ចុប្បន្ននេះប្រជាពលរដ្ឋនៅតែរងគ្រោះ ដោយសារគ្រាប់មីនជាហូរហែ។ ទោះយ៉ាងណាលោកមិនអាចបញ្ជាក់ពីចំនួនអ្នករងគ្រោះបានពិតប្រាកដថាប៉ុន្មាននាក់ទេ ដោយសារតែអង្គភាពរបស់លោកខ្វះថវិការលើគម្រោងស្រាវជ្រាវទិន្នន័យនេះ។
លោក ស សៀកហៀង ឱ្យដឹងថា ក្នុងរយៈពេល ១១ខែ ឆ្នាំ២០១៤ គឺលោកបានទទួលតួលេខអ្នករងគ្រោះដោយសារគ្រាប់មីនប្រហែល ២-៣នាក់ប៉ុណ្ណោះ ដោយសារតែមិនមានមន្ត្រីធ្វើការសកម្មទៅលើផ្នែកនេះ៖ «នៅតែព្រួយបារម្ភ ព្រោះនៅខែវស្សា គាត់ចុះប្រកបមុខរបរកសិកម្ម អាចនឹងប៉ះមីនតោន ឬក៏មីនស្គរដែលវាផ្ទុះ»។
មន្ត្រីមជ្ឈមណ្ឌលសកម្មភាពកម្ចាត់មីនកម្ពុជា ដែលហៅកាត់ថា ស៊ីម៉ាក់ ក៏សំដែងការព្រួយបារម្ភដូចគ្នានេះដែរ ដោយថា ក្នុងចំណោមខេត្តទាំងអស់នៃប្រទេសកម្ពុជា គឺខេត្តចំនួន៣ ដែលនៅជាប់ព្រំដែនខ្មែរ-ថៃ មានបាត់ដំបង ខេត្តបន្ទាយមានជ័យ និងខេត្តឧត្តរមានជ័យ នៅតែមានអ្នករងគ្រោះដោយសារគ្រាប់មីនច្រើនជាងគេ។
អគ្គនាយកនៃមជ្ឈមណ្ឌលសកម្មភាពកម្ចាត់មីនកម្ពុជា លោក ហេង រតនា ឱ្យដឹងថា ក្នុងរយៈពេល ៩ខែ នៃឆ្នាំ២០១៤ គឺមានអ្នករងគ្រោះដោយសារគ្រាប់មីន និងយុទ្ធភណ្ឌមិនទាន់ផ្ទុះទូទាំងប្រទេសចំនួន ១៣៤ករណី។ ចំនួននេះ កើនឡើងជាង ២០% បើប្រៀបធៀបទៅនឹងចំនួនអ្នករងគ្រោះកាលពីឆ្នាំ២០១៣ កន្លងទៅ។
លោក ហេង រតនា បញ្ជាក់ថា ស៊ីម៉ាក់ មានអាទិភាពសម្រាប់បោសសំអាតមីន ក៏ប៉ុន្តែអាទិភាពនោះគឺតម្រូវទៅតាមប្រភពធនធានដែលមានសព្វថ្ងៃ មិនអាចទូលំទូលាយទេ។ សព្វថ្ងៃនេះអាទិភាពសំអាតមីន គឺផ្ដល់ទៅកន្លែងណាដែលមានប្រជាពលរដ្ឋរស់នៅ ចំណែកតំបន់ដែលជាដីព្រៃ និងដីស្រែចំការទើបតែរានថ្មី គឺមិនទាន់បោសសំអាតទាំងស្រុងទេ៖ «ហើយតំបន់ដែលគ្រោះថ្នាក់ហ្នឹងភាគច្រើនជាដីកសិកម្ម ឬក៏ព្រៃនៅក្បែរៗភូមិ ដែលជាតំបន់មិនអាទិភាពបោសសំអាតនៅឡើយ ព្រោះយើងបោសសំអាតតែតំបន់លំនៅឋានហ្នឹងជាតំបន់អាទិភាពទី១»។
មជ្ឈមណ្ឌលសកម្មភាពកម្ចាត់មីនកម្ពុជា ឱ្យដឹងថា សព្វថ្ងៃប្រទេសកម្ពុជា នៅសេសសល់ផ្ទៃដីសង្ស័យថាមានគ្រាប់មីនចំនួនជាង ២.០០០គីឡូម៉ែត្រក្រឡា។ ស៊ីម៉ាក់ មានគម្រោង ៥ឆ្នាំទៅមុខ ត្រូវបោសសំអាតគ្រាប់មីនលើផ្ទៃដីឱ្យបាន ១.២០០គីឡូម៉ែត្រក្រឡា ដោយត្រូវការចំណាយប្រហែលពី៤០ ទៅ ៤៥លានដុល្លារក្នុង១ឆ្នាំៗ។
កាលពីថ្ងៃទី១២ ខែធ្នូ កន្លងទៅ អាជ្ញាធរមីនកម្ពុជា បានបង្ហាញនៅក្នុងសិក្ខាសាលាស្ដីពីការអប់រំកាត់បន្ថយគ្រោះថ្នាក់ដោយសារគ្រាប់មីន និងសំណល់ជាតិផ្ទុះសង្គ្រាមថា ចាប់តាំងពីឆ្នាំ១៩៧៩ រហូតដល់ខែតុលា ឆ្នាំ២០១៤ កម្ពុជាមានអ្នករងគ្រោះដោយសារគ្រាប់មីន និងយុទ្ធភណ្ឌមិនទាន់ផ្ទុះចំនួនជាង ៦ម៉ឺននាក់។
អគ្គលេខាធិការអាជ្ញាធរមីនកម្ពុជា បញ្ជាក់ទៀតថា ចាប់ពីឆ្នាំ១៩៩២ រហូតដល់ខែតុលា ឆ្នាំ២០១៤ ក្រុមការងារបានរួមគ្នាបោសសំអាតមីនលើផ្ទៃដីចំនួនជាង ១.០០០គីឡូម៉ែត្រក្រឡាដោយរកឃើញមីនប្រឆាំងមនុស្សជាង ១លានគ្រាប់ មីនប្រឆាំងរថក្រោះជាង ២ម៉ឺនគ្រាប់ និងសំណល់ពីសង្គ្រាមមិនទាន់ផ្ទុះចំនួន ២លានគ្រាប់ទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
អត្ថបទពេញនិយម
សង្គម
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់
- សារជូនពរឆ្នាំថ្មី ២០២៤
- ពលរដ្ឋចាញ់បោកអ្នកស្រី ឡេង ចាន់ណា ព្រមានឡើងមកតវ៉ានៅមុខផ្ទះលោក ហ៊ុន សែន បើតុលាការខេត្តសៀមរាបពន្យារពេលដោះស្រាយ
- ទិដ្ឋភាពទូទៅ នៃពិធីបុណ្យចូលឆ្នាំខ្មែរ ក្នុងតំបន់អង្គរខេត្តសៀមរាប