កម្មករ​កាត់​ដេរ​នៅ​ខេត្ត​កោះកុង​ជិត​១០០​នាក់​ដួល​សន្លប់​ព្រោះ​ភិតភ័យ

ដោយ ឡេង ម៉ាលី
2017-09-05
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
និមិត្តសញ្ញា​អាស៊ីសេរី
និមិត្តសញ្ញា​អាស៊ីសេរី
Photo: RFA

កម្មករ​កម្មការិនី​កាត់​ដេរ​ជិត ១០០​នាក់ នៅ​ខេត្ត​កោះកុង ដួល​សន្លប់ នៅ​ព្រឹក​ថ្ងៃ​ទី​៥ កញ្ញា ព្រោះ​ភ័យ​ស្លុត​នឹង​សំឡេង​កណ្ដឹង​ប្រកាស​អាសន្ន​រោទ៍​ឡើង​ដោយ​មិន​ដឹង​មូលហេតុ។

ប្រធាន​ផ្នែក​ផលិតភាព អាគារ​ទី​៣ នៃ​រោងចក្រ​ឈ្មោះ ខេ.ខេ.អិន អាផារែល (KKN Apparel Co., Ltd.) លោក ហេង សាម៉ឺឌី ថ្លែង​ថា ករណី​សន្លប់​នេះ​ចាប់ផ្ដើម​ដំបូង​ពីរ​បី​នាក់ ហើយ​មាន​អ្នក​ស្លុត​បន្ត​រាប់​សិប​នាក់​ទៀត៖ «ពេល​ពីរ​បី​សន្លប់ ពេល​យើង​បញ្ជូន​ដល់​ពេទ្យ នៅ​ពេទ្យ​សង្គ្រោះ​បឋម​នៅ​រោងចក្រ​ហ្នឹង ក៏​មាន​អ្នក​ផ្សេង​ទៀត​មាន​អារម្មណ៍​ថា​ភិតភ័យ ហើយ​ក៏​សន្លប់​ត​គ្នា។ អា​ហ្នឹង​គឺ​ជា​ដើម​ហេតុ​នៃ​ការ​សន្លប់។ មាន​ព័ត៌មាន​ខ្លះ​មិន​ច្បាស់​ការ​ចេញ​ទៅ​ថា កម្មករ​សន្លប់​ដោយសារ​ពុល ឬ​ញ៉ាំ​នេះ​ញ៉ាំ​នោះ អា​ហ្នឹង​វា​ជា​ព័ត៌មាន​មិន​ពិត​ទេ»

លោក​ឲ្យ​ដឹង​ថា រោងចក្រ ខេ.ខេ.អិន អាផារែល (KKN Apparel Co., Ltd.) ស្ថិត​នៅ​ឃុំ​បាក់ខ្លង ស្រុក​មណ្ឌលសីមា ខេត្ត​កោះកុង។ អាគារ​ទី​៣ មាន​កម្មករ​សរុប ១.៤០០​នាក់ ដែល​កាត់ដេរ​សំលៀក​បំពាក់​កីឡា។

លោក​បញ្ជាក់​ថា ចាប់​ពី​វេលា​ថ្ងៃ​ត្រង់​នៅ​ថ្ងៃ​ដដែល​នេះ កម្មករ​សន្លប់​ខ្លះ​បាន​ចេញ​ពី​មន្ទីរពេទ្យ​វិញ ហើយ​មិន​មាន​អ្នក​ស្លាប់​ទេ។ ខាង​លោក និង​អាជ្ញាធរ​ពាក់ព័ន្ធ​កំពុង​ស៊ើប​អង្កេត​រក​មូលហេតុ​ច្បាស់លាស់ ដែល​បណ្ដាល​ឲ្យ​កណ្ដឹង​រោទ៍​ចលាចល​នោះ ហើយ​នឹង​ចេញ​លទ្ធផល​អង្កេត​នៅ​ថ្ងៃ​ទី​៦ កញ្ញា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល