ផ្ទុះគ្រាប់នៅការដ្ឋានជីកថ្មស្រុកបាភ្នំស្លាប់មនុស្សម្នាក់
2015.01.04
មនុស្សម្នាក់ស្លាប់ក្នុងករណីផ្ទុះគ្រាប់មួយ នៅឯការដ្ឋានជីកថ្មមួយកន្លែង នៅក្នុងឃុំជើងភ្នំ ស្រុកបាភ្នំ ខេត្តព្រៃវែង នៅថ្ងៃទី៤ ខែមករា ឆ្នាំ២០១៥។ អធិការប៉ូលិសស្រុកបាភ្នំ ឲ្យដឹងថា តាមការសន្និដ្ឋានដំបូង គ្រាប់ដែលផ្ទុះនោះទំនងជាគ្រាប់ចាស់សល់ពីសង្គ្រាម។
អធិការប៉ូលិសស្រុកបាភ្នំ ខេត្តព្រៃវែង លោក អន សុគន្ធ មានប្រសាសន៍ឲ្យដឹងថា ជនរងគ្រោះឈ្មោះ ចយ ភេទប្រុស អាយុ ២៦ឆ្នាំ មានស្រុកកំណើតនៅក្នុងស្រុកបាណន់ ខេត្តបាត់ដំបង ជាកម្មករនៅការដ្ឋានអាជីវកម្មមួយកន្លែងនៅភ្នំបាភ្នំ របស់ក្រុមហ៊ុន ឡុង ណាំ។
លោក លោក អន សុគន្ធ អធិការនគរបាលស្រុកបាភ្នំ មានប្រសាសន៍ថា ការផ្ទុះនេះមិនមែនជាការផ្ទះរំសេវរបស់ក្រុមហ៊ុនជីកយកថ្មនេះទេ គឺទំនងផ្ទះដោយសារតែគ្រាប់ចាស់ដែលបន្សល់ទុកជាយូរមកហើយ។ ជនរងគ្រោះបានឈរមើលពីចំណោតខាងលើភ្នំពេលគេកាយថ្ម នៅការដ្ឋានកាយយកថ្មនោះ រួចក៏មានគ្រាប់ផ្ទះឡើងបណ្ដាលឲ្យខ្ទាតថ្មចំជនរងគ្រោះបណ្ដាលឲ្យចំពោះធ្លាយពោះវៀន។
លោកអធិការនគរបាលស្រុកបាភ្នំ មានប្រសាសន៍បន្ថែមទៀតថា ក្រោយពេលកើតហេតុ បុគ្គលិករបស់ក្រុមហ៊ុនបានព្យាយាមបញ្ជូនជនរងគ្រោះទៅកាន់មន្ទីរពេទ្យបង្អែកនៅតំបន់អ្នកលឿង ក្នុងស្រុកពាមរ ខេត្តព្រៃវែង ប៉ុន្តែនៅពេលដែលបញ្ជូនទៅដល់ពាក់កណ្ដាលផ្លូវ ជនរងគ្រោះបានស្លាប់ទៅហើយ។
លោក អន សុគន្ធ មានប្រសាសន៍បន្ថែមទៀតថា ក្រុមគ្រួសារកំពុងតែទាក់ទងមកក្រុមហ៊ុនដើម្បីនាំយកសាកសពទៅធ្វើបុណ្យនៅស្រុកកំណើតក្នុងខេត្តបាត់ដំបង៕