សមាគមគ្រូបង្រៀននៅពោធិ៍សាត់រិះគន់ថ្នាក់ដឹកនាំទាក់ទងរឿងបង្កកប្រាក់ខែគ្រូបង្រៀន
2015.04.05
គ្រូបង្រៀន និងប្រធានសមាគមគ្រូបង្រៀនកម្ពុជាឯករាជ្យ ខេត្តពោធិ៍សាត់ រិះគន់ថ្នាក់ដឹកនាំមន្ទីរ និងក្រសួងអប់រំ ទាក់ទងនឹងការបង្កកប្រាក់ខែគ្រូបង្រៀនម្នាក់នៅស្រុកក្រគរ។ ពួកគាត់ចាត់ទុកការបង្កកប្រាក់ខែនេះ គឺជាចេតនារបស់អាជ្ញាធរមូលដ្ឋាន និងថ្នាក់ដឹកនាំស្ថាប័នអប់រំ ក្នុងការគាបសង្កត់សិទ្ធិសេរីភាព និងមិនចង់ឲ្យគ្រូរូបនេះចេញតវ៉ារឿងដីធ្លីបន្តទៀត។
គ្រូបង្រៀននៅអនុវិទ្យាល័យស្នាអន្សាម្នាក់ គឺលោក សោម សារាវុត ត្រូវថ្នាក់ដឹកនាំមន្ទីរ និងក្រសួងអប់រំ សម្រេចបង្កកប្រាក់បៀវត្សសម្រាប់ខែកុម្ភៈ និងខែមីនា ឆ្នាំ២០១៥ បន្ទាប់ពីលោកអាក់ខានមិនបានទៅបង្រៀនសិស្សជិត ២ខែ។ ការអាក់ខាននេះ គឺដោយសារតុលាការឃុំខ្លួនលោកបណ្ដោះអាសន្នក្នុងពន្ធនាគារ ក្រោមបទចោទឆបោកទាក់ទងនឹងរឿងទិញលក់ដីធ្លីមួយកន្លែង កាលពីឆ្នាំ២០០៨។
លោក សោម សារាវុត ថ្លែងនៅថ្ងៃទី៥ ខែមេសា ថា ការបង្កកប្រាក់ខែរបស់លោកចំនួនពីរខែនេះ គឺជារឿងមិនត្រឹមត្រូវឡើយ បន្ទាប់ពីលោកទទួលភាពអយុត្តិធម៌ផ្ទួនៗពីការចោទប្រកាន់ ហើយចាប់លោកដាក់គុកជិត ២ខែ។ ក្រោយចេញពីពន្ធនាគារនៅថ្ងៃទី២៧ ខែមីនា ឆ្នាំ២០១៥ លោកបានស្វះស្វែងទៅបង្រៀនសិស្ស ប៉ុន្តែប្រាក់ខែលោកចំនួនពីរខែមិនត្រូវបានបញ្ចូលក្នុងគណនេយ្យឲ្យនោះទេ។
លោកស្នើឲ្យថ្នាក់ដឹកនាំមន្ទីរ និងក្រសួងអប់រំ ថ្លឹងថ្លែងរកហេតុផលដើម្បីផ្ដល់យុត្តិធម៌ជូនលោក និងជួយពន្លឿននីតិវិធីបើកប្រាក់ខែទាំងពីរខែនោះមកឲ្យលោកឲ្យបានមុនថ្ងៃបុណ្យចូលឆ្នាំខ្មែរផង៖ «ការបង្កកប្រាក់ខែវាអត់ត្រឹមត្រូវទៅតាមច្បាប់ នៃការអប់រំទេ ព្រោះការដែលខ្ញុំមានបញ្ហានេះវាជាអំពើអយុត្តិធម៌មួយនរណាក៏ដឹងដែរ តុលាការស្រុកខ្មែរវាអ៊ីចឹង ហើយអ្នកដឹកនាំស្រុកខ្មែរកាលដែលមានបញ្ហាអីមិនបានត្រេះរិះពិចារណារកខុសត្រូវទេ គឺសង្កត់សង្កិនតែរឿងបញ្ហាផ្សេងៗ យកមកបូករួមធ្វើឲ្យមានទោសកំហុសស្រេចនឹងចិត្ត។ រាល់ថ្ងៃខ្ញុំបានចូលបម្រើការងារវិញ ហើយទៅបើកប្រាក់បៀវត្សគឺមិនមាននៅក្នុងកុង (គណនេយ្យ) ធនាគារតែម្ដង»។
ឆ្លើយតបបញ្ហានេះ ប្រធានការិយាល័យបុគ្គលិកនៃមន្ទីរអប់រំយុវជន និងកីឡា ខេត្តពោធិ៍សាត់ លោក ម៉ែន សំអាត បញ្ជាក់ថា ថ្នាក់ដឹកនាំមន្ទីរ បានពិភាក្សាជាមួយថ្នាក់ដឹកនាំក្រសួងច្បាស់លាស់មុននឹងសម្រេចបង្កកប្រាក់ខែនេះ។
លោកថា ហេតុផលនៃការបង្កកគឺដោយសារលោកគ្រូ សោម សារាវុត ត្រូវបានតុលាការចេញដីកាឃុំខ្លួន ប៉ុន្តែបច្ចុប្បន្នលោកកំពុងស្វែងរកនីតិវិធី ដើម្បីបើកប្រាក់ខែឲ្យលោកគ្រូវិញហើយ ប៉ុន្ដែត្រង់ថា អាចបើកបាននៅពេលណានោះ លោកក៏មិនអាចកំណត់បានដែរ៖ «មានដីកាគេចាប់ខ្លួនត្រឹមត្រូវហើយ ខាងខ្ញុំមិនចេះតែបង្កកទេ ហើយបង្កកហ្នឹងមិនមែនចេះតែបង្កកដែរសួរយោបល់របស់ថ្នាក់ដឹកនាំក្រសួងដែរ។ សុំយោបល់គាត់ (ក្រសួង) ថា បង្កកទៅចាំមើលដល់តុលាការគេដោះស្រាយយ៉ាងគិតគូរតាមហ្នឹងទៀត។ អូ...! អារឿងផ្លូវច្បាប់មិនអាចបន្ទាន់ដូចចិត្តយើងចង់បានភ្លាមទេ»។
ទាក់ទងបញ្ហានេះ ប្រធានសមាគមគ្រូបង្រៀនកម្ពុជាឯករាជ្យប្រចាំខេត្តពោធិ៍សាត់ អ្នកស្រី គឹម តារានី ថ្លែងថា លោក សោម សារាវុត គឺជាគ្រូបង្រៀនមានសីលធម៌ល្អ និងសកម្មក្នុងការបង្រៀនសិស្ស។ ប៉ុន្តែការបង្កកប្រាក់ខែនេះ អាចជាការរើសអើង និងគាបសង្កត់សិទ្ធិសេរីភាពរបស់លោកគ្រូដែលជាសកម្មជនដីធ្លី និងជាសមាជិកនៃសមាគមគ្រូបង្រៀនកម្ពុជាឯករាជ្យ ក្នុងខេត្តពោធិ៍សាត់ ផងនោះ៕