អង្គការសិទ្ធិមនុស្សក្រៅរដ្ឋាភិបាល នៅខេត្តឧត្តរមានជ័យ រាយការណ៍ថា ទាហានប្រដាប់អាវុធ ២នាក់ បានចាប់ខ្លួនប្រជាពលរដ្ឋម្នាក់ទៅវាយធ្វើទារុណកម្មតាមអំពើចិត្ត និងចងជាប់ដើមឈើពេញ១យប់។ រាល់អំពើហិង្សាបែបនេះជាច្រើនករណីកន្លងទៅ គេសង្កេតឃើញថា ប្រព័ន្ធច្បាប់មិនសូវចាត់វិធានការម៉ឺងម៉ាត់ ប្រឆាំងនឹងក្រុមទាហានទាំងនោះទេ។
ប្រជាពលរដ្ឋម្នាក់នៅភូមិដងទង់ សង្កាត់កូនក្រៀល ក្រុងសំរោង កំពុងទាមទារប្រាក់ថ្លៃជំងឺចិត្តចំនួន ៤លានរៀល ព្រមទាំងជំរុញឱ្យតុលាការផ្ដន្ទាទោសទាហាន ២នាក់ ដែលបានចាប់ខ្លួនគាត់វាយដំដោយសេរី។
បុរសអាយុ ៣៥ឆ្នាំ ជាអ្នកភូមិដងទង់ គឺលោក ឈិត ក្លូ។ គាត់អះអាងកាលពីរសៀលថ្ងៃច័ន្ទ ទី៧ ខែកក្កដា ថា កាលពីទៀបភ្លឺថ្ងៃទី៤ ខែកក្កដា កន្លងទៅ នៅភូមិរបស់គាត់មានភ្លៀងធ្លាក់ ហើយរូបគាត់ក៏កាន់ពិលដើរឆ្លុះកង្កែបនៅក្បែរៗភូមិ។ បន្តិចក្រោយមក លោកបានដើរឆ្លុះទៅដល់កន្លែងមួយ ដែលមានរោង និងទាហាន ២នាក់ ដេកនៅទំនងជាកន្លែងចាំកាក់អ្នករកឈើគ្រញូង។ ពេលនោះ ទាហានទាំងពីរបានចេញមកចាប់គាត់ចង ហើយយកដំបងវាយធ្វើបាបយ៉ាងខ្លាំង។
លោក ឈិត ក្លូ៖ «ចាប់ខ្ញុំអូសមកចងខ្សែអង្រឹង និងក្រមា១ តាំងពីម៉ោង ៣ និង ៤០នាទីទៀបភ្លឺ។ វាយគំរាម ខ្ញុំថាបើមិនប្រាប់ឱ្យត្រង់ទេ កាត់ដៃខ្ញុំ ខ្វេះស្លឹកត្រចៀកខ្ញុំ ខ្វេះភ្នែក។ គេសួរខ្ញុំថា អ្នកណាគេបញ្ជូនមក? ហើយខ្ញុំឆ្លើយថា ខ្ញុំជាអ្នកឆ្លុះកង្កែបទេ គ្នាគេអត់ជឿ។ រហូតដល់ភ្លឺម៉ោង ៧ និង ២០នាទី មេភូមិទៅធានាបានគេស្រាយចំណង»។
ប្រភពពីប្រជាពលរដ្ឋនៅភូមិដងទង់ ឱ្យដឹងថា ទាហាន ២នាក់ ដែលចាប់អ្នកភូមិវាយធ្វើបាបនោះ គេស្គាល់ឈ្មោះ ហំ គឹមសេង និងឈ្មោះ វ៉ន វុន នៅក្នុងអង្គភាពកងពលតូចលេខ៤១។
ទោះយ៉ាងណា វិទ្យុអាស៊ីសេរី មិនអាចស្វែងរកការទាក់ទងទាហានទាំង ២នាក់ ព្រមទាំងមេបញ្ជាការកងពលតូចលេខ៤១ ដើម្បីសុំការបំភ្លឺជុំវិញការចោទប្រកាន់នោះបានថាយ៉ាងណានៅឡើយ។
បុរសដែលរងទារុណកម្មដោយសារទាហានវាយដំនោះ បានដាក់ពាក្យបណ្ដឹងទៅតុលាការខេត្តឧត្តរមានជ័យ និងសមាគមការពារសិទ្ធិមនុស្សអាដហុក (adhoc) រួចហើយ។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តឧត្តរមានជ័យ លោក ស្រី ណារ៉េន មានប្រសាសន៍ថា កាលពីថ្ងៃទី៦ ខែកក្កដា លោកបានទទួលបណ្ដឹងស្ដីពីអំពើហិង្សានេះ។ លោក ស្រី ណារ៉េន បញ្ជាក់ថា តាមការសាកសួរជនរងគ្រោះ លោកយល់ថា ទាហានទាំងពីរនាក់ពាក់ព័ន្ធនឹងការធ្វើទារុណកម្មមនុស្សខុសច្បាប់៖ «ខ្ញុំមើលទៅវាជាអំពើធ្វើទារុណកម្ម ពីព្រោះចាប់មនុស្សយកទៅចងវាយ ៤ដំបង ហើយមានម្នាក់ទៀតឈ្មោះ វ៉ន វុន ជាកូនទាហានហ្នឹង ក៏បើកសោកាំភ្លើងថាអ្ហែងតែហ៊ានរត់បាញ់ គំរាមអ៊ីចឹង។ បង្ខំវាយឱ្យឆ្លើយ គេចោទថាគាត់ហ្នឹងមានគេបញ្ជូនមក តាមពិតប្រជាពលរដ្ឋហ្នឹងគាត់ទៅរកឆ្លុះកង្កែបនៅក្នុងភូមិគាត់»។
បញ្ហាទាហានបង្កហិង្សានេះដែរ អ្នកភូមិថ្នល់កែង ឃុំផ្អាវ ស្រុកត្រពាំងប្រាសាទ បានឱ្យដឹងថា កាលពីចុងសប្ដាហ៍មុន ទាហាន១ក្រុមបានទៅចាប់យកកម្ទេចឈើគ្រញូងពីឪពុកកូន ៣នាក់ ក៏ប៉ុន្តែនៅពេលដែលឪពុកកូនទាំង ៣នាក់ ឃ្លាន មិនមានលុយទិញបាយហូប ក៏ទៅសុំកម្ទេចឈើគ្រញូងទាំងនោះមកលក់ ប៉ុន្តែត្រូវទាហានវាយហើមដៃ។
នៅខេត្តឧត្តរមានជ័យ ឧស្សាហ៍កើតអំពើហិង្សាដែលបង្កដោយទាហានជាញឹកញាប់។ កាលពីថ្ងៃទី៣០ ខែឧសភា កន្លងទៅ ស្ត្រី ២នាក់ នៅភូមិជ្រឹងខាងកើត សង្កាត់កូនក្រៀល ក្រុងសំរោង បានទទួលរងអំពើហិង្សាពីក្រុមទាហាន ៣នាក់ ដែលសម្រុកចូលទៅចាប់យកម៉ាស៊ីនអារឈើពីអ្នកភូមិ ដែលកំពុងកាប់ឈើក្នុងចម្ការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។