ពលរដ្ឋខេត្តស្វាយរៀងអំពាវនាវឲ្យអាជ្ញាធរបើកស្ពានតាហោដើម្បីឲ្យពលរដ្ឋបានធ្វើស្រែ
2015.06.06
០២-មិថុនា-២០១៥៖ ពលរដ្ឋភូមិទទា សង្កាត់ចេក ក្រុងស្វាយរៀង ខេត្តស្វាយរៀង ដែលផ្ដល់បទសម្ភាសន៍ដល់វិទ្យុអាស៊ីសេរី ស្នើឲ្យរដ្ឋាភិបាលបើកស្ពានតាហោ ដើម្បីឲ្យអ្នកភូមិបានធ្វើស្រែក្នុងរដូវវស្សា។
ពលរដ្ឋជាច្រើនគ្រួសាររស់នៅស្រុកស្វាយជ្រំ និងក្រុងស្វាយរៀង អំពាវនាវឲ្យអាជ្ញាធរបើកទំនប់ទឹកនៅស្ពានតាហោ នៃទន្លេវ៉ៃកូ នៅក្នុងរដូវវស្សានេះ ដើម្បីឲ្យពួកគាត់ធ្វើស្រែចម្ការបាន។
ពលរដ្ឋរស់នៅសង្កាត់ចេក ក្រុងស្វាយរៀង និងស្រុកស្វាយជ្រំ បារម្ភពីដីស្រែអាស្រ័យផល ត្រូវទឹកជន់លិចលង់ដីស្រែរៀងរាល់ឆ្នាំ។ ពលរដ្ឋចាត់ទុកថា មូលហេតុចម្បងដោយសារតែអាជ្ញាធរខេត្តធ្វើទំនប់បិទចរន្តទឹកត្រង់នៅស្ពានតាហោ នៅទន្លេវ៉ៃកូ ឋិតនៅភូមិក្បាលស្ពាន សង្កាត់ពោធិ៍តាហោ ក្រុងស្វាយរៀង បណ្ដាលឲ្យអ្នកភូមិចំនួន ៨ឃុំ មិនអាចធ្វើស្រែបាននៅរដូវវស្សា។
តំណាងពលរដ្ឋរស់នៅសង្កាត់ចេក អ្នកស្រី សូ សារ៉ន រៀបរាប់ថា បន្ទាប់ពីអាជ្ញាធរខេត្តទប់ទឹកនៅស្ពានតាហោ តាំងពីឆ្នាំ២០០០ មក គ្រួសារអ្នកស្រីមិនអាចធ្វើស្រែនៅរដូវវស្សាបានដូចឆ្នាំមុនៗឡើយរហូតបច្ចុប្បន្ន ដោយសារតែទឹកជំនន់ឡើងខ្លាំងធ្វើឲ្យលិចលង់ដីស្រែ និងបង្កឲ្យខូចខាតស្រូវទាំងស្រុង។
អ្នកស្រីថា ពលរដ្ឋមានដីស្រែតាមបណ្ដោយអូរតាវ៉ូ នេះ និងទន្លេវ៉ៃកូ មិនអាចធ្វើស្រែបានឡើយទាំងរដូវវស្សា និងរដូវប្រាំង៖ «តាំងពីគេបិទអាស្ពានខាងត្បូងមក ពួកខ្ញុំគ្មានបានអីហូបទេ គេបញ្ចាល់ទឹកទុករហូតតាំងពីឆ្នាំ២០០០មក។ ពួកខ្ញុំអត់រហូត ពួកនៅលើ។ ពួកនៅក្រោមគេបានផលរហូត»។
ចំណែកអភិបាលរងក្រុងស្វាយរៀង លោកស្រី ស ថាវី ឲ្យដឹងនៅថ្ងៃទី៥ ខែមិថុនា ថា ទំនប់ដែលអាជ្ញាធរជំនាញទប់នេះសម្រាប់កសិករធ្វើស្រែប្រាំង ដើម្បីផ្គត់ផ្គង់ទឹកធ្វើស្រែនៅប៉ែកខាងក្រោមទន្លេវ៉ៃកូ ដូចជាសង្កាត់ពោធិ៍តាហោ សង្កាត់ស្វាយតឿ ជាដើម។ ទោះយ៉ាងណា អ្នកស្រីមិនបានបញ្ជាក់លម្អិតដោយជំរុញឲ្យវិទ្យុអាស៊ីសេរី ទូរស័ព្ទសួរអាជ្ញាធរខេត្តបន្ថែម៖ «ប្រជាពលរដ្ឋខ្វះខាតទឹក ស្នើសុំ គេបើកទ្វារទឹកហ្នឹងទៅ»។
យ៉ាងនេះក្តី អាជ្ញាធរមូលដ្ឋាន ក៏ធ្លាប់ទទួលពាក្យប្ដឹងរបស់តំណាងពលរដ្ឋកាលពីឆ្នាំ២០០៥ ដើម្បីឲ្យដោះស្រាយបញ្ហាទឹកលិចលង់ដីស្រែនេះ តែមិនទាន់មានដំណោះស្រាយដោយសារតែជាកាតព្វកិច្ចរបស់មន្ទីរធនធានទឹក។
ចៅសង្កាត់រងចេក លោក លក ចន្ទ្រាត ទទួលស្គាល់ថា ជាង ១០ឆ្នាំ កន្លងមកហើយ ទំនប់ទឹកនេះពិតជាប៉ះពាល់ធ្ងន់ធ្ងរដល់ការប្រកបរបរធ្វើស្រែរបស់ពលរដ្ឋ។ តែទោះជាយ៉ាងណាក៏ដោយ លោកជំរុញឲ្យពលរដ្ឋរាប់ពាន់គ្រួសារដែលរងផលប៉ះពាល់គួរផ្ដិតមេដៃដាក់ញត្តិទៅអាជ្ញាធរខេត្ត និងរដ្ឋសភាដើម្បីអន្តរាគមន៍បញ្ហានេះ៖ «ដល់ពេលគេទប់ទៅ ពេលណាខែវស្សាភ្លៀងជន់ច្រើន ទឹកហ្នឹងវាហូរមកវាទាក់ត្រង់ស្ពាន់តាហោ ពេលណាទឹកវាខ្លាំងទៅហូរពីលើទំនប់ទៅ ហើយគេបើកនៅខាងកើតមួយទៀតនៅស្ពានតាហោ»។
មន្ត្រីសម្របសម្រួលអង្គការលីកាដូ ខេត្តស្វាយរៀង លោក នុត បូពិណ្ណារ័ត្ន ផ្តល់ទស្សនៈថា រដ្ឋាភិបាលត្រូវយកផលប្រយោជន៍ពលរដ្ឋជាធំចាំបាច់ត្រូវរក្សាទុក និងដោះស្រាយក្តីកង្វល់ពលរដ្ឋដែលកំពុងប្រឈមបញ្ហាទឹកលិចលង់ដីស្រែនេះ បង្កប៉ះពាល់ធ្ងន់ធ្ងរជីវភាពពលរដ្ឋ។ លោកអំពាវនាវក្រសួងធនធានទឹក ពិចារណាឡើងវិញចំពោះគម្រោងទំនប់ទន្លេវ៉ៃកូនេះ៖ «ឲ្យទឹកហ្នឹងទៅទម្លាក់ឲ្យពលរដ្ឋ ហើយមានផលប្រយោជន៍ជីវភាពរស់នៅរបស់ពលរដ្ឋ គឺចាំបាច់ យើងត្រូវប្រគល់ឲ្យពលរដ្ឋហើយ ព្រោះពលរដ្ឋជាធំ មិនអាចថា យើងរក្សាទឹកចិញ្ចឹមត្រីនៅក្នុងទន្លេហ្នឹង»។
ចៅសង្កាត់រងនៃសង្កាត់ចេក លោក លក ចន្ទ្រាត ឲ្យដឹងថា ពលរដ្ឋរងផលប៉ះពាល់មានចំនួន ៨ឃុំ ក្នុងស្រុក និងក្រុងចំនួន ២ ដូចជាសង្កាត់ចេក ឃុំឃ្លាំង ឃុំពោធិ៍រាជ ឃុំដូនស ព្រៃឆ្លាក់ ឃុំកណ្ដាល និងឃុំមេលោង។ ដោយឡែកពលរដ្ឋក្នុងសង្កាត់ចេក ជាប់អូរតាវ៉ូ ដៃទន្លេវ៉ៃកូ រងផលប៉ះពាល់ខ្លាំងជាងគេដោយសារតំបន់នោះជាតំបន់ទំនាប។
ទោះយ៉ាងណាក៏ដោយ តាំងពីទំនប់ទឹកនេះដំណើរការតាំងពីឆ្នាំ២០០០ ដែលបណ្ដាលឲ្យអ្នកភូមិផ្អាកការធ្វើស្រែរហូតមកដល់បច្ចុប្បន្ន។
ប្រធានប្រតិបត្តិការនៃវិទ្យាស្ថានស្រាវជ្រាវ និងអភិវឌ្ឍន៍ជនបទកម្ពុជា លោក ប្រាក់ សេរីវឌ្ឍន៍ យល់ឃើញថា ក្រសួងធនធានទឹក គួរវិភាគ និងសិក្សាវាយតម្លៃឲ្យច្បាស់លាស់ដើម្បីរកឲ្យឃើញពីផលប្រយោជន៍រួម ដែលជាប្រយោជន៍ដល់សង្គមទើបការអភិវឌ្ឍនោះជាការត្រឹមត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
