ទេសចរទៅលេងក្រុងព្រះសីហនុកើនច្រើននៅថ្ងៃបុណ្យចំរើនព្រះជន្មព្រះមហាក្សត្រ
2015.05.16
ទេសចរមកលេងកម្សាន្តនៅឆ្នេរអូរឈើទាល ខេត្តព្រះសីហនុ កាលពីថ្ងៃទី១៤ ខែឧសភា ឆ្នាំ២០១៥។
មន្ត្រីមន្ទីរទេសចរណ៍ខេត្តព្រះសីហនុ បានអះអាងថា ចំនួនភ្ញៀវទេសចរជាតិដែលទៅកម្សាន្តខេត្តនេះមានចំនួនកើនឡើងច្រើននៅក្នុងរយៈពេល ៣ថ្ងៃ នៃព្រះរាជពិធីបុណ្យចំរើនព្រះជន្មព្រះមហាក្សត្រ ព្រះករុណា សម្ដេចព្រះបរមនាថ នរោត្តម សីហមុនី។ ប៉ុន្តែចំនួនភ្ញៀវទេសចរបរទេសបានថយចុះ បើប្រៀបធៀបពេលវេលាដូចគ្នាកាលពីឆ្នាំ២០១៤។
បញ្ហានេះ មន្ត្រីសង្គមស៊ីវិលបានអះអាងថា ចំនួនភ្ញៀវទេសចរអាចនឹងកើនច្រើនថែមទៀត បើរដ្ឋាភិបាលបើករបងថ្មហ៊ុមព័ទ្ធឆ្នេរឲ្យភ្ញៀវទេសចរបានដើរឆ្លងកាត់ឲ្យបានទូលំទូលាយដូចពេលមុនឡើងវិញ។
ប្រធានមន្ទីរទេសចរណ៍ខេត្តព្រះសីហនុ លោក នូ សុផល មានប្រសាសន៍ថា ចំនួនភ្ញៀវទេសចរជាតិ-អន្តរជាតិ ដែលចូលមកទស្សនាខេត្តនេះ ក្នុងឱកាសបុណ្យចំរើនព្រះជន្មព្រះមហាក្សត្រ ព្រះករុណា សម្តេចព្រះបរមនាថ នរោត្តម សីហមុនី ចាប់ពីថ្ងៃទី១៣ ដល់ថ្ងៃទី១៥ ខែឧសភា មាន ៨៤.៩៦០នាក់ គឺកើនជាង ២០ភាគរយ បើប្រៀបធៀបឆ្នាំ២០១៤។ ចំណែកភ្ញៀវបរទេសមានចំនួន ៣.៧១១នាក់ គឺថយចុះចំនួន ២៩ភាគរយ។
កាលពីឆ្នាំ២០១៤ មានភ្ញៀវសរុបចំនួន ៧០.៤៩០នាក់។ ក្នុងនោះភ្ញៀវជាតិមាន ៦៥.៩០៩នាក់ និងភ្ញៀវអន្តរជាតិមាន ៤.៥៨១នាក់។
ទោះយ៉ាងណា លោក នូ សុផល មិនធ្វើអត្ថាធិប្បាយច្រើនទេ ពីការធ្លាក់ចុះចំនួនភ្ញៀវអន្តរជាតិ ប៉ុន្តែបញ្ជាក់ខ្លីថា អាចបណ្ដាលមកពីរដូវនេះជិតផុតរដូវកាលធ្វើទេសចរណ៍របស់ភ្ញៀវបរទេស និងគួបផ្សំរដូវនេះមានភ្លៀងធ្លាក់ច្រើននៅតំបន់មាត់សមុទ្រ ឬកោះជាដើម ជាហេតុនាំឲ្យចំនួនភ្ញៀវអន្តរជាតិបានថយចុះ។
ស្របពេលគ្នានេះ លោក នូ សុផល ក៏បានសំណូមពរដល់ប្រតិបត្តិករទេសចរណ៍ ឬប្រជាពលរដ្ឋជាភ្ញៀវទេសចរ ត្រូវចូលរួមសំអាតបរិស្ថានឆ្នេរឲ្យមានអនាម័យល្អ ប្រយោជន៍ដើម្បីចូលរួមថែរក្សាសោភណភាពឆ្នេរ ដើម្បីទាក់ទាញចំនួនភ្ញៀវឲ្យចូលមកទស្សនាខេត្តនេះបានកាន់តែច្រើន៖ «រាល់សំណល់ដែលគាត់បរិភោគរួចហើយ គាត់ចោលនៅលើឆ្នេរកន្លងមក។ សូមឲ្យប្រជាពលរដ្ឋមានស្មារតីទទួលខុសត្រូវ និងចេះស្រលាញ់បរិស្ថានឆ្នេរទាំងអស់គ្នា ហើយស្នើឲ្យពួកគាត់ទទួលទានចំណីអាហាររួចរាល់ហើយ ត្រូវខ្ចប់ទុកដាក់ និងយកទៅដាក់នៅក្នុងធុងសំរាម ដើម្បីឲ្យក្រុមហ៊ុនប្រមូលសំរាមងាយក្នុងការសំអាតបរិស្ថានឆ្នេរ ឬក៏ប្រមូលសំរាមយកទៅចោល»។
បញ្ហានេះដែរ លោក សុខ សុខុម ប្រធានអង្គការស្រាវជ្រាវជាតិកម្ពុជា ឬហៅកាត់ ស៊ីអិនរ៉ូ (CNRO) សាខាខេត្តព្រះសីហនុ បានឲ្យដឹងថា ខេត្តជាប់មាត់សមុទ្រមួយនេះ នឹងអាចទាក់ទាញភ្ញៀវទេសចរជាតិ-អន្តរជាតិ ចូលមកទស្សនាច្រើនថែមទៀតនៅឆ្នាំខាងមុខ ប្រសិនបើរដ្ឋាភិបាលអភិវឌ្ឍន៍តំបន់ឆ្នេរឲ្យមានអនាម័យ និងមានឆ្នេរធំទូលំទូលាយជាងពេលនេះ។
លោកអះអាងថា សព្វថ្ងៃនេះ ខេត្តព្រះសីហនុ មិនមានឆ្នេរទូលំទូលាយសម្រាប់ផ្ដល់ជូនប្រជាពលរដ្ឋ ឬភ្ញៀវទេសចរជាតិ-អន្តរជាតិ អង្គុយ ឬចូលងូតទឹកកម្សាន្តច្រើនទេ ព្រោះតំបន់ឆ្នេរភាគច្រើនត្រូវឈ្មួញ ឬមន្ត្រីមានអំណាចហ៊ុមព័ទ្ធរបងថ្ម មិនឲ្យមនុស្សដើរឆ្លងកាត់ស្ទើរតែទាំងស្រុងអស់ទៅហើយ។ ជាងនេះ តម្លៃសេវាកម្មលើវិស័យទេសចរណ៍ គឺប្រតិបត្តិករទេសចរណ៍ ឬមានអាជីវករលក់ចំណីអាហារ និងម្ចាស់ផ្ទះសំណាក់ សណ្ឋាគារជាដើម បានដំឡើង ឬកំណត់តម្លៃតាមទំនើងចិត្ត ពោលគឺនៅពេលមានពិធីបុណ្យជាតិធំៗ តម្លៃបានឡើងខ្ពស់កប់ពពក បើធៀបតម្លៃថ្ងៃធម្មតា។
ត្រង់ចំណុចនេះ លោក សុខ សុខុម បានស្នើដល់រដ្ឋាភិបាល ឬក្រសួងទេសចរណ៍ និងថ្នាក់ដឹកខេត្តព្រះសីហនុ ជាដើម ត្រូវមានវិធានការកំណត់តម្លៃស្នាក់នៅ ឬចំណីអាហារ ឲ្យបានសមរម្យជូនភ្ញៀវទេសចរ ដើម្បីឲ្យកំណើនភ្ញៀវទេសចរចូលមកទស្សនាខេត្តព្រះសីហនុ បានច្រើនបន្ថែមទៀត៖ «ភ្ញៀវទេសចរជាតិ អន្តរជាតិ កាន់តែកើនឡើងនៅខេត្តព្រះសីហនុ ក៏ប៉ុន្តែខេត្តនេះខ្វះឆ្នេរជាច្រើនសម្រាប់ទុកឲ្យភ្ញៀវទេសចរចូលមកកម្សាន្តទស្សនា។ ពេលមានឆ្នេរតូចចង្អៀត ជំរុញឲ្យការលក់ដូរចំណីអាហាររបស់អាជីវករកាន់តែមានតម្លៃខ្ពស់ សូម្បីតែកន្លែងអង្គុយក៏ត្រូវចំណាយលុយខ្ពស់កប់ពពកដែរ ជាហេតុធ្វើឲ្យភ្ញៀវមានការអាក់អន់ស្រពន់ចិត្តជាខ្លាំងពីសំណាក់ភ្ញៀវទេសចរ ឬពលរដ្ឋដែលចូលមកលេងខេត្តព្រះសីហនុ ព្រោះសេវាមានតម្លៃខ្ពស់ខុសពីធម្មតា ហួសពីការគិតស្មាន»។
បញ្ហានេះ លោក នូ សុផល ប្រធានមន្ទីរទេសចរណ៍ខេត្តព្រះសីហនុ ឲ្យដឹងថា មិនបានដឹងពីការដំឡើងតម្លៃតូបអង្គុយ ឬថ្លៃសេវាស្នាក់នៅមានតម្លៃខ្ពស់នោះទេ ព្រោះមិនទាន់ទទួលបានការរិះគន់ពីប្រជាពលរដ្ឋ ឬភ្ញៀវទេសចរទេ នៅក្នុងពិធីបុណ្យចំរើនព្រះជន្មព្រះមហាក្សត្រ ៣ថ្ងៃមកនេះទេ។
លោកបន្តថា បញ្ហានេះ ថ្នាក់ដឹកនាំក្រសួងទេសចរណ៍ ឬថ្នាក់ដឹកនាំខេត្តព្រះសីហនុ និងមន្ទីរទេសចរណ៍ជាដើម បានបើកកិច្ចប្រជុំណែនាំជាបន្តបន្ទាប់ដល់ប្រតិបត្តិករទេសចរណ៍ ឲ្យកំណត់តម្លៃសេវាកម្មរបស់ខ្លួនឲ្យបានសមរម្យ ដើម្បីចូលរួមទាក់ទាញចំនួនភ្ញៀវទេសចរ ឲ្យចូលមកទស្សនាខេត្តនេះ ឲ្យបានច្រើនថែមទៀត៖ «តម្លៃសេវាបម្រើវិស័យទេសចរណ៍នាខេត្តព្រះសីហនុ គឺមានការណែនាំពីលោក ថោង ខុន រដ្ឋមន្ត្រីក្រសួងទេសចរណ៍ លោក ឈិត សុខុន អភិបាលខេត្តព្រះសីហនុ ឬមន្ទីរទេសចរណ៍ជាដើម គឺតែបានណែនាំដល់ប្រតិបត្តិករទេសចរណ៍ អំពីការកំណត់តម្លៃសេវាបម្រើទេសចរណ៍ឲ្យបានសមរម្យជូនភ្ញៀវដែលចូលមកទស្សនាខេត្តព្រះសីហនុនេះ»។
ឆ្នេរសមុទ្រប្រទេសកម្ពុជា សរុបមានប្រវែង ៤៤០គីឡូម៉ែត្រ។ ខេត្តមានមូលដ្ឋានជាប់ឆ្នេរសមុទ្ររួមមាន ខេត្តកោះកុង ខេត្តព្រះសីហនុ ខេត្តកំពត និងខេត្តកែប។ ខេត្តទាំង ៤នេះ ត្រូវបានដាក់បញ្ចូលជាសមាជិកពេញសិទ្ធិរបស់ក្លឹបឆ្នេរសមុទ្រដែលស្អាតបំផុតលើសកលលោក កាលពីថ្ងៃទី២៦ ខែឧសភា ឆ្នាំ២០១១ នៅប្រទេសសេណេហ្គាល់ (Senegal)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
