អាជីវករនៅជាយផ្សារក្រុងសិរីសោភ័ណប្រតិកម្មនឹងផែនការប្ដូរទីតាំង
2014.04.07
ក្រុមហ៊ុនម៉ៅការនិងក្រុមអាជីវករជាង ៤០០នាក់ ជាអ្នកលក់ដូរលើកំណាត់ផ្លូវបេតុងនៅជាប់ជាយផ្សារក្រុងសិរីសោភ័ណ ប្រតិកម្មជំទាស់ទៅនឹងផែនការរបស់អាជ្ញាធរខេត្តបន្ទាយមានជ័យ។
អាជ្ញាធរខេត្តមានគម្រោងរៀបចំដោះដូរពួកគាត់ឲ្យទៅបោះទីតាំងលក់ដូរនៅក្នុងផ្សារឯកជនចំនួនពីរផ្សេងទៀតក្នុងខេត្តបន្ទាយមានជ័យ។ ផែនការរបស់អាជ្ញាធរខេត្តបានធ្វើឡើងក្រោមហេតុផលរៀបចំសណ្ដាប់ធ្នាប់និងសោភ័ណភាពអនាម័យក្នុងក្រុង។
អាជ្ញាធរខេត្តបន្ទាយមានជ័យ បានកំណត់ឲ្យក្រុមអាជីវករជាង ៤០០នាក់ ជាអ្នកលក់ដូរនៅលើចិញ្ចើមផ្លូវបេតុងមួយខ្សែ ជាប់ផ្សារក្រុងសិរីសោភ័ណ ត្រូវប្ដូរទីតាំងទៅលក់ដូរនៅផ្សារឯកជនចំនួនពីរផ្សេងទៀត នៅថ្ងៃទី៨ ខែមេសា ឆ្នាំ២០១៤។
ការកំណត់ឱសានវាទនេះបានធ្វើឡើងក្នុងកិច្ចប្រជុំមួយនៅសាលាខេត្តបន្ទាយមានជ័យ កាលពីព្រឹកថ្ងៃទី៧ ខែមេសា ឆ្នាំ២០១៤ ដោយមានការចូលរួមពីថ្នាក់ដឹកនាំខេត្ត និងតំណាងក្រុមហ៊ុនម៉ៅការផ្សារសិរីសោភ័ណ។ អាជីវករទាំងនោះនឹងត្រូវប្ដូរទីតាំងទៅលក់ដូរដោយឥតគិតថ្លៃតូបក្នុងរយៈពេលមួយឆ្នាំនៅផ្សារហ៊ុយឡេង និងផ្សាររាត្រី។
ក្រុមអាជីវករនិងក្រុមហ៊ុនម៉ៅការនៅផ្សារសិរីសោភ័ណ ប្រឆាំងជំទាស់ទៅនឹងផែនការនេះ។
អាជីវករឈ្មោះ ជុង សុធា ថ្លែងថា ក្រុមអាជីវករជាអ្នកលក់ដូរនៅលើចិញ្ចឹមផ្លូវបេតុង ជាប់ផ្សារសិរីសោភ័ណនោះ មិនចាកចេញទៅទីតាំងថ្មីនោះទេ ហើយពួកគេទាមទារបន្តលក់ដូរនៅកន្លែងចាស់រហូតដល់អាណត្តិនៅឆ្នាំ២០១៧៖ «ដាច់អាណត្តិ ក្នុងគោលការណ៍របស់សម្ដេច គាត់ឲ្យក្រុមហ៊ុនប្រគល់ឲ្យរដ្ឋ អោយរដ្ឋកែលំអលក់បន្តទៀត ដល់ពេលឥឡូវ ចៅហ្វាយខេត្តឡើងមកមួយ ដេញម្ដង យើងទៅតវ៉ាទៅ គាត់យល់ព្រម ហើយពេលចៅហ្វាយខេត្តឡើងមកថ្មី គាត់ដេញម្ដងទៀត ហើយខ្ញុំអត់មានចង់បានអីទេ សំខាន់ខ្ញុំចង់លក់នៅកន្លែងដដែលរហូតដល់ដាច់អាណត្តិផ្សារនេះ»។
ប្រធានផ្សារសិរីសោភ័ណ លោក ស៊ឹម ហុង ថ្លែងថា ក្រុមអាជីវករប្រមាណ ៤០០នាក់ បានប្រើប្រាស់ចិញ្ចើមផ្លូវបេតុងជាប់ផ្សារសិរីសោភ័ណ ១ភាគ៣ដើម្បីលក់ដូរ។ ផ្លូវនោះត្រូវបានស្ថាបនាឡើងក្រុមហ៊ុនថូម៉ាក់ ដែលបានវិនិយោគចាក់បេតុងសម្រាប់លក់ដូរ។ កាលពីមុនឆ្នាំ២០១០ ផ្លូវនៅជាប់ផ្សារនោះ មានភក់ជ្រាំ តែក្រោយមកអតីតអភិបាលខេត្តបន្ទាយមានជ័យ លោក អ៊ុង អឿន មើលឃើញថា ផ្លូវនោះខ្លះមានអនាម័យ ក៏សម្រេចចិត្តរកដៃគូវិនិយោគចាក់បេតុងឲ្យអាជីវករលក់ដូរ។
លោក ស៊ឹម ហុង៖ «ក្រោយពេលសាងសង់ហើយ អ្នកស្រី នួន សុភាន់ គាត់មកបើកឲ្យក្រុមអាជីវករលក់ ១ភាគ៣នៃផ្លូវ ហើយនិងចៅហ្វាយក្រុង លោក អ៊ុំ រាត្រី មានវត្តមានក្នុងហ្នឹង មានខាងស្នងការ មានខាងរាជអាវុធខេត្តអីហ្នឹងគេមកប្រកាសឲ្យអាជីវករលក់ បន្ទាប់មកលក់មិនទាន់បាន ប៉ុន្មានផង ខាងសាលាខេត្ត ដេញអាជីវករហ្នឹង ខាងអាជ្ញាធរសហការគ្នាលក់ផ្សារមេឃ ខាងក្នុងចេញជាការ៉ូចេញជាស្តង់អស់ហើយ អ៊ីចឹងអាជីវករអត់មានកន្លែងលក់មក គាត់មកលក់ខាងក្រៅ»។
តំណាងក្រុមហ៊ុនថូម៉ាក់ លោក ចក់ សារុំ ថ្លែងថា ការតម្រូវឲ្យក្រុមអាជីវករដូរកន្លែងទៅលក់នៅផ្សារឯកជនពីរផ្សេងទៀត បានធ្វើប៉ះពាល់ដល់ការវិនិយោគរបស់ក្រុមហ៊ុន។ ក្រុមហ៊ុនថូម៉ាក់ បានចុះកុងត្រាវិនិយោគនៅផ្សារសិរីសោភ័ណ ក្នុងរយៈពេល ១៨ឆ្នាំជាមួយអាជ្ញាធរខេត្តបន្ទាយមានជ័យ។ កុងត្រានោះមានសុពលភាពចាប់តាំងពីឆ្នាំ២០១០ រហូតដល់ឆ្នាំ២០១៨។
លោក ចក់ សារុំ៖ «ខាងខ្ញុំតំណាងឲ្យក្រុមហ៊ុនមិនប្រឆាំងទេការងាររបស់រដ្ឋអំណាចដែលកំពុងរៀបចំហ្នឹង តែគ្រាន់ថា ពេលដែលក្រុមហ៊ុនវិនិយោគលើកំណាត់ផ្លូវបេតុងនេះ លក់បានខ្លះហើយ មកឥឡូវនេះម៉េចបានប្រែប្រួលឈប់ឲ្យលក់? តើខ្ញុំបានលុយពីណាបង់ចំណូលចូលរដ្ឋ? ក្រុមហ៊ុនខ្ញុំត្រូវខាតទាំងស្រុងបើសិនជាចៅហ្វាយខេត្តឡើងមួយមកលុបចោល អ៊ីចឹងតើក្រុមហ៊ុនហ៊ានចូកមកវិនិយោគនៅក្នុងប្រទេសយើងទៀត?»។
ឆ្លើយតបចំពោះបញ្ហានេះ លោក គោ ស៊ុំសារឿត ជាអភិបាលខេត្តបន្ទាយមានជ័យ បញ្ជាក់ថា គោលបំណងសំខាន់គឺអាជ្ញាធរខេត្តមានគោលដៅកែលំអសោភ័ណភាពសណ្ដាប់ធ្នាប់អនាម័យ និងកន្លែងចំណតរថយន្ត។ ក្រុមអាជីវករលក់ដូរនៅលើចិញ្ចឹមផ្លូវជាប់ផ្សារសិរីសោភ័ណទាំងអស់ នឹងត្រូវយកទៅដាក់ឲ្យលក់ដូរនៅតាមតូប និងស្តង់លក់ដូរនៃផ្សារ ហ៊ុយឡេង និងផ្សាររាត្រី។ អាជីវករទាំងអស់ នឹងទទួលបានតូប និងស្តង់លក់ដូរ ដោយឥតគិតថ្លៃក្នុងរយៈពេលពេញ ១ឆ្នាំ ទាំងថ្លៃតូប ថ្លៃភ្លើង និងភាស៊ី នឹងមិនត្រូវបង់ថ្លៃទាំងអស់។
លោកបន្តថា គោលការណ៍កែលំអរបស់ខេត្តនេះ ពុំបានប៉ះពាល់ដល់ក្រុមហ៊ុនថូម៉ាក់នោះឡើយ៖ «កុងត្រាអត់ប៉ះទេ ផ្សារនោះមែនទែនកុងត្រារបស់គាត់គាត់ធ្វើ ៧ឆ្នាំ ឆ្នាំ២០១៧ ត្រូវចប់ហើយម្ចាស់ផ្សារដែលវិនិយោគហ្នឹង គាត់មានភារៈយកតែភាស៊ីខាងក្នុងទេ ដោយសារឈ្នួលតូបមួយចំនួនគាត់លក់អស់ហើយ ត្រូវដាច់កិច្ចសន្យាឆ្នាំ២០១៧ ហ្នឹង ត្រូវប្រគល់មកឲ្យអាជ្ញាធរខេត្ត»។
លោកបញ្ជាក់ថា អាជ្ញាធរខេត្តមានគម្រោងវិនិយោគផ្សារសិរីសោភ័ណនោះ សាជាថ្មី ដែលអគារកម្ពស់បីជាន់នៅលើទីតាំងចាស់ដដែលអោយបានល្អប្រសើរជាងពេលបច្ចុប្បន្ន ប៉ុន្តែការងារនេះត្រូវរង់ចាំរហូតដល់ឆ្នាំ២០១៧ ទើបផុតកំណត់កុងត្រាជាមួយក្រុមហ៊ុន។ បច្ចុប្បន្នការងារសំខាន់ចំពោះមុខគឺអាជ្ញាធរត្រូវរៀបចំសណ្ដាប់ធ្នាប់ អនាម័យនៅជុំវិញបរិវេណផ្សារសិរីសោភ័ណ ដើម្បីកែលំអសោភ័ណភាព អោយបានល្អប្រសើរ៕