មន្ត្រីធនាគារភូមិសាខាខេត្តរតនគិរីរងការចោទថាធ្វើឲ្យខាតបង់ពេលវេលាអ្នកចង់ខ្ចីប្រាក់
2015.03.18
ប្រជាពលរដ្ឋរស់នៅភូមិចងរ៉ា ឃុំប៉ាតាង ស្រុកលំផាត់ ចោទប្រធានសាខាមីក្រូហិរញ្ញវត្ថុឯកជនឈ្មោះធនាគារភូមិ ប្រចាំខេត្តរតនគិរី ថាមានចេតនាមិនល្អធ្វើឲ្យខាតបង់ពេលវេលា និងប្រាក់កាសប្រជាពលរដ្ឋដែលត្រូវការខ្ចីប្រាក់ពីធនាគារនេះ។
ការចោទប្រកាន់នេះ កើតមានឡើងបន្ទាប់ពីមន្ត្រីធនាគារភូមិសាខាខេត្តរតនគិរី បានលុបចោលគម្រោងផ្តល់ប្រាក់កម្ចីចំនួន ១ម៉ឺន ៥ពាន់ដុល្លារទៅឲ្យពលរដ្ឋម្នាក់ ខណៈមន្ត្រីស្ថាប័នមួយនេះបានតម្រូវឲ្យអ្នកខ្ចីប្រាក់ បំពេញបែបបទលិខិតបទដ្ឋានពាក់ព័ន្ធខ្ចីប្រាក់រួចរាល់។
ប្រជាពលរដ្ឋរស់នៅភូមិចងរ៉ា លោក អ៊ូ សល់ មានប្រសាសន៍ថា នេះជាភាពមិនត្រឹមត្រូវ ពីព្រោះមន្ត្រីស្ថាប័ននេះបានវិនិច្ឆ័យលក្ខណៈសម្បត្តិអ្នកខ្ចីប្រាក់រួចហើយ ទើបយល់ព្រមឲ្យលោករត់ការបំពេញបែបបទតាមតម្រូវការ និងលក្ខខណ្ឌរបស់ស្ថាប័នក្នុងការខ្ចីប្រាក់។ លោកបន្តថា មន្ត្រីធនាគារភូមិ បានទទួលយកឯកសារលក្ខខណ្ឌខ្ចីប្រាក់ពីធនាគារ រួមទាំងបានសន្យាផ្តល់ប្រាក់កម្ចី បន្ទាប់ពីបានទទួលឯកសារពាក់ព័ន្ធខ្ចីប្រាក់ ក៏ប៉ុន្តែមន្ត្រីធនាគារអូសបន្លាយពេលជិតមួយខែ និងបង្ហាញការខឹងសម្បារ រួមទាំងបញ្ឈប់គម្រោងផ្តល់ប្រាក់កម្ចីវិញ បន្ទាប់ពីលោកទាមទារឲ្យមន្ត្រីធនាគារប្រគល់ប្រាក់កម្ចីតាមលក្ខខណ្ឌដែលបានបំពេញរួចរាល់៖ «ខ្ញុំរត់ការអស់ហើយ គាត់ថាចាំចុះមកយកឯកសារនៅផ្ទះខ្ញុំ ហើយប្រគល់លុយនៅផ្ទះ។ ចេះតែទូរស័ព្ទពីមួយថ្ងៃទៅមួយថ្ងៃៗ ខាតពេលខ្ញុំចាំអស់ជាងមួយខែ ហើយគាត់ថាលេងឲ្យវិញ»។
ធនាគារភូមិសាខាខេត្តរតនគិរី ជាស្ថាប័នមីក្រូហិរញ្ញវត្ថុឯកជនផ្តល់ប្រាក់កម្ចីដល់ពលរដ្ឋ មានទីតាំងនៅសង្កាត់ឡាបានសៀក ក្រុងបានលុង។
ប្រធានសាខាធនាគារភូមិ ខេត្តរតនគិរី លោក រិន ទិត ទទួលស្គាល់ថា ស្ថាប័ននេះពិតជាលុបចោលគម្រោងខ្ចីប្រាក់របស់ លោក អ៊ូ សល់ មែន ដោយសារតែ លោក អ៊ូ សល់ មិនមានទីលំនៅច្បាស់លាស់ មិនមានទ្រព្យសម្បត្តិធានាគ្រប់គ្រាន់ និងមានចរិតឆេវឆាវ ទើបមន្ត្រីធនាគារស្នាក់ការកណ្ដាលបដិសេធមិនផ្តល់ប្រាក់កម្ចី។ លោកទទួលស្គាល់ថា នេះជាកំហុសផ្នែកខ្លះរបស់បុគ្គលិកស្ថាប័ននេះ ហេតុនេះទើបធនាគារភូមិយល់ព្រមសងការខូចខាតខ្លះនៃការចំណាយជូន លោក អ៊ូ សល់ ប៉ុន្តែលោកមិនព្រមទទួលយកដំណោះស្រាយនេះ៖ «ការមិនផ្តល់ប្រាក់កម្ចីឲ្យមិនបាន គឺអាស្រ័យលើថ្នាក់គ្រប់គ្រង។ ខ្ញុំទទួលស្គាល់ថា ខាងខ្ញុំខកការសន្យាជាមួយគាត់ទាំងអ្នកគ្រប់គ្រង ក៏ទទួលខុសមិនគ្រប់គ្រាន់ក្នុងការធ្វើរឿងហ្នឹង ប៉ុន្តែខ្ញុំបានសុំការអធ្យាស្រ័យពីអតិថិជនហើយ ប៉ុន្តែគាត់មិនសុខចិត្ត»។
នៅខេត្តរតនគិរី បច្ចុប្បន្នមានធនាគារស្ថាប័នមីក្រូសេដ្ឋកិច្ច និងអង្គភាពប្រតិបត្តិការផ្តល់ប្រាក់កម្ចីឯកជនប្រមាណជាង ១០ស្ថាប័ន។
ទាក់ទិនករណីនេះដែរ ប្រតិបត្តិករអង្គភាពផ្តល់កម្ចីខ្នាតតួចមួយរូបសុំមិនបញ្ចេញឈ្មោះ រិះគន់ចំណាត់ការរបស់មន្ត្រីធនាគារភូមិ ថាមិនមានសមត្ថភាពគ្រប់គ្រាន់ ឬមិនទទួលខុសត្រូវលើប្រតិបត្តិការផ្តល់ប្រាក់កម្ចីដល់ពលរដ្ឋ។ មន្ត្រីដដែលបញ្ជាក់ថា ប្រជាពលរដ្ឋអ្នកខ្ចីប្រាក់ពិតជារងការខូចខាត ដោយសារតែការមិនទទួលខុសត្រូវត្រួតពិនិត្យលក្ខណៈសម្បត្តិអ្នកខ្ចីប្រាក់ មុននឹងសម្រេចឲ្យអ្នកខ្ចីប្រាក់រត់ការបំពេញបែបបទ ដែលត្រូវចំណាយប្រាក់មួយផ្នែកលើសេវាធ្វើដំណើរ និងសេវាចុះហត្ថលេខារបស់មន្ត្រីមូលដ្ឋាន៖ «និយាយរួម ឲ្យតែឲ្យគេបញ្ជាក់អស់ហើយ ដឹងតែឲ្យហើយ។ អ្នកឯងត្រូវតែស៊ើបអង្កេត អ្នកឯងវាយតម្លៃឲ្យអស់។ ជំហានគេធ្វើឲ្យយើងអស់ហើយ មិនបាច់ស៊ើបអង្កេតស្អីទៀតទេ វាហួសពេលហើយ។ ឡានក្រុងគេដឹងតែយកលុយ គាត់ជាអ្នកជិះអតិថិជនជាឡានក្រុងអ៊ីចឹង»។
ដូចគ្នានេះដែរ មន្ត្រីឃ្លាំមើលសិទ្ធិមនុស្សអាដហុក (adhoc) ខេត្តរតនគិរី លោក ឆាយ ធី ហៅទង្វើមន្ត្រីធនាគារភូមិ ថាធ្វើឲ្យបាត់ទំនុកចិត្តពីអតិថិជន។ លោកអំពាវនាវឲ្យប្រជាពលរដ្ឋ បង្កើនការប្រុងប្រយ័ត្នស្វែងរកស្ថាប័នផ្តល់ប្រាក់កម្ចីណាអាចទុកចិត្តបាន និងយកអត្រាការប្រាក់ទាប៕