ពលរដ្ឋនៅមេមត់ស្នើអាជ្ញាធរបញ្ឈប់អ្នកយកប្រាក់ពីពលរដ្ឋរកស៊ីដឹកជន្លង់ម្រេច
2016.05.19
ប្រជាពលរដ្ឋនាំគ្នាចោមរោមមើលយុវជនលោក មឿន ស៊ីនា ដែលស្លាប់ដោយសារគ្រោះថ្នាក់ចរាចរណ៍នៅឃុំទន្លូង ស្រុកមេមត់ ខេត្តត្បូងឃ្មុំ កាលពីថ្ងៃទី១៩ ឧសភា ឆ្នាំ២០១៦។ ពលរដ្ឋអះអាងថា រថយន្តគ្រោះថ្នាក់នេះ ដោយសារទាហានដេញតាមយកប្រាក់ពីអ្នកដឹកសសរ។
RFA/Saut Sokprathna
ប្រជាពលរដ្ឋនៅឃុំទន្លូង ស្រុកមេមត់ ខេត្តត្បូងឃ្មុំ ស្នើឱ្យមន្ត្រីពាក់ព័ន្ធចាត់វិធានការករណីយកប្រាក់ពីសំណាក់ពលរដ្ឋរកស៊ីដឹកជន្លង់ម្រេចតាមផ្លូវ។ ការស្នើនេះ ក្រោយពេលពលរដ្ឋជិះលើរថយន្តដឹកសសរផ្ទះម្នាក់បានស្លាប់ ដោយសារគ្រោះថ្នាក់ចរាចរណ៍ដែលពលរដ្ឋលើកឡើងថា បង្កឡើងដោយសមត្ថកិច្ចនៅទីនោះបើករថយន្តដេញតាមយកប្រាក់។ អធិការស្រុកបញ្ជាក់ថា ករណីគ្រោះថ្នាក់ចរាចរណ៍នោះ នៅមិនទាន់អាចសន្និដ្ឋានបានថា បង្កឡើងដោយមូលហេតុអ្វីច្បាស់នៅឡើយទេ។
ពលរដ្ឋដឹងហេតុការណ៍គ្រោះថ្នាក់ចរាចរណ៍នៅឃុំទន្លូង បង្កឱ្យយុវជនជិះក្នុងរថយន្តម្នាក់ស្លាប់អះអាងថា សមត្ថកិច្ច រួមទាំងទាហាននៅតាមបណ្ដោយផ្លូវជាតិលេខ៧ តែងបើកដេញតាមរថយន្តដឹកជន្លង់ម្រេច ឬដឹកសសរជាប្រចាំនៅពេលណាដែលម្ចាស់រថយន្តទាំងនោះមិនព្រមចូលបង់ប្រាក់ជូនពួកគេ។ បញ្ហានេះ តែងបណ្ដាលឱ្យកើតមានគ្រោះថ្នាក់ចរាចរណ៍ជារឿយៗ ដែលធ្វើឱ្យពលរដ្ឋរស់នៅក្បែរផ្លូវមានក្តីបារម្ភ។
ម្ចាស់រថយន្តរកស៊ីដឹកជន្លង់ម្រេចពីស្រុកចិត្របូរី ខេត្តក្រចេះ មកលក់ឱ្យពលរដ្ឋនៅស្រុកមេមត់ លោក ជា វីរៈ ឱ្យដឹងថា ដោយសារតែប្រជាពលរដ្ឋគ្មានមុខរបរអ្វីផ្សេង ទើបនាំគ្នារកស៊ីដឹកជន្លង់ម្រេចបែបនេះ ប៉ុន្តែលោកអះអាងថា កូនឈើទាំងនោះមិនមែនកាប់យកពីក្នុងព្រៃស្រោងនោះទេ គឺជាឈើយកចេញតំបន់ដីសម្បទានប៉ុណ្ណោះ។
លោកបន្តថា នៅពេលពួកគាត់ដឹកតាមផ្លូវ ត្រូវចូលបង់ប្រាក់តាមបន្ទាយទាហាន និងទីស្នាក់ការកងរាជអាវុធហត្ថនៅស្រុកមេមត់ ជាច្រើនកន្លែង ហើយប្រសិនបើមិនព្រមបង់ឱ្យពួកគេទេ សមត្ថកិច្ចទាំងនោះជិះឡានដេញតាមរហូតបណ្ដាលរថយន្តខ្លះមានគ្រោះថ្នាក់ដោយបើកធ្លាក់ផ្លូវ៖ «ហេតុការណ៍ហ្នឹងកើតឡើងជារៀងរាល់ឆ្នាំ ហើយជំរិតទារលុយៗ ជារៀងរាល់ថ្ងៃ»។
កាលពីយប់ថ្ងៃទី១៨ ខែឧសភា យុវជនជិះក្នុងរថយន្តសាំយ៉ុងម្នាក់ឈ្មោះ មឿន ស៊ីនា ស្លាប់ ដោយសាររថយន្តក្រឡាប់នៅចំណុចភូមិពងទឹក ឃុំទន្លូង។
ម្ដាយជនរងគ្រោះ អ្នកស្រី ប៉ោន គីមឡា មានប្រសាសន៍ថា កូនរបស់អ្នកស្រីបានសុំម្ចាស់រថយន្តដឹកឈើជិះមកជាមួយពីខេត្តក្រចេះ មកផ្ទះនៅឃុំរំចេក ស្រុកមេមត់។ អ្នកស្រីដឹងហេតុការណ៍នេះតាមរយៈមន្ត្រីសមត្ថកិច្ចដែលថា រថយន្តនោះក្រឡាប់ដោយសារមានរថយន្តមួយគ្រឿងដេញពីក្រោយ ហើយពលរដ្ឋស្គាល់ថា ជាកម្មសិទ្ធិរបស់ទាហានក្នុងបន្ទាយមួយនៅក្បែរនោះ។
អ្នកស្រីចង់ឱ្យសមត្ថកិច្ចស្វែងរកយុត្តិធម៌ចំពោះការស្លាប់កូនអ្នកស្រី និងស្នើឱ្យមន្ត្រីកងកម្លាំងទាំងអស់បញ្ឈប់សកម្មភាពដេញតាមរថយន្តដឹកឈើដើម្បីយកប្រាក់តទៅទៀត។
អធិការនគរបាលស្រុកមេមត់ លោក ហុង គីមហឿន មានប្រសាសន៍ថា សមត្ថកិច្ចកំពុងស្រាវជ្រាវករណីគ្រោះថ្នាក់ចរាចរណ៍នេះ ដោយខាងលោកមិនទាន់អាចសន្និដ្ឋានបានយ៉ាងណាទេ៖ «ខ្ញុំមិនទាន់បដិសេធ ឬយ៉ាងម៉េចដែរ។ តែអានេះយើងរង់ចាំការស្រាវជ្រាវពីជំនាញយើងគេអង្កេតឱ្យបានពិតប្រាកដ»។
លោកទទួលស្គាល់ថា មានមន្ត្រីសមត្ថកិច្ចតាមអង្គភាពខ្លះនៅតំបន់នោះធ្លាប់យកប្រាក់ពីរថយន្តដឹកឈើមែន ប៉ុន្តែលោកអះអាងថា មិនមែនជាកុងត្រូលជជុះទេ ហើយក៏មិនសូវមានករណីដេញតាមរថយន្តដឹកឈើនោះដែរ។ ទោះជាបែបនេះក្ដី ប្រសិនបើរកឃើញថា ករណីគ្រោះថ្នាក់ចរាចរណ៍នេះកើតឡើងដោយសារកងកម្លាំងដេញតាមយកប្រាក់នោះ លោកនឹងធ្វើរបាយការណ៍ទៅគណៈបញ្ជាការឯកភាពស្រុក ឬខេត្តបន្តទៀត។
ទោះបីជាយ៉ាងណាក៏ដោយ ពលរដ្ឋរស់នៅឃុំទន្លូង លោក ឈុន វុត្ថា បញ្ជាក់ថា ករណីគ្រោះថ្នាក់ចរាចរណ៍បែបនេះកើតឡើងនៅឃុំទន្លូង មិនមែនជាលើកទីមួយទេ។ លោកស្នើឱ្យរាជរដ្ឋាភិបាលកំណត់ឱ្យច្បាស់ថា តើឈើប្រភេទណាពលរដ្ឋតូចតាចអាចរកស៊ីបាន និងឈើប្រភេទណាដែលគេមិនអនុញ្ញាត។ បន្ថែមពីនេះលោកឆ្ងល់ថា ប្រសិនបើសកម្មភាពដឹកជញ្ជូនឈើទាំងនោះជារឿងខុសច្បាប់ ហេតុអ្វីមន្ត្រីជំនាញមិនព្រមអនុវត្តតាមផ្លូវច្បាប់ បែរជាបណ្ដោយឱ្យសមត្ថកិច្ចតាមចាប់យកប្រាក់រហូតបង្កជាគ្រោះថ្នាក់ឡើង៖ «យើងឃើញថា គាត់ចេះតែឱ្យលុយមន្ត្រីតាមផ្លូវចេះតែយក គាត់ចេះតែដឹកទៅ ហើយមន្ត្រីទាំងអស់ហ្នឹងចេះតែចោទថា បទល្មើសៗទៅ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តត្បូងឃ្មុំ លោក នាង សុវ៉ាត មើលឃើញថា សកម្មភាពរថយន្តដឹកឈើ ឬជន្លង់ម្រេច និងសកម្មភាពដេញតាមយកប្រាក់របស់សមត្ថកិច្ចក្នុងស្រុកមេមត់ ពិតជាបណ្ដាលឱ្យមានគ្រោះថ្នាក់ដល់អ្នកប្រើប្រាស់ផ្លូវប្រាកដមែន។ លោកថា ដើម្បីជៀសវាងកុំឱ្យមានហេតុការណ៍នេះកើតឡើង រាជរដ្ឋាភិបាលត្រូវដកមន្ត្រីណាដែលបណ្ដោយឱ្យមានសកម្មភាពយកប្រាក់ និងដេញតាមរថយន្តដឹកឈើរហូតបង្កឱ្យមានគ្រោះថ្នាក់បែបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
