ហេតុអ្វីអ្នកស្រី មីស្ហ៊ែល អូបាម៉ា ជ្រើសវិទ្យាល័យប្រាសាទបាគងដើម្បីទស្សនកិច្ច?
2015.03.27
ដំណើរទស្សនកិច្ចរបស់ អ្នកស្រី មីស្ហ៊ែល អូបាម៉ា (Michelle Obama) ភរិយាប្រធានាធិបតីនៃសហរដ្ឋអាមេរិក មកកាន់ខេត្តសៀមរាប កាលពីថ្ងៃទី២១ ខែមីនា កន្លងទៅ គឺអ្នកស្រីបានជ្រើសរើសយកសាលាវិទ្យាល័យ ហ៊ុន សែន ប្រាសាទបាគង ចម្ងាយ ២០គីឡូម៉ែត្រភាគខាងកើតពីទីក្រុងសៀមរាប ដើម្បីជួបសំណេះសំណាលជាមួយក្មេងស្រីក្រីក្រចំនួន ១០នាក់។
នៅទីនោះ អ្នកស្រីបានបំពេញទស្សនកិច្ចរយៈពេលជាងមួយម៉ោង ដែលអមដំណើរដោយស្ត្រីទី១ នៃប្រទេសកម្ពុជា គឺអ្នកស្រី ប៊ុន រ៉ានី ហ៊ុន សែន។
មជ្ឈដ្ឋានមួយចំនួនមានចម្ងល់ដោយចោទសួរថា នៅក្នុងក្រុងសៀមរាប គឺមានសាលាវិទ្យាល័យ និងអនុវិទ្យាល័យជាច្រើន ហេតុអ្វីបានជា អ្នកស្រី មីស្ហ៊ែល អូបាម៉ា ជ្រើសរើសយកវិទ្យាល័យនៅក្រៅទីក្រុង ដើម្បីធ្វើទស្សនកិច្ចទៅវិញ?
ក្រុមគ្រូបង្រៀន និងសិស្ស ជាច្រើននាក់នៃវិទ្យាល័យ ហ៊ុន សែន ប្រាសាទបាគង ក្នុងស្រុកប្រាសាទបាគង បានបង្ហាញអារម្មណ៍ថា គេមានមោទនភាពយ៉ាងខ្លាំងដោយសារតែស្ត្រីទី១របស់សហរដ្ឋអាមេរិក បានជ្រើសរើសយកសាលារបស់ពួកគេធ្វើជាកន្លែងទស្សនកិច្ចកន្លងទៅ។ ពួកគេយល់ថា ដំណើរទស្សនកិច្ចរបស់ភរិយាប្រធានាធិបតីនៃសហរដ្ឋអាមេរិក មកកាន់កម្ពុជា លើកដំបូង គឺមិនធ្លាប់មានពីមុនមកទេ ហើយសាលារបស់គេ គឺជាសាលាតែមួយគត់នៅទូទាំងប្រទេសកម្ពុជា ដែលមានមោទនភាពបានទទួលស្វាគមន៍ និងមានសិស្សស្រីខ្លះបានជួបជជែកជាមួយ អ្នកស្រី មីស៊្ហែល អូបាម៉ា ទៀតផង។
តើមានកត្តាសំខាន់អ្វីខ្លះ ដែលធ្វើឲ្យមន្ត្រីស្ថានទូតអាមេរិក ប្រចាំកម្ពុជា ជ្រើសរើសសាលាវិទ្យាល័យ ហ៊ុន សែន ប្រាសាទបាគង ដើម្បីរៀបចំទទួលដំណើរទស្សនកិច្ចរបស់ អ្នកស្រី មីស្ហ៊ែល អូបាម៉ា ក្នុងពេលដែលបំពេញទស្សនកិច្ចនៅខេត្តសៀមរាប នោះ?
នាយកវិទ្យាល័យ ហ៊ុន សែន ប្រាសាទបាគង គឺលោក ស៊ិន សំណាង។ លោកមានប្រសាសន៍ថា លោកមិនអាចពន្យល់បានទេថា តើមូលហេតុអ្វីខ្លះដែលបណ្ដាលឲ្យ អ្នកស្រី មីស្ហ៊ែល អូបាម៉ា សម្រេចចិត្តជ្រើសយកសាលារបស់លោក ដើម្បីបំពេញទស្សនកិច្ចនោះ? លោកនាយកសាលាដដែលបញ្ជាក់ថា សាលាវិទ្យាល័យ ហ៊ុន សែន ប្រាសាទបាគង បានចាប់បង្ហាញខ្លួននៅលើទីតាំងបច្ចុប្បន្នចាប់តាំងពីឆ្នាំ១៩៩៣។ សាលានេះ មានទីធ្លាធំទូលាយ ដោយមានម្លប់ឈើជាច្រើនត្រជាក់ត្រឈឹងត្រឈៃ ព្រមទាំងការរៀបចំសួនច្បារ និងផ្លូវយ៉ាងមានរបៀបរៀបរយគួរឲ្យចាប់ចិត្ត។ លោក ស៊ិន សំណាង បញ្ជាក់បន្ថែមថា ចាប់តាំងពីវិទ្យាល័យ ហ៊ុន សែន ប្រាសាទបាគង បានបង្កើតឡើងមក គឺសំណង់អគារសិក្សាទាំងអស់មិនមែនជាអំណោយពីសហរដ្ឋអាមេរិក ទេ។ អគារខ្លះ ត្រូវឪពុកម្ដាយសិស្ស និងប្រជាពលរដ្ឋ រួមគ្នាសាងសង់ ហើយអគារខ្លះទៀតជាអំណោយរបស់គណបក្សប្រជាជនកម្ពុជា និងមូលនិធិសង្គមនៃព្រះរាជាណាចក្រកម្ពុជា។ នៅសល់ ៤អគារទៀត គឺជាអំណោយរបស់ លោក ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជា។
លោកនាយកវិទ្យាល័យ ហ៊ុន សែន ប្រាសាទបាគង យល់ឃើញថា ការដែលស្ត្រីទី១របស់សហរដ្ឋអាមេរិក អ្នកស្រី មីស្ហ៊ែល អូបាម៉ា សម្រេចចិត្តមកធ្វើទស្សនកិច្ចនៅសាលារបស់លោក ប្រហែលជាមកពីសាលានេះមានដើមឈើច្រើន ដែលជាផ្នែកជួយការពារបរិស្ថាន និងប្រហែលមកពីអង្គការមួយចំនួនរបស់សហរដ្ឋអាមេរិក ធ្លាប់ចេញចូលផ្ដល់ជំនួយនៅទីនេះដែរ៖ «ពាក់ព័ន្ធនឹងអាមេរិក ប្រមាណជា ៤ ឬ ៥ឆ្នាំមុន មានគណៈប្រតិភូ យូ.អេស.អេ.អាយ.ឌី (USAID) ជួយទៅលើការងារបច្ចេកទេសមានប្រព័ន្ធទឹក មានជាសម្ភារៈពិសោធន៍ ហើយមានប្រតិភូអង្គការ រូម ធូ រីដ (Room to Read) មានប្រតិភូនាយទាហានជើងទឹក ធ្លាប់មកទស្សនកិច្ចនៅសាលាខ្ញុំ»។
បច្ចុប្បន្ន ក្រៅពីអង្គការធំៗខាងលើធ្លាប់ផ្ដល់ជំនួយ គឺសាលាវិទ្យាល័យ ហ៊ុន សែន ប្រាសាទបាគង ក៏មានកិច្ចសហការជាមួយអង្គការមួយទៀតឈ្មោះ អង្គការថែរក្សាដើម្បីកម្ពុជា ដើម្បីផ្ដល់ជំនួយខ្លះៗលើកម្មវិធីប្រចាំថ្ងៃ។ អង្គការនេះ ក៏មានម្ចាស់មូលនិធិខ្លះជាជនជាតិអាមេរិកាំង ដែរ។
ក្មេងស្រីក្រីក្រ ១០នាក់ ដែលអង្គការ រូម ធូ រីដ បានផ្ដល់អាហារូបករណ៍ឲ្យបន្តការសិក្សានៅក្នុងវិទ្យាល័យ ហ៊ុន សែន ប្រាសាទបាគង នោះ គឺជាអ្នកដែលមានវាសនាបានជួបសន្ទនាជាមួយ អ្នកស្រី មីស្ហ៊ែល អូបាម៉ា ក្នុងចំណោមសិស្សស្រីជាង ១លាន ៥សែននាក់ផ្សេងទៀតដែលកំពុងរៀននៅទូទាំងប្រទេស។
ក្មេងស្រី វាន សុហាង អាយុ ១៩ឆ្នាំ រៀននៅថ្នាក់ទី១២ក គឺសិស្សក្រីក្រម្នាក់ក្នុងចំណោមសិស្សស្រី ៩នាក់ផ្សេងទៀតដែលជួបជាមួយ អ្នកស្រី មីស្ហ៊ែល អូបាម៉ា។ នាងបង្ហាញមោទនភាព ដោយមិននឹកស្មានថាមានវាសនាបានជួបជជែកជាមួយស្ត្រីទី១ របស់សហរដ្ឋអាមេរិក ដូច្នេះទេ។ នាងត្រេកអរជាខ្លាំងនៅពេលសាលាតម្រូវឲ្យជួបជាមួយ អ្នកស្រីភរិយារបស់លោកប្រធានាធិបតីនោះ ហើយការជួបជាមួយ អ្នកស្រី មីស្ហ៊ែល អូបាម៉ា ហាក់ដូចជាជួយលើកទឹកចិត្តឲ្យនាងកាន់តែចង់បន្តការសិក្សាទៅថ្នាក់ខ្ពស់ទៀត ដោយមិនត្រូវបោះបង់ចោលការសិក្សាឡើយ៖ «ដក់ជាប់ក្នុងអារម្មណ៍ខ្ញុំនៅពេលដែល អ្នកស្រី មីស្ហ៊ែល គាត់និយាយថាទោះបីជាយើងពិបាកប៉ុណ្ណា គឺយើងកុំបោះបង់ចោលការសិក្សាឲ្យសោះ»។
វាន សុហាង ចាត់ទុកថា សម្ដីផ្ដែផ្ដាំដ៏កម្រនេះ គឺប្រៀបបាននឹងគ្រាប់ពេជ្រដែលនាងត្រូវតែរក្សាទុកកុំឲ្យបាត់សម្រាប់ជួយខ្លួននាង និងក្មេងស្រីជាច្រើនទៀត។
រដ្ឋមន្ត្រីក្រសួងអប់រំ យុវជន និងកីឡា នៃប្រទេសកម្ពុជា លោក ហង់ ជួនណារ៉ុន មានប្រសាសន៍ថា ថ្វីត្បិតតែ អ្នកស្រី មីស្ហ៊ែល អូបាម៉ា ជ្រើសរើសយកវិទ្យាល័យ ហ៊ុន សែន ប្រាសាទបាគង តែមួយដើម្បីជួបសិស្សស្រី ១០នាក់នៅក្នុងដំណើរទស្សនកិច្ច ក៏ប៉ុន្តែនេះ គឺជាការទទួលស្គាល់របស់ស្ត្រីទី១ នៃសហរដ្ឋអាមេរិក ចំពោះវឌ្ឍនភាពនៅកម្ពុជា។ លោក ហង់ ជួនណារ៉ុន បញ្ជាក់ថា សិស្សស្រី ១០នាក់ដែលជួបជាមួយ អ្នកស្រី មីស្ហ៊ែល អូបាម៉ា នោះ អាចចាត់ទុកជាតំណាងសិស្សនៅទូទាំងប្រទេសចំនួន ៣លាននាក់៖ «ជាការពិតលោកជំទាវ អូបាម៉ា មិនអាចជួបសិស្សទាំងអស់បានទេ ប៉ុន្តែគឺជួបតំណាង ហើយតំណាងនេះ គឺតាមរយៈសាលាដែលអង្គការ យូ.អេស.អេ.អាយ.ឌី ជួយក៏ដូចជាអង្គការក្រៅរដ្ឋាភិបាលផ្សេងទៀត រូម ធូ រីដ ក៏ដូចជាអង្គការ ខារីង ហ្វ័រ ខេមបូឌា (Caring for Cambodia) ដែលអង្គការទាំងនោះមកពីសហរដ្ឋអាមេរិក»។
មន្ត្រីក្រសួងអប់រំ យុវជន និងកីឡា ឲ្យដឹងថា រយៈពេល ៣-៤ឆ្នាំមកនេះ សហរដ្ឋអាមេរិក បានផ្ដល់ការគាំទ្រចំពោះការអប់រំនៅកម្រិតបឋមសិក្សា និងកម្រិតមធ្យមសិក្សាបឋមភូមិនៅប្រទេសកម្ពុជា ដោយផ្ដល់ជំនួយជាទឹកប្រាក់ប្រមាណ ២០លានដុល្លារ តាមរយៈអង្គការស្បៀងអាហារពិភពលោក ដើម្បីធ្វើអាហារពេលព្រឹកសម្រាប់ក្មេងៗ។
ជំនួយរបស់សហរដ្ឋអាមេរិក ទៅលើម្ហូបអាហារ និងកែលំអទៅលើការបង្រៀនជាដើមនោះ គឺក្នុងគោលបំណងជំរុញក្មេងកម្ពុជា ទាំងអស់ ទាំងប្រុស ទាំងស្រី ឲ្យបានចូលរៀនគ្រប់គ្នា ដើម្បីឲ្យកម្ពុជា បានធ្វើកំណែទម្រង់វិស័យអប់រំកាន់តែប្រសើរថែមទៀត៕