កម្មករអូសរទេះដែលរបួសធ្ងន់ក្នុងបាតុកម្មនៅប៉ោយប៉ែតប្ដឹងសមត្ថកិច្ចទារសំណងជំងឺចិត្ត
2015.06.09
កម្មករអូសរទេះដែលរងរបួសធ្ងន់ពីការប៉ះទង្គិចគ្នាជាមួយសមត្ថកិច្ច ពេលធ្វើបាតុកម្មតវ៉ាកាលពីថ្ងៃទី២៥ ឧសភា នៅមុខការិយាល័យគយ និងរដ្ឋាករក្រុងប៉ោយប៉ែត ខេត្តបន្ទាយមានជ័យ ប្ដឹងសមត្ថកិច្ចទៅតុលាការ ទាមទារសំណងជំងឺចិត្ត។
កម្មករអូសរទេះអះអាងថា មូលហេតុដែលគេសម្រេចដាក់ពាក្យប្ដឹងនេះ ដោយសារខ្លួនទន្ទឹងរង់ចាំសមត្ថកិច្ចចាត់វិធានការជនដែលបង្ករបួសស្នាម ផ្ដន្ទាទោសតាមផ្លូវច្បាប់ជិត ២សប្ដាហ៍មកហើយ តែពុំទទួលបានលទ្ធផល។
កម្មករអូសរទេះអះអាងថា ខ្លួនពុំបានទៅបង្កហិង្សាដាក់សមត្ថកិច្ចក្នុងហេតុការណ៍ ដែលកើតឡើងខណៈដែលពួកគេតវ៉ានៅមុខការិយាល័យគយ និងរដ្ឋាករក្រុងប៉ោយប៉ែត នោះឡើយ។
កម្មករដែលរងរបួសធ្ងន់ក្នុងហេតុការណ៍ប៉ះទង្គិចគ្នានៅមុខច្រកទ្វារអន្តរជាតិប៉ោយប៉ែត លោក ម៉ៅ សុន ថ្លែងនៅថ្ងៃទី៨ មិថុនា ថា នៅក្នុងហេតុការណ៍ដែលពួកគេនាំគ្នាតវ៉ាទាមទារឲ្យមន្ត្រីគយ និងរដ្ឋាករក្រុងប៉ោយប៉ែត បន្ធូរបន្ថយពន្ធដឹកទំនិញតាមរទេះនាពេលកន្លងទៅនោះ មន្ត្រីកងរាជអាវុធហត្ថក្រុងប៉ោយប៉ែត ២នាក់ជាអ្នកបង្កបញ្ហាវាយដំលើរូបគាត់ ដោយអុកនឹងជង្គង់បណ្ដាលរងរបួសធ្ងន់រហូតដល់សន្លប់នៅនឹងកន្លែង។ បុរសវ័យ ៣៧ឆ្នាំរូបនេះ ស្នើឲ្យអាជ្ញាធរខេត្តបន្ទាយមានជ័យ ចាត់វិធានការផ្លូវច្បាប់ទៅលើជនបង្ករបួសស្នាមផ្ដន្ទាទោសតាមផ្លូវច្បាប់៖ «បាទ! ខាងសមត្ថកិច្ចពុំទាន់រកខុសត្រូវឲ្យខ្ញុំនៅឡើយទេ។ ខ្ញុំប្ដឹងនេះ ទាមទារសំណងខ្លះដែលខ្ញុំសម្រាកនៅមន្ទីរពេទ្យ ធ្វើឲ្យខាតបង់ប្រាក់ចំណូលមិនអាចចេញទៅធ្វើការងារអស់មួយរយៈ»។
ឆ្លើយតបនឹងបញ្ហានេះ មេបញ្ជាការកងរាជអាវុធហត្ថក្រុងប៉ោយប៉ែត លោក ជា ដា មានប្រសាសន៍ថា លោកមិនខ្វល់ចំពោះការប្ដឹងផ្ដល់មន្ត្រីកងរាជអាវុធហត្ថទៅតុលាការ ពីសំណាក់កម្មករអូសរទេះនោះទេ។ លោកបញ្ជាក់ថា ការប៉ះទង្គិចគ្នារវាងសមត្ថកិច្ច និងកម្មករអូសរទេះ កាលពីថ្ងៃទី២៥ ឧសភា កន្លងទៅនោះ ពុំមែនជាកំហុសរបស់សមត្ថកិច្ចនោះទេ៖ «ករណីនេះតើអ្នកណាជាអ្នកបង្កមុនទៅ? ហើយខាងសមត្ថកិច្ចក៏រងរបួសដែរ ពីព្រោះខ្ញុំជាសមត្ថកិច្ច ខ្ញុំត្រូវធ្វើតាមច្បាប់ គឺអត់មានប្រើអំពើហិង្សាទៅលើអ្នកណាម្នាក់នោះទេ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា ព្រួយបារម្ភខ្លាចតុលាការខេត្តបន្ទាយមានជ័យ មិនអាចរកយុត្តិធម៌ឲ្យកម្មករអូសរទេះនោះបាន ពីព្រោះថា ភាគីម្ខាងជាអាជ្ញាធរមានសមត្ថកិច្ចដែលអនុវត្តច្បាប់នៅក្រុងប៉ោយប៉ែត នោះ។ លោក ស៊ុំ ច័ន្ទគា ស្នើឲ្យតុលាការខេត្តបន្ទាយមានជ័យ ដំណើរការលើសំណុំរឿងនេះដោយឯករាជ្យទៅតាមអំណាចរបស់ខ្លួនតាមច្បាប់៖ «ព្រោះថា ដោយសារអ្នកនោះឯងជាអ្នកមានអំណាច វាអាចធ្វើឲ្យប៉ះពាល់ទៅលើភស្តុតាងផ្សេងៗ ក្នុងការស៊ើបអង្កេតបាន។ ដូចនេះ មានស្ថាប័នតុលាការទេដែលអាចដោះស្រាយបញ្ហានេះបាន»។
ការប៉ះទង្គិចគ្នារវាងកម្មករអូសរទេះជាមួយសមត្ថកិច្ច ខណៈធ្វើបាតុកម្មនៅក្រុងប៉ោយប៉ែត នោះ បណ្ដាលឲ្យកម្មករម្នាក់រងរបួសធ្ងន់ និងមន្ត្រីសន្តិសុខគយ និងរដ្ឋាករប៉ោយប៉ែត ម្នាក់រងរបួសស្រាល និងខូចខាតរថយន្តគយចំនួន ៧គ្រឿង ព្រមទាំងបែកកញ្ចក់ទ្វារបង្អួចស្នាក់ការគយមួយចំនួនទៀត។ រហូតមកទល់ពេលនេះ សមត្ថកិច្ចពុំទាន់ចាប់ជនបង្កណាម្នាក់ឲ្យទទួលខុសត្រូវ និងផ្ដន្ទាទោសតាមផ្លូវច្បាប់នៅឡើយទេ។
កម្មករអូសរទេះដែលរងរបួសធ្ងន់អះអាងថា ខ្លួនបានដាក់ពាក្យប្ដឹងសមត្ថកិច្ចដែលបង្ករបួសស្នាម ទៅតុលាការខេត្តបន្ទាយមានជ័យ រួចរាល់ហើយ ដើម្បីទាមទារសំណងជំងឺចិត្ត និងដោះស្រាយតាមផ្លូវច្បាប់៕