កម្មកររោងចក្រនៅកំពង់ចាមព្រមានធ្វើបាតុកម្មទ្រង់ទ្រាយធំនៅមុខស្ថានទូតអាមេរិក
2015.01.19
តំណាងសម្ព័ន្ធសហជីពកម្ពុជា ឈរកាន់បដាទាមទារឲ្យតំណាងពួកគាត់អាចចូលធ្វើការនៅក្នុងរោងចក្រមេនហាតធេន ឬមេតថេក (Medtec) នៅខេត្តកំពង់ចាម ស្របតាមសេចក្តីបង្គាប់របស់ក្រុមប្រឹក្សាអាជ្ញាកណ្ដាល កាលពីថ្ងៃទី៣១ ខែធ្នូ ឆ្នាំ២០១៤។
កម្មករប្រមាណ ២០០នាក់ ធ្វើការនៅរោងចក្រកាត់ដេរ មេហាតធេន (Manhattan) ខេត្តកំពង់ចាម តវ៉ាចំពោះការបញ្ឈប់មេដឹកនាំសហជីពរោងចក្រ ហើយបានធ្វើបាតុកម្មនៅមុខរោងចក្រជាបន្តទៀតនៅថ្ងៃទី១៩ មករា។ ពួកគេគ្រោងនឹងធ្វើជាទ្រង់ទ្រាយធំនៅរាជធានីភ្នំពេញ នាមុខស្ថានទូតអាមេរិក ដែលជាប្រទេសអ្នកបញ្ជាទិញដ៏ធំបំផុត ប្រសិនបើគ្មានដំណោះស្រាយ។
ការបណ្ដេញចេញមេដឹកនាំសហជីព ឬអ្នកការពារផលប្រយោជន៍កម្មករចេញពីទីកន្លែងធ្វើការងារនៅតាមបណ្ដារោងចក្រកាត់ដេរនានា គឺតែងកើតមានឡើងជារឿយៗនៅប្រទេសកម្ពុជា។ ជាក់ស្ដែងការធ្វើបាតុកម្មនៅមុខរោងចក្រ មេហាតធេន នៅខេត្តកំពង់ចាម គឺជាឧទាហរណ៍ស្រាប់ដែលក្រុមកម្មករបានចំណាយពេលវេលាជាងមួយខែមកហើយ ទាមទារឲ្យអ្នកគ្រប់គ្រងរោងចក្រនេះ ទទួលមេដឹកនាំសហជីពរបស់ពួកគេឲ្យចូលធ្វើការវិញ។
ការតវ៉ានេះ បានល្បីខ្ទរខ្ទារដល់ថ្នាក់ដឹកនាំសហជីពនៅរាជធានីភ្នំពេញ និងថ្នាក់ដឹកសហជីពមួយចំនួនដែលការពារផលប្រយោជន៍កម្មករ និងបានចូលរួមដឹកនាំបាតុកម្មនោះដែរ ដើម្បីជាការដាក់សម្ពាធដល់ប្រធានរោងចក្រទទួលយកសំណើ ឬដោះស្រាយបញ្ហានេះឲ្យកាន់តែឆាប់រហ័ស។
ប្រធានសហភាពសហជីពកម្ពុជា លោក រ៉ុង ឈុន ដែលបានដឹកនាំបាតុកម្មនៅមុខរោងចក្រមេហាតធេន នៅខេត្តកំពង់ចាម នៅថ្ងៃទី១៩ មករា អះអាងថា ប្រសិនបើខាងអ្នកគ្រប់គ្រងរោងចក្រមិនដោះស្រាយទៅតាមការស្នើរបស់កម្មករនោះទេ បាតុកម្មនេះនឹងផ្ទុះឡើងជាទ្រង់ទ្រាយធំ ជាពិសេសតវ៉ាមុខស្ថានទូតអ្នកបញ្ចាទិញ បរទេសដូចជាសហរដ្ឋអាមេរិកជាដើម។ ម៉្យាងវិញទៀត លោកបានស្នើឲ្យសុំឲ្យប្រធានមន្ទីរការងារបណ្ដុះបណ្ដាលវិជ្ជាជីវៈ ឲ្យជួយពន្លឿនដោះស្រាយបញ្ហានេះ ដើម្បីជៀសវាងការធ្វើបាតុកម្មជាទ្រង់ទ្រាយធំ នៅពេលដ៏ខ្លីខាងមុខ៖ «យើងចង់ឲ្យក្រសួងការងារ ធ្វើយ៉ាងម៉េចជំរុញឲ្យនិយោជកទទួលយកមេដឹកនាំសហជីពឲ្យចូលធ្វើការដូចធម្មតាវិញ»។
ឆ្លើយតបទៅនឹងបញ្ហានេះ ប្រធានមន្ទីការងារបណ្ដុះបណ្ដាលវិជ្ជាជីវៈខេត្តកំពង់ចាម លោក ចេង ហ៊ាង មានប្រសាសន៍ថា ជម្លោះរវាងកម្មករនិងរោងចក្រមេហាតធេននេះ គឺជាបញ្ហាដែលកើតឡើងហួសពីដែនកំណត់នៃការដោះស្រាយរបស់មន្ទីរ។ លោកបញ្ជាក់ថា រយៈកាលកន្លងមក មន្ទីរបានព្យាយាមសម្របសម្រួលតែមិនបានផលអ្វីឡើយ ដោយខាងនិយោជក ឬថៅកែរោងចក្របដិសេធ មិនទទួលយកមេដឹកនាំសហជីពនោះ មកធ្វើការវិញឡើយ។ ប្រធានរដ្ឋបាលរោងចក្រមេហាតធេន បានបដិសេធមិនឆ្លើយបំភ្លឺអំពីបញ្ហានេះដែរ នៅថ្ងៃទី១៩ មករា៖ «យើងខិតខំសម្របសម្រួលដែរ តែខាងរោងចក្រគេបដិសេធ មិនព្រម»។
មន្ត្រីសម្របសម្រួលនៃអង្គការលីការដូ (LICADHO) ប្រចាំខេត្តកំពង់ចាម ដែលបានស៊ើបការធ្វើបាតុកម្មនេះ លោក ប៊ូ វីរៈ អះអាងថា ការធ្វើបាតុកម្មនេះ ហាក់បានដូចអូសបន្លាយយូរពេកហើយ ដែលខាងភាគីម្ចាស់រោងចក្រ នៅតែមិនឆ្លើយទៅនឹងការទាមទាររបស់កម្មករ។
ទោះជាយ៉ាងណាក៏ដោយ កាលពីខែឧសភា ឆ្នាំ២០១៤ ក្រុមប្រឹក្សាអាជ្ញាកណ្ដាលបានបង្គាប់ឱ្យតំណាងសម្ព័ន្ធសហជីពកម្ពុជា ក្នុងរោងចក្រមួយចំនួនចូលការដូចធម្មតាវិញ ប៉ុន្តែភាគីរោងចក្រមិនព្រមអនុវត្តតាមដែលបណ្ដាលឲ្យកម្មករប្រមាណជាង ៧០% ក្នុងចំណោមកម្មករសរុបរបស់រោងចក្រមេហាតធេន ជាង ២ពាន់នាក់ មិនព្រមចូលធ្វើការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
សង្គម
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់
- សារជូនពរឆ្នាំថ្មី ២០២៤
- ពលរដ្ឋចាញ់បោកអ្នកស្រី ឡេង ចាន់ណា ព្រមានឡើងមកតវ៉ានៅមុខផ្ទះលោក ហ៊ុន សែន បើតុលាការខេត្តសៀមរាបពន្យារពេលដោះស្រាយ
- ទិដ្ឋភាពទូទៅ នៃពិធីបុណ្យចូលឆ្នាំខ្មែរ ក្នុងតំបន់អង្គរខេត្តសៀមរាប