អង្គការសង្គមស៊ីវិលរកឃើញបញ្ហាសំខាន់៣ចំណុចដែលយុវជនកំពុងជួបប្រទះក្នុងសង្គម
2016.08.29
វេទិកាយុវជនស្ដីពី "តម្រូវការអាទិភាពរបស់យុវជន" ដែលរៀបចំនៅសាលប្រជុំសាកលវិទ្យាល័យបាត់ដំបង ខេត្តបាត់ដំបង កាលពីព្រឹកថ្ងៃទី២៨ ខែសីហា ឆ្នាំ២០១៦។ RFA/Hum Chamroeun
RFA/Hum Chamroeun
មន្ត្រីអង្គការសង្គមស៊ីវិលដែលធ្វើការងារផ្នែកយុវជន ស្រាវជ្រាវរកឃើញក្ដីកង្វល់សំខាន់របស់យុវជននៅក្នុងសង្គមមាន ៣ចំណុច គឺយុវជន និងការងារ សុវត្ថិភាព និងការអប់រំ ដែលជាបញ្ហាប្រឈម ហើយត្រូវរួមគ្នាដោះស្រាយ។ ទន្ទឹមគ្នានេះ អង្គការសង្គមស៊ីវិលបានចុះអប់រំដល់ក្រុមយុវជនប្រមាណ ១០០នាក់នៅខេត្តបាត់ដំបង ឲ្យពួកគេបានយល់ដឹងបញ្ហាទាំងនោះ ដើម្បីជាការរួមចំណែកដោះស្រាយពីការប្រឈមបានឆាប់រហ័ស។
មន្ត្រីអង្គការសម្ព័ន្ធយុវជនដើម្បីឯកភាព និងការអភិវឌ្ឍ (YCUD) ថ្លែងបែបនេះនៅក្នុងវេទិកាយុវជន ក្រោមប្រធានបទ "តម្រូវការអាទិភាពរបស់យុវជន" ដែលរៀបចំឡើងនៅសាលប្រជុំសាកលវិទ្យាល័យបាត់ដំបង កាលពីព្រឹកថ្ងៃទី២៨ សីហា។
អគ្គលេខាធិការអង្គការសម្ព័ន្ធយុវជនដើម្បីឯកភាព និងការអភិវឌ្ឍ អ្នកស្រី ម៉ី សម្ផស្ស ប្រាប់អាស៊ីសេរី ក្នុងវេទិកានៅពេលសម្រាកអាហារសម្រន់ថា បញ្ហាសំខាន់របស់យុវជនសព្វថ្ងៃដែលពួកគេជួបប្រទះ គឺយុវជនគ្មានការងារធ្វើ និងមានការងារតែទទួលបានប្រាក់ខែទាប បញ្ហាបង្កអសន្តិសុខនៅក្នុងសង្គម ដូចជាការប្រើប្រាស់ថ្នាំញៀន និងបញ្ហាគ្រោះថ្នាក់ចរាចរណ៍ ជាដើម។
អ្នកស្រីបញ្ជាក់ថា អ្វីដែលអង្គការរកឃើញចំណុចទី៣ នោះ គឺបណ្ដាលមកពីការអប់រំយុវជននៅតាមសាលារៀនចុះខ្សោយ។ អ្នកស្រីពន្យល់ថា ដើម្បីដោះស្រាយបញ្ហាសំខាន់ទាំង ៣ចំណុចនោះបាន គឺធ្វើយ៉ាងណាផ្ដល់ឱកាសដល់យុវជន សម្រាប់ផ្សារភ្ជាប់ជាមួយបណ្ដាញផ្សេងៗ និងចងក្រងក្រុមយុវជនតាមសហគមន៍ដែលពួកគេរស់នៅ ជាបណ្ដាញឲ្យបានទូលំទូលាយតាំងពីថ្នាក់មូលដ្ឋានដល់ថ្នាក់ជាតិ។
អ្នកស្រីបន្ថែមថា ពង្រឹងបណ្ដាញសង្គមដោយជំរុញឲ្យយុវជនបានពិភាក្សាគ្នានៅក្នុងសិក្ខាសាលា ឬវេទិកាយុវជន និងរៀបចំយុទ្ធនាការផ្សព្វផ្សាយជាសាធារណៈ និងកសាងសំឡេងរួមរបស់យុវជនក្នុងការទាមទារសិទ្ធិពីរដ្ឋាភិបាល ជាពិសេសក្រសួងអប់រំ យុវជន និងកីឡា ដើម្បីដាក់បញ្ចូលមុខវិជ្ជាសិក្សាអំពីអាស៊ាននៅក្នុងកម្មវិធីសិក្សារបស់យុវជន ជាដើម៖ «បើសិនជាក្នុងសហគមន៍ភូមិ-ឃុំមានសុវត្ថិភាព យុវជនគាត់នឹងមិនភ័យខ្លាចទៅរៀន និងជួបជាមួយមិត្តភ័ក្ដិ ដើម្បីជជែកគ្នាពីការងារ និងបញ្ហាផ្សេងៗ នោះពួកគាត់នឹងទទួលបានការអប់រំ។ អ៊ីចឹងធ្វើឲ្យពួកគាត់ងាយស្រួលរកការងារធ្វើដែរ»។
វេទិកានេះក្នុងគោលបំណងដើម្បីឲ្យយុវជនរួមគ្នា ដើម្បីពង្រឹង និងពង្រីកការចូលរួមនៅក្នុងការងារសង្គម តាមរយៈការសាងសមត្ថភាព ការអប់រំផ្សព្វផ្សាយអំពីសិទ្ធិមនុស្ស លទ្ធិប្រជាធិបតេយ្យ បរិស្ថាន សុខភាព និងតស៊ូមតិឲ្យមានការផ្លាស់ប្ដូរស្ថានភាពយុវជន។
ទាក់ទងនឹងបញ្ហានេះ យុវជនដែលបានចូលរួមនៅក្នុងវេទិកាម្នាក់ គឺលោក ឈឿន ប៊ុនលី ថ្លែងថា លោកនឹងនាំយកចំណេះដឹងពីវេទិកានេះ ទៅពន្យល់ដល់ក្រុមយុវជនផ្សេងទៀតនៅក្នុងសហគមន៍របស់ខ្លួន ឲ្យបានយល់ដឹងអំពីទុក្ខលំបាករបស់ពួកគេឲ្យបានទូលំទូលាយ ដើម្បីរួមចំណែកដល់ការអភិវឌ្ឍនៅក្នុងសង្គមជាតិ៖ «ខ្ញុំនឹងពន្យល់ពួកគាត់ឲ្យយល់ដឹងពីផលប៉ះពាល់ពីគ្រោះថ្នាក់ចរាចរណ៍ និងការប្រើប្រាស់ថ្នាំគ្រឿងញៀន។ ខ្ញុំសំណូមពរឲ្យអង្គការជួយចុះផ្សព្វផ្សាយបង្កើនចំណេះដឹងដល់យុវជននៅតាមមូលដ្ឋានបន្តទៀត»។
ស្រដៀងគ្នានេះដែរ យុវតីម្នាក់ទៀត គឺកញ្ញា កេង យ៉ានុត ថ្លែងថា កញ្ញារីករាយណាស់ដែលបានចូលរួមនៅក្នុងវេទិកាយុវជននេះ។ កញ្ញាអះអាងថា វេទិកានេះមានសារសំខាន់ណាស់ដល់ក្រុមយុវជន ជាពិសេសគឺកញ្ញាតែម្ដង ធ្វើឲ្យទទួលបានចំណេះដឹងបន្ថែមទៀត ដើម្បីជាប្រយោជន៍យកទៅប្រើប្រាស់ទៅថ្ងៃខាងមុខ។ កញ្ញាបន្ថែមថា ក្រោយពីបានចូលរួមវេទិកានេះទៅ កញ្ញានឹងអនុវត្តខ្លួនឲ្យក្លាយទៅជាយុវជនល្អ ដោយមិនបង្កជាបញ្ហាផ្សេងៗនៅក្នុងសង្គម ដើម្បីរួមចំណែកដល់ការអភិវឌ្ឍប្រទេសជាតិឲ្យរីកចម្រើនទៅមុខបានឆាប់រហ័ស៖ «នាងខ្ញុំគិតថាយុវជន គឺជាកម្លាំងដ៏សំខាន់បំផុតក្នុងការអភិវឌ្ឍប្រទេសជាតិ។ បើសិនថា ក្នុងសង្គមយើងមានយុវជនប្រើប្រាស់ថ្នាំញៀនច្រើន គឺវាមិនរីកចម្រើនឡើយ ព្រោះយុវជនប្រៀបដូចជាទំពាំងស្នងឫស្សី បើទំពាំងមិនល្អនោះ ប្រទេសជាតិក៏អត់មានការរីកចម្រើនដែរ»។
នៅក្នុងវេទិកានោះ យុវជនមានឱកាសពិភាក្សាគ្នាជាក្រុម ដោយលើកជាបញ្ហាប្រឈមរបស់ខ្លួនដែលជួបប្រទះនៅក្នុងសង្គមកន្លងមក ដាក់ឲ្យសមាជិករិះរកវិធីដោះស្រាយរួមគ្នា។
អភិបាលរងខេត្តបាត់ដំបង ទទួលបន្ទុកផ្នែកយុវជន លោក ជាម ច័ន្ទសោភ័ណ មានប្រសាសន៍ថា វេទិកានេះជារឿងល្អដែលរួមចំណែកដល់ការអភិវឌ្ឍនៅក្នុងសង្គមជាតិ។ លោកមានជំនឿថា តាមរយៈវេទិកានេះ នឹងបានដឹងអំពីតម្រូវការរបស់យុវជន ដើម្បីដាក់ជូនស្ថាប័នពាក់ព័ន្ធចូលរួមដោះស្រាយបញ្ហា និងផ្សព្វផ្សាយព័ត៌មានបានទូលំទូលាយថែមទៀតដល់ស្រទាប់យុវជននៅតំបន់ដាច់ស្រយាល ដែលពុំទាន់មានបណ្ដាញព័ត៌មានផ្សព្វផ្សាយ មានឱកាសធ្វើការវិភាគក្នុងសកម្មភាពសង្គមផ្សេងៗ និងឈានទៅរកដំណោះស្រាយចំពោះខ្លួនឯង និងអ្នកពាក់ព័ន្ធ៖ «ខ្ញុំយល់ថា វេទិកានេះពិតជាឆ្លុះបញ្ចាំងផងដែរអំពីទិដ្ឋភាពរួម និងសកម្មភាពយុវជន និងបញ្ហាអាទិភាពដែលជាតម្រូវការរបស់យុវជនបច្ចុប្បន្ន តាមរយៈលទ្ធផលនៃការស្រាវជ្រាវរបស់អង្គការ (YCUD) ដោយរួមគ្នាដោះស្រាយចំណុចអវិជ្ជមាន ត្រូវបំផុសយុវជនសំដៅធ្វើឲ្យប្រសើរឡើង ប្រសិទ្ធភាព និងគុណភាព លើកកម្ពស់ការងាររបស់យុវជនឲ្យក្លាយទៅបញ្ញវន្តប្រកបដោយចំណេះដឹង ដើម្បីជាគុណប្រយោជន៍របស់សង្គមជាតិទាំងមូល»។
របាយការណ៍សិក្សាស្រាវជ្រាវរបស់អង្គការសម្ព័ន្ធយុវជនដើម្បីឯកភាព និងការអភិវឌ្ឍ (YCUD) ឆ្នាំ២០១៥ បង្ហាញថា ក្រោយពីការសិក្សាថ្នាក់ជាតិទៅលើយុវជនជាង ៥០០នាក់មកពី ៥ខេត្ត-រាជធានី ហើយរកឃើញបញ្ហាអាទិភាពដែលជាតម្រូវការរបស់យុវជនមាន ៣ចំណុច រួមមាន បញ្ហាការងារ សន្តិសុខ និងបញ្ហាការអប់រំ។
អ្នកស្រី ម៉ី សម្ផស្ស បញ្ជាក់ថា បន្ទាប់ពីធ្វើវេទិកានេះហើយ នឹងនាំយកបញ្ហាទៅពិភាក្សាជាមួយក្រសួងពាក់ព័ន្ធបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
សង្គម
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់
- សារជូនពរឆ្នាំថ្មី ២០២៤
- ពលរដ្ឋចាញ់បោកអ្នកស្រី ឡេង ចាន់ណា ព្រមានឡើងមកតវ៉ានៅមុខផ្ទះលោក ហ៊ុន សែន បើតុលាការខេត្តសៀមរាបពន្យារពេលដោះស្រាយ
- ទិដ្ឋភាពទូទៅ នៃពិធីបុណ្យចូលឆ្នាំខ្មែរ ក្នុងតំបន់អង្គរខេត្តសៀមរាប