យុវជនមួយចំនួនថាខ្វះព័ត៌មានធ្វើឲ្យពិបាកជ្រើសរើសមុខវិជ្ជាសិក្សានៅមហាវិទ្យាល័យ
2017.06.26
ក្រុមសិស្សនិស្សិតអះអាងថា ពួកគេមួយចំនួន ជាពិសេសអ្នករស់នៅទីជនបទ នៅតែមិនអាចទទួលបានព័ត៌មានគ្រប់ជ្រុងជ្រោយមុននឹងធ្វើសេចក្ដីសម្រេច ដើម្បីជ្រើសរើសមុខវិជ្ជាសិក្សានៅឯមហាវិទ្យាល័យ។ ពួកគេបន្តថា ការប្រឈមនឹងការខ្វះព័ត៌មានបែបនេះ ក៏ជាកត្តាមិនអាចឲ្យពួកគេសិក្សាចំមុខជំនាញដែលជាតម្រូវការទីផ្សារការងារនៅក្នុងសង្គមដែរ។
ស្របពេលយុវជនកម្ពុជា មួយចំនួនធំ នៅតែពិបាកក្នុងការសម្រេចចិត្តឲ្យបានច្បាស់លាស់ជ្រើសរើសមុខជំនាញសិក្សានៅមហាវិទ្យាល័យនោះ នៅថ្ងៃទី២៥ មិថុនា សមាគមអតីតនិស្សិតដែលធ្លាប់ទទួលបានអាហារូបករណ៍ទៅសិក្សានៅក្រៅប្រទេស ជាពិសេសនៅសហរដ្ឋអាមេរិក បានរៀបចំកម្មវិធីជួបជុំមួយដើម្បីតាំងពិព័រណ៍ជំនាញសិក្សា និងការងារ បង្ហាញទៅកាន់សិស្សនិស្សិតជាង ២ពាន់នាក់នៅឯវិទ្យាស្ថានបច្ចេកវិទ្យាកម្ពុជា។
ប្រធានសមាគមអតីតនិស្សិតអាហារូបករណ៍ហ៊្វុលប្រាយ (Fullbright) និងអាហារូបករណ៍សហរដ្ឋអាមេរិក (FUSAAC) លោក យូ សុគន្ធបញ្ញា ថ្លែងថា ដោយសារកូនសិស្សមួយចំនួនពុំអាចស្វែងរកអ្នកប្រឹក្សាយោបល់ និងស្វែងរកប្រភពព័ត៌មានឲ្យបានច្បាស់លាស់ទាក់ទងនឹងការជ្រើសរើសមុខជំនាញសិក្សានៅមហាវិទ្យាល័យ ដូច្នោះការតាំងពិព័រណ៍ជំនាញសិក្សា និងការងារនៅពេលនេះ គឺផ្ដល់ឱកាសឲ្យពួកគេអាចជួបពិគ្រោះយោបល់ដោយផ្ទាល់ជាមួយអតីតនិស្សិតដែលទទួលបានការជោគជ័យក្នុងការសិក្សា៖ «ហៅពួកគាត់មកថ្ងៃនេះ ប្រសិនគាត់មានចំណង់ចំណូលចិត្តខាងពេទ្យ យើងឲ្យគាត់ជួបជាមួយអ្នកធ្លាប់រៀនពេទ្យ ដើម្បីទទួលបានបទពិសោធន៍ ថាមានភាពលំបាកអ្វីខ្លះ ហើយនៅពេលរៀនទៅ មានទីផ្សារការងារអត់?»។
លោក យូ សុគន្ធបញ្ញា បន្តថា ក្រោយការរៀបចំកម្មវិធីតាំងពិព័រណ៍លើកនេះ លោកសង្ឃឹមថានឹងអាចជំរុញឲ្យនិស្សិតហ៊ានសម្រេចចិត្តជ្រើសរើសមុខវិជ្ជារបស់ខ្លួនចូលចិត្ត ហើយក៏ជាមុខវិជ្ជាឆ្លើយតបទៅនឹងទីផ្សារការងារដែលសង្គមបច្ចុប្បន្នកំពុងត្រូវការដែរ។
កម្មវិធីតាំងពិព័រណ៍ជំនាញសិក្សា និងការងារដដែលនេះ ក៏មានការចូលរួមផ្ដល់យោបល់ពីរដ្ឋមន្ត្រីក្រសួងអប់រំ យុវជន និងកីឡា និងឯកអគ្គរដ្ឋទូតសហរដ្ឋអាមេរិកប្រចាំកម្ពុជា ដែរ។
លោក វីល្លៀម ហៃដ្ដ៍ (William A. Heidt) អគ្គរដ្ឋទូតសហរដ្ឋអាមេរិកប្រចាំកម្ពុជា ថ្លែងថា ការជ្រើសរើសមុខវិជ្ជាណាមួយដើម្បីសិក្សា គឺជារឿងសំខាន់បំផុត ប៉ុន្តែលោកថាមាននិស្សិតកម្ពុជា ជាច្រើន នៅតែជ្រើសរើសមុខវិជ្ជាសិក្សានៅសាកលវិទ្យាល័យតាមមិត្តភ័ក្ដិរបស់ខ្លួនទៅវិញ។
ចំណែកលោក ហង់ ជួន ណារ៉ុន រដ្ឋមន្ត្រីក្រសួងអប់រំ ថ្លែងចំពោះមុខសិស្សនិស្សិតថា ដោយសារក្នុងរយៈពេលជិត ១០ឆ្នាំ បន្ទាប់ពីសេដ្ឋកិច្ចកម្ពុជា មានកំណើនជាង ៧ភាគរយជារៀងរាល់ឆ្នាំ និងបានរីកលូតលាស់ពីសេដ្ឋកិច្ចលក្ខណៈបុរាណ មកជាសេដ្ឋកិច្ចលក្ខណៈទំនើប ដូច្នោះហើយទើបធ្វើឲ្យមានតម្រូវការជំនាញកាន់តែច្រើន។ លោករដ្ឋមន្ត្រីបញ្ជាក់ថា ស្របពេលពិភពលោកកំពុងធ្វើបដិវត្តន៍ឧស្សាហកម្មលើកទី៤ ដែលជាសម័យកាលមួយមនុស្សចាប់ផ្ដើមប្រើប្រាស់ម៉ាស៊ីនដោយស្វ័យប្រវត្តិ ដូច្នោះនឹងអាចធ្វើឲ្យយុវជនមួយចំនួនដែលគ្មានជំនាញពិតប្រាកដ ពិបាកស្វែងរកការងារល្អនៅឆ្នាំ២០៣០ ខាងមុខ៖ «ស្វ័យប្រវត្តិ ឧទាហរណ៍ដូចជារោងចក្រអត់ប្រើប្រាស់មនុស្ស ឬផ្ទះគ្រប់គ្រងដោយបច្ចេកវិទ្យា បើកភ្លើងខ្លួនឯង និងបើកម៉ាស៊ីន ឬម៉ាស៊ីនត្រជាក់ខ្លួនឯង»។
លោករដ្ឋមន្ត្រីក៏បញ្ជាក់ទៀតថា ដោយសារវិស័យសំខាន់មួយចំនួន ជាពិសេសវិស័យកាត់ដេរដែលអាចលែងត្រូវការកម្មករតទៅទៀតនាពេលខាងមុខ ដូច្នោះហើយទើបក្រសួងអប់រំ សម្រេចធ្វើកំណែទម្រង់ឡើងវិញ ដើម្បីឲ្យនិស្សិតចាប់អារម្មណ៍សិក្សាមុខវិជ្ជាបែបវិទ្យាសាស្ត្រឲ្យបានច្រើនជាងមុន ដើម្បីអាចប្រកួតប្រជែងនៅក្នុងទីផ្សារការងារក្នុងតំបន់ និងពិភពលោកនាពេលខាងមុខ។
ចំណែកនិស្សិតសិក្សាខាងវិស្វកម្មឆ្នាំទី២ មកពីសាកលវិទ្យាល័យភូមិន្ទភ្នំពេញ កញ្ញា ហេង ស្រីលី បញ្ជាក់ថា កញ្ញាមានទំនុកចិត្តចំពោះមុខវិជ្ជាដែលកញ្ញាកំពុងសិក្សានេះ ព្រោះសព្វថ្ងៃ កញ្ញាសង្កេតឃើញថា និស្សិតដែលសិក្សាមុខវិជ្ជាវិទ្យាសាស្ត្រ និងវិស្វកម្ម នៅមានចំនួនតិចនៅឡើយ៖ «ខ្ញុំគិតថាជំនាញហ្នឹងខ្ញុំស្រឡាញ់ ខ្ញុំចូលចិត្ត គណិត គីមី ជីវៈ ហើយណាមួយសាកលវិទ្យាល័យភូមិន្ទភ្នំពេញ ជាសាលារបស់រដ្ឋ ហើយកំពុងល្បីដែរឥឡូវហ្នឹង»។
និស្សិតរូបនេះជំរុញឲ្យនិស្សិតដទៃទៀត ជាពិសេសនិស្សិតនៅតាមទីជនបទ មុននឹងឡើងមកសិក្សាបន្តនៅសាកលវិទ្យាល័យក្នុងរាជធានីភ្នំពេញ គួរតែស្វែងយល់ព័ត៌មានច្បាស់លាស់ជាមុនទាក់ទងនឹងជំនាញរបស់ខ្លួនដែលត្រូវរៀន ដែលអាចឆ្លើយតបទៅនឹងតម្រូវការទីផ្សារការងារនៅក្នុងសង្គម៕