មនុស្សនាំគ្នាទៅជីករកកំណប់មាសនៅសៀមរាប
គោលបំណងគឺនៃការជីកកកាយនោះ ដើម្បីស្វែងរកកំណប់មាសមួយចំនួនដែលគេជឿថា មានលាក់ទុកក្នុងរបបខ្មែរក្រហមកាន់អំណាច កាលពីជាង ៣០ឆ្នាំមុន។
ការប្រើគ្រឿងចក្រទៅជីកកកាយដីដើម្បីរកវត្ថុមានតម្លៃនេះ បានធ្វើឱ្យមានការភ្ញាក់ផ្អើលដល់ប្រជាពលរដ្ឋជាច្រើនរស់នៅក្នុងតំបន់នោះ កាលពីព្រលប់ថ្ងៃច័ន្ទ ទី១៣ ខែសីហា ហើយបានបញ្ជូនជាសាតៗគ្នា។
លោក តូច សាកល ជាអធិការនគរបាលស្រុកជីក្រែង។ លោកបានមានប្រសាសន៍កាលពីព្រឹកថ្ងៃអង្គារ ទី១៤ ខែសីហា ថា ពិតជាមានមនុស្សមួយក្រុមបានយកគ្រឿងចក្រទៅជីកកកាយដីដើម្បី ស្វែងរកកំណប់មាសនៅទីនោះមែន។
អធិការដដែលបានមានប្រសាសន៍ថា អ្នកទាំងនោះបានសង្ស័យថា មានកំណប់កប់ក្នុងដីតាមរយៈឪពុកម្តាយរបស់គេផ្ដែផ្ដាំ មុនពេលដែលឪពុកម្ដាយទាំងនោះស្លាប់៖ «គេប្រើគ្រឿងចក្រជីកនៅលើដីប្រហែលជា ៦ម៉ែត្របួនជ្រុង។ គេថា មានមាសដែលគេកប់ពីសម័យ ប៉ុល ពត ព្រោះតែងតែចេះតែល្បីតៗគ្នា ថាមុនគេធ្វើទំនប់គេចេះតែយកមាសយកអីទៅកប់ ដាក់បាតទំនប់បាតអី។ ឭខ្លះថាជាកេស ខ្លះថាជារទេះគោ ហើយខ្លះគេប្រាប់ថា មិនមែនជាមាសជាអីទេ គឺជាខ្នោះដែលសម័យ ប៉ុល ពត គេយកទៅដាក់។ ដល់កាយទៅអត់មានឃើញអី ក៏គេលុបទៅវិញហើយទៅបាត់ទៅ»។
សមត្ថកិច្ចបានបញ្ជាក់ថា គេបានស្គាល់ក្រុមអ្នកដែលយកគ្រឿងចក្រទៅជីកកកាយដីទាំងនោះ ក៏ប៉ុន្តែគេមិនអាចប្រាប់ឈ្មោះបានទេ ដោយគ្រាន់តែបង្ហើបថា ក្រុមមនុស្សទាំងនោះមកពីទីក្រុងភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
