អាជ្ញាធរខេត្តស្វាយរៀងរងការចោទថារារាំងពលរដ្ឋមិនឲ្យធ្វើបុណ្យនិងធ្វើអណ្ដូង
2015.05.12
ប្រជាពលរដ្ឋនៅខេត្តស្វាយរៀង ចោទអាជ្ញាធរខេត្តថា ហាមអ្នកភូមិមិនឲ្យប្រារព្ធពិធីបុណ្យឡើងអ្នកតា និងមិនអនុញ្ញាតឲ្យធ្វើអណ្ដូងទឹកប្រើប្រាស់ជាសាធារណៈនៅលើដីអ្នកតាត្រពាំងរាល។ ការហាមនោះធ្វើឡើង គឺបន្ទាប់ពីអ្នកភូមិគ្រោងប្រារព្ធពិធីបុណ្យឡើងអ្នកតាប្រចាំឆ្នាំកាលពីថ្ងៃទី៧ ខែ ឧសភា តែត្រូវបានអាជ្ញាធរមូលដ្ឋានមិនអនុញ្ញាត និងបានជំរុញឲ្យតំណាងអ្នកភូមិសរសេរលិខិតស្នើសុំពីអភិបាលខេត្តជាមុនសិន។
ពលរដ្ឋរស់នៅភូមិចេក ក្រុងស្វាយរៀង អះអាងថា អាជ្ញាធរខេត្តមានចេតនាបំបិទសិទ្ធិសហគមន៍មិនឲ្យអាស្រ័យផលលើដីសហគមន៍ដូចមុនឡើយ។ ទង្វើនេះអ្នកភូមិនៅតែមានមន្ទិលថា ដីសហគមន៍ដែលអភិបាលខេត្តស្វាយរៀង លោក ជៀង អំ ធ្លាប់បានសរសេរលិខិតប្រគល់ជូនសហគមន៍កាលពីចុងខែមេសា កន្លងទៅ នៅតែមានការគ្រប់គ្រងដោយអាជ្ញាធរខេត្តដដែល។
តំណាងអ្នកភូមិលោក ស៊ិន ស៊ីតារ៉ា ឲ្យដឹងនៅថ្ងៃទី១១ ខែឧសភា ថា កាលពីថ្ងៃទី៧ ខែឧសភា ឆ្នាំ២០១៥ អ្នកភូមិរៀបចំធ្វើអណ្ដូងស្នប់មួយសម្រាប់ប្រើប្រាស់ជាសាធារណៈ តែអាជ្ញាធរក្រុងរួមទាំងកងកម្លាំងប្រដាប់អាវុធហាមឃាត់។ បន្ថែមពីលើនេះទៀត អ្នកភូមិក៏ធ្លាប់ធ្វើលិខិតស្នើសុំអនុញ្ញាតធ្វើពិធីបុណ្យឡើងអ្នកតាដែរ កាលពីថ្ងៃទី៧ ឧសភា តែអាជ្ញាធរមូលដ្ឋាននិយាយថា ត្រូវឆ្លងអាជ្ញាធរភូមិដល់អភិបាលខេត្ត ក៏ប៉ុន្តែត្រូវបានអាក់ខានត្រឹមចៅសង្កាត់។
លោកថា ដីអ្នកតាត្រពាំងរាល នៅចុងភូមិ ជាដីសមូហភាពសម្រាប់អ្នកភូមិ។ រៀងរាល់ឆ្នាំពលរដ្ឋតែងតែយកទីតាំងនោះប្រារព្ធពិធីបុណ្យឡើងអ្នកតា និងពិធីសុំទឹកភ្លៀងមិនសូវខានទេ តែនៅឆ្នាំនេះត្រូវអាក់ខាន៖ «ស្នើធ្វើបុណ្យ ឥឡូវគេអត់ស៊ីញ៉េ ឲ្យធ្វើផងហ្នឹង គេអត់ឲ្យធ្វើបុណ្យទៀត ធ្វើបុណ្យគ្រាន់តែឡើងអ្នកតាតិចតួចហ្នឹងសុំទឹកភ្លៀងហ្នឹង វាធ្លាប់ទម្លាប់រាល់ឆ្នាំអ៊ីចឹង។ ធ្វើសំបុត្រស្នើទៅភូមិ ស្នើទៅឃុំ គេអត់ព្រមធ្វើឲ្យ គេថាមិនឲ្យធ្វើ»។
វិទ្យុអាស៊ីសេរី មិនអាចទាក់ទងសុំការអធិប្បាយបញ្ហានេះពីអភិបាលខេត្តស្វាយរៀង លោក ជៀង អំ បានទេ នៅថ្ងៃទី១១ ឧសភា។ ក៏ប៉ុន្តែអភិបាលរងក្រុងស្វាយរៀង លោក ខៀវ សារ៉ន ថ្លែងថា រាល់ការធ្វើអ្វីៗនៅលើដីទំនេររបស់រដ្ឋ គឺត្រូវមានការអនុញ្ញាតពីអាជ្ញាធរខេត្តជាមុនសិន។ លោកថា ដីនេះគឺអាជ្ញាធរខេត្តជាអ្នកគ្រប់គ្រង ដូច្នេះសហគមន៍មិនអាចចេះតែធ្វើតាមតែចិត្តចង់នោះទេ៖ «ព្រោះអីយើងមិនអាចចង់ទៅឃើញធ្វើទេ អ្វីធ្វើអីសុំមកថ្នាក់ណាដែលអាចទៅបាន ដីហ្នឹងខេត្តគ្រប់គ្រងមិនអ៊ីចឹង? ចង់ធ្វើអីយើងត្រូវសុំខេត្ត ហើយបើគាត់ចង់ធ្វើអីតាមតែអំពើចិត្តម៉េចកើត?»។
ជុំវិញបញ្ហានេះ អ្នកភូមិអះអាងថា កាលពីថ្ងៃទី២៤ ខែមេសា អាជ្ញាធរពាក់ព័ន្ធមួយចំនួននៅក្នុងខេត្តស្វាយរៀង បានឃុបឃិតយកដីអ្នកតាត្រពាំងរាល នៅសង្កាត់ចេក មានទំហំជាង ៤ហិកតារ ត្រូវមន្ត្រីទាំងនោះកាត់ចែកគ្នាជាឡូត៍ ថែមទាំងមានប្លង់កម្មសិទ្ធិរៀងខ្លួនទៀតផង។ ដោយឡែកពលរដ្ឋចំនួន ១៤១គ្រួសារ បានលើកគ្នាតវ៉ាទាមទារដីនោះមកវិញ រហូតដល់ល្ងាចថ្ងៃដែលអភិបាលខេត្តស្វាយរៀង លោក ជៀង អំ ចេញលិខិតប្រគល់ជូនពលរដ្ឋវិញ។
មន្ត្រីសម្របសម្រួលអង្គការលីកាដូ (Licadho) ខែត្រស្វាយរៀង លោក នុត បូពិណ្ណារ័ត្ន យល់ឃើញថា ដីនេះបើអ្នកភូមិប្រារព្ធពិធីបុណ្យផ្សេងៗ មិនគួរមានការស្នើសុំរហូតដល់អភិបាលខេត្តទេ។ លោកបន្តថា ដំណឹងក្រៅផ្លូវការដីនេះអាជ្ញាធរខេត្តអាចនឹងមានគម្រោងធ្វើពន្ធនាគារ ព្រោះពន្ធនាគារខេត្តនេះសព្វថ្ងៃចង្អៀតខ្លាំង៖ «បើឲ្យពន្ធនាគារក៏នៅតែដីរដ្ឋដដែលហ្នឹង អ៊ីចឹងពលរដ្ឋគាត់ធ្វើអីក៏មិនមានសិទ្ធិហាមឃាត់គាត់ដែរបើគាត់សុំជូនដំណឹងទៅអាជ្ញាធរ បើគាត់សុំធ្វើកន្លែងហ្នឹងដីរដ្ឋ បើគាត់សុំធ្វើអី ភូមិឃុំគាត់ក៏មិនមានអីត្រូវការហាមឃាត់ទេ ហើយឲ្យគាត់ទៅសុំខេត្ត បើសុំខេត្តមានន័យ ថាដីនោះជាដីកម្មសិទ្ធិរបស់អ្នកណាម្នាក់ទៀត»។
អ្នកឃ្លាំមើលអភិវឌ្ឍសង្គម លោកបណ្ឌិត កែម ឡី ពន្យល់ថា យោងតាមច្បាប់ភូមិបាលដីបែកចែកជា ៤ប្រភេទ ទី១ គឺដីសាធារណៈរបស់រដ្ឋទូទៅ ទី២ ដីឯកជនរបស់រដ្ឋ ទី៣ ដីសហគមន៍ និងទី៤ ឯកជន។ លោកថា អាជ្ញាធរខេត្តបានហាមឃាត់អ្នកភូមិមិនឲ្យអាស្រ័យផលលើដីសហគមន៍កន្លងទៅ គឺផ្ទុយពីច្បាប់ភូមិបាល ហើយអ្នកភូមិមានសិទ្ធិអាស្រ័យផលលើដីសហគមន៍តាមមូលដ្ឋានមិនចាំបាច់ស្នើសុំរហូតដល់អភិបាលខេត្តទេ។ លោកថា អ្នកភូមិគួរតែរកមេធាវីអង្គការប្ដឹងទៅតុលាការទាក់ទិនបញ្ហានេះដើម្បីតតាំងផ្នែកច្បាប់។
តំណាងប្រជាពលរដ្ឋគ្រោងផ្ដិតមេដៃដាក់ពាក្យប្ដឹងទៅ អង្គការមិនមែនរដ្ឋាភិបាល និងដាក់ញត្តិទៅរដ្ឋសភាដើម្បីជួយអន្តរាគមន៍ដោះស្រាយរឿងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
ព័ត៌មានថ្មីៗ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់