អាជ្ញាធរខេត្តស្វាយរៀងរៀបចំទីតាំងសម្រាប់គោរពវិញ្ញាណក្ខន្ធព្រះមហាវីរក្សត្រ

មន្ត្រីអាជ្ញាធរខេត្តស្វាយរៀង បានរៀបចំទីតាំងមួយកន្លែង សម្រាប់ពលរដ្ឋនៅក្នុងខេត្តមួយនេះដែលចង់ចូលរួមរំលែកទុក្ខ និងគោរពវិញ្ញាណក្ខន្ធ ព្រះមហាវីរក្សត្រ ព្រះបាទសម្ដេចព្រះ នរោត្តម សីហនុ អតីតព្រះមហាក្សត្រនៃព្រះរាជាណាចក្រកម្ពុជា។

ដោយ ម៉ម មុនីរតន៍
2012-10-20

h101912mm-a1.mp3

ទីតាំងដែលអាជ្ញាធរខេត្តរៀបចំឡើង គឺស្ថិតនៅក្បែរដើមពោធិ៍ ត្រង់រង្វង់មូលនៃទីរួមខេត្ត។

អភិបាលស្រុកស្វាយរៀង គឺលោក យូ ប៊ុន្នី ថ្លែងថា ការបង្កើតឲ្យមានទីតាំងសម្រាប់ពលរដ្ឋ មន្ត្រីរាជការ និងសិស្ស និស្សិត ចូលរួមកាន់ទុក្ខនេះ គឺជាការរួមចំណែកក្នុងការដឹងគុណរបស់ព្រះបាទសម្ដេចព្រះ នរោត្តម សីហនុ ដែលព្រះអង្គយកអស់កម្លាំងកាយពល ដើម្បីជាតិមាតុភូមិ។ លោកបន្តថា ជាពិសេស គឺទាមទារបានមកវិញនូវឯករាជ្យពីបារាំងទាំងស្រុង ក្នុងឆ្នាំ១៩៥៣ និងអាណាខេត្តមួយចំនួនទៀត ដែលបានបាត់បង់ផ្នែកខាងលិច ព្រមទាំងបានទាមទារមកវិញនូវប្រាសាទព្រះវិហារ ពីប្រទេសថៃ។

លោក យូ ប៊ុន្នី៖ «ក្នុងនាមខ្ញុំជាអាជ្ញាធរ ក៏ដូចជាកូនចៅរបស់ព្រះអង្គ គឺខ្ញុំមានសោកស្ដាយសោកសង្រេងខ្លាំងណាស់ បាត់ព្រះអង្គ គឺប្រៀបដូចជាបាត់ឪពុក ហៅថាអ្នកដ៏មានគុណ ធ្លាប់ដឹកនាំ ធ្លាប់កសាងប្រទេសយើង ធ្លាប់រំដោះ ធ្លាប់ជួយការកសាង យើងគឺថា ខ្ញុំមានសោកស្ដាយ ខ្ញុំមិនថ្លែងបានទេ»។

ព្រះអនុគណក្រុងស្វាយរៀង គឺព្រះតេជព្រះគុណ អ៊ុក សារី មានថេរដីកាថា គ្រប់វត្តអារាមក្នុងខេត្តស្វាយរៀង និងទីតាំងសំខាន់ៗរបស់ខេត្ត ត្រូវកំណត់ឲ្យមានពិធីសូត្រមន្ត បង្សុកូល និងបំផុសឲ្យពលរដ្ឋគ្រប់រូប ត្រូវចូលរួមកាន់ទុក្ខក្នុងរយៈពេល ៧ថ្ងៃចំពោះព្រះបរមសព ព្រះមហាវីរក្សត្រ ព្រះបាទសម្ដេចព្រះ នរោត្ដម សីហនុ នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។