លោកគ្រូម្នាក់ក្នុងចំណោមលោកគ្រូអ្នកគ្រូ ដែលកំពុងទាមទារនោះ បានថ្លែងដោយសុំមិនបញ្ចេញឈ្មោះថា ពួកគាត់ទាមទារពីរចំណុច។ ទី១ សុំឲ្យតែងតាំងនាយករង ឡើងធ្វើនាយកជំនួសតំណែងនាយកចាស់ ដែលប្ដូរការងារទៅភ្នំពេញ។ ទី២ សុំឲ្យបន្ថែមគ្រូប្រមាណ ៥ទៅ ៦នាក់ ដូចជាគ្រូជំនាញគណិតវិទ្យា គ្រូជំនាញកុំព្យូទ័រ គ្រូជំនាញភាសាអង់គ្លេស ភាសាខ្មែរ ជាដើម មកបង្រៀនក្នុងអនុវិទ្យាល័យនេះ ព្រោះសាលាកំពុងខ្វះគ្រូបង្រៀនច្រើនមុខវិជ្ជាដែរ។
វិទ្យុអាស៊ីសេរី ទាក់ទងប្រធានការិយាល័យអប់រំស្រុកស្រីសន្ធរ ប៉ុន្តែលោកកំពុងមានជំងឺ មិនអាចបំភ្លឺចំពោះការទាមទាររបស់បុគ្គលិកសិក្សាអនុវិទ្យាល័យ ហ៊ុន សែន ទូរ៉ី ចំនួនពីរចំណុចនោះបានភ្លាមៗទេ។
នាយករងអនុវិទ្យាល័យ ហ៊ុន សែន ទូរ៉ី លោក ឡាយ ផល្លា ថ្លែងថា លោកសូមអរគុណចំពោះការពេញចិត្តគាត់ឲ្យឡើងតំណែងជានាយករបស់បុគ្គលិកសិក្សាទាំងអស់។ ប៉ុន្តែគាត់ចង់ឲ្យបុគ្គលិកសិក្សាទាំងអស់ ដែលមានសមត្ថភាពក្នុងការដឹកនាំ រួមគ្នាបោះឆ្នោតប្រកួតប្រជែងយកតួនាទីធ្វើជានាយកសាលាវិញ។
ក្រុមគ្រូបង្រៀននោះ បានឲ្យដឹងថា តាមគាត់បានសាកសួរទៅអាជ្ញាធរស្រុក គឺតំណែងនាយកថ្មី បានរើសចេញពីតំបន់ផ្សេង តែមិនទាន់តែងតាំង និងប្រកាសជាផ្លូវការ ឲ្យពួកគាត់ដឹងនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។