គ្រូបង្រៀនអតីតមន្ត្រីបោះឆ្នោតប្រតិកម្មចំពោះការកាត់ប្រាក់ខែ

គ្រូបង្រៀនមួយចំនួនដែលជាអតីតបុគ្គលិកធ្វើការងារជាមន្ត្រីគណៈកម្មការខេត្តរៀបចំការបោះឆ្នោត (គ.ខ.ប) ខេត្តព្រៃវែង នៅថ្ងៃទី២៤ កក្កដា មានប្រតិកម្មចំពោះសេចក្តីជូនដំណឹងរបស់ក្រសួងអប់រំ ពីការកាត់ប្រាក់បៀវត្សរ៍។

ដោយ វណ្ណ វិចារណ៍
2012-07-25

h072412sv.mp3

ពួកគាត់រិះគន់ថា ការសម្រេចរបស់ក្រសួងអប់រំស្រេចតែចិត្តនឹកឃើញ។ អតីតមន្ត្រីបណ្ដុះបណ្ដាលរបស់គណៈកម្មការខេត្តរៀបចំការបោះឆ្នោតខេត្តព្រៃវែង និងជាគ្រូបង្រៀននៅវិទ្យាល័យ តាគោក ស្រុកព្រះស្ដេច លោក ហ៊ឹម ផល្លី មានប្រសាសន៍ថា ព្រោះតែជីវភាពខ្វះខាត និងចង់ជួយការងារសង្គម លោកសម្រេចចិត្តទៅធ្វើជាបុគ្គលិកជាប់កិច្ចសន្យារបស់ គ.ខ.ប។ លោកបន្តថា កាលពីខែមីនា ឆ្នាំ២០១២ ក្រសួងអប់រំបានចេញសេចក្តីជូនដំណឹងមួយបញ្ជាក់ថា បុគ្គលិកគ្រូបង្រៀនទៅធ្វើការងារ គ.ខ.ប ត្រូវបានរក្សាប្រាក់ខែនៅដដែល។

លោកបន្ថែមថា លុះដល់ខែឧសភា ក្រសួងអប់រំស្រាប់តែចេញសេចក្តីសម្រេចមួយទៀត ដោយប្រកាសថា កាត់ប្រាក់បៀវត្សរ៍មន្ត្រីអប់រំទៅវិញ៖ «ខាងមន្ទីរគេប្រាប់ឲ្យយើងយកលុយទៅបង់ឲ្យគេរយៈពេល៤ខែ។ ខ្ញុំទៅរកឯណាទៅបង់ឲ្យគេ ឲ្យហើយ ស្រាប់តែឲ្យរកលុយសងវិញ ខ្ញុំរកលុយសងវាមិនបាន ទូទាំងប្រទេស២៤ខេត្ត-ក្រុង កាត់តែ១៣ខេត្ត»។

លោក ហ៊ឹម ផល្លី បន្តថា លោកស្នើឲ្យក្រសួងអប់រំលុបចោលការទារលុយពីពួកគាត់ ព្រោះពួកគាត់កំពុងតែខ្វះខាតជីវភាពប្រចាំថ្ងៃ។

ពលរដ្ឋម្នាក់រស់នៅខេត្តព្រៃវែង ដែលមានឪពុកជាមន្ត្រីអប់រំ ធ្វើការងារបោះឆ្នោតដែរនោះ ឈ្មោះ ហឿម សត្យា មានប្រសាសន៍ថា ឪពុកលោកធ្វើការងារបោះឆ្នោតនេះហត់នឿយខ្លាំងណាស់ ហើយសង្ឃឹមថាបានលុយបន្ថែមផ្គត់ផ្គង់ជីវភាពគ្រួសារ។ តែក្រសួងអប់រំចេញប្រកាសមួយហើយមួយទៀត ដោយមិនគិតពីការលំបាករបស់គ្រូបង្រៀនសោះ៖ «មានអារម្មណ៍ថាអយុត្តិធម៌ណាស់ លិខិតមួយចេញថាអត់កាត់ប្រាក់បៀវត្សរ៍អីចឹង នៅពេលគេធ្វើការចប់ ប្រកាសទាមទារប្រាក់ខែវិញ គ្រូទាំងអស់ហ្នឹង មិនទាន់យកលុយទៅសងគេដែរ តែប្រាក់ខែមួយខែមិថុនា ហ្នឹង គេអត់បើកឲ្យទេ»។

វិទ្យុអាស៊ីសេរី មិនអាចទាក់ទងមន្ត្រីអ្នកនាំពាក្យក្រសួងអប់រំ លោក អ៊ិន ថែរ បានទេ នៅថ្ងៃទី២៤ កក្កដា ឆ្នាំ២០១២។

យ៉ាងណាក៏ដោយ ក្រសួងអប់រំបានចេញប្រកាសលេខ ៨០៨អ.យ.ក ប.ល ចុះហត្ថលេខាដោយរដ្ឋមន្ត្រីក្រសួងអប់រំ លោក អ៊ឹម សិទ្ធី នៅថ្ងៃទី៥ មីនា ឆ្នាំ២០១២ ស្ដីពីករណីបុគ្គលិកអប់រំជាប់ឈ្មោះទៅបំពេញការងាររៀបចំការបោះឆ្នោតឃុំ-សង្កាត់ អាណត្តិទី៣។

សេចក្តីជូនដំណឹងនោះបានសរសេរថា សាមីខ្លួនត្រូវបានរក្សាបៀវត្សរ៍អតីតភាពការងារសម្រាប់ឡើងថ្នាក់ និងទទួលសោធននិវត្តន៍។ ប៉ុន្តែនៅថ្ងៃទី១៨ ឧសភា ឆ្នាំ២០១២ ក្រសួងអប់រំបានចេញលិខិតមួយទៀត ដែលចុះហត្ថលេខាដោយរដ្ឋមន្ត្រីក្រសួងអប់រំ លោក អ៊ឹម សិទ្ធី ដដែល នៅក្នុងប្រការ២ បានសរសេរថា ក្នុងរយៈពេលនេះ សាមីខ្លួនមន្ត្រីអប់រំដែលធ្វើការងារបោះឆ្នោត ត្រូវបានអតីតភាពការងារសម្រាប់ការឡើងថ្នាក់ និងទទួលសោធននិវត្តន៍ តែមិនបានប្រាក់បៀវត្សរ៍ទេ។

ស្របពេលគ្នានេះ ប្រធានសមាគមគ្រូបង្រៀនឯករាជ្យ លោក រ៉ុង ឈុន មានប្រសាសន៍ថា ការចូលរួមធ្វើការងារបោះឆ្នោតរបស់គ្រូបង្រៀន ជាការងារសង្គមមួយគួរតែមានការលើកទឹកចិត្ត តែត្រូវបានក្រសួងបំបាក់ស្មារតី ដោយធ្វើការងារមិនច្បាស់លាស់ទៅវិញ។ លោកបន្តថា ក្រសួងអប់រំមានតួនាទីជាអាណាព្យាបាលរបស់គ្រូ ត្រូវតែយកចិត្តទុកដាក់ដោះស្រាយបញ្ហាឲ្យគ្រូបង្រៀន៖ «ក្រសួងត្រូវតែគោរពពាក្យសម្ដីខ្លួនឯង ចង់ឲ្យលោកគ្រូ អ្នកគ្រូ ដែលជួបបញ្ហាហ្នឹង លើកបញ្ហាមកសមាគម សមាគមនឹងដោះស្រាយអន្តរាគមន៍ជូន»។

សេចក្តីជូនដំណឹងរបស់ក្រសួងអប់រំ ចុះថ្ងៃទី១៨ ឧសភា ឆ្នាំ២០១២ ផ្ទុយពីការសម្រេចកាលពីខែមីនា។ ការសម្រេចថ្មី កាត់ប្រាក់បៀវត្សរ៍មន្ត្រីអប់រំនៅក្នុងខេត្តទាំង១៣ រួមមានកំពង់ស្ពឺ មណ្ឌលគិរី កំពង់ឆ្នាំង ព្រៃវែង កែប ស្ទឹងត្រែង ស្វាយរៀង កណ្ដាល បាត់ដំបង កំពង់ធំ ពោធិ៍សាត់ ឧត្តរមានជ័យ បន្ទាយមានជ័យ។ ការសម្រេចចុងក្រោយនេះ កំពុងបង្ខំឲ្យគ្រូបង្រៀន និងបុគ្គលិកអប់រំ រកប្រាក់សងទៅក្រសួងវិញ ខណៈពេលជីវភាពគ្រូកំពុងខ្វះខាត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។