អគ្គលេខាធិការរងអង្គការសហប្រជាជាតិជួបពិភាក្សាជាមួយលោក ហ៊ុន សែន
h082112ob.mp3
ក្រោយជំនួបរវាងនាយករដ្ឋមន្ត្រី ជាមួយលោកស្រីបណ្ឌិត ណូអីឡែន ហៃហ្សឺ លោក អៀង សុផលឡែត ជំនួយការផ្ទាល់នាយករដ្ឋមន្ត្រី ហ៊ុន សែន បានប្រាប់អ្នកសារព័ត៌មានថា លោកស្រីបានថ្លែងកោតសសើរដល់ការអភិវឌ្ឍរបស់ប្រទេសកម្ពុជានាពេលបច្ចុប្បន្ន ដែលមានការផ្លាស់ប្ដូរយ៉ាងខ្លាំង។
កាលពីឆ្នាំ២០០៥ លោកស្រីបានមកជាលើកទី១ កម្ពុជាទើបមានការអភិវឌ្ឍខ្លះៗ។ លោកស្រីបន្ថែមថា ទោះបីកម្ពុជាបានជួបប្រទះវិបត្តិសេដ្ឋកិច្ចពិភពលោក ដូចប្រទេសមួយចំនួន ក៏កម្ពុជានៅមានកំណើនសេដ្ឋកិច្ច ហើយមានការអភិវឌ្ឍប្រកបដោយចីរភាព ក្នុងរយៈពេលដ៏ខ្លី។
ជាមួយគ្នានោះដែរ លោកស្រីបានសសើរដល់លោក ហ៊ុន សែន ដែលបានដឹកនាំការប្រជុំក្នុងនាមជាប្រធានអាស៊ាន ហើយនឹងជំរុញគាំទ្រលើវិស័យសមភាពយេនឌ័រ នៅកម្ពុជា និងបានលើកកម្ពស់វិស័យអប់រំ វិស័យសុខមាលភាព និងកាត់បន្ថយគម្លាតរវាងអ្នកមាន និងអ្នកក្រ ដែលទាំងនោះសុទ្ធតែជាកត្តាសំខាន់ ដើម្បីជំរុញការអភិវឌ្ឍ នៅក្នុងព្រះរាជាណាចក្រកម្ពុជា។
ចំណែកនាយករដ្ឋមន្ត្រី ហ៊ុន សែន បានជម្រាបអំពីការអភិវឌ្ឍនៅកម្ពុជាថា វិបត្តិសេដ្ឋកិច្ចឆ្នាំ២០០៨ ពុំមានផលប៉ះពាល់ខ្លាំងដល់កម្ពុជាទេ ព្រោះកម្ពុជានៅមានកំណើនសេដ្ឋកិច្ច ទោះបីនៅមានកម្រិតទាបក៏ដោយ ហើយបទពិសោធន៍យកមកដោះស្រាយ គឺវិបត្តិសេដ្ឋកិច្ចអាស៊ាន ឆ្នាំ១៩៩៧ គឺយកមកដោះស្រាយ៖
ទី១ គឺរក្សាស្ថិរភាពនយោបាយ។
ទី២ គឺរក្សាម៉ាក្រូសេដ្ឋកិច្ច។
ទី៣ ចាត់វិធានការបម្រុងទុកជាមុនជាមួយធនាគារ។
ទី៤ ផ្តល់ការបណ្ដុះបណ្ដាលកម្មករដែលគ្មានជំនាញ ឲ្យមានបទពិសោធន៍ និងមុខរបរថ្មី។
ចំពោះការអភិវឌ្ឍនប្រកបដោយចីរភាពនោះ លោកនាយករដ្ឋមន្ត្រីថ្លែងប្រាប់លោកស្រីបណ្ឌិត ហៃហ្សឺ ថា បានលុបចោលឡូនេសាទទាំងស្រុង និងកំណែទម្រង់ដីធ្លី ដែលមានយុវជនស្ម័គ្រចិត្តរាប់ពាន់នាក់ កំពុងធ្វើការចុះវាស់ដីជូនពលរដ្ឋ។
ចំពោះវិស័យអប់រំ និងការកាត់គម្លាតរវាងអ្នកមាន និងអ្នកក្រនោះ លោក ហ៊ុន សែន បានជម្រាបជូនថា រដ្ឋាភិបាលបានចេញសេចក្តីថ្លែងការណ៍នៅឆ្នាំ២០០២ ដែលអនុវត្តបានជោគជ័យ គឺជំរុញហេដ្ឋារចនាសម្ព័ន្ធប្រឡាយទឹក ផ្លូវថ្នល់ ជាដើម ដើម្បីឲ្យការអភិវឌ្ឍនៅជនបទរីកចម្រើន។ ចំពោះការអប់រំនៅពេលបច្ចុប្បន្ន គឺសាលាដើររកសិស្ស មិនមែនសិស្សដើររកសាលាដូចមុនទេ។ ប៉ុន្តែបញ្ហាប្រឈម គឺគុណភាពនៃការអប់រំទៅវិញ នាពេលបច្ចុប្បន្ន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
