ពលការិនី តាំងយូ ធ្វើការនៅម៉ាឡេស៊ីផ្ដល់ដំណឹងមកផ្ទះបន្ទាប់ពីគ្មានដំណឹងជិត២ឆ្នាំ
h081712us-a1.mp3
ការជួបគ្នាតាមទូរស័ព្ទរវាងម្តាយឪពុក ជាមួយកូនស្រីធ្វើការនៅប្រទេសម៉ាឡេស៊ី នេះ បានកើតមានឡើងក្រោយពីម្តាយពលការិនី ជិន តាំងយូ បានសុំទៅអង្គការអាដហុក ខេត្តព្រះវិហារ ឲ្យជួយស្វែងរកដំណឹង កាលពីថ្ងៃទី១៣ សីហា ហើយវិទ្យុអាស៊ីសេរី ក៏បានផ្សាយអំពីព័ត៌មាននេះ។
ក្រោយពេលទទួលពាក្យសុំឲ្យជួយ អង្គការអាដហុក ខេត្តព្រះវិហារ បានទូរស័ព្ទទាក់ទងជាមួយក្រុមហ៊ុន ហ្វីលីម៉រ (Phlimore) ហើយបុគ្គលិកក្រុមហ៊ុននៅក្រុងភ្នំពេញ បានសន្យាថានឹងខិតខំស្វែងរកព័ត៌មានអំពីពលការិនី ជិន តាំងយូ នោះ។
អ្នកស្រី ធឿន ហឿន អាយុ៤៧ឆ្នាំ ជាម្តាយពលការិនី ជិន តាំងយូ បានរៀបរាប់អំពីការសប្បាយរីករាយក្នុងគ្រួសារ ក្រោយពេលបានទទួលដំណឹងអំពីកូនស្រី ដែលនៅរស់ និងកំពុងបន្តធ្វើការនៅប្រទេសម៉ាឡេស៊ី ថា ជារឿងមួយដែលអ្នកស្រីរង់ចាំជាយូរមកហើយ។
អ្នកស្រី ធឿន ហឿន៖ «រំភើបអរណាស់ខ្ញុំ។ អរដោយសារបានដំណឹងកូន ហើយកូនឆ្លើយមកថា រស់នៅបានសុខស្រួល។ ចាស ខ្ញុំសុខសប្បាយទេម៉ែ មកពីខ្ញុំអត់ហ៊ានសុំថៅកែ។ ខ្ញុំសួរថា ម៉េចបានជាកូនមិនផ្តល់ដំណឹងឲ្យម៉ែ? ថាខ្ញុំអត់ហ៊ាន។ កាលមុនសរសៃប្រសាទ ឥឡូវបានដេកបានអីបាន ឮសូរកូនផ្តល់ដំណឹងមក។ ចាស តេប្រាប់បងប្អូននៅស្រុកទាំងអស់ចាស។ បងប្អូនខ្ញុំនៅកំពង់ចាម ច្រើនណាស់គេថាអរគុណ។ ចាស យប់មិញខ្ញុំបានទាក់ទងទៅ។ គេថាម៉ោង៨យប់ ឲ្យខ្ញុំតេទាក់ទងទៅជួបកូន។ តែដល់ពេលតេទៅ មិនដឹងធាតុអាកាសយ៉ាងម៉េច បានជានិយាយទៅអត់ច្បាស់»។
ពលការិនី ជិន តាំងយូ បានចាកចេញពីប្រទេសកម្ពុជា ទៅធ្វើការតាមផ្ទះនៅប្រទេសម៉ាឡេស៊ី តាមរយៈក្រុមហ៊ុនជ្រើសរើសពលករមួយឈ្មោះ ហ្វីលីម៉រ កាលពីថ្ងៃទី៦ ខែតុលា ឆ្នាំ២០១០។ តាំងពីពេលចាកចេញទៅ ក្រុមគ្រួសារមិនដែលបានទទួលដំណឹងអំពីសុខទុក្ខឡើយ។ ម្តាយពលការិនីនេះ បានដាក់លិខិត សាកសួរព័ត៌មានជាច្រើនដងពីកូនស្រី តែកន្លងមកមិនបានទទួលការឆ្លើយតបពីក្រុមហ៊ុនឡើយ។ រហូតមកដល់ពេលនេះ ទើបបានទទួលព័ត៌មានថា នាងរស់នៅ និងធ្វើការនៅប្រទេសម៉ាឡេស៊ី មានសេចក្តីសុខជាធម្មតា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
