ទិវាសន្តិភាពពិភពលោកថ្ងៃទី២១ កញ្ញា

ក្រុមការងារដើម្បីសន្តិភាព ដែលមានគ្នាជិត២ពាន់នាក់ គ្រោងដើរដង្ហែក្បួន និងធ្វើសមាធិអប់រំចិត្ត ដើម្បីប្រារព្ធទិវាសន្តិភាពពិភពលោក នៅថ្ងៃទី២១ ខែកញ្ញា ឆ្នាំ២០១២។

ដោយ ខែ សុណង
2012-09-21

h092012ko-a1.mp3

នៅក្នុងសេចក្ដីប្រកាសព័ត៌មានរបស់ក្រុមការងារសន្តិភាព បានឲ្យដឹងថា ប្រជាពលរដ្ឋដែលស្រលាញ់សន្តិភាព នឹងប្រារព្ធទិវាសន្តិភាព នៅរាជធានីភ្នំពេញ និងខេត្តចំនួន៧ទៀត គឺខេត្តបាត់ដំបង កំពង់ចាម កំពង់ឆ្នាំង បន្ទាយមានជ័យ កំពង់ស្ពឺ ព្រះវិហារ និងខេត្តសៀមរាប ដើម្បីលើកកម្ពស់សន្តិភាពនៅថ្នាក់តំបន់ និងទូទាំងពិភពលោក។ ការប្រារព្ធនេះ គឺមានកិច្ចសហប្រតិបត្តិការពីរដ្ឋាភិបាល ដៃគូអភិវឌ្ឍន៍ អន្តរសាសនា ក្រុមយុវជន និងប្រជាពលរដ្ឋទាំងអស់ ធ្វើការដើម្បីសន្តិភាពដែលជាមធ្យោបាយសម្រាប់ការរស់នៅប្រកបដោយភាពសុខដុមរមនា និងសុភមង្គល។

សមាជិកក្រុមការងារដើម្បីសន្តិភាព ដែលជាអ្នកសម្របសម្រួលកម្មវិធីនេះនៅភ្នំពេញ លោក ទីម ម៉ាឡៃ មានប្រសាសន៍នៅថ្ងៃទី២០ កញ្ញា ថា ពិធីនេះគឺប្រារព្ធឡើងក្នុងគោលដៅបង្ហាញសារដល់សាធារណជន ឲ្យយល់ដឹងកាន់តែច្បាស់អំពីអ្វីទៅជាសន្តិភាពក្នុងពិភពលោក និងសន្តិភាពរវាងចិត្តរបស់បុគ្គលម្នាក់ៗ៖ «បាទ ស្ថានភាពបច្ចុប្បន្នយើងចង់និយាយថាមានដែរ ប៉ុន្តែយើងចង់ឲ្យមានសន្តិភាពដូចជាពាក្យមួយបានពោលថា សន្តិភាពគឺជាដង្ហើម បើសិនជាវាអត់ដកទេ វាត្រូវដាច់។ អ៊ីចឹងចង់រំលឹកឲ្យប្រជាពលរដ្ឋ ឬក៏យុវជន ឬសាសនាផ្សេងៗទាំងអស់ហ្នឹង គាត់ចូលរួមរំលឹកពង្រឹងសន្តិភាព បើសិនយើងសង្កេតឃើញប្រជាពលរដ្ឋមានការភ័យខ្លាចក៏មិនទាន់រឹងមាំដែរ»។

ប៉ុន្តែ បណ្ដាញក្រុមការងារដើម្បីសន្តិភាព បានឲ្យដឹងថា សាលារាជធានីភ្នំពេញបានហាមឃាត់ក្រុមនេះមិនឲ្យប្រារព្ធនោះទេ។ ទោះជាយ៉ាងណាក៏ដោយ ក្រុមការងារនេះអះអាងថា នៅតែបន្តការប្រារព្ធពិធីរបស់ពួកគេដដែល។

ទិវាសន្តិភាពពិភពលោកត្រូវបានបង្កើតឡើងដោយសេចក្ដីសម្រេចរបស់អង្គការសហប្រជាជាតិមួយ ក្នុងឆ្នាំ១៩៨១ គឺចំពេលជាមួយការបើកមហាសន្និបាតអង្គការសហប្រជាជាតិ។ ទិវាសន្តិភាពលើកដំបូង ត្រូវបានប្រារព្ធឡើងកាលពីខែកញ្ញា ឆ្នាំ១៩៨២។ ក្នុងឆ្នាំ២០០២ មហាសន្និបាតអង្គការសហប្រជាជាតិ បានប្រកាសជាផ្លូវការ យកថ្ងៃទី២១ កញ្ញា ជាថ្ងៃអចិន្ត្រៃយ៍សម្រាប់ទិវាសន្តិភាព៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។