យុវតីស្ម័គ្រចិត្តចូលរួមវាស់វែងដីជូនប្រជាពលរដ្ឋនៅខេត្តក្រចេះ

ក្នុងយុទ្ធនាការបញ្ចប់ទំនាស់ដីធ្លីនៅកម្ពុជា ដែលផ្ដើមចេញពីការចុះវាស់វែងដីធ្លីជូនប្រជាពលរដ្ឋ ដោយក្រុមនិស្សិតស្ម័គ្រចិត្តតាមគោលនយោបាយចាស់សកម្មភាពថ្មីរបស់រដ្ឋាភិបាល មាននិស្សិតជិត២ពាន់នាក់ កំពុងបំពេញបេសកកម្មនេះលើទំហំដី១លានហិកតារ ជូនប្រជាពលរដ្ឋជាង៣០ម៉ឺនគ្រួសារនៅទូទាំងប្រទេសកម្ពុជា។

ដោយ ទេព សុរ៉ាវី
2012-08-09

h080812tn.mp3

ក្រុមនិស្សិតស្ម័គ្រចិត្តចុះវាស់វែងដីចំនួន៧ក្រុម និងក្រុមអាជ្ញាធរ នៅស្រុកស្នួល ខេត្តក្រចេះ កាលពីថ្ងៃទី៨ ខែសីហា ឆ្នាំ២០១២។

RFA/Tep Soravy

នៅឯស្រុកស្នួល ខេត្តក្រចេះ យុវតីដែលបានស្ម័គ្រចិត្តនៅក្នុងក្រុមចុះវាស់វែងដីធ្លី ចាត់ទុកបេសកកម្មរបស់ខ្លួនជាជំហានថ្មីមួយសម្រាប់ស្ត្រី ដើម្បីឲ្យពួកគេមានឱកាសចូលរួមអភិវឌ្ឍក្នុងកិច្ចការសង្គម។

ក្នុងទិសដៅមិនរួញថយនឹងការនឿយហត់ យុវតី ហ៊ីង ជ័យសុលឿន អាយុ២១ឆ្នាំ ជានិស្សិតឆ្នាំទី៣ នៃសកលវិទ្យាល័យភូមិន្ទកសិកម្ម បានស្ម័គ្រចិត្តចូលរួមក្រុមយុវជនស្ម័គ្រចិត្តចុះវាស់វែងដីធ្លីជូនប្រជាពលរដ្ឋ តាមគោលការណ៍រដ្ឋាភិបាល។ នាងត្រូវបានបញ្ជូនមកជាមួយក្រុមនិស្សិតដទៃទៀត សរុបជាង៨០នាក់ ដើម្បីវាស់ដីនៅក្នុងស្រុកស្នួល ខេត្តក្រចេះ។

កញ្ញា ហ៊ីង ជ័យសុលឿន ឲ្យដឹងនៅថ្ងៃទី៨ ខែសីហា ថា ក្នុងរយៈពេលជាង១ខែ ដែលនាងចុះមកធ្វើការជាយុវជនស្ម័គ្រចិត្ត នាងបានសម្របខ្លួនរៀនរស់នៅជាមួយអ្នកភូមិ ចេះហាត់ពត់ខ្លួនឯង ដែលធ្លាប់តែរស់នៅស្រួលនៅទីក្រុងភ្នំពេញ ទៅរស់នៅតាមជនបទ និងអាចធ្វើកិច្ចការមួយចំនួនដើម្បីសង្គម។

នាងស្នើឲ្យយុវតីងាកមកចាប់អារម្មណ៍កិច្ចការជួយសង្គមឲ្យបានច្រើន និងហ៊ានពុះពារឧបសគ្គមួយចំនួន ដើម្បីអភិវឌ្ឍខ្លួនឯងឲ្យទៅជាមនុស្សម្នាក់ ដែលអាចធ្វើកិច្ចការបានដូចជាបុរស៖ «ចុះធ្វើការងារច្រើនអីចឹង យល់ពីសង្គមយល់ពីការរស់នៅ ងាយកុំឲ្យប្រឈមមុខនឹងការដែលគេហៅថាស្ត្រីវិលចង្ក្រានមិនជុំ។ ធ្លាប់រស់នៅទីក្រុង មកផ្លាស់ប្ដូររស់នៅជនបទជាមួយប្រជាជន»។

យុវតីម្នាក់ទៀតឈ្មោះ ឆាយ សុលីន អាយុ២០ឆ្នាំ ដែលចុះទៅវាស់វែងដីធ្លី នៅឃុំ២ធ្នូ ឲ្យដឹងដែរថា ការចុះមកវាស់វែងដីធ្លីជួបការលំបាកខ្លះ ដោយសារតែក្រុមការងារពួកគេត្រូវដើរឆ្ងាយនៅក្នុងព្រៃ។ តែទោះជាយ៉ាងណា ឧបសគ្គទាំងនោះមិនមែនជាបញ្ហាចោទនោះទេ ហើយនាងចាត់ទុកថាវាជាបទពិសោធន៍ក្នុងជីវិតសម្រាប់យុវជន ហើយយុវជនអាចចេះអ្វីដែលគេហៅថាអត់ធ្មត់ និងតស៊ូដើម្បីបំពេញការងារឲ្យចប់ចុងចប់ដើម៖ «ស្រីៗនិងប្រុសៗ ធ្វើការជាមួយគ្នាអីចឹង យើងឃើញថាថ្ងៃក្រោយទៅគ្មានថាប្រកាន់ការងារ ថាស្រីៗអត់អាចធ្វើបានទេ យើងអាចមកជួយគ្នាបាន»។

ចំពោះការងារវាស់ដីវិញ យុវនិស្សិតស្ម័គ្រចិត្ត បានឲ្យដឹងថា ការងារសំខាន់ដែលត្រូវបំពេញមានបីផ្នែក។ ផ្នែកទី១ គឺទទួលខុសត្រូវផ្សព្វផ្សាយអំពីការងារវាស់ដី ដើម្បីឲ្យប្រជាពលរដ្ឋដឹងអំពីពេលវេលា និងទីកន្លែងដែលក្រុមការងារចុះទៅវាស់ដី។ ផ្នែកទី២ គឺក្រុមទទួលខុសត្រូវខាងបំពេញសលាកបត្រ បែបបទ ដើម្បីឲ្យប្រជាពលរដ្ឋបានទទួលប្លង់កម្មសិទ្ធិបឋម ដែលភាគច្រើន កិច្ចការនេះយុវតីក្នុងក្រុមជាអ្នកទទួលខុសត្រូវ។ ផ្នែកទី៣ គឺក្រុមចុះវាស់ជាក់ស្តែងជាមួយមន្ត្រីអាជ្ញាធរមូលដ្ឋាន មន្ត្រីមន្ទីររៀបចំដែនដី នគរូបនីយកម្ម និងសំណង់ និងប្រជាពលរដ្ឋ ដើម្បីកំណត់ព្រំដីឲ្យបានច្បាស់លាស់។

លោក អ៊ុច វីរៈ អនុប្រធានការិយាល័យសុរិយោដី នៃមន្ទីរដែនដី នគរូបនីយកម្ម ដែលដឹកនាំក្រុមយុវជនស្ម័គ្រចិត្តចុះវាស់វែងដីនៅស្រុកស្នួល ឲ្យដឹងថា លោកមានការលំបាកខ្លះដែរចំពោះការណែនាំនូវជំនាញបច្ចេកទេសដល់ក្រុមនិស្សិតស្ម័គ្រចិត្តទាំងនោះ ដោយលោកបានពន្យល់ថា ពួកគេមិនមានជំនាញបច្ចេកទេសបំពេញឯកសារ តែអាចមានសមត្ថភាពវាស់វែងដី ដោយប្រើម៉ាស៊ីន ជី.ភី.អេស (GPS)៖ «មិនជាពិបាករៀនទេ ព្រោះមនុស្សចេះខ្លះហើយ រឿងវាស់វែង គាត់ចេះតាម ជី.ភី.អេស តែការងារបច្ចេកទេសសរសេរទម្រង់បែបបទ គាត់យល់ដឹងតិច»។

លោក អ៊ុច វីរៈ បានប្រដូចសកម្មភាពចុះវាស់វែងដីនេះ ជាការចុះកម្មសិក្សាមួយរបស់ក្រុមនិស្សិត ហើយពួកគេអាចមានបទពិសោធន៍ច្រើន ទាំងក្នុងការងារ និងជីវភាពរស់នៅ ក្រោយពីបញ្ចប់កម្មសិក្សានេះ។

មន្ត្រីសុរិយោដីរូបនេះបន្តថា ក្រុមនិស្សិតបានវាស់វែងដីធ្លីនៅភូមិគ្រញូង ក្នុងឃុំ២ធ្នូ រួចហើយ ដែលបានជិត៩០០ក្បាលដី ដែលតំបន់នោះអ្នកភូមិមានទំនាស់ដីធ្លីជាមួយក្រុមហ៊ុន ស៊ី អាយ វី (CIV)។ ក្រុមនិស្សិតនឹងបន្តវាស់វែងដីនៅឃុំឃ្សឹម ក្នុងស្រុកស្នួល ដដែល ចាប់ពីថ្ងៃទី៨ ខែសីហា ដែលតំបន់នេះអ្នកភូមិមានទំនាស់ដីធ្លីជាមួយក្រុមហ៊ុនចំនួន២ គឺក្រុមហ៊ុន សុវណ្ណ ឫទ្ធី និងក្រុមហ៊ុន ហួត សម្បត្តិ។

ដីដែលក្រុមយុវជនស្ម័គ្រចិត្តត្រូវចុះទៅវាស់នោះ មានដីសម្បទាន ដីព្រៃសម្បទាន និងដីទំនាស់ ដែលប្រជាពលរដ្ឋកាន់កាប់ជាក់ស្ដែង។ ប្រភពមន្ត្រីក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា មានដីប្រមាណ១លានហិកតារ ដែលត្រូវវាស់ ដើម្បីធ្វើប្លង់កម្មសិទ្ធិឲ្យប្រជាពលរដ្ឋចំនួន ៣៥ម៉ឺនគ្រួសារ នៅទូទាំងប្រទេស៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។