យុវជនស្ម័គ្រចិត្តចុះវាស់វែងដីមួយក្រុមជួយឧបត្ថម្ភគ្រួសារចាស់ជរា

ក្រុមយុវជនស្ម័គ្រចិត្តចុះវាស់វែងដីមួយក្រុម បានជួយគ្រួសារប្រជាពលរដ្ឋចាស់ជរា និងក្រីក្រមួយ នៅភូមិខ្នាទៃមោក ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង។

ដោយ មណ្ឌល កែវ
2012-09-04

h090312pb.mp3

យុវជនស្ម័គ្រចិត្ត ផ្ដល់អំណោយដល់ចាស់ជរា ៣០៥

០៣-កញ្ញា-២០១២៖ ក្រុមយុវជនស្ម័គ្រចិត្តវាស់វែងដីធ្លីក្រុមទី៨៩ នៅឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង យកអំណោយទៅជូនគ្រួសារលោកយាយ ជៀម ឃីម។

RFA/Mondul keo

និស្សិតឈ្មោះ ជា សេង ជាប្រធានក្រុមយុវជនស្ម័គ្រចិត្តចុះវាស់វែងដីធ្លីក្រុមទី៨៩ នៃខេត្តកំពង់ឆ្នាំង បានឲ្យដឹងនៅព្រឹកថ្ងៃទី៣ កញ្ញា ថា ក្រុមទី៨៩ ទទួលបន្ទុកចុះវាស់វែងដីជូនប្រជាពលរដ្ឋ នៅឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង។ យុវជន ជា សេង បន្តថា ក្នុងបេសកកម្មចុះវាស់វែងនេះ ប្អូនបានជួបប្រជាពលរដ្ឋចាស់ជរា និងក្រីក្រមួយគ្រួសារ។ លោកតា គឹម ហ៊ន អាយុ៧៦ឆ្នាំ កំពុងមានជំងឺមិនអាចក្រោកដើររួច ចំណែកលោកយាយជាប្រពន្ធឈ្មោះ ជៀម ឃីម អាយុ៨១ឆ្នាំ បានមកសុំចុះបញ្ជីដីធ្លីរបស់គាត់។

យុវជន ជា សេង៖ «ដោយសារសេចក្ដីស្រឡាញ់របស់ក្រុមការងារយុវជន ក្មួយក៏ដូចជាការណែនាំរបស់សម្ដេចអគ្គមហាសេនាបតីតេជោ ហ៊ុន សែន និងលោកជំទាវ ឲ្យយកចិត្តទុកដាក់ចំពោះបងប្អូនប្រជាពលរដ្ឋក្រីក្រ ក្មួយក៏បានពាំនាំអំណោយមួយចំនួន ដែលបានមកពីការឧបត្ថម្ភរបស់ថ្នាក់ដឹកនាំគ្រប់លំដាប់ថ្នាក់ ទៅចែករំលែកជូនគ្រួសារនេះ»។

យុវជន ជា សេង ក៏បានឲ្យដឹងដែរថា ដោយឃើញលោកយាយមកធ្វើការចុះបញ្ជីដោយផ្ទាល់ ប្អូនមានការងឿងឆ្ងល់ ក៏ឲ្យសមាជិកក្រុមការងារតាមពិនិត្យមើលផ្ទះសម្បែង ទើបដឹងថា គ្រួសារលោកយាយមានជីវភាពក្រីក្រលំបាក និងគ្មានកូនចៅរស់នៅជាមួយ។ ក្រុមយុវជនស្ម័គ្រចិត្តទាំងអស់គ្នា ក៏សម្រេចចិត្តរំលែកគ្រឿងឧបភោគបរិភោគដែលក្រុមយុវជនស្ម័គ្រចិត្តទទួលបានពីថ្នាក់ដឹកនាំខេត្តមួយចំនួន និងរៃអង្គាសលុយគ្នា យកទៅជួយជួសជុលផ្ទះលោកយាយ ជៀម ឃីម៖ «ដោយសារអត្តសញ្ញាណប័ណ្ណគាត់បាត់ គាត់មានតែសំបុត្រកំណើត ទើបក្មួយសួរគាត់ថា មានរូបថតដែរទេ គាត់ថាអត់មានលុយថតរូប ក្មួយក៏បានប្រើអាយផេត (Ipad) ថតឲ្យគាត់ រួចចំណាយលុយផ្ទាល់ខ្លួនផ្ដិតយកមកបិទក្នុងឯកសារ សម្រាប់ការចុះបញ្ជីដីធ្លីរបស់គាត់»។

ទទួលបានការជួយឧបត្ថម្ភពីក្រុមយុវជនស្ម័គ្រចិត្ត លោកយាយ ជៀម ឃីម ត្រេកអរនិយាយមិនចេញ បានត្រឹមតែពាក្យថា អរគុណប៉ុន្មានម៉ាត់ប៉ុណ្ណោះ៖ «យាយអរគុណណាស់ អរគុណចៅៗទាំងអស់ ដែលបានជួយយាយ សុំឲ្យចៅៗបានសុខសប្បាយទាំងអស់គ្នា»។

បន្ទាប់ទទួលបានដំណឹងពីក្រុមយុវជនស្ម័គ្រចិត្ត ស្ដីពីគ្រួសារជនជរាក្រីក្រនេះ កាកបាទក្រហមខេត្តក៏បានផ្ដល់ជំនួយជាគ្រឿងឧបភោគបរិភោគ និងថវិកាមួយចំនួនដល់គ្រួសារជនជរាក្រីក្រនេះដែរ។

ទន្ទឹមនឹងការកោតសរសើរចំពោះក្រុមយុវជនស្ម័គ្រចិត្ត អង្គការសង្គមស៊ីវិលនានា ក្នុងខេត្តបានរិះគន់ចំពោះអាជ្ញាធរដែនដីភូមិ-ឃុំ ថា បានមើលរំលងចំពោះទុក្ខលំបាករបស់ប្រជាពលរដ្ឋក្រីក្រ និងចាស់ជរាក្នុងដែនដីដែលខ្លួនគ្រប់គ្រង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។