មានអ្វីអាងទៀត?
(បទពាក្យ៨)
១. ចាស់ៗអាងស្លាប់ទៅចាប់ជាតិថ្មី ពពួកយុវតីអាងលើក្រែមម្សៅ
យុវជនឈាមរាវអាងភាពកម្លៅ រីជនល្ងង់ខ្លៅអាងភ្លើធ្វើចេះ។
២. មូលធនចក្រពត្តិអាងត្រួតជិះជាន់ និស្សិតបញ្ញវន្តអាងលើតម្រិះ
ឯមនុស្សកម្ជិលអាងការគេចវេះ អ្នកអត់ចំណេះអាងលើកម្លាំង។
៣. អ្នកធំមានប្រាក់អាងសក្ដិអំណាច អ្នកតូចអាងខ្លាចមិនហ៊ានតតាំង
អ្នកល្មោភសង្គ្រាមអាងធ្វើចម្បាំង ឯពួកជើងខ្លាំងអាងកាប់វ៉ៃតប់។
៤. ពួកមហាអំណាចអាងបរមាណូ គំរាមកកូរទ្វីបលោកឥតឈប់
អ្នកប្រាជ្ញអាងឆ្លាតរកផ្លូវទល់ទប់ ពួកមូស្លីមស៊ប់អាងភេរវកម្ម។
៥. ខ្មែរអាងធនធានធម្មជាតិពិសិដ្ឋ អាងឈើប្រណិតអាយុរយឆ្នាំ
អាងកាប់បំផ្លាញជាប់ជាប្រចាំ អាងមើលបំណាំអាត្មានិយម។
៦. មើលចុះត្បូងខ្មែរកំពុងវិនាស ចំណែករ៉ែមាសគ្រឿងចក្រតូចធំ
គេជីកកកាយរំលើងរំលំ ធម្មជាតិស្រែកយំគ្មានអ្នកសង្គ្រោះ។
៧. ឥឡូវបាត់បង់សម្បត្តិធម្មជាតិ បើបណ្ដោយទៀតខ្មែរបាត់ទាំងឈ្មោះ
“COUNTRY FOR SALE” មិនមែនពីរោះ កំពុងតែឆ្ពោះរកគ្រោះអសោចិ៍។
៨. បុព្វហេតុតែមួយមិនអាចគេចកែ ព្រោះតែមានខ្មែរស្គាល់តែប្រយោជន៍
ស៊ីមិនចេះឆ្អែតនាំគ្នាបេះបោច ដល់ជាតិហិនហោចមានអ្វីអាងទៀត?
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
