ដើមត្នោត
១. ត្នោតខ្ពស់ត្នោតលៃ ត្នោតល្អប្រពៃ ត្នោតកេរដូនតា
ត្នោតផ្ដល់រសជាតិ ស្ករផ្អែមណាស់សា អ្នកស្រែចំការ
ចូលចិត្តស្ករត្នោត។
២. មានចាក់ជាដុំ មូលតូចមូលធំ មិនមែនលោកឆោត
រួចចងជាស្រាក់ ស្រួលជាងដាក់ប៉ោត ធ្វើបានគួរកោត
ជាស្នាដៃចាស់។
៣. ស្ករនេះឆ្ងុយឆ្ងាញ់ បើបានចម្រាញ់ វឹកកូរឲ្យណាស់
ក្លាយជាតាំងម៉ែ លើកជូនចាស់ៗ សប្បាយចិត្តណាស់
ស្ថិតក្នុងរោងការ។
៤. ទឹកវាសល្អក់ មិនមែនកខ្វក់ ស្រក់ចេញពីផ្កា
បើយកទៅផ្អាប់ ក្លាយជាសុរា ផឹកច្រើនកាលណា
ខ្លាំងជាងត្រប៉ែ។
៥. បើផ្អាប់ឲ្យយូរ មានរសជាតិជូរ ដូចម្ជូរក្រូចដែរ
ចូលចិត្តញាំភ្លា ត្រីរ៉ស់ តុកកែ ម្ហូបស្រស់ស្រុកស្រែ
ឆ្ងាញ់ពិតណាស់ទៅ។
៦. ត្នោតកេរដីម៉ែ ដាំក្បែរដីស្រែ ហែតាមដងផ្លូវ
ពីភូមិដល់វត្ត ឃើញគ្រប់រដូវ ទេសភាពមាននៅ
លើទឹកដីខ្មែរ។
៧. នេះគឺសម្បត្តិ ធម្មជាតិខ្វែងខ្វាត់ ពីដូនតាម៉ែ-
ឪទុកឲ្យកូន ខិតខំប្រឹងថែ បន្តកេរម៉ែ
ដែលបន្សល់ទុក។
៨. ត្នោតមានតម្លៃ ត្រូវចេះកែច្នៃ ប្រើបានច្រើនមុខ
ស្លឹកយកប្រក់ផ្ទះ ជ្រកភ្លៀងបានសុខ ថ្ងៃមិនចាំងមុខ
ដេកលក់ស្កប់ស្កល់។
៩. ស្លឹកធ្វើជញ្ជាំង បាំងជារនាំង រាំងទប់នឹងខ្យល់
ពីជើងពីត្បូង មិនឲ្យវិលវល់ ជើងក្រានត្រូវខ្យល់
នាំឲ្យបាយឆៅ។
១០. ស្លឹកធ្វើផ្លិតបាន បក់ភ្លើងជើងក្រាន ឆេះផ្ដល់កម្ដៅ
ដាំស្លបាយហូប ជួបជុំកូនចៅ ព្រមទាំងញាតិផៅ
រៀងរាល់យប់ថ្ងៃ។
១១. ធាងបិតធ្វើខ្សែ ចងអ្វីនៅក្បែរ ទុកប្រើជិតដៃ
មិនពិបាករក ស៊កនៅទីទៃ បើនៅក្បែរដៃ
ងាយស្រួលធ្វើជាង។
១២. បើវេញជាខ្សែ ចងគោវាលស្រែ យោងទឹកដាក់ពាង
ចងហាលខោអាវ ព្យួរទោងឲ្យនាង ក្រោមផ្ទះចំហៀង
គ្រាន់លេងសប្បាយ។
១៣. ជាគ្រឿងកម្សាន្ត ឲ្យកូនឋិតបាន លេងកម្សាន្តកាយ
ជៀសវាងដើរលេង នាំឲ្យខ្វល់ខ្វាយ មានហេតុនៅឆ្ងាយ
ពិបាករកតាម។
១៤. ជក់ធ្វើអំបោស សំអាតត្រូវកោស កើបយកសំរាម
ចាក់ក្នុងរណ្ដៅ ឲ្យកូនធ្វើតាម ចាស់ទុំលោកហាម
កុំខ្វះអនាម័យ។
១៥. នេះជាទម្លាប់ ត្រូវស្ដាប់បង្គាប់ ឲ្យមានវិន័យ
រស់ជាអ្នកស្អាត មានអនាម័យ រស់នៅក្នុងន័យ
សុខសាន្តមិនខាន។
១៦. ដើមរឹងដូចថ្ម យកធ្វើសសរ ក៏អាចប្រើបាន
ច្រៀកធ្វើរនាប រលោងដូចចាន ប្រដូចមិនបាន
នឹងឈើដទៃ។
១៧. បើគល់ធំប៉ោង គេលុងប្រហោង ច្នៃបានទូកថ្មី
គ្រាន់អុំឆ្លងព្រែក ឬជិះស្ទូចត្រី បេះត្រកួនខ្ចី
នៅឯបឹងធំ។
១៨. ខ្ញុំរៀបមិនអស់ រាប់នេះហៅចោះ ត្នោតអាចធ្វើនំ
អាកោ នំបត់ បញ្ចុកក្មេងយំ រហូតចាស់ទុំ
ក្នុងរោងការធំ។
១៩. ដល់ខែវស្សា លោកយាយលោកតា នាំគ្នាប្រជុំ
រួមគ្នាធ្វើបុណ្យ នារដូវភ្ជុំ ត្រៀមវេចជានំ
មិនឲ្យខកការ។
២០. ត្នោតមានប្រយោជន៍ ចូរយើងកុំឆោត កាប់កេរដូនតា
បើកាប់ដាំថ្មី ហើយថែរក្សា កុំឲ្យគេថា
កូនឥតមារយាទ៕
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
