កន្លង់ចៅផ្រាយ៉ាបុប្ផាចតុមុខ
(បទពាក្យប្រាំពីរ)
១. Exchange Program បានជួបស្រី ចិន្ដាស្រមៃថ្លៃគ្មានល្ហែ
បុប្ផាភ្នំពេញសមលើសគេ រៀមបានលួចស្នេហ៍ស្រស់នួនល្អង។
២. បងជាកន្លង់មកពីនាយ ប្រទះឆោមឆាយឆើតទងវង
សក់ខ្មៅរលើបនាងតែងក្រង ថ្ពាល់ខួចទាំងសងបងប្រាថ្នា។
៣. នេត្រាក្រឡង់មានមន្តស្នេហ៍ ភក្ត្រដូចដួងខែលើវេហា
សក់អូនរសាយផាយលើស្មា សម្លឹងរៀមរ៉ាមិនដាក់ភ្នែក។
៤. ត្រគាករាងរាវសមអើយសម ដើមទ្រូងមូលក្លំល្អអនេក
ដៃមុំស្រឡូនស្អាតពន់ពេក សាច់ដូចទាវឯកស្រស់អស្ចារ្យ។
៥. គយគន់ទៅម្រាមបន្លាក្រូច ម្រាមដៃមុំតូចដូចបន្លា
ធ្វើឲ្យរូបខ្ញុំកួចស្នេហា លើនាងបុប្ផាចតុមុខ។
៦. រៀនថ្នាក់រួមគ្នាបានមួយឆ្នាំ អកុសលអ្វីកម្មឲ្យជួបទុក្ខ
ខ្ញុំក៏ត្រឡប់វិលទៅស្រុក ខានបានជួបមុខនួនជីវ៉ា។
៧. ទោះបីបងឃ្លាតនួននាថស្រី បងនឹកស្រមៃកាលសិក្សា
អូនតែងឲ្យបងជួយកិច្ចការ របស់កនិដ្ឋាគ្រប់នាទី។
៨. អូនធ្លាប់ហៅបងថាឃុនណា បងហៅជីវ៉ាថាណងនី
អនុស្សារដើមចាន់គិរី អង្គុយសំភីអានសៀវភៅ។
៩. បងបង្រៀនអូនភាសាថៃ រីឯស្រីថ្លៃបង្រៀនខ្មែរ
ពេលឮមាត់បងអានឡែៗ ស្រាប់តែស្រីស្នេហ៍សើចព្រងើយ។
១០. រៀមទ្រាំមិនបានលូកដៃទៅ បិចថ្ពាល់ពាលពៅកែវត្រាណត្រើយ
អូនវិញពៅមិននៅស្ងៀមឡើយ ក្ដិចបងឥតស្បើយព្រោះស្រឡាញ់។
១១. គិតទៅរឿងយើងទាំងពីរប្រាណ ស្ម័គ្រស្មោះសុខសាន្តគ្មានឃ្នាន់ខ្នាញ់
ព្រោះតែរូបយើងមិនចុះចាញ់ ទោះក្ដីស្រឡាញ់ឆ្លងវេហា។
១២. ពេលប្រេសង់តេមុខគេឯង បងគ្មានចំបែងភ័យកាយា
ព្រោះអូនជួយបងរឿងភាសា មិនច្បាស់ម្ដេចម្ដាអូនពន្យល់។
១៣. ភូមិផងរបងជាមួយគ្នា ពេលបងមិនជាអូនតែងខ្វល់
មើលថែទាំបងគ្មានឯកអល់ ទោះបីរវល់អូនមិនថា។
១៤. ណងនីអូនល្អលើសអស់ស្រី នៅក្នុងបូរីដែនរដ្ឋា
សម្បត្តិក៏មានសមចរិយា សុភាពរាបសាជាកូនខ្មែរ។
១៥. បងនឹងឆ្លាក់ទុកក្នុងបេះដូង ចារឈ្មោះទងវងគូរបុព្វេ
បងចង់បានអូនមកថ្នមថែ ឲ្យអូនរស់ក្បែរបងលុះក្ស័យ។
១៥. បងស្នើចាស់ទុំចូលស្ដីស្ងួន ទៅតាមច្បាប់ក្បួនប្រពៃណី
ចាំទុកពាក្យបងណាចរណៃ រៀមនឹងវិលវៃជួបស្រីវិញ។
១៦. ឱចៅផ្រាយ៉ាទន្លេធំ ជួយនាំពាក្យខ្ញុំទៅភ្នំពេញ
កុំឲ្យណងនីទុក្ខទោម្នេញ នាំពាក្យស្រឡាញ់ខ្ញុំប្រាប់នាង។
១៧. យូរណាស់ឆ្នាំក្រោយពេលរៀនចប់ ខ្ញុំនឹងត្រឡប់ដោយឥតល្អៀង
ថ្វីបើរដូវផ្លាស់មិនទៀង ជឿចុះនួននាងបងនៅស្មោះ។
១៨. សង្ឃឹមថាបានគ្នាជាគូរ ដោយការតស៊ូឥតបង់បោះ
ថ្ងៃមួយនឹងបានឮគងឈ្មោះ ប្រគំព្រំប្រោះជ័យស្នេហា។
១៩. ឱក្រុងភ្នំពេញជួយចាំផង រឿងខ្ញុំកន្លងធ្លាប់សច្ចា
ឲ្យជួបស្នេហ៍ស្មោះត្រង់ចិន្ដា រហូតមរណាជាទំនុក។
២០. បងជាកន្លង់ចៅផ្រាយ៉ា អូនជាបុប្ផាចតុមុខ
សូមឲ្យស្នេហ៍យើងកុំជួបទុក្ខ សូមជួបតែសុខក្នុងអាត្មា។
២១. ហ្នឹងហើយរឿងខ្ញុំហើយនិងស្រី រំដួលក្មេងខ្ចីរូបកាយា
សម្ដីសំដៅមានលក្ខណា មារយាទចរិយាក្រៃណាល្អ។
២២. កំលោះបាងកកសូមជួបមុំ គ្រប់ៗជាតិកុំឃ្លាតបវរ
សម្បុរខ្មៅស្រស់ពូជអង្គរ ចិត្តស្មោះចិត្តធម៌គឺបុប្ផា។
២១. សូមអស់លោកអ្នកមានខន្តី ដល់រូបកវីខ្ញុំផងណា
ពាក្យពេចន៍ខុសឆ្គងយ៉ាងម្ដេចម្ដា ប្រាប់ដល់គុណ្ណាខ្ញុំបាទផង។
២២. ព្រោះមិនបានគ្រោងទុកថាខុស បែរជាកំហុសកើតរហង់
ទោះបីជាខ្ញុំខំផ្ចិតផ្ចង់ តែកំហុសឆ្គងនៅតែមាន។
២៣. សូមអស់ញាតិមិត្តអធ្យាស្រ័យ ចំពោះកវីទើបតែរៀន
វិជ្ជាតែងកាព្យតាមធនធាន សៀវភៅដែលមាននៅសេសសល់៕
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
