១-មើលចុះស្រុកខ្មែរ មិនថាក្រុងស្រែ ផ្សារកើតច្រើនណាស់ មានតូចមានធំ ដូចផ្លុំស្អេកស្កះ លូតលាស់ក្រៃក្រាស់ ដេរដាសកើតកើន។
២-មើលចុះស្រុកស្រែ ឥឡូវផ្លាស់ប្រែ ផ្សារកើតឡើងច្រើន ពីតូចទៅធំ ត្រសុំរន្ថើន គឺរីកចម្រើន កើនគ្មានឈប់ឈរ។
៣-ផ្សារកើតច្រើនហើយ មនុស្សមិនកន្តើយ មូលមីរខ្មៅមរ ខ្លះមកខ្លះទៅ ខ្លះនៅកៀងគរ អ្នករឹងជំហរ គរឈើធ្វើផ្ទះ។
៤-ផ្ទះជុំវិញផ្សារ សង់ឡើងត្រៀបត្រា ម្នីម្នារូតរះ ធ្វើតាមចំណង់ ចិត្តចង់ជម្នះ លៃយកតែឈ្នះ ផ្ទះអ្នកជិតខាង។
៥-មុនពេលសង់ផ្សារ កើតមានបញ្ហា អ្នកខ្លះឈរកាង ជួរក្រោយជួរមុខ វាយលុកកសាង ធ្វើតូបបើកហាង សាងសង់ទិញលក់។
៦-មើលទៅក្នុងផ្សារ សែនអនិច្ចា ដើរកាត់តែភក់ ពេលចូលដល់ក្នុង ស្លៅស្លុងចង់ឈ្លក់ អ្នកទិញវីវក់ អ្នកលក់ងីងើ។
៧-ភ្លៀងធ្លាក់កាលណា ទឹកលិចពេញផ្សារ នាំគ្នាឈរមើល ព្រោះផ្ទះជុំវិញ រលេញនៅលើ មុនពេលគេធ្វើ ចាក់ដីឲ្យខ្ពស់។
៨-ផ្ទះខ្ពស់ជាងផ្សារ ពេលភ្លៀងឆ្លេឆ្លា សំឡេងទ្រគោះ លូខូចវរវឹក លិចទឹកកើតឈ្លោះ ធំជ្រាំដូចជ្រោះ ពោះចាប់ផ្ដើមលាន់។
៩-រឿងសាងសង់ផ្សារ ត្រូវតែចាត់ការ ក្រឡាប្រព័ន្ធ រៀបចំខ្វាត់ខ្វែង ចាត់ចែងបន្ទាន់ ឲ្យបានគ្រប់គ្រាន់ ប្រព័ន្ធទឹកហូរ។
១០-រៀបផ្សាររួចស្រេច ទើបចាំសម្រេច សង់ផ្ទះផង់ផូរ ធ្វើមានរបៀប រយរៀបដោះដូរ កុំឲ្យជាប់សូរ ទឹកហូរបានស្រួល។
១១-មុនគឺកំហុស កែកុនខាត់ដុស កុំឲ្យធំឈួល រៀបចំប្លង់មេ រិះរេសម្រួល ដីស្រស់ដូចទួល ស្រួលលក់ដូរទិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។