ការបណ្តុះផ្សិតបានទទួលជោគជ័យ ឬមិនបានច្រើនស្ថិតនៅនឹងការរក្សាភាពស្អាតក្នុងកន្លែងបណ្តុះ។ កសិករពេលទំនេរខ្លះធ្វើមិនកើត ព្រោះបណ្តោយឲ្យមានផ្សិត ឬមេរោគចង្រៃលាយឡំក្នុងអាកាស ក្នុងបន្ទប់បណ្តុះ ឬខ្លះផ្សិតដែលបណ្តុះដុះហើយតែផ្តល់ទិន្នផលតិច ដោយសារមេផ្សិតមិនសូវមានកម្លាំង។ល។
ក្នុងការបណ្តុះផ្សិតប្រភេទខ្លះ គេត្រូវសម្អាតបន្ទប់ ឬរោងតម្កលដុំបណ្តុះ ដោយប្រើ permanganate ៥ក្រាម លាយនឹង Formol ១០សង់ទីលីត្រ សម្រាប់ផ្ទៃបន្ទប់ ១ម៉ែត្រការ៉េ ដាក់ក្នុងចានគោម ឬផើង ដើម្បីឲ្យកើតជាឧស្ម័នហុយ សម្លាប់មេរោគក្នុងបន្ទប់ ឬរោងបណ្តុះផ្សិត ដែលគេបិទទ្វារបង្អួចជិត ទុកចោលប្រមាណជា ២ ទៅ ៦ម៉ោង។
ស្តីពីការរក្សាភាពស្អាតប្រាសចាកមេរោគនេះ សំខាន់បំផុតគឺពេលបង្កាត់មេផ្សិត។ តើត្រូវមានឧបករណ៍អ្វីខ្លះក្នុងការបង្កាត់មេនេះ? ទីមួយត្រូវមានដែកតង្កៀបស្រួចវែងធ្វើពីលោហផ្សំដែលគុណសម្បត្តិវា គឺរហ័សក្តៅរហ័សត្រជាក់ ដងវាធ្វើពីអាលុយមីន្យ៉ូម មុនប្រើត្រូវរោលភ្លើងឲ្យចុងវាឡើងក្រហម រួចទុកឲ្យត្រជាក់មុននឹងយកទៅថ្កៀបចាប់។
លោក ថា សុមេធ អ្នកជំនាញខាងការបណ្តុះផ្សិតនៅបឹងត្រកួន ខេត្តបន្ទាយមានជ័យ ពិពណ៌នាអំពីឧបករណ៍មួយនេះដូច្នេះ ៖ «ដូចពេទ្យ ទិញប្រដាប់ពេទ្យយើង ដែកវែងសម្រាប់ចាប់ ដែកហ្នឹងចំនួនប្រហែល ២តឹកកន្លះ ដែកហ្នឹងបើវែងល្អត្រឹម ៣តឹកបានត្រូវ។ ដែកសម្រាប់ចាក់ ម្ជុលចាក់អីដេរហ្នឹង ទិញរបស់ពេទ្យហ្នឹង»។
ទី២ ត្រូវមានចង្កៀងអាល់កុលសម្រាប់ដុតរោលមាត់ដបពេលបន្តក់មេ និងម្ជុល ឬឡាម ដែលគេប្រើក្នុងការឆ្កឹះស្ព័រផ្សិត ៖ «ត្រូវសម្អាត យកឡាមដាក់អាល់កុលយកមកដុសសិន ចង្រ្កៀងអាល់កុលដុតបញ្ឆេះបន្តិចៗបានហើយ ចង្រ្កៀងអាល់កុល»។
ទី៣ គឺធុង ឬទូបញ្ចូលមេធ្វើពីកញ្ចក់ មានប្រហោងសម្រាប់បញ្ចូលដៃ ព្រមទាំងមានកូនទ្វារមួយផង ៖ «ធុងវាហ្នឹងទទឹងប្រហែល ៦តឹក កម្ពស់ប្រហែល ៦តឹកកន្លះ បណ្ដោយប្រហែល ៨តឹក ធ្វើអំពីកញ្ចក់ ហើយគេចោះប្រហោងមូលៗ ល្មមលូកដៃចូលបាន។ ទាំងអស់ត្រូវពីរ ប្រលោះដៃពីរ ទុកចន្លោះកណ្ដាលកន្លែងដើមទ្រូងអឹប ហើយឲ្យគេធ្វើទ្វារបិទបើកសម្រាប់បិទបើក។ យើងបញ្ចូលដាក់អាល់កុលក្នុងហ្នឹង យើងបញ្ចូលតង្កៀបក្នុងហ្នឹង បញ្ចូលដប ឬបញ្ចូលមេក្នុងហ្នឹង។ ដូចលោកអង្គុយចំពីមុខអ៊ីចឹង លោកត្រូវឲ្យគេចោះ ហ្នឹងឈើទេ ក្ដារកុំផ្លាកេក៏បានដែរ អាកន្លែងចោះហ្នឹង កាលណាចោះកញ្ចក់ខ្លាចមុតដៃ។ ក្រៅពីហ្នឹងកញ្ចក់ទាំងអស់ ពីលើកញ្ចក់ ពីក្រោមកញ្ចក់ ចំហៀងកញ្ចក់ ចំពីមុខកញ្ចក់ដែរ តែឈើកន្លែងទ្វារបិទបើក។ ឲ្យគេធ្វើសោចាក់ផង កាលណាទាញចាក់សោ ហើយកន្លែងប្រហោងដែលស៊កដៃចូលហ្នឹង លោកត្រូវមានក្រណាត់បិទប្រហោងហ្នឹង កាលណាលូកដៃចូលអត់អីទេ លូកដៃចូលតាមក្រណាត់ហ្នឹង បើមិនមានប្រហោងយើងលូកចូលអត់កើតទេ ព្រោះកាលណាបញ្ចូលមេគេអត់ឲ្យបញ្ចូលខាងក្រៅទេ ប៉ុន្តែមុននឹងលោកពូដាក់មេដាក់អី លោកពូត្រូវបាញ់អាល់កុលខាងក្នុងធុងសិន បាញ់ហើយដាក់តម្រៀបក្នុងហ្នឹងទៅ ហើយអាល់កុលដបតូចមួយដាក់នៅក្បែរហ្នឹងទៅ ហើយឡាមក៏ដាក់នៅហ្នឹងទៅ ប្រដាប់សម្រាប់បញ្ចូលមេក៏ដាក់នៅក្នុងហ្នឹងទៅ ដែកកេះមួយដាក់នៅក្នុងហ្នឹងទៅ បានលោកពូបាញ់ដៃលោកពូម្ដង បាញ់ហើយទុក ៥នាទី ឲ្យស្ងួតដៃបន្តិច បានលោកពូបញ្ចូលដៃទៅ»។
កាលណាមានគ្រឿងប្រដាប់ និងទូសុវត្ថិភាពនេះហើយ ទើបគេអាចបង្កាត់មេផ្សិតបានដោយគ្មានផ្សិតចង្រៃ ឬមេរោគចូលមកលាយឡំ គឺមេមិនស្អុយ។
មានមិត្តអ្នកស្តាប់សួរថា តើត្រូវស៊ីពេលយូរប៉ុន្មានក្រោយយកដុំបណ្តុះតម្រៀបក្នុងបន្ទប់ទើបផ្សិតអំបោះចាប់ផ្តើមដុះឲ្យយើងដកយកមកបរិភោគ ឬលក់ដូរបាន? លោក ថា សុមេធ ប្រាប់ថា ចាប់ពីដាក់មេទី៣ ទៅក្នុងកញ្ចប់ល្បាយ រយៈពេលប្រមាណ ២៥ថ្ងៃ ទៅ ១ខែ មេនឹងដើរដល់បាតថង់។ លុះមេឡើងសពេញថង់ហើយ ទើបយកទៅតម្រៀបក្នុងរោងបណ្តុះ ហើយប្រមាណមួយអាទិត្យក្រោយមកផ្សិតក៏នឹងដុះឲ្យដកបានហើយ។
លោក ថា សុមេធ ប្រាប់ដូច្នេះ ៖ «ដល់បានហើយ យើងយកទៅតម្រៀប យកទៅតម្រៀបតាមជញ្ជាំង តាមកន្លែងកៀនកោះត្រង់ណាក៏ដោយឲ្យតែកន្លែងមានខ្យល់ចេញចូលខ្លះ កុំឲ្យហប់ពេក ហើយស្រោចទឹកទៅ ស្រោចទឹកតែ ៧ថ្ងៃ បានផ្សិតចេញមកហើយ ៧ថ្ងៃ។ តែមួយខែ ៥ថ្ងៃបានដកហើយ ជួនកាលមួយខែបានដកក៏មាន ប៉ុន្តែជាទូទៅច្រើនមួយខែ ៥ថ្ងៃ មួយខែ ៧ថ្ងៃ។ មានអាខ្លះដុះមុន ជួនកាលបាន ២៨-២៩ថ្ងៃ វាដុះ ប៉ុន្តែមួយខែ ៧ថ្ងៃដឹងតែដុះចេញទាំងអស់តែម្ដង»។
ស្តីពីវិធីតម្រៀបដុំល្បាយ លោក ថា សុមេធ រៀបរាប់ប្រាប់ដូច្នេះ ៖ «តម្រៀបផ្ដេក យកគូទវាទៅទល់នឹងជញ្ជាំង មាត់វាបែរមករកយើងឈរ។ យើងដាក់ល្មមតែជាប់ ជួនកាលយើងដាក់កម្ពស់ ៨តឹក កុំឲ្យវារលំ។ ខ័ណ្ឌវាខ្លីៗទៅអត់ងាយរលំទេ តែដាក់វែងខ្ពស់ពេករលំ។ ខ្ញុំដាក់ ១២ម៉ែត្រ ខ្ញុំខ័ណ្ឌវា ខ័ណ្ឌខ្លី ខ័ណ្ឌប្រហែល ៨តឹកៗ ដាក់បានខ្ពស់»។
លោក ជា បាន អ្នកស្រុកស្វាយស៊ីសុផុន ខេត្តបន្ទាយមានជ័យ បានសួរថា ផ្សិតដែលបណ្តុះដោយខុសបច្ចេកទេសវាពុល តើយើងសម្គាល់យ៉ាងដូចម្តេច ពីព្រោះជួនកាលនៅពេលយើងធ្វើមេមិនបានល្អ ឬធ្វេសប្រហែសតែបន្តិច វាអាចធ្វើឲ្យផ្សិតដែលដុះមកនោះវាពុលបាន។ សូរថាវាមានលក្ខណៈខុសគ្នាយ៉ាងដូចម្តេចទើបអាចដឹងថាផ្សិតដែលដុះមកនោះវាពុល ជៀសវាងពេលយើងបរិភោគហើយទើបដឹង វាហួសពេល និងពិបាកព្យាបាល។
ចំពោះសំណួរនេះងាយឆ្លើយទេ គឺថា ចាប់ផ្តើមពីនៅក្នុងកញ្ចប់ល្បាយក្រោយបន្តក់មេផ្សិតហើយ បើសរសៃស្ព័រដែលចុះមកបាតថង់មានពណ៌ខ្មៅ ឬខៀវ មិនសក្បុស គេត្រូវយកទៅកម្ទេចចោល ព្រោះជាផ្សិតឆ្លងជំងឺ អាចឆ្លងទៅកញ្ចប់បណ្តុះផ្សេងទៀតបាន។ ពេលដុះជាផ្សិតមកហើយគេអាចសម្គាល់ផ្សិតបានតាមពូជដែលគេបណ្តុះ គឺផ្សិតចំបើង ឬផ្សិតត្រចៀកកណ្តុរ ផ្សិតស ផ្សិតអំបោះ វាមានរូបរាងមុខមាត់ច្បាស់លាស់របស់វា មិនចាំបាច់ខ្លាចថាជាផ្សិតពុលឡើយ៕