ថ្នាក់ដឹកនាំជំរុញឲ្យយុវជនដើរតួនាទីសំខាន់ក្នុងអាស៊ាន
2015.08.31
ឧបនាយករដ្ឋមន្ត្រី រដ្ឋមន្ត្រីក្រសួងការបរទេស លោក ហោ ណាំហុង ថ្លែងក្នុងពិធីរដ្ឋាភិបាលកម្ពុជា ប្រគល់ផែនទី យូ.ធី.អិម (UTM) ១៨ផ្ទាំង ទៅអង្គការសហប្រជាជាតិ នាវិមានសន្តិភាព នៅថ្ងៃទី២៦ ខែសីហា ឆ្នាំ២០១៥។
ខណៈ ៦៥% នៃចំនួនប្រជាជនសរុបជាង ៦០០លាននាក់ក្នុងតំបន់អាស៊ាន ជាអ្នកដែលមានអាយុក្រោម ៣៥ឆ្នាំ អាស៊ានបានមើលឃើញពីសារសំខាន់នៃការគិតគូរពីតួនាទីរបស់យុវជន ក្នុងការអភិវឌ្ឍសហគមន៍អាស៊ាន។
ស្របពេលគ្នានេះ យុវជនកម្ពុជា ក៏ត្រូវបានថ្នាក់ដឹកនាំ ជំរុញឲ្យបង្កើនសមត្ថភាពដើម្បីឲ្យពួកគេអាចចាប់យកឱកាសផ្សេងៗ ដែលកើតមានក្នុងពេលដែលតំបន់នេះកំពុងធ្វើសមាហរណកម្មដោយផ្អែកលើសសរស្ដម្ភ ឬសហគមន៍ទាំងបីរបស់អាស៊ាន។
ក្នុងសេចក្ដីថ្លែងការណ៍ទីក្រុងកូឡាឡាំពួរ នាពេលថ្មីៗនេះ មេដឹកនាំអាស៊ាន បានបញ្ជាក់ពីទិសដៅចម្បងរបស់ខ្លួនក្នុងការជំរុញឲ្យមានភាពសកម្មរបស់យុវជន ក្នុងការចូលរួមកសាងសហគមន៍អាស៊ាន។
សហគមន៍ទាំងបីរបស់អាស៊ាន ដែលរួមមាន សហគមន៍សន្តិសុខ និងនយោបាយ សហគមន៍សេដ្ឋកិច្ច និងសហគមន៍សង្គម វប្បធម៌ កំពុងស្ថិតនៅលើវិថីនៃសមាហរណកម្ម ដោយប្ដេជ្ញាសម្រេចឲ្យបានត្រឹមចុងឆ្នាំ២០១៥ នេះ។ នៅលើដំណើរមួយនេះ មេដឹកនាំអាស៊ាន បានសំឡឹងឃើញសក្ដានុពលនៃកម្លាំងប្រជាជនវ័យក្មេងក្នុងតំបន់របស់ខ្លួន ដោយមេដឹកនាំនៃបណ្ដាប្រទេសជាសមាជិកនីមួយៗ សុទ្ធសឹងតែកំពុងផ្សព្វផ្សាយសារស្ដីពីតួនាទីសំខាន់របស់យុវជន ក្នុងការកសាងសហគមន៍មួយនេះ។
នៅកម្ពុជា ប្រជាជនដែលមានអាយុចន្លោះពី ១៥ឆ្នាំ ទៅ ២៩ឆ្នាំ មានចំនួនប្រមាណ ៥លាននាក់ ដែលស្មើនឹងប្រមាណ ៣០% នៃចំនួនប្រជាជនសរុប។ ចំនួននេះ ត្រូវបានព្យាករថា នឹងកើនដល់ ៤០% ត្រឹមឆ្នាំ២០២០។ ទោះចង់ ឬមិនចង់ ពលរដ្ឋវ័យក្មេងទាំងនេះ នឹងក្លាយជាកម្លាំងស្នូលមួយដែលរួមចំណែកក្នុងសហគមន៍អាស៊ានទាំងពេលបច្ចុប្បន្ន និងអនាគត។
ក្នុងការថ្លែងបាឋកថាស្ដីពីយុវជន និងសហគមន៍អាស៊ាន ២០១៥ ទៅកាន់យុវជនជាង ១.០០០នាក់ លោក ហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិ និងជាមន្ត្រីកម្ពុជា ទទួលបន្ទុកសហគមន៍សន្តិសុខ នយោបាយរបស់អាស៊ាន បានគូសបញ្ជាក់ពីសារសំខាន់នៃតួនាទីរបស់យុវជន ដោយលើកឡើងពីកិច្ចការមួយចំនួន ដែលថ្នាក់ដឹកនាំអាស៊ានបានធ្វើកន្លងមក។
ក្នុងបាឋកថានោះដែរ ឧត្ដមមន្ត្រីកម្ពុជា សម្រាប់អាស៊ាន លោកស្រី សឿង រដ្ឋចាវី បានជំរុញឲ្យយុវជនចេះទាញយកផលចំណេញពីសមាហរណកម្មអាស៊ាន តាមរយៈឱកាសផ្សេងៗ ដូចជាអាហារូបករណ៍ ជាដើម៖ «យុវជនមានឱកាសច្រើនណាស់ក្នុងការទទួលការអប់រំក្នុងប្រទេសអាស៊ាន បើនិយាយឲ្យចំទៅ។ ឱកាសក្នុងការទទួលបានហ្នឹង រាល់ថ្ងៃហ្នឹង បើសិនជាប្អូនៗតាមដានឧស្សាហ៍ឆែកមើលនៅក្នុងវែបសាយ (website) របស់អាស៊ាន ឧស្សាហ៍ឆែកមើលនៅក្នុងវែបសាយក្រសួងការបរទេសសាំងហ្គាពួរ (Singapore) របស់ម៉ាឡេ របស់អី មានអាហារូបករណ៍ច្រើនណាស់ដែលគេផ្ដល់ ដែលគេហៅថា អាហារូបករណ៍របស់អាស៊ានតែម្ដង។ អ៊ីចឹងប្អូនអាចខំរៀនដូចឯកឧត្តមឧបនាយករដ្ឋមន្ត្រីគាត់ផ្ដាំផ្ញើអំបាញ់មិញអ៊ីចឹង ថាឲ្យខំរៀនភាសាអង់គ្លេស។ ខំរៀនភាសាអង់គ្លេស ព្រោះភាសាអង់គ្លេសជាភាសាយានរបស់អាស៊ាន»។
ទន្ទឹមនឹងនេះ យុវជនកម្ពុជា ត្រូវបានជំរុញឲ្យបង្កើនសមត្ថភាពចំណេះដឹងទូទៅ សមត្ថភាពជំនាញ និងភាសាអង់គ្លេស ដែលជាភាសាយានរបស់អាស៊ាន រួមទាំងភាសាដទៃទៀតដែលប្រទេសក្នុងតំបន់អាស៊ាននិយមប្រើប្រាស់។
ការសម្រេចបានសហគមន៍សេដ្ឋកិច្ចអាស៊ានឆ្នាំ២០១៥ មានន័យថា លំហូរនៃទំនិញ សេវាកម្ម ពលកម្មជំនាញ មូលធន និងការវិនិយោគ នឹងមានលក្ខណៈសេរីនៅក្នុងប្លុកអាស៊ាន ដែលមានសមាជិកចំនួន ១០ប្រទេស។ ខណៈកាលកំណត់នៃសមាហរណកម្មកាន់តែខិតជិតចូលមកដល់ សមត្ថភាពជំនាញរបស់យុវជនកម្ពុជា នៅតែជាបញ្ហាប្រឈមមួយ ដែលអ្នកសេដ្ឋកិច្ចមើលឃើញ។
ទាក់ទងបញ្ហាសមត្ថភាពរបស់យុវជនកម្ពុជា តួលេខចុងក្រោយស្ដីពីភាពគ្មានការងារធ្វើ បង្ហាញថា ០,៣% នៃចំនួនប្រជាជនសរុបជាង ១៥លាននាក់នៅកម្ពុជា កំពុងប្រឈមនឹងភាពគ្មានការងារធ្វើ។ របាយការណ៍របស់ធនាគារអភិវឌ្ឍន៍អាស៊ី (ADB) បង្ហាញថា កង្វះខាតហិរញ្ញវត្ថុក្នុងគ្រួសារ និងកង្វះខាតការបណ្ដុះបណ្ដាលជំនាញ ជាឧបសគ្គដែលរារាំងប្រជាជនវ័យក្មេងរបស់កម្ពុជា ប្រមាណ ២លាននាក់ពីការទទួលបានការអប់រំ និងជំនាញវិជ្ជាជីវៈ។ ទាំងនេះ ជាមូលហេតុចម្បងដែលបណ្ដាលឲ្យយុវជនកម្ពុជា ជាច្រើន ធ្វើចំណាកស្រុកមកកាន់ទីក្រុងដោយទទួលបានប្រាក់កម្រៃទាប និងទៅធ្វើជាពលករ ឬកម្មករនៅតាមប្រទេសថៃ ម៉ាឡេស៊ី និងកូរ៉េ ជាដើម។
ការសិក្សារបស់ទីភ្នាក់ងារជាតិមុខរបរ និងការងារ ឆ្នាំ២០១៣ រកឃើញថា យុវជនកម្ពុជា ជាច្រើន នៅខ្វះខាតជំនាញ និងទំនុកចិត្ត នៅពេលស្វែងរកការងារធ្វើ។ ទន្ទឹមនឹងនេះ ការស្រាវជ្រាវរបស់អង្គការអន្តរជាតិខាងការងារ (ILO) បង្ហាញថា យុវជនជាច្រើនសិក្សាជំនាញដែលខុសពីតម្រូវការក្នុងទីផ្សារការងារជាក់ស្ដែង។ បញ្ហាយុវជនខ្វះជំនាញនេះ អ្នកជំនាញលើកឡើងថា កម្ពុជា នឹងអាចប៉ះពាល់កាន់តែខ្លាំងនៅពេលប្រទេសក្នុងតំបន់ នឹងធ្វើសមាហរណកម្មសេដ្ឋកិច្ចនៅចុងឆ្នាំ២០១៥ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ