ខ្មែរកម្ពុជាក្រោមកំណត់ផែនការឆ្នាំ២០១៣ទាមទារឲ្យមានការគោរពសិទ្ធិមនុស្ស
2013.01.03
ឆ្នាំ២០១២ កន្លងផុតទៅ គឺជាឆ្នាំដែលខ្មែរកម្ពុជាក្រោមបានអះអាងថា ពួកគាត់រស់នៅលើទឹកដីកំណើតរបស់ខ្លួន មិនមានសិទ្ធិពេញលេញនោះទេ ហើយក៏ជាឆ្នាំដែលតំណាងសហព័ន្ធខ្មែរកម្ពុជាក្រោម ទទួលបរាជ័យលើការប្រកួតប្រជែងដើម្បីជាប់ជាសមាជិកនៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ដែរ។
ប៉ុន្តែយ៉ាងនេះក្ដី ឆ្នាំ២០១៣ បានចូលមកដល់ អង្គការសមាគមខ្មែរកម្ពុជាក្រោម ទាំងនៅកម្ពុជា និងនៅបរទេស បានរៀបចំផែនការច្បាស់លាស់ក្នុងការអនុវត្តការងាររបស់ខ្លួន ក្នុងបុព្វហេតុជាតិសាសន៍ និងការទាមទារឲ្យរដ្ឋាភិបាលវៀតណាម ទទួលស្គាល់ខ្មែរកម្ពុជាក្រោម គឺជាជនជាតិដើម និងផ្ដល់សិទ្ធិពេញលេញដល់ជនជាតិដើមទាំងអស់ក្នុងចំណោម ៥៤ជាតិសាសន៍នៅវៀតណាម។
ប្រធានសហព័ន្ធខ្មែរកម្ពុជាក្រោម លោក ថាច់ ង៉ុកថាច់ មានប្រសាសន៍ថា សហព័ន្ធខ្មែរកម្ពុជាក្រោម មានការងារជាច្រើនទៀតសម្រាប់ធ្វើនៅក្នុងឆ្នាំ២០១៣ ដើម្បីប្រយោជន៍ខ្មែរកម្ពុជាក្រោមរស់នៅលើទឹកដីកំណើតរបស់ខ្លួន ដែលរងនូវការធ្វើទុក្ខបុកម្នេញពីអាជ្ញាធរវៀតណាម។
លោក ថាច់ ង៉ុកថាច់ បានលើកឡើងថា លោកនឹងធ្វើយ៉ាងណាឲ្យមានការគាំទ្រពីសហគមន៍អន្តរជាតិ កាន់តែខ្លាំងឡើង ដើម្បីស្នើឲ្យរដ្ឋាភិបាលវៀតណាម យកចិត្តទុកដាក់គិតគូរដល់ប្រជាពលរដ្ឋខ្មែរកម្ពុជាក្រោម។
ម្យ៉ាងវិញទៀត សម្រាប់នៅប្រទេសកម្ពុជា វិញ អ្វីដែលជាបញ្ហាចោទសម្រាប់អង្គការសមាគមខ្មែរកម្ពុជាក្រោមនោះ គឺនៅពេលពួកគេចង់ជួប ឬផ្ញើរបាយការណ៍ស្ដីពីការទាមទារឲ្យមានការគោរពសិទ្ធិមនុស្សនៅប្រទេសវៀតណាម តាមរយៈស្ថានទូតវៀតណាម នៅកម្ពុជា នោះ បែរជាត្រូវបានស្ថានទូតវៀតណាម បដិសេធមិនទទួលយកជាបន្តបន្ទាប់នៅក្នុងឆ្នាំ២០១២។
កាលពីចុងខែធ្នូ ឆ្នាំ២០១២ តំណាងអង្គការសមាគមខ្មែរកម្ពុជាក្រោម នៅទីក្រុងភ្នំពេញ បានជួបប្រជុំប្រចាំរបស់ខ្លួន និងបានជ្រើសរើសប្រធានលេខាធិការដ្ឋាននៃអង្គការសមាគមខ្មែរកម្ពុជាក្រោម ដែលជាស្ថាប័នមួយធ្វើការសម្របសម្រួល និងតំណាងឲ្យអង្គការសមាគមខ្មែរកម្ពុជាក្រោមនៅកម្ពុជា។
នៅក្នុងអង្គប្រជុំនោះ តំណាងអង្គការសមាគមខ្មែរកម្ពុជាក្រោម ជាង១០ ដែលបានចូលរួមនោះ បានកំណត់ផែនការមួយចំនួន នឹងត្រូវធ្វើនៅក្នុងឆ្នាំ២០១៣ នេះ រួមមាន អប់រំផ្សព្វផ្សាយ កសាងសន្តិភាពសហគមន៍ និងសេចក្ដីប្រកាសជាសាកលស្ដីពីសិទ្ធិមនុស្ស សេចក្ដីប្រកាសជាសាកលស្ដីពីសិទ្ធិជនជាតិដើម ឯកសារប្រវត្តិសាស្ត្រ និងភូមិសាស្ត្រខ្មែរ។ បង្កើតបណ្ដាញព័ត៌មានដើម្បីផ្សព្វផ្សាយតាមរយៈព្រឹត្តិបត្រសារព័ត៌មានព្រៃនគរ គេហទំព័រនានារបស់ខ្មែរក្រោម និងប្រព័ន្ធផ្សព្វផ្សាយសំឡេងជាតិ និងអន្តរជាតិ និងបញ្ហាជាច្រើនទៀត។
ទាក់ទងនឹងបញ្ហានេះ ប្រធានមជ្ឈមណ្ឌលវប្បធម៌ខ្មែរកម្ពុជាក្រោម លោក យន្ត ថារូ មានប្រសាសន៍ថា ជាការសំខាន់ណាស់ដើម្បីទាមទារឲ្យអាជ្ញាធរវៀតណាម ផ្ដល់សិទ្ធិសេរីភាព សិទ្ធិជំនឿ សាសនា សិទ្ធិទទួលបានការអប់រំសម្រាប់ខ្មែរកម្ពុជាក្រោម។
នាយកកម្មវិធីនៃសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ លោក សឺន ជុំជួន បានសង្កត់ធ្ងន់ថា ខ្មែរកម្ពុជាក្រោមតែងតែទទួលរងនូវការធ្វើបាបពីអាជ្ញាធរវៀតណាម ដោយសារតែការទាមទាររឿងដីធ្លីស្រែចម្ការដែលវៀតណាម រឹបអូសយក ប៉ុន្តែការទាមទាររបស់ពួកគេមិនមានលទ្ធផលទេ ទីបំផុតពួកគេរត់គេចពីការតាមចាប់ខ្លួនពីអាជ្ញាធរវៀតណាម។
លោក សឺន ជុំជួន បានអះអាងថា រាល់សកម្មភាពដែលអង្គការសមាគមខ្មែរកម្ពុជាក្រោម បានធ្វើ គឺស្របទៅតាមច្បាប់ និងគោលការណ៍សិទ្ធិមនុស្សអន្តរជាតិ ពីព្រោះថាគោលបំណងសំខាន់ដែលអង្គការសមាគមខ្មែរកម្ពុជាក្រោមធ្វើ ដើម្បីការពារសិទ្ធិប្រជាពលរដ្ឋខ្មែរកម្ពុជាក្រោម ទាំងអ្នករស់នៅកម្ពុជា និងនៅប្រទេសវៀតណាម។
ទោះបីជាយ៉ាងណាក៏ដោយ លោក ថាច់ ង៉ុកថាច់ បានជំរុញឲ្យអង្គការសមាគមខ្មែរកម្ពុជាក្រោម ទាំងអស់សហការគ្នាធ្វើការ។ ម្យ៉ាងវិញទៀត ត្រូវផ្ដល់ព័ត៌មានឲ្យគ្នាទៅវិញទៅមក រវាងអង្គការសមាគមខ្មែរកម្ពុជាក្រោម នៅកម្ពុជា និងសហព័ន្ធខ្មែរកម្ពុជាក្រោម នៅកាណាដា ឬនៅសហរដ្ឋអាមេរិក។
លោក ថាច់ ង៉ុកថាច់ បានអះអាងថា លោកនឹងខំប្រឹងធ្វើការជាមួយសហគមន៍អឺរ៉ុប បន្តទៀត ដើម្បីឲ្យគេគាំទ្រសហព័ន្ធខ្មែរកម្ពុជាក្រោម ឲ្យជាប់ជាសមាជិកនៃក្រុមប្រឹក្សាជាសមាជិកក្រុមប្រឹក្សាសេដ្ឋកិច្ច និងសង្គមកិច្ចរបស់អង្គការសហប្រជាជាតិ (អ៊ីកូសុក = ECOSOC = Economic and Social Council) នៅឆ្នាំ២០១៣ នេះ។
សហព័ន្ធខ្មែរកម្ពុជាក្រោមពិភពលោក មិនបានជាប់ជាសមាជិកក្រុមប្រឹក្សាសេដ្ឋកិច្ច និងសង្គមកិច្ចរបស់អង្គការសហប្រជាជាតិ កាលពីថ្ងៃទី២៣ កក្កដា ឆ្នាំ២០១២ ដោយសារតែប្រទេសមួយចំនួន ពិសេសប្រទេសវៀតណាម បានបោះឆ្នោតទម្លាក់។
ទោះបីជាយ៉ាងណាក៏ដោយ អ្នកប្រវត្តិសាស្ត្របានពន្យល់ថា សហព័ន្ធខ្មែរកម្ពុជាក្រោមពិភពលោក មិនជាប់ជាសមាជិកក្រុមប្រឹក្សាសេដ្ឋកិច្ច សង្គមកិច្ចនៃអង្គការសហប្រជាជាតិនោះ ដោយសារតែបញ្ហាប្រទេសវៀតណាម មិនទាន់មានទំនុកចិត្តលើសហព័ន្ធខ្មែរកម្ពុជាក្រោមនៅឡើយ។
ប៉ុន្តែទោះបីជាយ៉ាងនេះក្ដី អ្នកប្រវត្តិសាស្ត្របានជំរុញឲ្យសហព័ន្ធខ្មែរកម្ពុជាក្រោម ខិតខំតស៊ូបន្ថែមទៀត ពិសេសធ្វើយ៉ាងណាបង្ហាញអំពីសកម្មភាពរបស់ខ្លួនដល់ពិភពលោក ថារាល់ទង្វើរបស់សហព័ន្ធកំពុងធ្វើនោះ គ្រាន់តែចង់ការពារសិទ្ធិសេរីភាពជូនប្រជាពលរដ្ឋខ្មែរកម្ពុជាក្រោមនៅក្នុងប្រទេសវៀតណាម បច្ចុប្បន្ន មិនជាប់ពាក់ព័ន្ធនឹងការចង់ទាមទាររដ្ឋឯករាជ្យណាមួយនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ