មូលហេតុជំរុញឲ្យយុវជនខ្មែរយកចិត្តទុកដាក់ពីប្រវត្តិសាស្ត្រដែនដីកម្ពុជាក្រោម
2014.07.09
អស់រយៈពេលជាងមួយខែមកហើយ ដែលមន្ត្រីនាំពាក្យស្ថានទូតវៀតណាម ប្រចាំកម្ពុជា អះអាងថា ទឹកដីកម្ពុជាក្រោម គឺជាទឹកដីរបស់ប្រទេសវៀតណាម តាំងពីយូរយារណាស់មកហើយ ហើយបារាំង ក៏មិនបានកាត់ទឹកដីនេះទៅឲ្យវៀតណាម ដែរ។
រហូតមកទល់ពេលនេះ ពុំឃើញមានប្រតិកម្មណាមួយរបស់រដ្ឋាភិបាលកម្ពុជា ឆ្លើយតបចំពោះការអះអាងរបស់មន្ត្រីវៀតណាម នេះឡើយ។ ចំពោះអ្នកប្រវត្តិសាស្ត្រខ្មែរវិញ ក៏ពុំឃើញមានការឆ្លើយតបជាផ្លូវការណាមួយដែរ។ ផ្ទុយទៅវិញ ប្រជាពលរដ្ឋខ្មែរក្រោម និងយុវជនខ្មែរមួយចំនួន បានខ្វល់ខ្វាយចំពោះបញ្ហាប្រវត្តិសាស្ត្រនេះខ្លាំងណាស់។
តើមានមូលហេតុអ្វីខ្លះដែលជំរុញឲ្យពលរដ្ឋខ្មែរក្រោម និងយុវជនខ្មែរ យកចិត្តទុកដាក់ពីប្រវត្តិសាស្ត្រដែនដីកម្ពុជាក្រោម?
ចាប់តាំងពីមានជម្លោះពាក្យសម្ដីរវាងអង្គការសមាគមខ្មែរកម្ពុជាក្រោម និងមន្ត្រីស្ថានទូតវៀតណាម មក មានព្រឹត្តិការណ៍ចំនួន២ហើយ ត្រូវបានគេរៀបចំឡើង ដើម្បីឆ្លើយតបចំពោះការអះអាងរបស់មន្ត្រីវៀតណាម។ ព្រឹត្តិការណ៍ទី១ គឺការរៀបចំវេទិកាសាធារណៈ ស្ដីពីទឹកដីខ្មែរកម្ពុជាក្រោម កាលពីថ្ងៃទី៦ ខែកក្កដា ដើម្បីប្រមែប្រមូលឯកសារ និងទស្សនៈរបស់អ្នកចូលរួម មុននឹងដាក់ញត្តិទៅកាន់ស្ថានទូតវៀតណាម និងព្រឹត្តិការណ៍ទី២ គឺការប្រមូលផ្តុំគ្នារបស់ព្រះសង្ឃ យុវជន និងពលរដ្ឋ នៅមុខស្ថានទូតវៀតណាម នៅព្រឹកថ្ងៃទី៨ ខែកក្កដា ដើម្បីទាមទារឲ្យរដ្ឋាភិបាលកុម្មុយនីស្តមួយនេះ សុំទោសប្រជាពលរដ្ឋខ្មែរជាសាធារណៈ និងឲ្យទទួលស្គាល់ថា ទឹកដីកម្ពុជាក្រោម គឺជាអតីតទឹកដីរបស់កម្ពុជា។
ជុំវិញបញ្ហាប្រវត្តិសាស្ត្រខ្មែរក្រោមនេះ ពលរដ្ឋខ្មែរក្រោមម្នាក់ឈ្មោះ កែវ សុធា ដែលបានចូលរួមវេទិកាសាធារណៈ នៅសង្កាត់ភ្នំពេញថ្មី ខណ្ឌសែនសុខ បានឲ្យដឹងថា តាំងពីដើមមក លោកតែងបានចូលរួមក្នុងព្រឹត្តិការណ៍នានាទាក់ទងនឹងបញ្ហាខ្មែរកម្ពុជាក្រោម។ លោកថា ក្នុងនាមជាពលរដ្ឋខ្មែរក្រោម លោកឈឺចាប់នៅពេលដែលមន្ត្រីវៀតណាម មិនទទួលស្គាល់ថា ទឹកដីកម្ពុជាក្រោម ជាអតីតរបស់កម្ពុជា៖ «យើងមានការឈឺចាប់ ដោយសារជាទឹកដីរបស់យើង ប៉ុន្តែគេថាជាទឹកដីរបស់គេ គេបំភ្លៃប្រវត្តិសាស្ត្រ។ ជាការពិតណាស់ យួន ច្រើនតែធ្វើបាប កាលពីពេលខ្ញុំនៅកម្ពុជាក្រោម ក៏ដូចអ៊ីចឹងដែរ គេច្រើនតែធ្វើបាបជីដូនជីតាយើងពីជំនាន់មួយដល់ជំនាន់មួយ រហូតដល់ពេលនេះ គេព្យាយាមបំភ្លៃប្រវត្តិសាស្ត្រថែមទៀត»។
ចំណែកពលរដ្ឋខ្មែរក្រោមមួយរូបទៀតមកពីខេត្តព្រះត្រពាំង ឈ្មោះ ថាច់ ចន្ទ្រា ដែលបានចូលរួមក្នុងវេទិកាសាធារណៈដែរនោះ កត់សម្គាល់ថា ការបំភ្លៃប្រវត្តិសាស្ត្រដោយមន្ត្រីវៀតណាម នៅពេលនេះ គឺជារឿងអយុត្តធម៌ចំពោះខ្មែរក្រោម។ លោកថា ការបកស្រាយប្រវត្តិសាស្ត្រមិនច្បាស់លាស់នេះ វាអាចធ្វើឲ្យជីវិតពលរដ្ឋខ្មែរប្រមាណជាង ១០លាននាក់ ដែលកំពុងរស់នៅកម្ពុជាក្រោមសព្វថ្ងៃ ប្រឈមនឹងការធ្វើបាប ការរំលោភសិទ្ធិមនុស្ស និងការរឹតបន្តឹងទៅលើសិទ្ធិប្រតិបត្តិផ្នែកជំនឿសាសនា ជាដើម។
លោក ថាច់ ចន្ទ្រា៖ «វាអយុត្តិធម៌ណាស់សម្រាប់ខ្មែរកម្ពុជាក្រោមយើង ដែលរងគ្រោះវេទនាខ្លោចផ្សាជាទីបំផុត យើងឃើញហើយ ទាំងអស់ប្រជាជនជាង ១០លាននាក់ កំពុងតែរងទុក្ខវេទនានៅកម្ពុជាក្រោមឯណោះ ការកាប់សម្លាប់ពីមុនមក ដុតទាំងរស់ ធ្វើជាមុំចង្ក្រាន ខ្មែរក្រោមទូទៅសោកស្ដាយណាស់វីរបុរសដែលបាត់បង់ទៅ ដូច្នេះហើយយើងចូលរួម យើងតតាំងនេះ ដើម្បីជាយុត្តិធម៌ ខ្មែរកម្ពុជាក្រោម ត្រូវការយុត្តិធម៌ ដូចជាអ្នកទាំងអស់នៅលើពិភពលោកដែរ»។
ជាការពិតណាស់ ប្រវត្តិសាស្ត្រ គឺជាប្រវត្តិសាស្ត្រ។ គេពិបាកនឹងក្រឡៃប្រវត្តិសាស្ត្រណាស់ ជាពិសេសនៅពេលដែលប្រវត្តិសាស្ត្រនោះទើបនឹងកើតឡើងថ្មីៗ។ ការបកស្រាយប្រវត្តិសាស្ត្រមិនច្បាស់លាស់ ឬការមានចេតនាបំភ្លៃប្រវត្តិសាស្ត្រ អាចបង្កជាអរិភាព ឬភាពមន្ទិលរវាងប្រជាជាតិមួយ និងប្រជាជាតិមួយទៀត។
សម្រាប់យុវជន វីល្លៀម អនណែស គីវ៉ាន់ណា (William Honest Kiwana) ជាកូនខ្មែរកាត់បារាំង ហើយដែលបានចូលរួមវេទិកាសាធារណៈខ្មែរក្រោមដែរនោះ ថ្លែងថា មូលហេតុដែលមន្ត្រីវៀតណាម ព្យាយាមបិទបាំងប្រវត្តិសាស្ត្រពិតប្រាកដនៅកម្ពុជាក្រោមនោះ ដោយសារមន្ត្រីវៀតណាម យល់ថា រដ្ឋាភិបាលកម្ពុជាសព្វថ្ងៃ មិនសូវខ្វាយខ្វល់ពីរឿងប្រវត្តិសាស្ត្រខ្មែរឡើយ។
យុវជន គីវ៉ាន់ណា បន្តថា រដ្ឋាភិបាលវៀតណាម គិតថា បើទោះជាគេលើកឡើងយ៉ាងនេះក្តី ក៏ប្រជាពលរដ្ឋខ្មែរមិនអាចធ្វើអ្វីចំពោះគេបានឡើយ ព្រោះថា រដ្ឋាភិបាលកម្ពុជាសព្វថ្ងៃ គឺជាមិត្តម៉ឺនឆ្នាំរបស់វៀតណាម។ ដូច្នេះ រដ្ឋាភិបាលកម្ពុជា នឹងមិនអនុញ្ញាតឲ្យប្រជាពលរដ្ឋខ្មែរធ្វើអ្វីផ្ដេសផ្ដាសចំពោះប្រទេសវៀតណាម ឡើយ៖ «មូលហេតុដែលខ្ញុំសំអាងដូច្នេះ ដោយសារការលើកឡើងរបស់អ្នកនាំពាក្យស្ថានទូតវៀតណាម ហ្នឹង អត់មានប្រតិកម្មណាមួយសោះពីសំណាក់រាជរដ្ឋាភិបាល ឬពីសំណាក់អ្នកនាំពាក្យរបស់រដ្ឋាភិបាល អ៊ីចឹងហើយយើងជាមជ្ឈដ្ឋានប្រជាពលរដ្ឋ យើងអាចវាយតម្លៃថាអ៊ីចឹង បើសិនជាគាត់ពិតជាគិតថា កម្ពុជាក្រោមនៅមានតឹកតាងប្រវត្តិសាស្ត្រនៅមានប្រជាពលរដ្ឋ ដែលប្រើប្រាស់ភាសាខ្មែរ គាត់គិតថា ប្រជាពលរដ្ឋខ្មែរ ដូច្នេះគាត់គួរតែនាំពាក្យមួយ ដើម្បីការពារប្រាប់ថា ទឹកដីនេះពីមុនជារបស់ខ្មែរទេ ឬក៏យ៉ាងណា តែគាត់អត់និយាយសោះ គឺគ្មានប្រតិកម្មសោះតែម្តង»។
បើទោះជាគ្មានប្រតិកម្មផ្លូវការរបស់រដ្ឋាភិបាលកម្ពុជា ចំពោះការអះអាងរបស់មន្ត្រីវៀតណាម ក៏ដោយ រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ធ្លាប់ថ្លែងប្រាប់វិទ្យុអាស៊ីសេរី ថា រដ្ឋាភិបាលកម្ពុជា មិនត្រូវការឆ្លើយឆ្លង ឬប្រតិកម្មចំពោះពាក្យសម្ដីរបស់បុគ្គលណាមួយឡើយ។ លោកថា បញ្ហានេះវាមិនមានសារសំខាន់សម្រាប់រដ្ឋាភិបាល ដែលត្រូវទៅជជែកតតាំង ឬត្រូវទៅពិចារណានោះទេ។ លោកថា កម្ពុជា ឈរនៅលើច្បាប់ដែលមានចែងនៅក្នុងរដ្ឋធម្មនុញ្ញ ហើយនេះ គឺជាគោលការណ៍នីតិរដ្ឋ ដែលកម្ពុជា អនុវត្តតាំងពីឆ្នាំ១៩៩៣ មក។ លោកថា ចំពោះប្រវត្តិសាស្ត្រវិញ វាពិត ឬមិនពិតយ៉ាងណានោះ គេអាចនាំគ្នាអានសៀវភៅបាន។
ចំពោះពលរដ្ឋខ្មែរក្រោម លោក ថាច់ រ៉ូ វិញកត់សម្គាល់ថា ការប៉ុនប៉ងបំភ្លៃប្រវត្តិសាស្ត្រកម្ពុជាក្រោម វាគឺជារឿងមួយ។ ប៉ុន្តែលោកថា អ្វីដែលមន្ត្រីវៀតណាម កំពុងធ្វើនេះ គឺមានបង្កប់ទៅដោយអត្ថន័យនយោបាយ។ លោកថា វៀតណាម ចង់យកឱកាសដែលគណបក្សប្រជាជនកម្ពុជា កំពុងកាន់អំណាចនេះ ដើម្បីស្ទង់មតិប្រតិកម្មរបស់ពលរដ្ឋខ្មែរទូទៅ ជាពិសេសវៀតណាម ចង់ដឹងថា នៅពេលដែលគេលើកឡើងដូចនេះហើយ តើខ្មែរទាំងអស់នឹងរួបរួមគ្នាប្រតិកម្មចំពោះពួកគេដែរ ឬយ៉ាងណា៖ «យួន កំពុងតែសម្លឹងឃើញជាឱកាសដ៏ល្អសម្រាប់គេ ព្រោះអីប្រសិនជារដ្ឋាភិបាលបច្ចុប្បន្ន អាចផ្លាស់ប្ដូរ គឺយួន អាចបាត់បង់ឱកាស ប៉ុន្តែឱកាសសម្រាប់រដ្ឋាភិបាល ពិសេសគឺកម្ពុជា ហ្នឹង គឺជាឱកាសមួយដ៏ល្អសម្រាប់យួន គឺដោយសារ ប្រសិនជាខ្មែរដែលក្រោកឡើង គឺពេលនោះហើយ រដ្ឋាភិបាលគេត្រូវតែបង្ក្រាបហើយ អ៊ីចឹងទេ ក្នុងឱកាសនេះ គឺជាឱកាសមាសរបស់យួន ដែលត្រូវតែក្រោកឡើង»។
ទាក់ទងនឹងបញ្ហានេះដែរ កញ្ញា សុខ ណា ដែលមានឪពុកជាខ្មែរ និងម្តាយជាខ្មែរកម្ពុជាក្រោម លើកឡើងថា រដ្ឋាភិបាលកម្ពុជា គួរតែប្រតិកម្មការទូតឆ្លើយតបចំពោះការលើកឡើងរបស់មន្ត្រីវៀតណាម នៅពេលនេះ៖ «រដ្ឋាភិបាលគួរចេញមុខប្រកាសតាមវិទ្យុ និងទូរទស្សន៍អ៊ីចឹង ធ្វើឲ្យប្រជាជនខ្មែរយើងទាំងអស់គ្នាហ្នឹង យល់ដឹងអំពី តើទឹកដីកម្ពុជាក្រោម ជារបស់ខ្មែរមែនពិតអត់?»។
ប្រជាពលរដ្ឋ និងយុវជនកម្ពុជា ក្នុងពេលបច្ចុប្បន្ន បានយល់ដឹងច្រើនអំពីបញ្ហាកម្ពុជាក្រោម។ កាលពីមុន នៅពេលដែលខ្មែរក្រោមមានបញ្ហា គឺមានតែព្រះសង្ឃ និងពលរដ្ឋខ្មែរក្រោមខ្លួនឯងប៉ុណ្ណោះ ជាអ្នកចេញមុខ ប៉ុន្តែនៅពេលនេះ បញ្ហារបស់ខ្មែរក្រោមលែងជារបស់ខ្មែរក្រោមតែម្នាក់ឯងហើយ ប៉ុន្តែវាបានក្លាយជាបញ្ហាសម្រាប់ខ្មែរទូទៅ។ ជាក់ស្តែង ការចូលរួមរបស់យុវជនខ្មែរ ក្នុងពិធីរំឭកខួបបាត់បង់ទឹកដីកម្ពុជាក្រោម កាលពីពេលកន្លងមក និងការចូលរួមរបស់ពួកគេតវ៉ានៅមុខស្ថានទូតវៀតណាម កាលពីថ្ងៃទី៨ កក្កដា គឺជាឧទាហរណ៍ស្រាប់។
លើសពីនេះ ទន្ទឹមនឹងមនុស្សមួយចំនួនមានក្តីសង្ឃឹមទៅលើគណបក្សសង្គ្រោះជាតិ ថាអាចនឹងការពារផលប្រយោជន៍របស់ពលរដ្ឋខ្មែរ ដែលកំពុងរស់នៅកម្ពុជាក្រោមបាន នៅពេលដែលគណបក្សប្រឆាំងមួយនេះឡើងកាន់អំណាច។ អ្នកវិភាគខ្លះក៏មានក្តីសង្ឃឹមចំពោះយុវជន ដែលជាទំពាំងស្នងឫស្សីសព្វថ្ងៃ។ ពួកគេយល់ថា យុវជនទាំងអស់នេះនឹងមានទឹកចិត្តស្រឡាញ់ជាតិ ជាងមេដឹកនាំសព្វថ្ងៃ ហើយពួកគេនឹងមានភាពក្លាហានជាងមេដឹកនាំសព្វថ្ងៃ ក្នុងការទាមទារឲ្យវៀតណាម ទទួលស្គាល់នូវអ្វីដែលជារបស់កម្ពុជា៕