សមាគមខ្មែរក្រោមប្រតិកម្មនឹងវៀតណាមកម្ទេចខ្លោងទ្វាររចនាបថខ្មែរចូលខេត្តព្រះត្រពាំង
2014.12.11
អាជ្ញាធរវៀតណាម កាលពីពេលថ្មីៗនេះបានវាយកម្ទេចខ្លោងទ្វាររចនាបថខ្មែរចូលទៅកាន់ទីរួមខេត្តព្រះត្រពាំង ដោយលើកហេតុផលថា ខ្លោងទ្វារនោះទាប រថយន្តឧស្សាហ៍ប៉ះទង្គិច។ ប៉ុន្តែ អង្គការសមាគមខ្មែរកម្ពុជាក្រោមយល់ថា ការវាយកម្ទេចខ្លោងទ្វារខ្មែរដែលមានអាយុកាលជាង ៦០០ឆ្នាំនេះ គឺជាយុទ្ធសាស្ត្ររបស់រដ្ឋាភិបាលវៀតណាម ក្នុងការលុបបំបាត់ប្រវត្តិសាស្ត្រ និងអត្តសញ្ញាណរបស់ខ្មែរនៅកម្ពុជាក្រោម។
រូបថតសកម្មភាពនៃការវាយកម្ទេចខ្លោងទ្វារខ្មែរចូលទៅកាន់ទីរួមខេត្តព្រះត្រពាំង ត្រូវបានគេចែករំលែកតៗគ្នានៅលើបណ្ដាញសង្គមហ្វេសប៊ុក (Facebook) រហូតមកទល់ពេលនេះ។
ជាមួយគ្នានេះដែរ សមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍ កាលពីថ្ងៃទី២ ខែធ្នូ ក៏បានចេញសេចក្តីថ្លែងការណ៍ចោទប្រកាន់អាជ្ញាធរវៀតណាម ថាវាយកម្ទេចសំណង់ដែលមានរចនាបថខ្មែរនោះ គឺមានចេតនាលុបបំបាត់អត្តសញ្ញាណជាតិរបស់ខ្មែរក្រោមតែម្តង។
សេចក្តីថ្លែងការណ៍របស់សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ បានបញ្ជាក់ថា អាជ្ញាធរវៀតណាម បានវាយកម្ទេចខ្លោងទ្វារខេត្តព្រះត្រពាំង ដោយសារពួកគេថា វាត្រូវបានរថយន្តស្ទូចបើកបុកបណ្ដាលឲ្យប្រេះស្រាំ និងទ្រុឌទ្រោម។ យ៉ាងណាក៏ដោយ សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ លើកឡើងថា សកម្មភាពរបស់អាជ្ញាធរវៀតណាម នេះ ពលរដ្ឋខ្មែរក្រោមមិនអាចទទួលយកបានឡើយ។ ពួកគេថា អ្វីដែលអាជ្ញាធរវៀតណាម អះអាងនេះ វាគ្រាន់តែជាលេសដើម្បីលុបបំបាត់កេរដំណែលវប្បធម៌របស់បុព្វបុរសខ្មែរ ដែលបានបន្សល់ទុកជាប្រវត្តិសាស្ត្រដល់កូនចៅខ្មែរនៅកម្ពុជាក្រោមប៉ុណ្ណោះ។
នាយកកម្មវិធីសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ លោក សឺន ជុំជួន។ លោកមានប្រសាសន៍នៅថ្ងៃទី១០ ធ្នូ ថា ការវាយកម្ទេចខ្លោងទ្វារចូលទីរួមខេត្តព្រះត្រពាំង កាលពីពេលថ្មីៗនេះ វាគឺជាយុទ្ធសាស្ត្រយ៉ាងពិតប្រាកដរបស់រដ្ឋាភិបាលវៀតណាម ក្នុងការលុបបំបាត់ដានប្រវត្តិសាស្ត្ររបស់ខ្មែរ។
លោក សឺន ជុំជួន មានប្រសាសន៍ថា លោកទទួលបានព័ត៌មានថា រដ្ឋាភិបាលវៀតណាម នឹងកសាងខ្លោងទ្វារនោះឡើងវិញ។ ប៉ុន្តែលោកថា បើទោះជារដ្ឋាភិបាលវៀតណាម កសាងវាឡើងវិញក៏ដោយ ក៏លោកមិនសង្ឃឹមថា ខ្លោងទ្វារថ្មីបង្ហាញពីអត្តសញ្ញាណនិងរចនាបថរបស់ខ្មែរនោះឡើយ។
ប្រការនេះហើយ ទើបលោកថា មុននឹងមានការសាងសង់ឡើងវិញ អាជ្ញាធរវៀតណាម ត្រូវបង្ហាញរូបគំរូខ្លោងទ្វារទៅឲ្យពលរដ្ឋខ្មែរក្រោម ដើម្បីឲ្យប្រាកដថា ខ្លោងទ្វារថ្មីនោះមានរចនាបថ និងលក្ខណៈសម្គាល់អត្តសញ្ញាណរបស់ខ្មែរតាំងពីបុរាណកាលមក។ លោកថា ការសាងសង់នោះទៀតសោត ក៏ត្រូវធ្វើឡើងនៅត្រង់កន្លែងចាស់ដដែល ដើម្បីបង្ហាញឲ្យខ្មែរជំនាន់ក្រោយដឹងថា បុព្វបុរសរបស់គេធ្លាប់បានកសាងខ្លោងទ្វារនៅកន្លែងនោះ។ លោក សឺន ជុំជួន ថា នេះគឺជាយុទ្ធសាស្ត្ររបស់វៀតណាម ក្នុងការ «បំផ្លាញបន្តិចម្តងៗ ដើម្បីធ្វើឲ្យបាត់នូវអត្តសញ្ញាណខ្មែរ»។
លោក សឺន ជុំជួន ឲ្យដឹងដែរថា ពីមុនមកអាជ្ញាធរវៀតណាម ខេត្តព្រះត្រពាំង ក៏ធ្លាប់មានបំណងវាយកម្ទេចខ្លោងទ្វារនោះដែរ ប៉ុន្តែដោយសារមានការតវ៉ារបស់ខ្មែរក្រោមនៅទីនោះ ទើបអាជ្ញាធរវៀតណាម បង្អាក់សកម្មភាពទៅវិញ។
ស្រដៀងគ្នានេះដែរ ប្រធានសាខាសហព័ន្ធខ្មែរកម្ពុជាក្រោម ប្រចាំកម្ពុជា លោក តាំង សារៈ។ លោកមានប្រសាសន៍ថា ក្រៅពីបំផ្លាញខ្លោងទ្វារចូលខេត្តព្រះត្រពាំង នៅពេលនេះ ពីមុនមកអាជ្ញាធរវៀតណាម ក៏ធ្លាប់បំផ្លាញវត្តអារាមរបស់ខ្មែរដែរ ដែលក្រោយមកលោកថា វត្តខ្លះមានសល់តែខឿនព្រះវិហារ ឬខឿនសាលាប៉ុណ្ណោះ។
លោក តាំង សារៈ យល់ឃើញថា អ្វីដែលរដ្ឋាភិបាលវៀតណាម បានធ្វើ គឺជាការប៉ុនប៉ងក្នុងការបំបាត់កេរដំណែលរបស់ខ្មែរ ដែលបានកសាងតាំងពីបុរាណកាលមក។ លោកថា ប្រសិនបើរដ្ឋាភិបាលវៀតណាម ពិតជាចង់រក្សាអ្វីៗដែលជារបស់ខ្មែរមែននោះ រដ្ឋាភិបាលវៀតណាម មិនគួរវាយកម្ទេចសំណង់ចាស់ៗរបស់ខ្មែរចោល ដូចជាខ្លោងទ្វារនៅពេលនេះឡើយ។ លោកមានប្រសាសន៍ថា ដើម្បីឲ្យការរស់នៅក្នុងសង្គមមានសុខដុមរមនាជាមួយគ្នា រដ្ឋាភិបាលវៀតណាម «មិនគួរដើរបង្ករឿងបំផ្លាញវប្បធម៌របស់ខ្មែរឡើយ»។
នៅក្នុងសេចក្តីថ្លែងការណ៍របស់ខ្លួន អង្គការសមាគមខ្មែរកម្ពុជាក្រោម បានទាមទារឲ្យរដ្ឋាភិបាលវៀតណាម សាងសង់ខ្លោងទ្វារនោះឡើងវិញឲ្យដូចរូបភាពដើម នៃរចនាបថរបស់ខ្មែរ។ រដ្ឋាភិបាលវៀតណាម ក៏ត្រូវបំភ្លឺឲ្យបានច្បាស់លាស់អំពីបំណងវាយកម្ទេចខ្លោងទ្វារ ដែលខ្មែរក្រោមអះអាងថា គឺជាខ្លោងទ្វារតែមួយគត់នៅកម្ពុជាក្រោម ដែលត្រូវបានសាងសង់តាមបណ្តោយផ្លូវជាតិចូលទៅទីរួមខេត្ត។
ទោះជាយ៉ាងណាក៏ដោយ ក្រៅតែពីចេញសេចក្តីថ្លែងការណ៍ទាមទារឲ្យរដ្ឋាភិបាលវៀតណាម បញ្ចប់យុទ្ធសាស្ត្រលុបបំបាត់អត្តសញ្ញាណខ្មែរ អង្គការសមាគមខ្មែរកម្ពុជាក្រោម មិនទាន់បានដាក់ពាក្យតវ៉ាផ្លូវការទៅឲ្យរដ្ឋាភិបាលវៀតណាម នៅឡើយ។
លោក សឺន ជុំជួន មានប្រសាសន៍ថា ខ្មែរក្រោមនឹងរៀបចំរបាយការណ៍មួយផ្សេងទៀតដាក់ជូនក្រសួងការបរទេសកម្ពុជា ដើម្បីស្នើក្រសួងការបរទេស លើកឡើងរឿងរ៉ាវរបស់ខ្មែរក្រោម ទៅជជែកជាមួយប្រធានាធិបតីវៀតណាម ដែលនឹងបំពេញទស្សនកិច្ចមកកម្ពុជា នៅពេលខាងមុខនេះ។
ទាក់ទងនឹងការវាយកម្ទេចខ្លោងទ្វារខ្មែរនេះ វិទ្យុអាស៊ីសេរី មិនអាចទាក់ទងមន្ត្រីវៀតណាម ខេត្តព្រះត្រពាំង ឬដែលវៀតណាម បានប្ដូរទៅជាខេត្តត្រាវិញ នោះ ដើម្បីសុំការបំភ្លឺបានឡើយ។
ប៉ុន្តែអតីតអនុប្រធានមន្ទីរវប្បធម៌ កីឡា និងទេសចរណ៍ ខេត្តត្រាវិញ លោក ថាច់ សួង ដែលអះអាងថា លោកបានចូលនិវត្តន៍រួចហើយនោះ លោកទទួលស្គាល់ថា ពិតជាមានការវាយកម្ទេចខ្លោងទ្វារប្រាកដមែន។ ប៉ុន្តែលោកថា ការវាយកម្ទេចនោះ គឺមិនមែនរដ្ឋាភិបាលវៀតណាម មានបំណងលុបបំបាត់កេរដំណែលរបស់ខ្មែរនោះទេ។
លោក ថាច់ សួង បន្តថា កាលពីមុននៅពេលដែលផ្លូវចូលខេត្តមិនទាន់ត្រូវបានសាងសង់ ខ្លោងទ្វារនោះខ្ពស់ ប៉ុន្តែលោកថាក្រោយពីលើកផ្លូវឲ្យខ្ពស់ជាងមុន ខ្លោងទ្វារក៏ទាបជាងមុនដែរ។ លោកថា កត្តានេះហើយទើបបណ្ដាលឲ្យមានរថយន្តប៉ះទង្គិចម្តងៗ។
ទោះយ៉ាងណាលោកថា មុនការវាយកម្ទេចនោះ អាជ្ញាធរខេត្តក៏បានស្នើសុំយោបល់ពីសមាគមព្រះសង្ឃស្នេហាជាតិ ចាស់ព្រឹទ្ធាចារ្យ និងពលរដ្ឋខ្មែរ។ លោកថា ព្រះសង្ឃ និងពលរដ្ឋខ្មែរទាំងអស់បានយល់ស្របឲ្យអាជ្ញាធរវៀតណាម វាយកម្ទេចខ្លោងទ្វារចាស់ ហើយសាងសង់ខ្លោងទ្វារថ្មីឲ្យដូចដើមវិញ។ លោក ថាច់ សួង ថា រដ្ឋាភិបាលវៀតណាម «មិនត្រឹមតែមិនបំផ្លាញអត្តសញ្ញាណខ្មែរនោះទេ» ប៉ុន្តែគេ «រក្សាឲ្យខ្មែរ និងអភិវឌ្ឍន៍ឲ្យខ្មែរថែមទៀត»។
លោក ថាច់ សួង អះអាងថា លោកក៏មិនទាន់ដឹងនៅឡើយថា តើខ្លោងទ្វារថ្មីនោះនឹងត្រូវសាងសង់នៅកន្លែងចាស់ដដែល ឬក៏នៅទីតាំងថ្មីនោះទេ?
ទាក់ទងនឹងខ្លោងទ្វារថ្មីនេះដែរ សមាជិកសមាគមព្រះសង្ឃខ្មែរស្នេហាជាតិ ខេត្តព្រះត្រពាំង មួយអង្គ ដែលស្នើមិនបញ្ចេញព្រះនាម ឲ្យដឹងថា តាមដែលព្រះអង្គដឹង ខ្លោងទ្វារថ្មីនោះនឹងត្រូវសាងសង់នៅកន្លែងថ្មីវិញ។
ព្រះតេជព្រះគុណអង្គនេះក៏ព្រួយបារម្ភដែរថា ព្រះអង្គខ្លាចក្រែងតែខ្លោងទ្វារថ្មីដែលនឹងសាងសង់នោះ នឹងមិនមានរចនាបថខ្មែរសុទ្ធសាធដូចខ្លោងទ្វារចាស់។ មួយវិញទៀត ព្រះតេជព្រះគុណមានថេរដីកាថា បន្ទាប់ពីមានខ្លោងទ្វារថ្មី ហើយវាប្រាកដណាស់ថា អាជ្ញាធរវៀតណាម នឹងប្រកាសថា ពួកគេជាអ្នកសាងសង់ឲ្យខ្មែរ ហើយនៅទីបំផុត ខ្លោងទ្វារចាស់ដែលបុព្វបុរសខ្មែរខំប្រឹងកសាងទុកឲ្យកូនចៅជំនាន់ក្រោយតាំងពីយូរមកហើយនោះ នឹងបាត់ដានប្រវត្តិសាស្ត្រ និងត្រូវបានគេបំភ្លេចចោល៕