យុវជននិងសមាគមខ្មែរក្រោមគ្រោងធ្វើបាតុកម្ម៣ថ្ងៃជាប់គ្នារឿងប្រវត្តិសាស្ត្រខ្មែរក្រោម
2014.08.07
អង្គការសមាគមខ្មែរកម្ពុជាក្រោម និងសម្ព័ន្ធយុវជនខ្មែរ ដើម្បីលទ្ធិប្រជាធិបតេយ្យ នឹងប្រមូលផ្តុំគ្នារយៈពេល ៣ថ្ងៃជាប់គ្នានៅសប្ដាហ៍ក្រោយ ដើម្បីធ្វើបាតុកម្មទាមទារឲ្យក្រសួងការបរទេសកម្ពុជា កោះហៅមន្ត្រីស្ថានទូតវៀតណាម ប្រចាំកម្ពុជា បំភ្លឺឲ្យច្បាស់លាស់ពីបញ្ហាប្រវត្តិសាស្ត្រកម្ពុជាក្រោម។
ក្រៅពីនោះ ពួកគេនឹងដង្ហែក្បួនដាក់ញត្តិទៅកាន់ស្ថានទូតប្រទេសសមាជិកសមាគមអាស៊ាន ប្រចាំកម្ពុជា ដើម្បីស្នើឲ្យប្រទេសទាំងនេះ ជំរុញឲ្យប្រទេសវៀតណាម គោរពគោលការណ៍អាស៊ានឲ្យបានពេញលេញក្នុងស្មារតីមិត្តភាព និងសមធម៌ ក្នុងនាមជាប្រទេសក្បែរខាងគ្នា។
អង្គការសមាគមខ្មែរកម្ពុជាក្រោម និងសម្ព័ន្ធយុវជនខ្មែរ ដើម្បីលទ្ធិប្រជាធិបតេយ្យ ដែលមានក្រុមយុវជន I Cambodia យុវជនដើម្បីលទ្ធិប្រជាធិបតេយ្យ យុវជន I Love Cambodia Hot News យុវជនខ្មែរមហានគរ យុវជនដើម្បីសន្តិភាព ក្លឹបសំឡេងយុវជនខ្មែរអន្តរជាតិ ចលនាប្រជាធិបតេយ្យ និងជាតិនិយម ព្រមទាំងចលនាយុវជនស្វយ័តប្រជាធិបតេយ្យខ្មែរ នឹងធ្វើបាតុកម្មជាលើកទី៣ ដើម្បីទាមទារឲ្យរដ្ឋាភិបាលវៀតណាម ទទួលស្គាល់ប្រវត្តិសាស្ត្រទឹកដីកម្ពុជាក្រោម ឬសុំទោសប្រជាពលរដ្ឋខ្មែរជាសាធារណៈ។
គម្រោងធ្វើបាតុកម្មជាថ្មីនេះ កើតមានឡើងបន្ទាប់ពីពេលវេលាកំណត់២សប្ដាហ៍ ដែលអង្គការសមាគមខ្មែរកម្ពុជាក្រោម និងយុវជន ទុកឲ្យរដ្ឋាភិបាលវៀតណាម ឆ្លើយតបចំពោះការទាមទាររបស់ពួកគេផុតកំណត់នៅថ្ងៃទី៤ ខែសីហា។ ព្រមជាមួយគ្នានេះ ពួកគេក៏មិនទទួលបានដំណឹងពីក្រសួងការបរទេស ជុំវិញបញ្ហានេះដែរ។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា មានប្រសាសន៍នៅថ្ងៃទី៦ សីហា ថា ខ្មែរក្រោម និងយុវជន នៅតែរក្សាជំហរទាមទារឲ្យរដ្ឋាភិបាលវៀតណាម ទទួលស្គាល់ប្រវត្តិសាស្ត្រនេះ ដោយលោកលើកឡើងជាថ្មីថា ការព្រងើយកន្តើយធ្វើមិនដឹងមិនឮរបស់រដ្ឋាភិបាលវៀតណាម គឺបង្ហាញកាន់តែច្បាស់ថា រដ្ឋាភិបាលវៀតណាម កំពុងមើលងាយប្រជាពលរដ្ឋកាន់តែខ្លាំងឡើងៗ។ ម្យ៉ាងវិញទៀត លោកថា ការដែលរដ្ឋាភិបាលវៀតណាម នៅតែបន្តប្រើប្រាស់អ្នកនាំពាក្យស្ថានទូតរបស់ខ្លួន និយាយច្រំដែលៗពីបញ្ហាប្រវត្តិសាស្ត្រខ្មែរក្រោមនេះ សបញ្ជាក់ថា ជាការប្រមាថលើពលរដ្ឋខ្មែរដែលមិនអាចទទួលយកបានឡើយ។
លោក ថាច់ សេដ្ឋា៖ «មិនត្រឹមតែ ត្រឹង វ៉ាំងថុង (Tran Van Thong) ហ្នឹងទេ វាតាំងពីស្ថានទូត ក៏ចេញសេចក្តីថ្លែងការណ៍ ហើយអ្នកនាំពាក្យក្រសួងការបរទេសយួន ក៏បានចេញជាការថ្កោលទោសជាការព្រមានរបៀបលក្ខណៈគាំទ្រដល់ ត្រឹង វ៉ាំងថុង ទៀតផង។ អ៊ីចឹងវាជាគោលការណ៍របស់រដ្ឋាភិបាលវៀតណាម តែម្តង ហើយញត្តិមិនទទួលថែមទៀតផង ហើយទាំងនិយាយថាមិនខ្វល់ខ្វាយចំពោះញត្តិ ចំពោះការធ្វើបាតុកម្មថែមទៀតផង នេះជាឥរិយាបថរឹងត្អឹងមួយ ដែលមើលងាយប្រជាពលរដ្ឋខ្មែរធ្ងន់ធ្ងរ ដែលយើងមិនអាចទទួលយកបាន»។
លោក ថាច់ សេដ្ឋា មានប្រសាសន៍បន្តថា សម្រាប់គម្រោងបាតុកម្មនៅលើកនេះ ខ្មែរក្រោម និងយុវជន នឹងដើរដង្ហែក្បួនទៅកាន់ក្រសួងការបរទេស និងសហប្រតិបត្តិការអន្តរជាតិកម្ពុជា ដើម្បីដាក់ញត្តិស្នើឲ្យក្រសួងការបរទេស កោះហៅមន្ត្រីស្ថានទូតវៀតណាម ប្រចាំកម្ពុជា បកស្រាយឲ្យច្បាស់អំពីប្រវត្តិសាស្ត្រទឹកដីកម្ពុជាក្រោម។ ក្រៅពីនេះ ពួកគេនឹងដង្ហែញត្តិទៅដាក់នៅតាមស្ថានទូតប្រទេសសមាជិកសមាគមអាស៊ានដទៃទៀត ដើម្បីស្នើឲ្យរដ្ឋាភិបាលនៃអង្គការតំបន់មួយនេះ ជំរុញឲ្យរដ្ឋាភិបាលវៀតណាម គោរពគោលការណ៍អាស៊ានឲ្យបានពេញលេញ ក្នុងឋានៈជាប្រទេសជិតខាងល្អក្នុងស្មារតីមិត្តភាព និងសមធម៌។ លោក ថាច់ សេដ្ឋា ថា លោកមិនទាន់អាចនិយាយបានថានឹងទទួលបានលទ្ធផលយ៉ាងណានោះទេ ប៉ុន្តែលោកថា ការដាក់ញត្តិនេះយ៉ាងហោចណាស់ ក៏ធ្វើឲ្យប្រទេសនៅក្នុងតំបន់អាស៊ាន ដឹងអំពីឥរិយាបថរឹងទទឹងរបស់រដ្ឋាភិបាលកុម្មុយនីស្តវៀតណាម ដែរ។
លោក ថាច់ សេដ្ឋា៖ «ប្រទេសគេទាំងអស់គេទទួលញត្តិគេស្វាគមន៍ ហើយដែលខ្លួនឯងជាប្រទេសមួយភូមិផងរបងជាប់គ្នា ដែលអះអាងថា ជាមិត្តភាពល្អ បែរជាក្រអឺតក្រទម ហើយបំភ្លៃបំផ្លើសប្រវត្តិសាស្ត្រនេះ វាជាការមួយមិនត្រឹមត្រូវទេ ហើយថែមទាំងយើងដាក់ញត្តិដាក់អីមិនទទួល អាហ្នឹងកាន់តែមើលងាយថែមទៀតអ៊ីចឹង ថ្ងៃណាមួយទៅថ្ងៃអនាគតទៀត គេអាចថា កម្ពុជា ជាទឹកដីរបស់គេ សូម្បីតែឥឡូវហ្នឹងតាមអង្គរវត្ត តាមបូកគោ ក៏ចាប់ផ្ដើមបណ្ដើរៗទៅហើយ អាហ្នឹងហើយដែលយើងមើលឃើញថា ការមិនចេញមកទទួលញត្តិ ការមិនសុំទោស មិនអីទាំងអស់របស់យួន ហ្នឹង គឺគេមានការចិញ្ចឹមចិត្ត មហិច្ឆតាក្នុងការលេបត្របាក់យកទឹកដីខ្មែរ ដូចអ្វីដែលគេកំពុងធ្វើសព្វថ្ងៃនេះ»។
ជុំវិញរឿងរ៉ាវនេះ អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ថា តាមពិត ក្រសួងការបរទេសកម្ពុជា បានធ្វើតាមសំណើរបស់ក្រុមអ្នកតវ៉ារួចហើយនោះ គឺការបញ្ជូនញត្តិទៅកាន់ស្ថានទូតវៀតណាម ប្រចាំកម្ពុជា ហើយលោកថា មកទល់ពេលនេះ ក្រសួងក៏មិនទទួលបានដំណឹងអ្វីដែរ។ ចំពោះគម្រោងដង្ហែញត្តិរបស់ខ្មែរក្រោម និងយុវជន ស្នើឲ្យក្រសួងការបរទេសកម្ពុជា កោះហៅមន្ត្រីស្ថានទូតវៀតណាម ឬក៏យ៉ាងណានោះ លោក កុយ គួង ថា លោកមិនទាន់អាចនិយាយបានទេ៖ «ខ្ញុំអត់យល់ថា គាត់បន្តធ្វើការស្នើទៅលើអ្វីទៀតនោះ ខ្ញុំមិនមានយោបល់អ្វីទេ ប៉ុន្តែអ្វីគាត់បានស្នើឲ្យយើងទៅតាមរយៈសាលាក្រុងដែលដាក់ញត្តិទៅខាងភាគីវៀតណាម តាមរយៈក្រសួងៗក៏បានផ្ញើទៅហើយ»។
តាមគម្រោង ក្រុមអ្នកតវ៉ានឹងប្រមូលផ្តុំគ្នារយៈពេល ៣ថ្ងៃ គឺថ្ងៃទី១១ ទី១២ និងទី១៣ ខែសីហា នៅសួនច្បារមុខវត្តបទុមវតី។ ក្នុងរយៈពេល ៣ថ្ងៃនេះ ពួកគេនឹងជួបជុំគ្នាពីម៉ោង ៨ព្រឹក ដល់ម៉ោង ១រសៀល ដើម្បីសម្ដែងមតិ មុននឹងដើរដង្ហែក្បួនដាក់ញត្តិតាមស្ថានទូតនានា។ បន្ទាប់មក នឹងដង្ហែក្បួនទៅកាន់ស្ថានទូតវៀតណាម ដើម្បីទទួលចម្លើយអំពីការទទួលញត្តិរបស់អ្នកតវ៉ា រួចហើយក្បួនដង្ហែនឹងរំសាយនៅមុខស្ថានទូតវៀតណាម នៅវេលាម៉ោង ៥រសៀល។ ការជួបជុំចុងក្រោយនៅមុខស្ថានទូតវៀតណាម នេះ គឺធ្វើឡើង ៣ថ្ងៃជាប់គ្នាតែម្តង។
ទាក់ទងរឿងបាតុកម្មដង្ហែក្បួននេះដែរ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ថ្លែងថា សាលារាជធានីភ្នំពេញ បានទទួលលិខិតជូនដំណឹងរបស់ខ្មែរក្រោមរួចហើយ ប៉ុន្តែលោកថា សាលារាជធានីភ្នំពេញមិនទាន់បានប្រជុំសម្រេចយ៉ាងណានៅឡើយទេ៖ «យើងអត់ទាន់ផ្តល់ចម្លើយជូនបាន ព្រោះទើបទទួលបានលិខិតផង ហើយយើងកំពុងតែរៀបចំមានកំណត់បង្ហាញខាងជំនាញ ហើយនឹងដាក់កំណត់បង្ហាញជូនគណៈអភិបាលលោកសម្រេចសិន តែប្រហែលជាត្រូវអញ្ជើញខាងម្ចាស់ ខាងតំណាងមកពិភាក្សាគ្នាសិនហើយ»។
សំណើសុំរបស់ខ្មែរក្រោម និងយុវជន ធ្វើបាតុកម្មដង្ហែក្បួននៅពេលនេះ ស្របពេលដែលភាពតានតឹងនយោបាយហាក់ធូរស្រាល និងស្របពេលដែលអាជ្ញាធររាជធានីភ្នំពេញ ទើបដោះលែងទីលានប្រជាធិបតេយ្យឲ្យមានសេរីភាពឡើងវិញ។
សម្រាប់សាស្ត្រាចារ្យផ្នែកវិទ្យាសាស្ត្រនយោបាយ លោកបណ្ឌិត រស់ រ៉ាវុធ វិញ កត់សម្គាល់ថា ការធ្វើបាតុកម្មរបស់ខ្មែរក្រោម និងយុវជន ទាមទារឲ្យមានការទទួលស្គាល់ប្រវត្តិសាស្ត្ររបស់រដ្ឋាភិបាលវៀតណាម គឺជារឿងត្រឹមត្រូវ ហើយលោកថាបាតុកម្មដោយសន្តិវិធីរបស់ពួកគេ គួរទទួលបានការការពារពីអាជ្ញាធររដ្ឋាភិបាល។ ចំពោះការដាក់ញត្តិទៅស្ថានទូតប្រទេសសមាជិកអាស៊ានវិញ លោកថា អាចទទួលលទ្ធផលតិចតួចណាស់ ប៉ុន្តែលោកថាវាល្អជាងមិនធ្វើសោះ៖ «ក្នុងធម្មនុញ្ញអាស៊ាន បាននិយាយថា ប្រទេសដែលជាសមាជិកអាស៊ានមិនលូកដៃចូលកិច្ចការផ្ទៃក្នុងនៃប្រទេសដែលជាសមាជិករបស់ខ្លួនទេ។ អ៊ីចឹង យើងហែញត្តិទៅគ្រាន់តែបានដូចថា វាមានប្រសើរជាងអត់ អាហ្នឹងតែប៉ុណ្ណឹងទេ ដើម្បីឲ្យគេជួយ គ្រាន់តែថាដឹងឮ គ្រាន់តែជាពញ្ញាក់អារម្មណ៍ផងដែរ តែបើយើងអត់ធ្វើសោះ ដូចថាប្រទេសវៀតណាម ចេះតែរំលោភទៅ ប្រសិនណាបើខ្មែរក្រោមអត់ធ្វើសោះ»។
សម្រាប់ លោកបណ្ឌិត រស់ រ៉ាវុធ ប្រសិនបើរដ្ឋាភិបាលមិនចង់ឲ្យមានបាតុកម្ម ដែលធ្វើឲ្យប៉ះពាល់ដល់សណ្ដាប់ធ្នាប់សង្គមដូចដែលខ្លួនមិនចង់បាននោះ រដ្ឋាភិបាលគួរតែកោះហៅមន្ត្រីស្ថានទូតវៀតណាម ប្រចាំកម្ពុជា ឆ្លើយបំភ្លឺឲ្យបានច្បាស់ពីបញ្ហាប្រវត្តិសាស្ត្រនេះ ដើម្បីឲ្យប្រជាពលរដ្ឋខ្មែរអស់ចិត្ត៕