ភ្ជាប់ទៅនឹងបញ្ហានេះ សាលាក្ដីខ្មែរក្រហមបានអញ្ជើញដើមបណ្ដឹងរដ្ឋប្បវេណីជាង ២០នាក់ ដើម្បីឲ្យចូលស្ដាប់នៅក្នុងអង្គសវនាការនៅថ្ងៃទី២០ មិថុនា។
ជនរងគ្រោះនៅក្នុងរបបកម្ពុជាប្រជាធិបតេយ្យបានតាំងខ្លួនជាដើមបណ្ដឹងរដ្ឋប្បវេណី និងប្រជាពលរដ្ឋទូទៅមកចូលរួមនៅក្នុងសវនាការជំនុំជម្រះក្ដីនៅសាលាក្ដីខ្មែរក្រហម មកទល់ពេលនេះមានជាង ២សែននាក់ហើយ។
នៅថ្ងៃទី២០ មិថុនា អង្គភាពគាំពារជនរងគ្រោះនឹងផ្ដល់ឱកាសឲ្យខ្មែរក្រោម ដែលជាដើមបណ្ដឹងរដ្ឋប្បវេណីចូលទស្សនាការកាត់ក្ដីចំនួន ២៥នាក់ ដែលចំនួននេះជាចំនួនច្រើនជាងពីពេលមុនៗ។ ខ្មែរក្រោមជាង ២០នាក់នេះ មកពីខេត្តតាកែវ ជាខេត្តមួយដែលខ្មែរក្រហមបានសម្លាប់ខ្មែរក្រោមច្រើននៅក្នុងរបបកាប់សម្លាប់នោះ។
ជនរងគ្រោះនៅក្នុងរបបកម្ពុជាប្រជាធិបតេយ្យ និងជាដើមបណ្ដឹងរដ្ឋប្បវេណី លោក សាន តូច នៅស្រុកគីរីវង់ ខេត្តតាកែវ បានឲ្យដឹងថា នៅថ្ងៃព្រហស្បតិ៍ ទី២០ មិថុនា លោក និងប្រជាពលរដ្ឋមួយចំនួនទៀតទៅចូលរួមស្ដាប់ក្នុងសវនាការកាត់ទោសមេដឹកនាំខ្មែរក្រហមក្នុងសំណុំរឿងលេខ០០២ គឺលោក នួន ជា និងខៀវ សំផន។ លោកបញ្ជាក់ថា ការមកចូលរួមក្នុងសវនាការនេះមានសារៈសំខាន់ណាស់ក្នុងនាមជាដើមបណ្ដឹងរដ្ឋប្បវេណី និងជាជនរងគ្រោះនៅក្នុងរបបកម្ពុជាប្រជាធិបតេយ្យ ហើយនេះជាលើកទី៥ ហើយ ដែលលោកបានមកចូលរួមក្នុងសវនាការនេះ។
នាយកប្រតិបត្តិអង្គការការពារជនជាតិភាគតិច លោក អាង ចាន់រិទ្ធិ មានប្រសាសន៍ថា ក្នុងចំណោមដើមបណ្ដឹងរដ្ឋប្បវេណីជាខ្មែរកម្ពុជាក្រោមទាំង ២៥នាក់នេះ មាន ១០រូប សាលាក្ដីអនុញ្ញាតឲ្យចូលស្ដាប់អង្គសវនាការដោយផ្ទាល់ និង ១៥នាក់ផ្សេងទៀត ឲ្យស្ដាប់ និងមើលតាមកញ្ចក់ទូរទស្សន៍នៅខាងក្រៅបន្ទប់សវនាការ។ លោក អាង ចាន់រិទ្ធិ បញ្ជាក់ថា ការអនុញ្ញាតឲ្យដើមបណ្ដឹងរដ្ឋប្បវេណីចូលរួមក្នុងសវនាការនេះជារឿងសំខាន់ ដើម្បីឲ្យពួកគាត់បានយល់ដឹងអំពីនីតិវិធីរបស់សាលាក្ដី។
ក្រៅពីខ្មែរក្រោមមកចូលរួមក្នុងសវនាការនេះ គឺជនជាតិវៀតណាម នៅមានចំនួនតិចនៅឡើយដែលខាងសាលាក្ដីខ្មែរក្រហមអនុញ្ញាតឲ្យចូលរួមនោះ។ លោក អាង ចាន់រិទ្ធិ អះអាងថា វៀតណាម ខ្មែរក្រហមបានសម្លាប់ច្រើនដែរនៅក្នុងរបបខ្មែរក្រហម សម្លាប់ច្រើនដែរចំពោះអ្នកដែលបានរៀបការយកប្ដី ឬប្រពន្ធខ្មែរ ហើយមិនបានវិលទៅកាន់ប្រទេសវៀតណាម វិញនៅក្នុងរបបកម្ពុជាប្រជាធិបតេយ្យនោះ។
ទាក់ទងទៅនឹងបញ្ហានេះ នៅក្នុងអង្គសវនាការនាព្រឹកថ្ងៃទី១៩ មិថុនា នេះ សាក្សីដែលផ្ដល់សក្ខីកម្មនៅក្នុងសវនាការ លោក នួ ម៉ៅ បានអះអាងថា លោក ខៀវ សំផន ជាអ្នកគាំទ្រឲ្យមានការជម្លៀសប្រជាជនចេញពីទីក្រុង។ លោកបញ្ជាក់ថា ខ្មែរក្រហមបានយកខ្មែរដែលទៅរៀននៅវៀតណាម ឬហៅថាខ្មែរវៀតមិញ យកទៅសម្លាប់ប្រមាណ ៣ពាន់នាក់ ក្រោមរូបភាពថាយកទៅរៀនសូត្រ។
មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ដ្រា មានប្រសាសន៍ថា គិតទាំងសំណុំរឿង០០១ និង ០០២ គឺមានដើមបណ្ដឹងរដ្ឋប្បវេណី និងប្រជាពលរដ្ឋទូទៅមានជាង ២សែននាក់ ហើយបានមកចូលរួមក្នុងសវនាការកាត់ទោសអតីតមេដឹកនាំខ្មែរក្រហម គិតពីឆ្នាំ២០០៩ មក ដើម្បីឲ្យពួកគាត់បានយល់ដឹងបន្ថែមអំពីដំណើរការសាលាក្ដី។
ជនរងគ្រោះនៅក្នុងរបបកម្ពុជាប្រជាធិបតេយ្យ បានតាំងខ្លួនជាដើមបណ្ដឹងរដ្ឋប្បវេណីមានជាង ៣.៨០០នាក់ ក្នុងនោះមានខ្មែរក្រោមចំនួន ១៣៤នាក់ នៅក្នុងសំណុំរឿងលេខ០០២។ ដោយឡែកខ្មែរក្រោមចំនួន ១៣២នាក់ទៀត បានដាក់ពាក្យតាំងខ្លួនជាដើមបណ្ដឹងរដ្ឋប្បវេណីនៅក្នុងសំណុំរឿងលេខ០០៤ សាលាក្ដីខ្មែរក្រហមមិនទាន់ទទួលស្គាល់នៅឡើយមកទល់ពេលនេះ។
មេធាវីការពារក្ដីឲ្យដើមបណ្ដឹងរដ្ឋប្បវេណីខ្មែរកម្ពុជាក្រោម លោក សំ សុគង់ មានប្រសាសន៍ថា ដើមបណ្ដឹងរដ្ឋប្បវេណីខ្មែរក្រោមជាង ១៣០នាក់នេះ គឺពួកគាត់ស្ទើរតែទាំងអស់ត្រូវបានសាលាក្ដីអញ្ជើញឲ្យមកចូលរួមនៅក្នុងសវនាការ។ លោក សំ សុគង់ បញ្ជាក់ថា ក្នុងចំណោមខ្មែរក្រោមជាង ១៣០នាក់នោះ មានពីរនាក់អង្គជំនុំជម្រះបានអនុញ្ញាតមកធ្វើសក្ខីកម្មនៅក្នុងសវនាការ គឺលោក ចៅ នី និងលោក សឺន សុវណ្ណឌី កាលពីពេលថ្មីៗនេះ ក្នុងសំណុំរឿងលេខ០០២ នឹងបើកឱកាសឲ្យសួរសំណួរជាច្រើនទៅកាន់មេដឹកនាំជាន់ខ្ពស់ក្នុងរបបកម្ពុជាប្រជាធិបតេយ្យ គឺលោក ខៀវ សំផន និងលោក នួន ជា។
លើសពីនេះទៀត ខ្មែរក្រោមបានតាំងខ្លួនជាដើមបណ្ដឹងរដ្ឋប្បវេណីនោះ តើអង្គជំនុំជម្រះនឹងជ្រើសរើសឲ្យឡើងមកផ្ដល់សក្ខីកម្មបន្ថែមទៀត ឬយ៉ាងណាទេនៅពេលខាងមុខ?
សាលសវនាការរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) មានកៅអីចំនួន៤៨២ សម្រាប់សាធារណជនទូទៅ មន្ត្រីអង្គទូត និងតំណាងសារព័ត៌មាន (តំណាងសារព័ត៌មានត្រូវមានប័ណ្ណព័ត៌មានដែលចេញដោយ អ.វ.ត.ក)។ នៅថ្ងៃសវនាការធម្មតា ការបែងចែកកៅអី គឺអនុវត្តតាមគោលការណ៍អ្នកមកមុនបានមុន លើកលែងតែការមកជាក្រុមដែលមានសមាជិកលើសពី ៥នាក់ ត្រូវតែចុះឈ្មោះជាមុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។