ខ្មែរ | នាទីប្រចាំសប្ដាហ៍ | នាទីកម្ពុជាក្រោម

អ្នកប្រវត្តិសាស្ត្រជំរុញឲ្យសហព័ន្ធខ្មែរក្រោមពង្រឹងការងាររបស់ខ្លួនថែមទៀត

អង្គការសិទ្ធិមនុស្សអន្តរជាតិសម្ដែងការសោកស្ដាយចំពោះសហព័ន្ធខ្មែរកម្ពុជាក្រោមពិភពលោក ដែលមិនបានជាប់ជាសមាជិកក្រុមប្រឹក្សាសេដ្ឋកិច្ច និងសង្គមកិច្ចរបស់អង្គការសហប្រជាជាតិ កាលពីថ្ងៃទី២៣ កក្កដា កន្លងទៅ ដោយសារតែប្រទេសមួយចំនួន ពិសេសប្រទេសវៀតណាម បានបោះឆ្នោតទម្លាក់។

ដោយ ទីន ហ្សាការីយ៉ា
2012-07-26

អ្នកសិក្សាផ្នែកប្រវត្តិសាស្ត្របានពន្យល់ថា សហព័ន្ធខ្មែរកម្ពុជាក្រោមពិភពលោកមិនជាប់ជាសមាជិកក្រុមប្រឹក្សាសេដ្ឋកិច្ច និងសង្គមកិច្ចនៃអង្គការសហប្រជាជាតិនោះ ដោយសារតែបញ្ហាប្រទេសវៀតណាម មិនទាន់មានទំនុកចិត្តលើសហព័ន្ធខ្មែរកម្ពុជាក្រោមនៅឡើយ។

ទោះបីជាយ៉ាងនេះក្ដី អ្នកប្រវត្តិសាស្ត្របានជំរុញឲ្យសហព័ន្ធខ្មែរកម្ពុជាក្រោម ខិតខំតស៊ូបន្ថែមទៀត ពិសេសធ្វើយ៉ាងណាបង្ហាញអំពីសកម្មភាពរបស់ខ្លួនដល់ពិភពលោកថា រាល់ទង្វើរបស់សហព័ន្ធកំពុងធ្វើនោះ គ្រាន់តែចង់ការពារសិទ្ធិសេរីភាពជូនប្រជាពលរដ្ឋខ្មែរកម្ពុជាក្រោមនៅក្នុងប្រទេសវៀតណាម បច្ចុប្បន្នទេ មិនជាប់ពាក់ព័ន្ធនឹងការចង់ទាមទាររដ្ឋឯករាជ្យនោះទេ។

សាស្ត្រាចារ្យផ្នែកប្រវត្តិសាស្ត្រនៃសាកលវិទ្យាល័យភូមិន្ទភ្នំពេញ លោកសាស្ត្រាចារ្យ សំបូរ មាណ្ណារ៉ា មានប្រសាសន៍ថា ការបោះឆ្នោតជ្រើសរើសយកសហព័ន្ធខ្មែរកម្ពុជាក្រោម ជាសមាជិកក្រុមប្រឹក្សាសេដ្ឋកិច្ច សង្គមកិច្ចនៃអង្គការសហប្រជាជាតិនេះ វាអាស្រ័យលើភាគីអន្តរជាតិដែលជាប្រទេសជាសមាជិកជាអ្នកសម្រេច។

ប៉ុន្តែយ៉ាងនេះក្ដី លោក សំបូរ មាណ្ណារ៉ា បានពន្យល់ថា សហព័ន្ធខ្មែរកម្ពុជាក្រោមត្រូវប្រឹងប្រែងតទៅទៀត នៅក្នុងក្របខ័ណ្ឌឲ្យអន្តរជាតិមើលឃើញនូវសកម្មភាពរបស់ខ្លួន ពិសេសឲ្យរដ្ឋវៀតណាម យល់ដឹងអំពីទិសដៅរបស់ខ្លួនដែលថា ខ្លួនគ្រាន់តែធ្វើការងារដើម្បីទាមទារសិទ្ធិ សេរីភាពជូនប្រជាពលរដ្ឋខ្មែរនោះ។

ការលើកឡើងដូច្នេះនៅបន្ទាប់ពីតំណាងប្រទេសចំនួន ២៧ ក្នុងនោះមានវៀតណាម ចិន និងប្រទេសកុម្មុយនិស្តផ្សេងៗទៀត ក្នុងចំណោមប្រទេសចំនួន ៥៤ បានបោះឆ្នោតមិនគាំទ្របេក្ខភាពសហព័ន្ធខ្មែរកម្ពុជាក្រោមចូលជាសមាជិកក្រុមប្រឹក្សាសេដ្ឋកិច្ច សង្គមកិច្ចនៃអង្គការសហប្រជាជាតិកាលពីថ្ងៃទី២៣ កក្កដា។

ដោយឡែកប្រទេសដែលបោះឆ្នោតគាំទ្រសហព័ន្ធខ្មែរកម្ពុជាក្រោមជាសមាជិកក្រុមប្រឹក្សាសេដ្ឋកិច្ច សង្គមកិច្ច នៃអង្គការសហប្រជាជាតិនោះមានចំនួន ១៤ប្រទេស ក្នុងនោះមានប្រទេសអំណាចធំៗ ដូចជាសហរដ្ឋអាមេរិក អង់គ្លេស និងប្រទេសបារាំង និងប្រទេសមួយចំនួនទៀត។ រីឯ តំណាងប្រទេសចំនួន ១០ផ្សេងទៀត បានបោះឆ្នោតអនុប្បវាទ និងប្រទេសមិនចូលរួមបោះឆ្នោតមាន ៣ប្រទេសក្នុងចំណោមតំណាងប្រទេសចំនួន ៥៤។

នៅមុនពេលតំណាងប្រទេសជាសមាជិកនៃក្រុមប្រឹក្សានេះ បានបោះឆ្នោតសម្រេចកាលពីថ្ងៃទី២៣ កក្កដា នោះ តំណាងរដ្ឋាភិបាលវៀតណាម បានជំទាស់យ៉ាងខ្លាំងចំពោះបេក្ខភាពសហព័ន្ធខ្មែរកម្ពុជាក្រោម និងបានចោទប្រកាន់សហព័ន្ធនេះថា ចង់បង្កើតរដ្ឋឯករាជ្យរបស់ខ្លួនពីប្រទេសវៀតណាម។ យុវជនខ្មែរសហព័ន្ធខ្មែរកម្ពុជាក្រោម បានប្រជុំ និងបានប្រឌិតផែនទីទឹកដីខ្មែរកម្ពុជាក្រោម ថាមានចំនួន ១៦ ខែត្រក្រុងនៅវៀតណាម ភាគខាងត្បូង ដែលមានប្រជាជនរស់នៅប្រមាណ ៣០លាននាក់ជាដើម។

ឆ្លើយតបទៅនឹងបញ្ហានេះ លោក ថាច់ ង៉ុកថាច់ ជាប្រធានសហព័ន្ធខ្មែរកម្ពុជាក្រោម។ លោកបានបំភ្លឺថា វាមិនមែនជារឿងខ្មែរកម្ពុជាក្រោមចង់ទាមទារទឹកដីអ្វីទេ ករណីផែនទីគឺវៀតណាម ត្រូវតែទទួលស្គាល់ការពិតនូវរឿងប្រវត្តិសាស្ត្ររបស់ខ្លួន។ លោកបញ្ជាក់ថា ការចោទប្រកាន់នេះគ្រាន់តែជាការលើកឡើងដែលវៀតណាម ចង់បំភ្លេចនូវប្រវត្តិសាស្ត្រតែប៉ុណ្ណោះ។

ទាក់ទងទៅនឹងបញ្ហានេះ សាស្ត្រាចារ្យផ្នែកប្រវត្តិសាស្ត្រនៃសាកលវិទ្យាល័យភូមិន្ទភ្នំពេញ លោកសាស្ត្រាចារ្យ សំបូរ មាណ្ណារ៉ា បានពន្យល់ថា នៅក្នុងបរិបថបច្ចុប្បន្ននេះ គ្មានចលនារដ្ឋណាមួយ ឬប្រទេសណាមួយធ្វើការទាមទារឯករាជ្យពីប្រទេសមួយទទួលបានជោគជ័យនោះទេ។ នៅក្នុងសម័យកាលនេះ គ្រប់ប្រទេសទាំងអស់ចង់បានតែសិទ្ធិសេរីសេរីភាព និងសន្តិភាពតែប៉ុណ្ណោះ។

ទោះបីជាយ៉ាងណាក៏ដោយ ក្រុមអ្នកសង្កេតការណ៍អន្តរជាតិដើម្បីការការពារនៃអ្នកការពារសិទ្ធិមនុស្ស និងគណៈកម្មាធិការវៀតណាម ដើម្បីសិទ្ធិមនុស្ស (FIDH and OMCT) កាលពីថ្ងៃទី២៤ កក្កដា បានថ្កោលទោសចំពោះដំណោះស្រាយដែលអនុម័តដោយក្រុមប្រឹក្សាសេដ្ឋកិច្ច និងសង្គមកិច្ចនៃអង្គការសហប្រជាជាតិនូវការបដិសេធទៅនឹងសេចក្ដីសម្រេច ដើម្បីផ្ដល់ស្ថានភាពពិគ្រោះយោបល់ដល់អង្គការក្រៅរដ្ឋាភិបាល គឺសហព័ន្ធខ្មែរកម្ពុជាក្រោមពិភពលោកនេះ។

ប្រធានគណៈកម្មាធិការសិទ្ធិមនុស្សវៀតណាម នៅប្រទេសបារាំង លោក វ័រ វុំាងអៃ មានប្រសាសន៍ថា នេះជារឿងអាក្រក់មួយដែលរដ្ឋាភិបាលវៀតណាម មិនចង់ឲ្យមានការកែប្រែនូវគោលនយោបាយគោរពសិទ្ធិមនុស្សនៅក្នុងប្រទេសវៀតណាម នោះ តែបែរជាធ្វើការចោទប្រកាន់សហព័ន្ធខ្មែរកម្ពុជាក្រោមថា ចង់ទាមទារបង្កើតរដ្ឋឯករាជ្យនៅក្នុងប្រទេសវៀតណាម វិញនោះ។

លោក វ័រ វុំាងអៃ៖ «វាជារឿងគួរឲ្យអាម៉ាស់ ដែលប្រទេសជាសមាជិកនៃ UN មិនបានធ្វើអ្វីទៅតាមឆន្ទៈរបស់ខ្លួន ដោយសារតែមានសម្ពាធពីប្រទេសវៀតណាម ហើយសមគំនិតជាមួយប្រទេសវៀតណាម ដើម្បីបន្ទច់បង្អាក់សំឡេងអ្នកការពារសិទ្ធិមនុស្ស ហើយក៏ជាការបង្ហាញនៃសញ្ញាអវិជ្ជមានទៅប្រជាជនក្នុងប្រទេសវៀតណាម ដែលសហគមន៍អន្តរជាតិមិនឈរភាគីប្រជាពលរដ្ឋក្នុងប្រទេសវៀតណាម ដែលស្រេកឃ្លានសេរីភាព»។

អង្គការសហប្រជាជាតិមានស្ថាប័នបីសំខាន់ៗ ដែលអង្គការសហប្រជាជាតិបានបង្កើតឡើង ក្នុងនោះមានក្រុមប្រឹក្សាសន្តិសុខ ក្រុមប្រឹក្សាសិទ្ធិមនុស្ស និងក្រុមប្រឹក្សាសេដ្ឋកិច្ច និងសង្គមកិច្ច។ ស្ថាប័នទាំង ៣នេះ គឺជាផ្នែកមួយដ៏សំខាន់ក្នុងការធានានូវចលនាប្រជាធិបតេយ្យ និងសន្តិភាពនៅក្នុងតំបន់ និងពិភពលោក។

ក្រុមអ្នកវិភាគបានលើកឡើងថា ប្រសិនសហព័ន្ធខ្មែរកម្ពុជាក្រោមបានជាប់ជាសមាជិកក្រុមប្រឹក្សាសេដ្ឋកិច្ច សង្គមកិច្ច នៃអង្គការសហប្រជាជាតិនោះ បញ្ហាដែលខ្មែរកម្ពុជាក្រោមកំពុងប្រឈមក្រោមរបបនយោបាយរបស់រដ្ឋាភិបាលវៀតណាម សព្វថ្ងៃ អាចនឹងត្រូវកាត់បន្ថយ ហើយគេនឹងទាមទារបានមកវិញនូវជំនឿសាសនាវប្បធម៌ និងសិទ្ធិសេរីភាពក្នុងការបញ្ចេញមតិដែលធ្លាប់មានពីអតីតកាល ពិសេសគឺអាចមានសិទ្ធិលើកពីបញ្ហាប្រឈមនានារបស់ខ្លួននូវរាល់សម័យប្រជុំជាផ្លូវការរបស់អង្គការសហប្រជាជាតិ ដូចជាអាចធ្វើសេចក្ដីថ្លែងការណ៍នៅកិច្ចប្រជុំមានសិទ្ធិជួបសន្ទនាជាមួយរដ្ឋាភិបាល ឬអង្គការសង្គមស៊ីវិលផ្សេងទៀត មានសិទ្ធិរៀបចំកិច្ចប្រជុំនៅក្នុងសម័យប្រជុំពេញអង្គរបស់អង្គការសហប្រជាជាតិជាដើម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

កូនខ្មែរ

ពី ភ្នំពេញ

រឿងអីយួនចង់ឱ្យកម្ពុជាក្រោមរបូតពីកណ្តាប់ដៃរបស់ខ្លួននោះ បើយួនកំពុងតែរកវិធីដើម្បីលេបយកកម្ពុជាកណ្តាល
ទៀតនោះ គឺឱ្យខ្មែរលែងមានផែនទីលើពិភពលោកនា សតវត្សក្រោយនេះ ។

Jul 27, 2012 10:58 AM

ខ្មែរត្រូវតែជួយខ្មែរ!

Why Khmer Krom can't get the independent from VN Everyboby know that is Khmer Land. I am glad if our Khmer Krom can get the independent. France where are you now? You are the killer because you gave Khmer Krom to VN.

Jul 26, 2012 11:33 PM

Shihamoni

ពី Phnom Penh

Dear សំបូរ មាណ្ណារ៉ា! do you think youn will easily gives freedom to Khmer Krom??? what KKF doing is VIETNAM/YOUN MUST ACCEPT THE PAST, THE TRUE.......

Jul 26, 2012 08:11 PM

CheiVorman007

I kiss all of u who support my khmere kroim ...I cry for my khmere kroim for long time and my tears continous to fall down today ...

Jul 26, 2012 05:52 AM

អ្នកអានអនាមិក

why some countries on the world help communist viet nam action to khmer kampucheakrom people mak close the mouth, close eyes, close ear,tie hands,and tie the legs,whitout do anythings for our live living there. Just wait the day for died. Our khmer rcom would like to say many thanks that countries support us, We are never forget. please help us in the future.

Jul 26, 2012 04:50 AM