សារសំខាន់នៃការចូលរួមរបស់កងកម្លាំងប្រដាប់អាវុធក្នុងការបញ្ឈប់អំពើហិង្សាលើស្ត្រីនិងកុមារ
2014.11.29
បុរសល្អ ជាឈ្មោះយុទ្ធនាការមួយរបស់ក្រុមអង្គការមិនមែនរដ្ឋាភិបាល និងក្រសួងកិច្ចការនារី បានរួមគ្នាធ្វើ ដើម្បីកាត់បន្ថយការរើសអើង និងការប្រើអំពើហិង្សាលើស្ត្រី និងកុមារ។
ការហែក្បួនកម្មវិធីនេះ ត្រូវធ្វើឡើងនៅក្នុងទីរួមខេត្តកំពង់ស្ពឺ នៅថ្ងៃប្រារព្ធទិវាអន្តរជាតិបញ្ឈប់អំពើហិង្សាប្រឆាំងស្ត្រី កាលពីថ្ងៃទី២៥ ខែវិច្ឆិកា។ យុទ្ធនាការនេះ ចូលរួមផ្សព្វផ្សាយពីមន្ត្រីអាជ្ញាធរ មានមន្ត្រីប៉ូលិស កងរាជអាវុធហត្ថ កងទាហាន និងសិស្សានុសិស្សនៅក្នុងខេត្តសរុបប្រមាណជិត ៤០០នាក់។
ក្នុងនាទីស្ត្រីខ្មែរសប្ដាហ៍នេះ អ្នកស្រី សុ ជីវី រាយការណ៍ពីសារសំខាន់នៃការចូលរួមរបស់កងកម្លាំងប្រដាប់អាវុធ ក្នុងការបញ្ឈប់អំពើហិង្សាលើស្ត្រី និងកុមារដូចតទៅ៖
សំឡេងស្គរឆៃយ៉ាំ បានលាន់ឮកងរំពងក្នុងទីរួមខេត្តកំពង់ស្ពឺ នាពេលព្រឹកព្រលឹម។ សំឡេងនោះបានបន្លឺចេញពីក្រុមអ្នកហែក្បួនក្នុងកម្មវិធីបុរសល្អ។
«សំឡេងឆៃយ៉ាំ»
អ្នកចូលរួមដែលភាគច្រើនជាកងកម្លាំងប្រដាប់អាវុធ សិស្ស បុគ្គលិកអង្គការមិនមែនរដ្ឋាភិបាល បានដើរកាន់បដា និងសារអប់រំជាច្រើន។ សារមួយក្នុងចំណោមនោះលើកឡើងថា ខ្ញុំអប់រំកូនពីក្មេងឲ្យចេះគោរព និងទទួលស្គាល់តម្លៃស្ត្រី បុរសល្អផ្តល់តម្លៃឲ្យស្ត្រី។
មន្ត្រីកងរាជអាវុធហត្ថខេត្តមួយរូបឈ្មោះ ទូច ឬទ្ធី ដែលចូលរួមក្នុងយុទ្ធនាការនោះថ្លែងថា ជារឿងល្អមួយដែលលោកបានចូលរួមយុទ្ធនាការ និងស្វែងយល់ពីអត្ថន័យបុរសល្អ។ លោកថា ក្នុងនាមមន្ត្រីកងរាជអាវុធហត្ថ លោកគាំទ្រចំពោះសកម្មភាពដែលជាមធ្យោបាយចូលរួមបញ្ឈប់អំពើហិង្សាលើស្ត្រី។ លោក ឬទ្ធី យល់ថា បុរសល្អ គឺជាបុរសដែលមិនមាក់ងាយស្ត្រី ឬប្រើហិង្សាដាក់ស្ត្រី។
អង្គការមិនមែនរដ្ឋាភិបាលឈ្មោះ សន្តិភាព និងអភិវឌ្ឍន៍ ដែលរៀបចំកម្មវិធីនេះ បានកំណត់គោលដៅរយៈពេលវែងរបស់ខ្លួន ក្នុងការផ្លាស់ប្ដូរឥរិយាបថពលរដ្ឋក្នុងសង្គម ចំពោះតម្លៃនៃសមភាពយេនឌ័រ ជាពិសេសការផ្លាស់ប្ដូរឥរិយាបថរបស់ក្រុមបុរស។ អង្គការនេះ បានធ្វើយុទ្ធនាការបុរសល្អជាច្រើនឆ្នាំកន្លងមកហើយ ប៉ុន្តែនេះជាលើកទី១ហើយ ដែលមានកងកម្លាំងប្រដាប់អាវុធចូលរួមដូចនៅក្រុងច្បារមន នេះ។
ប្រធានផ្នែកទំនាក់ទំនងនៃអង្គការសន្តិភាព និងអភិវឌ្ឍន៍ (PYD) អ្នកស្រី គឹម ធីតាកល្យាណណី មានប្រសាសន៍បញ្ជាក់ថា ការចូលរួមរបស់ក្រុមកងកម្លាំងប្រដាប់អាវុធ គឺជាសារមួយបង្ហាញពីការប្ដេជ្ញាចិត្តរបស់ពួកគាត់ ក្នុងការទប់ស្កាត់ និងដាក់ទោសទណ្ឌចំពោះអ្នកបង្កអំពើហិង្សាលើស្ត្រី។ ការចូលរួមរបស់ពួកគាត់ ជាការប្រកាសប្រាប់ពលរដ្ឋទូទៅថា ពួកគាត់ពិតជាមានការយកចិត្តទុកដាក់ខ្លាំង ក្នុងការបង្ក្រាបអំពើហិង្សា ជាពិសេសអំពើហិង្សាលើស្ត្រី។
ឆ្លងកាត់បទពិសោធន៍ការងារជាច្រើនឆ្នាំមកនេះ អ្នកស្រី ធីតាកល្យាណី អះអាងថា ក្រុមបុរសដែលបានចូលរួមកម្មវិធីបុរសល្អ បានផ្លាស់ប្ដូរឥរិយាបថចំពោះស្ត្រី ឬតែងតែជាអ្នកដែលមិនប្រើហិង្សាលើស្ត្រី។ ពួកគាត់តែងផ្តល់តម្លៃចំពោះភាពស្មើគ្នារវាងបុរស និងស្ត្រី។ ពួកគាត់ចូលរួមចែករំលែកការងារផ្ទះ និងការសម្រេចចិត្តរួមគ្នាក្នុងគ្រួសារ។ អ្នកស្រីរំពឹងថា ក្រុមបុរសជាកងកម្លាំងប្រដាប់អាវុធ ក៏ដូចគ្នានឹងក្រុមបុរសដែលបានចូលរួមយុទ្ធនាការនេះកាលពីឆ្នាំមុនៗដែរ។
ក្រៅពីចូលរួមយុទ្ធនាការហែក្បួន ក្រុមកងកម្លាំងប្រដាប់អាវុធ ក៏បានឆ្លងកាត់វគ្គសិក្ខាសាលាផ្សព្វផ្សាយសារ ៦ចំណុច ជាគោលការណ៍នៃយុទ្ធនាការ «បុរសល្អ» ដែលជាការអំពាវនាវឲ្យបុរសផ្លាស់ប្ដូរផ្នត់គំនិតមកចូលរួមការពារ និងកាត់បន្ថយអំពើហិង្សាលើស្ត្រី។ សិក្ខាសាលាដូចគ្នានោះ ត្រូវធ្វើនៅក្នុងខេត្តចំនួន៤ផ្សេងទៀត រួមមានខេត្តកំពត កំពង់ស្ពឺ ស្ទឹងត្រែង និងរតនគិរី។
គោលការណ៍ស្នូលទាំង៦ នៃយុទ្ធនាការ «បុរសល្អ» នេះ គឺចូលរួមបញ្ឈប់អំពើហិង្សាលើស្ត្រី ចែករំលែកកិច្ចការផ្ទះ ដោះស្រាយបញ្ហាដោយការពិភាក្សាគ្នា ធ្វើខ្លួនជាគំរូល្អក្នុងការលើកកម្ពស់សមភាពរវាងបុរស និងស្ត្រី ធ្វើការសម្រេចចិត្តរួមគ្នា និងយកចិត្តទុកដាក់ចំពោះបុរស និងស្ត្រីដោយស្មើភាពគ្នា។
ប្រធាននាយកដ្ឋានការពារផ្លូវច្បាប់នៃក្រសួងកិច្ចការនារី អ្នកស្រី កេត ម៉ារឌី មានប្រសាសន៍ពន្យល់ដែរថា ការចូលរួមពីកងកម្លាំងប្រដាប់អាវុធក្នុងយុទ្ធនាការនេះ គឺមានសារសំខាន់ ដ្បិតពួកគេជាអ្នកផ្ដល់សេវាជួយជនរងគ្រោះដោយអំពើហិង្សា។ អ្នកស្រីបន្តថា កងកម្លាំងប្រដាប់អាវុធភាគច្រើនជាបុរស ហើយអ្នកប្រព្រឹត្តិអំពើហិង្សាភាគច្រើនជាបុរស ហេតុនេះការជ្រើសរើសក្រុមកងកម្លាំងប្រដាប់អាវុធជាគោលដៅ គឺចង់បញ្ជាក់ថា ចាប់ផ្ដើមពីពួកគាត់នេះមុនគេ ក្នុងការបញ្ឈប់អំពើហិង្សាក្នុងគ្រួសារ។
អ្នកស្រី កេត ម៉ារឌី ឲ្យដឹងទៀតថា ដោយយោងទៅលើការស្ទង់មតិផ្នែកសុខភាពវិទ្យាសាស្ត្រ នៅក្នុងប្រទេសកម្ពុជា បានបង្ហាញថា ស្ត្រីមានជិត ១៣ភាគរយ បានទទួលអំពើហិង្សាពីប្ដី ឬពីក្រុមបុរសដែលជាដៃគូក្នុងអំឡុង ១២ខែចុងក្រោយនេះ។
ចំណែករបាយការណ៍របស់អង្គការសហប្រជាជាតិ ដែលធ្វើការងារខាងស្ត្រី បានចេញផ្សាយកាលពីចុងឆ្នាំ២០១៣ កន្លងទៅនេះ គឺបន្ទាប់ពីបានសម្ភាសជាមួយបុរសប្រមាណជិត ២ពាន់នាក់ (១.៨៦៣នាក់) បង្ហាញដែរថា បុរសកម្ពុជា ១នាក់ក្នុងចំណោម ៥នាក់ គិតចាប់ពីអាយុ ១៥ ដល់ ៤៩ឆ្នាំ មានបទពិសោធន៍រំលោភសេពសន្ថវៈលើស្ត្រី៕