សារសំខាន់នៃការបង្កើតក្រុមមាតាបិតាគាំពារការសិក្សារបស់កុមារជនជាតិដើមភាគតិច
2014.08.22
ស្ត្រីជាម្ដាយចម្អិនអាហារសម្រន់សម្រាប់កូនតូចៗដែលរៀនក្នុងសាលាបឋមសិក្សាមួយក្នុងស្រុកវ៉ឺនសៃ ខេត្តរតនគិរី កាលពីថ្ងៃទី១៩ ខែមិថុនា ឆ្នាំ២០១៤។
ក្រុមអង្គការមិនមែនរដ្ឋាភិបាល ធ្វើការក្នុងវិស័យអប់រំនៅក្នុងតំបន់ភាគឦសានប្រទេស បង្កើតកម្មវិធីមួយចំនួនជាជំនួយដល់ការសិក្សារបស់កុមារតូចជនជាតិដើមភាគតិច។ ការបង្កើតក្រុមឪពុកម្ដាយសិស្ស ឬហៅដោយខ្លីថា ក្រុមម៉ែៗ គឺជាផ្នែកមួយក្នុងចំណោមកម្មវិធីទាំងនោះ។ ក្រុមនោះជាចំណងភ្ជាប់ទំនាក់ទំនងរវាងឪពុកម្ដាយ ឬអាណាព្យាបាលកុមារ ទៅនឹងការសិក្សារបស់កូនៗពួកគេក្នុងសាលារៀន។
ពេលព្រឹក ស្ត្រីវ័យក្មេងបីនាក់ បានជួយគ្នារៀបចំបង្កាត់ភ្លើងដាក់ទឹកក្នុងខ្ទះ និងផ្សំគ្រឿង ដើម្បីដាំបបរនៅក្នុងកូនរោងតូចមួយខាងក្រោយអគារសិក្សានៃសាលាបឋមសិក្សា ពូលូង នៅពេលដែលក្មេងៗសិស្សសាលាកំពុងរៀនក្នុងថ្នាក់៖ «សំឡេង»។
កំពុងលីងគ្រឿងបបរបណ្ដើរ និយាយបណ្ដើរ យូរៗម្ដងបានប្ដូរកន្លែង ដើម្បីគេចចេញពីផ្សែងដែលហុយទ្រលោមក្នុងរោង លោកស្រី ប៉ុក ង ជាជនជាតិភាគតិចព្នង រស់នៅភូមិពូលូង សង្កាត់រមនា ក្នុងក្រុងមនោរម្យ ខេត្តមណ្ឌលគិរី មានប្រសាសន៍ថា ជាញឹកញាប់គាត់តែងឆ្លៀតពេលមកជួយដាំបបរធ្វើអាហារពេលព្រឹកអោយក្មេងៗ រួមទាំងកូនលោកស្រីផង អោយបានស្រស់ស្រូបនៅពេលពួកគេមកសាលារៀន។ អាហារនោះភាគច្រើន គឺបបរគ្រឿង យូរៗម្ដងក៏មានបបរសដែរ៖ «សំឡេង»។
ការជួយធ្វើអាហារពេលព្រឹកអោយកុមារនៅបឋមសិក្សា គឺជាផ្នែកមួយនៃគម្រោងបង្កើតអោយមានក្រុមមាតាបិតា អាណាព្យាបាលសិស្ស។ ដ្បិតអាហារពេលព្រឹកត្រូវចាត់ទុកជាជំនួយមួយសំខាន់ ក្នុងការទាក់ទាញកុមារអោយចូលរៀន និងចង់រៀន ព្រមទាំងរៀនបានល្អ។
ពួកគេបានបែងចែកវេនដើម្បីទៅធ្វើអាហារពេលព្រឹក។ ពេលខ្លះឪពុកម្ដាយកុមារ ក៏បានចូលរួមផ្ដល់ឧស និងអង្ករដែរ។ នៅសាលាបឋមសិក្សាក្នុងភូមិពូលូង អាហារពេលព្រឹករបស់សិស្សបានការឧបត្ថម្ភពីអង្គការក្រៅរដ្ឋាភិបាល ចំណែកសិស្សនៅមត្តេយ្យសហគមន៍ គឺក្រុមម៉ែៗរួមគ្នាឧបត្ថម្ភ។
ម្ដាយជនជាតិព្នងម្នាក់ដែលមានកូនតូចកំពុងរៀនក្នុងថ្នាក់មត្តេយ្យដែរ មានប្រសាសន៍ថា ក្មេងតូចៗតែងតែឃ្លាន និងត្រូវការអាហារនៅពេលពួកគេមកសាលារៀន ប្រសិនបើពុំមានអាហារសម្រន់ទេ ពួកគេតែងប្រកែកមិនចង់ទៅរៀន៖ «សំឡេង»។
នាយកបឋមសិក្សាភូមិពូលូង លោក សុត ចាន់ធឿន មានប្រសាសន៍ថា ចំនួនសិស្សក្នុងសាលាមិនបានថយចុះឡើយ ចំណែកចំនួនសិស្សបោះបង់ការសិក្សា ក៏មិនមានចំនួនច្រើនដូចមុនឡើយ នៅពេលសាលាមានអាហារពេលព្រឹក៖ «សំឡេង»។
ក្នុងខេត្តមណ្ឌលគិរី អត្រាបោះបង់ចោលសាលារបស់កុមារមានចំនួនពី ១២% ទៅ ១៤% ហើយចំនួននេះឋិតនៅថេរ គឺពុំបានកើនឡើងឡើយគិតត្រឹមឆ្នាំសិក្សា២០១៣-២០១៤។ ក្នុងផ្នែកបឋមសិក្សាមានសិស្សសរុបជាង ១ម៉ឺន ២ពាន់នាក់ (១២.២១៩នាក់)។ ចំណែកនៅក្នុងស្រុកវ៉ឺនសៃ ក្នុងខេត្តរតនគិរី វិញ ក្រៅពីជួយផ្ដល់អាហារសម្រន់សម្រាប់កុមារ ក្រុមឪពុកម្ដាយ ឬក្រុមម៉ែៗនោះ បានជួយផ្គត់ផ្គង់សម្ភារៈក្មេងលេង ជំនួយដល់ការរៀនរបស់ក្មេងទៅដល់សាលាមត្តេយ្យ។
តំណាងក្រុមឪពុកម្ដាយក្នុងស្រុកវ៉ឺនសៃ លោកស្រី ស៊ុកាន់ មានប្រសាសន៍ថា ស្របគ្នានឹងការផ្គត់ផ្គង់ចំណីអាហារ និងសម្ភារៈផ្សេងៗនេះ ឪពុកម្ដាយ ជាពិសេសម្ដាយតែងជាអ្នកដែលជួយជំរុញកុមារអោយចូលរៀន និងមកសាលារៀនទៀងទាត់។ ក្រៅពីនេះ ក្រុមឪពុកម្ដាយក៏តែងជួបប្រជុំគ្នា ស្វែងយល់ពីការថែទាំសុខភាពគ្រួសារ និងក្មេងៗតូចៗផង៖ «សំឡេងចំរៀង»។
នាយកប្រតិបត្តិសមាគមគ្រួសារយើង ដែលកំពុងធ្វើការងារជំរុញការអប់រំក្នុងខេត្តភាគឦសាន អ្នកស្រី ទី សំភី មានប្រសាសន៍ថា ការចងក្រងក្រុមមាតាបិតាសិស្សនេះ អាចជួយពួកគាត់ឲ្យមានការយល់ដឹងកាន់តែច្រើនពីការថែទាំសុខភាពគ្រួសារ ចាប់តាំងពីអាហារប្រចាំថ្ងៃ ពេលមានផ្ទៃពោះ និងក្រោយសម្រាល៖ «សំឡេង»។
ពាក់ព័ន្ធនឹងការផ្ដល់អាហារពេលព្រឹកសម្រាប់កុមារនៅថ្នាក់មត្តេយ្យ និងបឋមសិក្សានេះ បើទោះជាមានការអះអាងថា ជាជំនួយសំខាន់មួយ ប៉ុន្តែរដ្ឋពុំមានថវិកាសម្រាប់ផ្គត់ផ្គង់ផ្នែកនេះទេ ដែលចាំបាច់ត្រូវពឹងផ្អែកលើជំនួយរបស់អង្គការមិនមែនរដ្ឋាភិបាល និងក្រុមឪពុកម្ដាយសិស្ស។
ប្រធានមន្ទីរអប់រំ យុវជន និងកីឡា ខេត្តរតនគិរី លោក ទឹម សង្វាត មានប្រសាសន៍ថា ករណីនេះទាមទារអោយបណ្ដាភាគីម្ចាស់ជំនួយ ជាពិសេស សហភាពអឺរ៉ុប ដែលកំពុងផ្ដល់ជំនួយដល់វិស័យអប់រំនៅកម្ពុជា៖ «សំឡេង»។
ឆ្លើយតបនឹងការអំពាវនាវនេះ សហភាពអឺរ៉ុប គ្រោងនឹងផ្ដល់ថវិកាប្រមាណ ១៨០លានដុល្លារ ដោយផ្ដោតសំខាន់ទៅលើការអភិវឌ្ឍវិស័យអប់រំនៅកម្ពុជា ពីឆ្នាំ២០១៤ ដល់ឆ្នាំ២០២០៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ