យុវជនចាប់អារម្មណ៍បច្ចេកវិទ្យាព័ត៌មានសម្រាប់អភិវឌ្ឍសង្គម
2014.11.27
យុវជនគឺជាកម្លាំងចលករមួយដ៏សំខាន់ក្នុងការអភិវឌ្ឍប្រទេសជាតិ ឲ្យមានភាពរីកចម្រើន។ យុវជនព្យាយាមផ្សារភ្ជាប់ខ្លួនឯងទៅក្នុងសង្គមតាមរយៈសកម្មភាពនានា។ សព្វថ្ងៃនេះដោយបច្ចេកវិទ្យាកាន់តែទំនើប យុវជនភាគច្រើនបានយកមធ្យោបាយព័ត៌មានវិទ្យាជាទុនក្នុងការ ឈឺឆ្អាលបញ្ហាដែលកើតមានឡើងក្នុងសហគមន៍របស់ខ្លួន។
រឿងរ៉ាវអសកម្មជាច្រើនក្នុងសង្គម យុវជនអាចសរសេរ ថតជាវីដេអូ ឬថតជារូបភាពដាក់បង្ហោះក្នុងគេហទំព័រមួយដែលបញ្ចូលទិន្នន័យនៃការផ្លាស់ប្ដូរ និងការអភិវឌ្ឍ។ ព័ត៌មានពាក់ព័ន្ធបញ្ហាការមិនប្រមូលសំរាម ការឧស្សាហ៍ដាច់ភ្លើងញឹកញាប់មិនមានការជូនដំណឹងជាមុន ស្ថានភាពលំបាកក្នុងការធ្វើដំណើររបស់ជនពិការតាមផ្លូវសាធារណៈ និងបញ្ហាផ្សេងៗទៀត ត្រូវបានបង្ហោះក្នុងគេហទំព័រ "សំឡេងទីក្រុង" របស់អង្គការសមាគមធាងត្នោត ដែលមានកិច្ចសហប្រតិបត្តិការជាមួយបណ្ដាញយុវជនកម្ពុជា (CYN)។
"សំឡេងទីក្រុង" គឺជាគេហទំព័រដំបូងបង្អស់នៅកម្ពុជា ដែលប្រើប្រាស់ឧបករណ៍ទំនើប អាចទាញយកព័ត៌មាន និងការវិភាគលើនិន្នាការនៃការអភិវឌ្ឍទីក្រុងទុកធ្វើជាភស្តុងតាងក្នុងការតស៊ូមតិ និងបង្កើនការចូលរួមរបស់សង្គមតាមរយៈមហាជន។
យុវជន អិន ចិនណា រៀននៅសាកលវិទ្យាល័យភូមិន្ទភ្នំពេញ ចាប់អារម្មណ៍គេហទំព័រ "សំឡេងទីក្រុង" ដោយគិតថា គេហទំព័រនេះអាចនឹងពាំនាំទុក្ខកង្វល់របស់មហាជនទៅដល់អាជ្ញាធរឲ្យជួយដោះស្រាយ និងចូលរួមអភិវឌ្ឍន៍ទីក្រុងជាមួយគ្នា៖ «ខ្ញុំគិតថា អាចជួយបានច្រើន បើយើងផ្សព្វផ្សាយឲ្យបានច្រើនជាងនេះ»។
គេហទំព័រ "សំឡេងទីក្រុង" ចាប់ផ្ដើមបង្កើតកាលពីខែកុម្ភៈ ឆ្នាំ២០១២។ ប៉ុន្តែមិនដំណើរការទេ លុះដល់ខែតុលា ឆ្នាំ២០១៣ ទើបដាក់ឲ្យប្រើប្រាស់។
ប្រធានប្រព័ន្ធផ្សព្វផ្សាយនៅសមាគម "ធាងត្នោត" លោក មី សុវណ្ណ ឲ្យដឹងថា យុវជនកំពុងចាប់អារម្មណ៍ច្រើនទៅលើគេហទំព័រនេះ ដោយសារតែពួកគេអាចបរិយាយរឿងពិតក្នុងសង្គម រួមមានការអភិវឌ្ឍន៍សេដ្ឋកិច្ច បញ្ហាសិទ្ធិមនុស្ស នយោបាយ និងបរិស្ថាន។ លោកបន្តថា ជាលទ្ធផលដែលលោកកត់សំគាល់នោះ បញ្ហានៅតែកើតមាននៅក្នុងសង្គម ប៉ុន្តែមានការផ្លាស់ប្ដូរខ្លះគួរឲ្យចាប់អារម្មណ៍៖ «យើងទទួលបានជោគជ័យច្រើនក្នុងយុទ្ធនាការកន្លងមក...។ នេះជាការផ្លាស់ប្ដូរសន្សឹមៗ ដែលយើងកំពុងធ្វើ»។
ដើម្បីទាក់ទាញឲ្យមានការចូលរួមច្រើនពីយុវជន "សំឡេងទីក្រុង" បានរៀបចំសិក្សាសាលាជាបន្តបន្ទាប់ ដែលពិភាក្សាលើបញ្ហាសង្គមនៅទីក្រុងភ្នំពេញ និងចែកចាយនូវចំណេះដឹងពីឧបករណ៍បច្ចេកវិទ្យាដែលទាក់ទងនឹងសង្គមស៊ីវិល សហគមន៍ និងសិស្សនិស្សិតតាមសាកលវិទ្យាល័យ។
យុវសិស្ស គង់ សុខជឿ ដែលបានចូលរួមក្នុងសិក្ខាសាលាស្ដីពីបច្ចេកវិទ្យាព័ត៌មានវិទ្យា អាយ.ស៊ី.ធី (ICT) សម្រាប់ការអភិវឌ្ឍ ដែលរៀបចំឡើងដោយ "សំឡេងទីក្រុង" ឲ្យដឹងថា គេហទំព័រនេះនឹងអាចទាក់ទាញមហាជន ពិសេសយុវជនចូលរួមផ្សព្វផ្សាយព័ត៌មានតាមសហគមន៍បានច្រើន៖ «សំឡេងយុវជនល្អសម្រាប់ពលរដ្ឋ ពេលមានបញ្ហាហៅទៅឲ្យជួយដោះស្រាយ។ ទោះជាដោះស្រាយមិនបានភ្លាមៗ តែអាចដោះស្រាយបានមួយផ្នែកសម្រាប់យើង»។
ទាក់ទងបញ្ហាផ្តល់ព័ត៌មានពីសហគមន៍នេះ ប្រធានសហគមន៍ "ឫស្សីស្រស់" ក្នុងសង្កាត់និរោធ ខណ្ឌច្បារអំពៅ លោកស្រី សេក សាលី ឲ្យដឹងថា លោកស្រីធ្លាប់បានសរសេរអត្ថបទ និងបង្ហោះរូបជាច្រើនពាក់ព័ន្ធនឹងបញ្ហាមួយចំនួនក្នុងសហគមន៍របស់លោកស្រី។ ជាលទ្ធផល អាជ្ញាធរតែងផ្តល់ការឆ្លើយតបភ្លាមៗដល់សហគមន៍ នៅពេលដែលឃើញរឿងអាស្រូវក្នុងសហគមន៍ត្រូវបានលាតត្រដាង៖ «បើយើងមិនបង្ហោះរឿងនៅក្នុងសហគមន៍ទៅឲ្យអង្គការជាដៃគូជួយយើង ក្រុមហ៊ុន ឬអាជ្ញាធរមិនចាប់អារម្មណ៍ទេ»។
ប្រធានប្រព័ន្ធផ្សព្វផ្សាយនៅសមាគមធាងត្នោត លោក មី សុវណ្ណ បញ្ជាក់ថា យុវជន ឬមហាជនដែលចាប់អារម្មណ៍ចូលរួមក្នុង "សំឡេងទីក្រុង" អាចសរសេរ ឬដាក់របាយការណ៍ព័ត៌មាន ចូលទៅកាន់គេហទំព័រ Urban Voice Cambodia ឬក៏អាចផ្ញើសារ ឬទូរស័ព្ទទៅកាន់លេខ ០៩៧ ២៦៤ ០០ ៥៦ ឬក៏អាចចូលរួមសកម្មភាពប្រជុំប្រចាំខែ ឬក៏ចូលរួមក្នុងសិក្ខាសាលាបណ្ដុះបណ្ដាលបច្ចេកវិទ្យាព័ត៌មានវិទ្យា និងការធ្វើបទបង្ហាញផ្សេងៗ ដើម្បីអាចចូលរួមចំណែកពីការអភិវឌ្ឍសង្គមបាន៕