ខ្មែរ

#រូបត្លុកនយោបាយ៖ «កម្ពុជាលែងមានស្កេម នៅសល់តែមេស្កេម»

សំ ប៉ូលី — Fri, 04 Sep 2026 14:13:28 +0000

ប្រធានលេខាធិការដ្ឋាននៃគណៈកម្មាការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា លោក ឆៃ ស៊ីណារិទ្ធ បានប្រាប់តំណាងអង្គទូតបរទេស និងអង្គការអន្តរជាតិប្រចាំកម្ពុជាប្រហែល៥០នាក់ កាលពីថ្ងៃទី ២៧ សីហាថា មជ្ឈមណ្ឌលឆបោក អនឡាញ គ្មានវត្តមាននៅកម្ពុជាទៀតទេ។

សម្រាប់អ្នកឃ្លាំមើលបានលើកឡើងថា ការប្រកាសរបស់មន្ត្រីជាន់ខ្ពស់នេះ មិនអាចធ្វើឲ្យសហគមន៍អន្តរជាតិជឿជាក់បានឡើយ ដោយសារតែមេខ្លោង ឬម្ចាស់ទីតាំងដែលជាប់ពាក់ព័ន្ធនឹងក្រុមឧក្រិដ្ឋជនឆបោក ដូចជាឧកញ៉ា លី យ៉ុង ផាត់ ឧកញ៉ា កុក អាន និងឧកញ៉ា ហ៊ុន តូ ជាដើម ដែលរងការចោទប្រកាន់ពីសហរដ្ឋអាមេរិក មិនទាន់ត្រូវបានចាប់ខ្លួន និងស៊ើបអង្កេតឲ្យបានច្បាស់លាស់នៅឡើយ៕

#នេះជាគំនិតរបស់អ្នកគូររូបត្លុក!

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

#រូបត្លុកនយោបាយ៖ «សមិទ្ធផល ៣ឆ្នាំរបស់លោក ហ៊ុន ម៉ាណែត»

សំ ប៉ូលី — Thu, 27 Aug 2026 14:29:15 +0000

មន្ត្រីរដ្ឋាភិបាលបានលើកឡើងថា ការដឹកនាំ៣ឆ្នាំ លោក ហ៊ុន ម៉ាណែត សម្រេចបានសមិទ្ធផលធំៗជាច្រើន តាមរយៈការទៅសម្ពោធដាក់ឲ្យប្រើប្រាស់ស្ពាន ថ្នល់ សលារៀន មន្ទីរពេទ្យ កំពង់ផែ និងព្រលានយន្តហោះអន្តរជាតិថ្មីជាដើម ដើម្បីតភ្ជាប់បណ្ដាញដឹកជញ្ជូនទាំងផ្លូវគោកនិងផ្លូវអាកាស។ រដ្ឋាភិបាលបានបញ្ជាក់ថា សមិទ្ធផលធំៗទាំងនេះ បានកើតឡើងដោយសារការដឹកនាំបន្តវេនពីលោក ហ៊ុន សែន ជាឪពុក ទៅលោក ហ៊ុន ម៉ាណែត។

ផ្ទុយទៅវិញ ពលរដ្ឋទូទៅ បានមើលឃើញថា ការដឹកនាំរបស់លោក ហ៊ុន ម៉ាណែត រយៈពេល៣ឆ្នាំ បានធ្វើឲ្យកម្ពុជាជួបបញ្ហាធំៗ មិនអាចដោះស្រាយបាន។ បញ្ហាធំៗទាំងនោះ រួមមាន ការប្រឈមបាត់បង់ទឹកដីនិងប្រាសាទបុរាណទៅប្រទេសថៃ ការឆបោកអនឡាញ ពលរដ្ឋរងគ្រោះចាញ់បោកក្រុមឧកញ៉ា មិនអាចទទួលបានយុត្តិធម៌ ពលករដែលវិលពីចំណាកស្រុក ពិបាករកការងារធ្វើ និងការធ្លាក់ចុះភ្ញៀវទេសចរអន្តរជាតិជាដើម។

បញ្ហាពុករលួយ និងបក្ខពួកនិយម បានធ្វើឲ្យពលរដ្ឋកាន់តែអស់សង្ឃឹមលើប្រព័ន្ធយុត្តិធម៌ ហើយបញ្ហាគ្រឿងញៀន និងក្មេងទំនើង ក៏កាន់តែគំរាមកំហែងដល់សន្ដិសុខសង្គម ធ្វើឲ្យពលរដ្ឋរស់នៅក្នុងភាពភ័យខ្លាច។

ក្រៅពីនេះ ការធ្លាក់ចុះលទ្ធិប្រជាធិបតេយ្យ និងការរំលោភសិទ្ធិមនុស្ស នៅតែជាក្ដីកង្វល់ធំ ដែលនាំឲ្យសហគមន៍អន្តរជាតិបន្តរិះគន់ និងជាឧបសគ្គ ធ្វើឲ្យកម្ពុជា មិនអាចទាក់ទាញអ្នកវិនិយោគ មកពីប្រទេសធំៗខាងប៉ែកប្រជាធិបតេយ្យបាន៕

#នេះជាគំនិតរបស់អ្នកគូររូបត្លុក!

#រូបត្លុកនយោបាយ៖ «ជួយជាតិ ឬជួយជនផ្ដាច់ការ»

សំ ប៉ូលី — Thu, 20 Aug 2026 12:21:22 +0000

លោក ហ៊ុន សែន បានបង្កើតបទចោទក្លែងក្លាយ «ក្បត់ជាតិ» ដើម្បីយកលេសរំលាយគណបក្សសង្គ្រោះជាតិ ដែលមានអ្នកគាំទ្រកន្លះប្រទេស និងចាប់ឃុំខ្លួនលោក កឹម សុខា ជិត១០ឆ្នាំ។ លើសពីនេះ លោក ហ៊ុន សែន ក៏បានប្រើប្រាស់គ្រប់ឧបាយកល រាប់ពីការចាប់បង្ខំ រហូតឲ្យលុយកាក ទិញទឹកចិត្តក្រុមមន្ត្រីគណបក្សសង្គ្រោះជាតិ ឲ្យចុះចូលគណបក្សប្រជាជនកម្ពុជា។

លោក ហ៊ុន សែន ចាត់ទុកអ្នកចុះចូលទាំងនោះ ថាជាសត្វលលក ហើយលោកបានប្រើ លលកឲ្យជួយទាក់លលក ដោយមិនប្រកាន់ថា លលកតូចឬធំឡើយ។ ចំណែកក្រុមមន្ត្រីគណបក្សប្រឆាំង ដែលមានឆន្ទៈរឹងមាំ តស៊ូ ដើម្បីលទ្ធិប្រជាធិបតេយ្យ បានរងការធ្វើបាបយ៉ាងចាស់ដៃពីអាជ្ញាធរនៃរបបដឹកនាំត្រកូល «ហ៊ុន»។ លោក ហ៊ុន សែន បានចាត់ទុកក្រុមមន្ត្រីបក្សប្រឆាំង ដែលមិនព្រមលក់ខ្លួន ថាជាក្រុមមនុស្សក្បាលរឹង និងប្រៀបប្រដូច ជាត្រីក្នុងត្រក ដែលលោក កាច់កស៊ីពេលណាក៏បាន។

លោក ហ៊ុន សែន មិនដែលខ្វល់នឹងការថ្កោលទោសពីសហគមន៍ជាតិ និងអន្តរជាតិ ជុំវិញការរំលោភសិទ្ធិមនុស្ស និងដើរប្រាសចាកឆ្ងាយពីរបបលទ្ធិប្រជាធិបតេយ្យនោះទេ។ លោកខ្វល់តែការពារអំណាច និងរៀបចំផ្ទេរអំណាច ទៅឲ្យកូនប្រុសរបស់លោក គឺលោក ហ៊ុន ម៉ាណែត តែប៉ុណ្ណោះ។

ថ្មីៗនេះ កញ្ញា កឹម មនោវិទ្យា កូនស្រីច្បងរបស់លោក កឹម សុខា បានចុះចូលជាមួយរដ្ឋាភិបាលលោក ហ៊ុន ម៉ាណែត ដែលកញ្ញា និងឪពុកនាង ធ្លាប់ចាត់ទុកថា ជារបបផ្ដាច់ការ៕

#នេះជាគំនិតរបស់អ្នកគូររូបត្លុក!

#រូបត្លុកនយោបាយ៖ តើកម្ពុជានឹងខាតបង់ទេ ប្រសិនបើបដិសេធដូចថៃ?

សំ ប៉ូលី — Thu, 13 Aug 2026 14:15:42 +0000

អ្នករាយការណ៍ពិសេសរបស់អង្គការសហប្រជាជាតិស្ដីពីសិទ្ធិមនុស្សនៅកម្ពុជា លោក ថម អេនឌ្រូ (Thomas Andrews) បានបង្ហាញពីកង្វល់នៃស្ថានភាពរបស់ជនភៀសសឹកខ្មែរជិត៣ម៉ឺននាក់ និងបានទទូចឲ្យថៃ គោរពច្បាប់អន្តរជាតិ ដើម្បីឲ្យជនភៀសសឹកទាំងនោះ បានវិលទៅភូមិកំណើត និងប្រកបរបរចិញ្ចឹមជីវិតដូចដើមវិញ។ ប៉ុន្តែការលើកឡើងនេះ ត្រូវបានប្រទេសថៃបដិសេធ និងចាត់ទុកថា ជារបាយការណ៍មិនឆ្លុះបញ្ចាំងការពិត និងលម្អៀង។

ក្រៅពីបញ្ហារបស់ជនភៀសសឹកខ្មែរតាមព្រំដែន លោក លោក ថម អេនឌ្រូ ក៏បានជំរុញឱ្យរដ្ឋាភិបាលកម្ពុជា ធានាការគោរពសិទ្ធិសេរីភាពជាមូលដ្ឋានឡើងវិញ។ ការលើកឡើងនេះ ស្របពេលលោកបង្ហាញពីក្ដីកង្វល់ ជុំវិញការធ្វើទុក្ខបុកម្នេញអ្នកនយោបាយជំទាស់ ជាពិសេស គឺការចាប់ខ្លួនអ្នកសម្ដែងមតិជាង ១០០នាក់ ដាក់ពន្ធនាគារ។ រដ្ឋាភិបាលកម្ពុជា មិនទាន់មានប្រតិកម្មលើការជំរុញនេះទេ ប៉ុន្តែ កន្លងមក តែងចាត់ទុកថា ជារបាយការណ៍ខ្វះការពិត និងលម្អៀងទៅគណបក្សប្រឆាំង៕

#នេះជាគំនិតរបស់អ្នកគូររូបត្លុក!

#រូបត្លុកនយោបាយ៖ «មានលុយ មិនបាច់ជាប់គុក»

សំ ប៉ូលី — Fri, 07 Aug 2026 09:32:31 +0000

ពលរដ្ឋហាក់មិនជឿថា ក្រុមអ្នកមានអំណាច និងកូនចៅរបស់ពួកគេ ដែលបង្កគ្រោះថ្នាក់ចរាចរណ៍បុកមនុស្សស្លាប់ នឹងត្រូវប្រឈមមុខតាមផ្លូវច្បាប់ឡើយ។ ភាពមិនជឿជាក់នេះបានកើតឡើងជាថ្មី ក្រោយពីកូនស្រីឧកញ៉ា តុង ហុងសេង ឈ្មោះ សាម ម៉ីជូ អាយុ២៧ឆ្នាំ បានបើកឡានទំនើបបុកអ្នកបើកម៉ូតូ ជាមន្ត្រីក្រសួងសាធារណការឈ្មោះ គួច លឹមហាន អាយុ៣៥ឆ្នាំ ឲ្យស្លាប់ចោលប្រពន្ធនិងកូនតូច ក្នុងខណ្ឌឫស្សីកែវ កាលពីថ្ងៃទី២៨ ខែកក្កដា។

ការព្រួយបារម្ភរបស់ពលរដ្ឋ ថាជនបង្កអាចរកលេសដើម្បីរួចខ្លួនពីការទទួលខុសត្រូវតាមច្បាប់ គឺដោយសារកន្លងមក ធ្លាប់មានករណីកូនមន្ត្រីនិងអ្នកមានអំណាច តែងទទួលបានការបន្ធូរបន្ថយទោស ក្រោយពីបើកឡានបុកមនុស្សស្លាប់។ ករណីទាំងនោះ រួមមាននិស្សិតពេទ្យឈ្មោះ គាមពិសិដ្ឋ ណារីតា កូនស្រីអនុប្រធានមន្ទីរសុខាភិបាលខេត្តកណ្ដាល កាលពីឆ្នាំ២០១៣ បានបើករថយន្តបុករះម៉ូតូជាច្រើនគ្រឿង បណ្ដាលឲ្យកុមារ៣នាក់ស្លាប់ ប៉ុន្តែជាប់គុកតែ៣ខែ ដោយមន្ត្រីលើកហេតុផលថា និស្សិតពេទ្យរូបនេះ មានជំងឺសរសៃប្រសាទ។

ចំណែកកូនស្រីសមាជិកក្រុមប្រឹក្សាខេត្តសៀមរាបឈ្មោះ យិន ឃុនម៉ី ដែលបើកឡានយ៉ាងលឿន ទៅបុកម៉ូតូនិស្សិតឆ្នើមកញ្ញា ឌុំ រីដា ស្លាប់ កាលពីឆ្នាំ២០១៩ ក៏ជាប់គុកត្រឹម២ខែដែរ។ លើសពីនេះ កូនប្រុសរបស់មេធាវីម្នាក់ឈ្មោះ ព្រហ្ម វិចិត្រសុសក្ដា ដែលបានបើកឡានបុកកីឡាករជម្រើសជាតិវាយស៊ីស្លាប់ ហើយបានព្យាយាមរត់គេចខ្លួនពីផ្លូវច្បាប់ បានប្ដឹងប្រពន្ធ និងឪពុកម្ដាយជនរងគ្រោះពីបទបរិហាកេរ្តិ៍ថែមទៀតផង៕

#រូបត្លុកនេះ ជាគំនិតរបស់អ្នកគូររូបត្លុក!

#រូបត្លុកនយោបាយ៖ «ជារឿងបុគ្គលរវាងអាមេរិក ជាមួយ កុក អាន និង លី យ៉ុងផាត»

សំ ប៉ូលី — Thu, 30 Jul 2026 14:02:56 +0000

លោកនាយករដ្ឋមន្ត្រី ហ៊ុន ម៉ាណែត ថ្លែងក្នុងបទសម្ភាសជាមួយសារព័ត៌មាន Bloomberg ថា អាមេរិកបានដាក់ទណ្ឌកម្មលើក្រុមសមាជិកព្រឹទ្ធសភាលោក លី យ៉ុងផាត់ និងលោក កុក អាន ពាក់ព័ន្ធនឹងឧក្រិដ្ឋជកម្មឆបោកអនឡាញ និងការរំលោភសិទ្ធិមនុស្ស គឺជារឿងបុគ្គលរវាងឧកញ៉ាទាំងពីររូបនេះ ជាមួយសហរដ្ឋអាមេរិក។ លោកបន្តថា លោក កុក អាន និងលោក លី យ៉ុងផាត់ ក៏បានជួលមេធាវី ដើម្បីតតាំងនឹងការចោទប្រកាន់ពីសហរដ្ឋអាមេរិក តាមផ្លូវតុលាការ។

លោក ហ៊ុន ម៉ាណែត បានបន្ថែមថា លោកក៏មិនអាចបកស្រាយថា ភាគីខាងណាខុសឬត្រូវឡើយ ដោយវាអាស្រ័យលើភស្ដុតាង និងការសម្រេចពីតុលាការអាមេរិកប៉ុណ្ណោះ។ ទោះជាយ៉ាងណា ការបកស្រាយរបស់លោក ហ៊ុន ម៉ាណែត នេះ ត្រូវបានគេចាត់ទុកថា ជាការគេចវេះ និងដោះសារយករួចខ្លួន ពីការទទួលខុសត្រូវ៕

#រូបត្លុកនេះ ជាគំនិតរបស់អ្នកគូររូបត្លុក!

#រូបត្លុកនយោបាយ៖ «ចិនហាមកម្ពុជាមិនឲ្យប្រើអាវុធរបស់ខ្លួនវាយប្រហាថៃ»

សំ ប៉ូលី — Fri, 24 Jul 2026 15:17:18 +0000

នាយករដ្ឋមន្ត្រីថៃលោក អានុទីន ចាន់វីរៈគុល (Anutin Charnvirakul) បានជួបប្រធានាធិបតីចិនលោក ស៊ី ជីនពីង (Xi Jinping) កាលពីថ្ងៃទី១៧ ខែកក្កដា ហើយលោកបានលើកឡើងពីការព្រួយបារម្ភរបស់ថៃ ចំពោះការបញ្ជូនអាវុធ ជាពិសេសរថក្រោះផលិតដោយប្រទេសចិន ទៅឲ្យប្រទេសកម្ពុជា។ លោក អានុទីន បញ្ជាក់ថា ជាការឆ្លើយតប ប្រធានាធិបតីចិនបានធានាថា នឹងមិនឲ្យកម្ពុជាប្រើប្រាស់អាវុធដែលទទួលបានពីចិន សម្រាប់យកទៅវាយប្រហារលើប្រទេសថៃឡើយ។

កម្ពុជាទទួលបានរថគ្រោះប្រភេទ T59D ចំនួន៣៩គ្រឿង ក្នុងចំណោម៩៣គ្រឿង ដែលចិនបានព្រមព្រៀងប្រគល់មកឲ្យកម្ពុជា តាំងពីមិនទាន់ផ្ទុះសង្គ្រាម។ ប្រធានព្រឹទ្ធសភាលោក ហ៊ុន សែន ធ្លាប់បានប្រតិកម្មថា រថក្រោះដែលចិនប្រគល់ឲ្យទាំងនេះ មិនបានស្នើ១០ភាគនៃរថគ្រោះ ដែលកម្ពុជាកំពុងប្រើនោះទេ។

ទោះជាយ៉ាងណា ការអះអាងរបស់នាយករដ្ឋមន្ត្រីថៃ ថាប្រធានាធិបតីចិន មិនឲ្យកម្ពុជាប្រើប្រាស់អាវុធទទួលបានពីចិនសម្រាប់វាយប្រហារលើថៃនោះ មិនទាន់មានការឆ្លើយតបផ្ទាល់ពីភាគីចិន និងកម្ពុជានៅឡើយទេ៕

#រូបត្លុកនេះ ជាគំនិតរបស់អ្នកគូររូបត្លុក!

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

ហ៊ុន តូ៖ «ទុកលុយ ហួយវ័ន ធ្វើវិមាន និងទីលានវាយកូនហ្គោល»

សំ ប៉ូលី — Fri, 17 Jul 2026 15:57:32 +0000

ក្មួយប្រុសលោក ហ៊ុន សែន និងជាបងជីដូនមួយលោកនាយករដ្ឋមន្ត្រី ហ៊ុន ម៉ាណែត គឺលោក ហ៊ុន តូ ត្រូវបានសង្ស័យថា កំពុងសាងសង់វិមានដ៏ប្រណិត រួមទាំងទីលានវាយកូនហ្គោល នៅលើផ្ទៃដីបឹងតាមោកប្រមាណ១០០ហិកតា។

លោក ហ៊ុន តូ ត្រូវបានសហរដ្ឋអាមេរិក ដាក់ឈ្មោះនៅក្នុងបញ្ជីខ្មៅ ថាជាក្រុមឧក្រិដ្ឋជនអន្តរជាតិ ជាប់ពាក់ព័ន្ធនឹងការប្រើប្រាស់ធនាគារ ហួយវ័ន ផេ (Huione Pay) លាងលុយកខ្វក់ ដែលទទួលបានពីការឆបោក។ លោក ហ៊ុន តូ ក៏កំពុងប្រឈមមុខនឹងក្រុមជនជាតិចិន និងខ្មែររាប់រយនាក់ ដែលជាអតិថិជនក្រុមហ៊ុន ហួយវ័ន ផេ។ ពួកគេបានចេញតវ៉ាស្ទើររៀងរាល់ថ្ងៃ នៅមុខធនាគារជាតិ និងមុខស្ថានទូតចិន ដោយលើកបដាទាមទារឲ្យលោក ហ៊ុន តូ សងលុយកម្លាំងញើសឈាមពួកគេវិញ។ ក្រុមអ្នកតវ៉ាសង្ស័យថា លុយពួកគេរាប់លានដុល្លារ ដែលដាក់តម្កល់ទុកនៅធនាគារ ហួយវ័ន ផេ ហើយបានបាត់ គឺអាចដោយសារលោក ហ៊ុន តូ បង្កកទុក សម្រាប់យកទៅសាងសង់ទីលានវាយកូនហ្គោល។

ទោះជាយ៉ាងណា គ្មានស្ថាប័នណាមួយ ហ៊ានប៉ះពាល់ ឬចាត់វិធានការច្បាប់លើលោក ហ៊ុន តូ ឡើយ ផ្ទុយទៅវិញ បែរជាបង្ក្រាបយ៉ាងហិង្សាលើអ្នកតវ៉ា ហើយបានចាប់ខ្លួនម្ចាស់លុយ ជាជនជាតិខ្មែរពីរនាក់ដាក់គុក និងចាប់ជនជាតិចិនម្នាក់បញ្ជូនទៅប្រទេសវិញ។ ទង្វើនេះ នឹងធ្វើឲ្យកេរ្តិ៍ឈ្មោះកម្ពុជា កាន់តែមានក្លិនអាសោចលើឆាកអន្តរជាតិ៕

#រូបត្លុកនេះ ជាគំនិតរបស់អ្នកគូររូបត្លុក!

#គំនូជីវចល៖ «ស្រមោលយុត្តិធម៌ និងឃាតករសិប្បនិម្មិត»

សំ ប៉ូលី — Fri, 10 Jul 2026 14:09:28 +0000

បណ្ឌិត កែម ឡី ជាអ្នកវិភាគសង្គមមួយរូប ដែលហ៊ាននិយាយរិះគន់ចំៗ ទៅលើចំណុចខ្វះខាតរបស់រដ្ឋាភិបាលដើម្បីឱ្យមានការគោរព សិទ្ធិមនុស្ស និងប្រជាធិបតេយ្យពិតប្រាកដនៅកម្ពុជា។

ថ្ងៃទី១០ ខែកក្កដា ឆ្នាំ២០២៦ ជាថ្ងៃគម្រប់ខួប ១០ឆ្នាំ នៃឃាតកម្មលើបណ្ឌិត កែម ឡី ដែលត្រូវបានឃាតករបាញ់សម្លាប់ នៅស្ថានីយប្រេងឥន្ធនៈស្ដុបបូកគោ ក្នុងរាជធានីភ្នំពេញ។ ទោះបីជា អាជ្ញាធរចាប់បានបុគ្គលឈ្មោះ អឿត អាង ដែលហៅខ្លួនឯងថា «ជួប សម្លាប់» ឲ្យមកទទួលខុស ហើយជននេះ បានសារភាពថា ការសម្លាប់បណ្ឌិត កែម ឡី ដោយសារបំណុល ៣០០០ដុល្លារអាមេរិក។ ប៉ុន្តែពលរដ្ឋ និងក្រុមគ្រួសារយល់ឃើញថា គ្រាន់ជារឿងប្រឌិតប៉ុណ្ណោះ។ ពួកគាត់សង្ស័យថា ការធ្វើឃាតលើបណ្ឌិត កែម ឡី គឺជាប់ពាក់ព័ន្ធអ្នកមានអំណាចក្នុងជួររដ្ឋាភិបាល ទើបមិនអាចវែកមុខឃាតករពិតបាន៕

តើយុត្តិធម៌នឹងមានសម្រាប់លោកបណ្ឌិត កែម ឡី ដែរឬទេ?

#គំនូរជីវចលនេះ ជាគំនិតរបស់អ្នកគូររូបត្លុក!

#រូបត្លុកនយោបាយ៖ ចំណាត់ការ Facebook លើសារគំរាមលោក ហ៊ុន សែន

សំ ប៉ូលី — Sun, 28 Jun 2026 09:00:00 +0000

លោក ហ៊ុន សែន ជាមេដឹកនាំដែលតែងតែប្រើប្រាស់យុទ្ធសាស្ត្រគំរាមកំហែង ដើម្បីបំភិតបំភ័យប្រជាពលរដ្ឋ និងរារាំងពួកគេមិនឱ្យចូលរួមក្នុងសកម្មភាពសង្គម និងនយោបាយ។ ក្នុងពេលថ្មីៗនេះ ក្រុមហ៊ុនមេតា (Meta) បានសម្រេចដកវីដេអូរបស់លោក ហ៊ុន សែន ដែលប្រើភាសាអសុរោះ និងគំរាមកំហែងថា “ងើបមួយ វ៉ៃមួយ” ចេញពីទំព័រហ្វេសប៊ុក (Facebook) របស់លោក កាលពីថ្ងៃទី១៨ ខែមិថុនា។ ការសម្រេចនេះធ្វើឡើងក្រោយពីអង្គការចលនាខ្មែរដើម្បីប្រជាធិបតេយ្យ រួមទាំងសហគមន៍ខ្មែរនៅក្រៅប្រទេស បានដាក់ពាក្យប្ដឹងទៅកាន់ក្រុមហ៊ុនមេតា ប្រឆាំងនឹងលោក ហ៊ុន សែន ដែលប្រើប្រាស់បណ្ដាញសង្គមដើម្បីផ្សព្វផ្សាយសារគំរាមកំហែង ហិង្សា និងអសុរោះ។

តើព្រឹត្តិការណ៍នៃការលុបវីដេអូនេះ អាចធ្វើឱ្យមេដឹកនាំខ្មែររូបនេះភ្ញាក់រឭកបានដែរឬទេ?

តើវិស័យការពារជាតិខ្សោយ ដោយសារអំពើពុករលួយ ឬការអភិវឌ្ឍ?

សំ ប៉ូលី — Sun, 14 Jun 2026 09:00:00 +0000

លោក ហ៊ុន សែន ជាមេដឹកនាំ ដែលចូលចិត្តពាក់នាឡិកា តម្លៃរាប់សិបលានដុល្លារ។ លោកបានទទួលស្គាល់កំហុសថា កាលលោកនៅធ្វើជានាយករដ្ឋមន្ត្រី លោកមិនបានពង្រឹងវិស័យការពារជាតិ ហើយផ្ដោតតែលើការសាងសង់ហេដ្ឋារចនាសម្ព័ន្ធផ្សេងៗ ដូចជាស្ពាន ថ្នល់ សាលារៀន និងមន្ទីរពេទ្យជាដើម ទើបធ្វើឲ្យកម្ពុជាមិនអាចទប់ទល់ការឈ្លានពានពីប្រទេសថៃបាន។

តើកត្តាដែលនាំឲ្យវិស័យការពារជាតិទន់ខ្សោយ គឺដោយសារតែអំពើពុករលួយ និងការដឹកនាំតាមបែបបក្ខពួកគ្រួសារនិយម ឬដោយសារការអភិវឌ្ឍលើហេដ្ឋារចនាសម្ព័ន្ធ នៅពេលដែលកម្ពុជាបានទទួលជំនួយអភិវឌ្ឍន៍ពីបរទេសច្រើនណាស់ក្នុងមួយឆ្នាំៗ?

អង្គការជាតិនិងអន្តរជាតិ៧០ស្ថាប័នទាមទារឲ្យលោក ហ៊ុន ម៉ាណែត ដោះលែងយុវជនចលនាមាតាធម្មជាតិ

ប្រាជ្ញ ចេវ — Fri, 05 Jun 2026 14:21:51 +0000

ក្រុមអង្គការជាតិ និងអន្តរជាតិបានលើកឡើងនៅក្នុងលិខិតដាក់ទៅលោក ហ៊ុន ម៉ាណែត ថា ក្រុមចលនាមាតាធម្មជាតិ បានធ្វើយុទ្ធនាការដោយសន្ដិវិធីដើម្បីការពារបរិស្ថាន តាមរយៈការលើកម្ពស់ការយល់ដឹងទៅដល់ពលរដ្ឋតាមបណ្ដាញសង្គម និងអំពាវនាវឲ្យទប់ស្កាត់ការកាប់បំផ្លាញព្រៃឈើ និងការបូមខ្សាច់ខុសច្បាប់ ការបញ្ចេញទឹកកខ្វក់ចូលទន្លេ និងសមុទ្រ ការសាងសង់ទំនប់វារីអគ្គិសនី និងការបំផ្លាញដីសើមជាដើម ខណៈបញ្ហាទាំងអស់នេះ ត្រូវបានរកឃើញថា សុទ្ធតែជាប់ពាក់ព័ន្ធនឹងអំពើពុករលួយ ដែលនាំឲ្យបាត់បង់ចំណូលជាតិ ហើយត្រូវការជាចាំបាច់នូវអភិបាលកិច្ចល្អ។

អង្គការទាំងនោះថា យុវជនមាតាធម្មជាតិ ធ្វើសកម្មភាពដោយសន្ដិវិធី និងស្របតាមច្បាប់អន្តរជាតិ៕

លិខិតដដែលបន្តថា ក្រុមចលនាមាតាធម្មជាតិ បានអនុវត្តសិទ្ធិរបស់ខ្លួនដោយសន្ដិវិធី តាមរយៈការបញ្ចេញមតិ និងការប្រមូលផ្ដុំគ្នាដើម្បីការពារបរិស្ថាននៅកម្ពុជា ដែលទៅស្របតាមអនុសញ្ញាស្ដីពីសិទ្ធិមនុស្សអង្គការសហប្រជាជាតិ ហើយរដ្ឋាភិបាលកម្ពុជាក៏បានផ្ដល់សច្ចាប័នដែរ លើសពីនេះ ក្រុមយុវជនទាំងនោះ ក៏មិនបានញុះញង់ឲ្យមនុស្សប្រព្រឹត្តអំពើហិង្សា ដែលជាទង្វើខុសច្បាប់ឡើយ។

ក្រុមអង្គការទាំងនោះ បានបន្តថា ការបំបែកក្រុមចលនាមាតាធម្មជាតិ ឃុំខ្លួននៅពន្ធនាគារដាច់ស្រយាលផ្សេងៗពីគ្នា និងមានចម្ងាយរាប់រយគីឡូម៉ែត្រពីគ្រួសារ និងការបដិសេធបណ្ដឹងសុំនៅក្រៅឃុំជាបន្តបន្ទាប់ រួមទាំងការពន្យារពេលនិតីវិធីរបស់សាលាឧទ្ធរណ៍ គឺបានរំលោភទាំងសិទ្ធិទទួលបានការជំនុំជម្រះក្តីដោយសេរីនិងយុត្តិធម៌ និងទាំងសិទ្ធិសន្មតថាគ្មានទោសផងដែរ។

ការដាក់លិខិតនេះ បានធ្វើឡើងបន្ទាប់ពីសាលាឧទ្ធរណ៍បានជូនដំណឹងកាលពីខែឧសភា ស្ដីពីការពន្យារពេលបើកសវនាការជំនុំជម្រះក្ដីលើបណ្ដឹងរបស់ក្រុមយុវជនចលនាមាតាធម្មជាតិទាំង៥នាក់ ដើម្បីជំទាស់ទៅនឹងសេចក្ដីសម្រេចរបស់សាលាដំបូងរាជធានីភ្នំពេញ ដែលបានផ្ដន្ទាទោសពួកគេដាក់ពន្ធនាគារពី៦ឆ្នាំទៅ៨ឆ្នាំ ពីបទ «ប្រមាថចំពោះអង្គព្រះមហាក្សត្រ និងរួមគំនិតក្បត់» ពាក់ព័ន្ធនឹងសកម្មភាពការពារបរិស្ថាន និងបានឃុំខ្លួនពួកគេតាំងពីថ្ងៃទី០២ ខែកក្កដា ឆ្នាំ២០២៤។ សកម្មជនចលនាមាតាធម្មជាតិទាំង៥នាក់ ដែលកំពុងជាប់ឃុំរួមមានលោក ថុន រដ្ឋា លោក លី ចាន់ដារ៉ាវុត កញ្ញា ឡុង គន្ធា និងកញ្ញា ភួន កែវរស្មី និងលោក យីម លាងហ៊ី។

ក្រុមអង្គការទាំង៧០ស្ថាប័នបានបញ្ជាក់ទៀតថា កម្ពុជាកំពុងរៀបចំធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនី (Francophonie) លើកទី២០ ដែលគ្រោងធ្វើឡើងនៅពាក់កណ្ដាលខែវិច្ឆិកាឆ្នាំ២០២៦នេះ ហើយពួកគេបានទាមទារឲ្យលោក ហ៊ុន ម៉ាណែត ត្រូវទទួលស្គាល់ថា បញ្ហាសិទ្ធិមនុស្ស ការការពារបរិស្ថាន និងការទប់ស្កាត់ការប្រែប្រួលអាកាសធាតុ គឺជាបញ្ហាប្រឈមជាសកលដ៏សំខាន់ ដែលក្រុមមេដឹកនាំពិភពលោក នឹងលើកឡើងពីបញ្ហាទាំងអស់ហ្នឹង នៅក្នុងកិច្ចប្រជុំកំពូលនេះ ដូច្នេះ លោក ហ៊ុន ម៉ាណែត ត្រូវធ្វើសកម្មភាពឲ្យស្របតាមស្មារតីនេះ ហើយត្រូវដោះលែងក្រុមយុវជនចលនាមាតាធម្មជាតិ ឲ្យបានមុខកិច្ចប្រជុំកំពូលនេះកើតឡើង៕

ការលើកលែងទោសជាប់ឃុំលោក កឹម សុខា «មិនមែនជាការបង្រួបបង្រួមជាតិ»

ប្រាជ្ញ ចេវ — Fri, 05 Jun 2026 14:02:17 +0000

ការដោះលែងលោក កឹម សុខា ឲ្យមានសេរីភាព ប៉ុន្តែមិនផ្ដល់សិទ្ធិឲ្យលោកធ្វើនយោបាយ ត្រូវបានគេមើលឃើញថា គ្រាន់តែជារូបភាពបោកបញ្ជោតរបស់គណបក្សប្រជាជនកម្ពុជា ក្នុងការបន្លំភ្នែកពលរដ្ឋនិងសហគមន៍អន្តរជាតិ ឲ្យមើលឃើញថា កម្ពុជាកំពុងមានការបង្រួមបង្រួមជាតិនិងសាមគ្គីជាតិ។

ការដោះលែងលោក កឹម សុខា ឲ្យមានសេរីភាព ប៉ុន្តែមិនផ្ដល់សិទ្ធិឲ្យលោកធ្វើនយោបាយ ជាល្បិចបញ្ឆោតរបស់លោក ហ៊ុន សែន៕

ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលីលោក ស៊ឹង សែនករុណា បានលើកឡើងថា ការបោកបញ្ជោតនេះ នឹងមិនអាចធ្វើឲ្យពលរដ្ឋនិងសហគមន៍អន្តរជាតិជឿជាក់ឡើយ ពីព្រោះលោក ហ៊ុន សែន ហាក់នៅខ្លាចលោក កឹម សុខា វិលចូលធ្វើនយោបាយឡើងវិញ។

ធម្មតា នៅក្នុងប្រទេសប្រជាធិបតេយ្យ មេដឹកនាំនយោបាយ គេមានសិទ្ធិក្នុងការអនុវត្ត ផ្នែកសិទ្ធិសេរីភាពនយោបាយហ្នឹង ប៉ុន្តែប្រសិនបើអ្នកនយោបាយមួយ ត្រូវបានរឹតត្បិតដោយច្បាប់ចេញពីមាត់មេដឹកនាំគណបក្សប្រកួតប្រជែងមួយទៀត អ៊ីចឹង តើគេមើលមកថា វាជាសេរីភាពពិតប្រាកដ ឬជាការបង្កើតសាមគ្គីភាពជាតិ រួបរួមជាតិ មិនអាចធ្វើទៅបានទេ។ វាលុះត្រាតែ បើកលំហសេរីភាព ទី១ មិនមែនត្រឹមលោក កឹម សុខា មានសេរីភាពទេ ត្រូវផ្ដល់សិទ្ធិពេញលេញទាំងផ្នែកនយោបាយ ទាំងការដើរហើរដោយសេរី ស្របតាមកតិកាសញ្ញា និងអនុសញ្ញាស្ដីពីសិទ្ធិពលរដ្ឋ និងនយោបាយ។
ប្រធានអង្គការប្រជាធិបតេយ្យខ្មែរលោក ស៊ឹង សែនកុរណា

ការលើកឡើងនេះ បានធ្វើឡើង បន្ទាប់ពីលោកនាយករដ្ឋមន្ត្រី ហ៊ុន ម៉ាណែត បានបង្ហោះលើហ្វេសប៊ុកថា ការដែលឪពុករបស់លោក គឺលោក ហ៊ុន សែន បានចុះហត្ថលេខាលើព្រះរាជក្រឹត្យក្នុងនាមជាប្រមុខរដ្ឋស្ដីទី ដើម្បីលើកលែងទោសជាប់ពន្ធនាគារ២៧ឆ្នាំឲ្យលោក កឹម សុខា គឺជាជំហានមួយបន្ថែម ក្នុងការពង្រឹងសាមគ្គីឯកភាពជាតិ។

ទោះជាយ៉ាងណា ព្រះរាជក្រឹត្យបានបញ្ជាក់ថា ទោសបន្ថែម ដែលបានដាក់បម្រាមមិនឲ្យលោក កឹម សុខា មានសិទ្ធិធ្វើនយោបាយ និងចេញទៅក្រៅប្រទេស មិនត្រូវបានលើកលែងឡើយ។

ការលើកលែងទោសជាប់ឃុំនេះ ក្រោយពីលោក កឹម សុខា តាមរយៈមេធាវី បានដាក់លិខិតទៅប្រធានសាលាឧទ្ធរណ៍ថា មិនប្ដឹងសារទុក្ខទៅតុលាការកំពូលនោះទេ បើទោះជាលោកមិនបានទទួលយកការសម្រេចផ្ដន្ទាទោសក្ដី។ ម្យ៉ាងវិញទៀត ការសម្រេចរបស់លោក ហ៊ុន សែន ដើម្បីលើកលែងទោសឲ្យលោក កឹម សុខា គឺក្រោយពីមេបក្សប្រឆាំងរូបនេះ បានលើកឡើងពីបំណងឈប់ខ្វាយខ្វល់រឿងនយោបាយ ហើយគ្រាន់តែចង់បួសសងគុណម្ដាយ និងមើលថែម្ដាយដែលកំពុងឈឺចាស់ជរាប៉ុណ្ណោះ ប្រសិនបើមានសេរីភាព។

ក្រុមប្រទេសប្រជាធិបតេយ្យធំៗ ដូចជាសហភាពអឺរ៉ុប ចក្រភពអង់គ្លេស និងប្រទេសអូស្ដ្រាលីជាដើម បានស្វាគមន៍ចំពោះការលើកលែងទោសឲ្យលោក កឹម សុខា ប៉ុន្តែប្រទេសទាំងនោះបានគូសបញ្ជាក់ជាថ្មីថា ពួកគេនៅតែចង់ឃើញកម្ពុជា បើកលំហសេរីភាពផ្នែកនយោបាយដ៏ពិតប្រាកដមួយ៕

#រូបត្លុកនយោបាយ៖ ភាពផ្ទុយគ្នារវាង «ពាក្យសម្ដី និង ការពិត»

សំ ប៉ូលី — Mon, 25 May 2026 16:02:31 +0000

ក្នុងរយៈពេលប៉ុន្មានខែចុងក្រោយនេះ អាជ្ញាធរក្រុងភ្នំពេញ នៅតែបន្តធ្វើទុក្ខបុកម្នេញដល់សកម្មជនបរិស្ថាន សកម្មជននយោបាយ សូម្បីតែជនភៀសសឹក ដែលកំពុងបាត់បង់ផ្ទះសម្បែងដោយសារសង្គ្រាមឈ្លានពានពីប្រទេសថៃ ក៏ត្រូវបានអាជ្ញាធរចាប់ខ្លួន និងគំរាមកំហែង មិនឱ្យនិយាយការពិតដែរ។

លោក ហ៊ុន ម៉ាណែត បានប្រកាសក្ដែងៗនៅលើវេទិកាសាធារណៈថា ការបញ្ចេញមតិ ជាសិទ្ធិសេរីភាពរបស់ពលរដ្ឋ ព្រោះពលរដ្ឋក៏ចេះឈឺចាប់ពីបញ្ហាទឹកដី ដែលប្រទេសជិតខាង កំពុងឈ្លានពាន។

ប៉ុន្តែកាលពីថ្ងៃទី១៧ ខែឧសភា អាជ្ញាធរក្រុងភ្នំពេញ បានចាប់ខ្លួនកញ្ញា ខែម ស្រីមុំ ដោយសារកញ្ញាជាអ្នកចែកចាយព័ត៌មានពីបញ្ហាព្រំដែន និងរឿងរ៉ាវអយុត្តិធម៌នៅក្នុងសង្គម ដ៏សកម្មម្នាក់តាមបណ្ដាញសង្គមហ្វេសប៊ុក៕

មន្ត្រីបក្សប្រឆាំងថា ថៃអុកឡុកត្រកូល ហ៊ុន ឱ្យទទួលយកកិច្ចព្រមព្រៀងថ្មី មុនចូលតុចរចា

ប្រាជ្ញ ចេវ — Fri, 22 May 2026 02:18:32 +0000

អ្នកនាំពាក្យរដ្ឋាភិបាលកម្ពុជាឯករាជ្យ២៣តុលាលោក គឹម សុខបានប្រាប់វិទ្យុអាស៊ីសេរីថាកងទ័ពថៃនឹងបន្តអុកឡុកចូលទន្ទ្រានយកដីខ្មែរនៅតាមព្រំដែនរហូតទាល់តែរដ្ឋាភិបាលលោក ហ៊ុន ម៉ាណែតយល់ព្រមបង្កើតកិច្ចព្រមព្រៀងថ្មីមួយដែលថៃចង់ដាក់ប្រទេសកម្ពុជាឱ្យស្ថិតនៅក្រោមឥទ្ធិពលរបស់ខ្លួន។លោកបានបន្តថាយោធាថៃមិនខ្លាចអុកឡុកខ្មែរដោយសារដឹងថា លោក ហ៊ុន ម៉ាណែតជាមេដឹកនាំអន់ខ្សោយប៉ុណ្ណោះ។

មន្ត្រីរដ្ឋាភិបាលនៅក្រៅប្រទេសបានមើលឃើញថា ថៃកំពុងប្រើមធ្យោបាយអុកឡុក ដើម្បីដាក់សម្ពាធឱ្យរដ្ឋាភិបាលលោក ហ៊ុន ម៉ាណែត យល់ព្រមលើកិច្ចព្រមព្រៀងថ្មី៕

ថៃចង់ព្រមព្រៀងគ្នាលើរបស់ថ្មីទាំងអស់ ជាឧទាហរណ៍ គូសផែនទីថ្មីជាដើម គឺងាកចេញពីឯករសារនិងផែនទី ដែលបន្សល់ទុកដោយបារាំង ហើយថៃចង់ឱ្យដោះស្រាយគ្រប់ទំនាស់ទាំងអស់ និងការប្រទុស្ដគ្នា រវាងកម្ពុជានឹងថៃ ដោយប្រើយន្តការទ្វេភាគីតែមួយគត់ គឺមិនឆ្លងទៅដល់ស្ថាប័នអន្តរជាតិ នេះជាអ្វីដែលជាគោលដៅធំ នៅក្នុងកិច្ចព្រមព្រៀងថ្មី។
អ្នកនាំពាក្យរដ្ឋាភិបាលកម្ពុជាឯករាជ្យ២៣តុលាលោក គឹម សុខ

…

ការលើកឡើងនេះស្របពេលរដ្ឋាភិបាលថៃមិនទាន់បង្ហាញជំហរវិលចូលតុចរចាដោះស្រាយបញ្ហាព្រំដែនគោកនៅឡើយដោយទុកឱ្យកងទ័ពបន្តដើររាយបន្លាលួសនិងសាងសង់របងដើម្បីខណ្ឌព្រំដែនជាឯកតោភាគី។លើសពីនេះកាលពីអំឡុងខែមេសារដ្ឋមន្ត្រីការបរទេសថៃលោក ស៊ីហាសាក់ ភួងកេតកែវ (Sihasak Phuangketkeow) ក៏ចេញមកបកស្រាយថាថៃមិនដែលយល់ព្រមជាមួយកម្ពុជាក្នុងប្រើប្រាស់អនុសញ្ញាអង្គការសហប្រជាជាតិស្ដីពីច្បាប់សមុទ្រ(UNCLOS) ដើម្បីដោះស្រាយដែនសមុទ្រត្រួតស៊ីគ្នានោះឡើយក្រោយពីថៃបានលុបចោលជាឯកតោភាគីនូវអនុស្សរណៈយោគយល់គ្នាឆ្នាំ២០០១។

ប្រទេសថៃបានបដិសេធសំណើជាបន្តបន្ទាប់ពីកម្ពុជាក្នុងការវិលទៅដោះស្រាយជម្លោះព្រំដែនតាមរយៈគណៈកម្មការចម្រុះខណ្ឌសីមានិងបោះបង្គោលព្រំដែនគោក(JBC) គឺចាប់តាំងពីការធ្វើសង្គ្រាមលើកទី២អស់រយៈពេល២០ថ្ងៃកាលពីខែធ្នូឆ្នាំ២០២៥ដែលឈ្លានពានបានប្រាសាទនិងទឹកដីខ្មែរនៅតាមព្រំដែន។

លោកនាយករដ្ឋមន្ត្រី ហ៊ុន ម៉ាណែតតែងប្រកាសមិនទទួលស្គាល់ការកំណត់ខណ្ឌសីមាព្រំដែនតាមរយៈការប្រើកម្លាំងឡើយនិងតែងទទូចឱ្យថៃវិលមកចរចានិងវាស់វែងកំណត់ព្រំដែនគោកដោយក្រុមបច្ចេកទេសដែលប្រទេសទាំងពីរបានព្រមព្រៀងគ្នាឡើងវិញ។លើសពីនេះ លោក ហ៊ុន ម៉ាណែត និងលោក ហ៊ុន សែនក៏បានប្រកាសទៀតថាទោះនៅសល់ក្ដីសង្ឃឹម១ភាគរយក៏លោកចង់ចរចាដោយទ្វេភាគីជាមួយថៃដែរ៕

អ្នកឃ្លាំមើលថា លោក ហ៊ុន ម៉ាណែត មិនប្ដឹងថៃទៅតុលាការអន្តរជាតិ ព្រោះចង់រក្សាអំណាច

ប្រាជ្ញ ចេវ — Fri, 15 May 2026 11:36:23 +0000

អ្នកតាមដានបានមើលឃើញថា ការប្ដឹងប្រទេសថៃទៅតុលាការយុត្តិធម៌អន្តរជាតិ (IJC) ឬតុលាការអន្តរជាតិសម្រាប់ច្បាប់សមុទ្រ (ITLOS) ដើម្បីឱ្យដោះស្រាយជម្លោះដែនទឹកត្រួតស៊ីគ្នាជាមួយថៃ នឹងអាចធ្វើឱ្យប៉ះពាល់ដល់អំណាចរបស់ត្រកូល «ហ៊ុន» ប្រសិនបើការសម្រេចឱ្យកម្ពុជាឈ្នះក្ដីពីតុលាការទាំងពីរនេះ នឹងក្លាយជាគំរូគតិយុត្តិ ដែលត្រូវយកទៅអនុវត្តទាំងទៅលើប្រទេសថៃ និងប្រទេសវៀតណាម។

អ្នកឃ្លាំមើលថា ការដោះស្រាយតំបន់សមុទ្រត្រួតស៊ីគ្នាតាមអនុសញ្ញាអង្គការសហប្រជាជាតិស្ដីពីនីតិសមុទ្រ (UNCLOS) នឹងប្រើរយៈពេលយូរ ហើយមិនមានដំណោះស្រាយច្បាស់លាស់៕

អ្នកតាមដានភូមិសាស្ដ្រនយោបាយលោក សេង វណ្ណលី បានប្រាប់វិទ្យុអាស៊ីសេរីថា ជាការប្រថុយប្រថានមួយ ដែលអាចធ្វើឱ្យរង្គោះរង្គើដល់ទំនាក់ទំនងរវាងគណបក្សប្រជាជនកម្ពុជា និងគណបក្សកុម្មុយនិស្ដវៀតណាម ប្រសិនបើលោក ហ៊ុន សែន និងលោក ហ៊ុន ម៉ាណែត ធ្វើឱ្យប៉ះពាល់ដល់ផលប្រយោជន៍របស់វៀតណាមនៅក្នុងតំបន់សមុទ្រ ដោយសារតែជម្លោះដែនសមុទ្ររវាងកម្ពុជានិងថៃ។

ប្រសិនបើកម្ពុជាឈ្នះក្ដីលើថៃ ដោយផ្អែកទៅលើការបកស្រាយច្បាប់សមុទ្រណាមួយ ការបកស្រាយនោះ នឹងត្រូវយកមកអនុវត្តជាមួយវៀតណាមដូចគ្នា ដែលអាចធ្វើឱ្យប៉ះពាល់ដល់ផលប្រយោជន៍របស់វៀតណាម នៅក្នុងតំបន់សមុទ្រ ដែលលោក ហ៊ុន សែន ធ្លាប់ព្រមព្រៀងជាមួយវៀតណាម។ ភាពរង្គោះរង្គើរវាងគណបក្សបងប្អូនទាំងពីរនេះ ជាហានិភ័យនយោបាយ ដែលរបបលោក ហ៊ុន សែន និងលោក ហ៊ុន ម៉ាណែត មិនហ៊ានប្រថុយប្រថាន នៅពេលនេះទេ។
អ្នកតាមដានភូមិសាស្ដ្រនយោបាយលោក សេង វណ្ណលី

ការលើកឡើងនេះ បានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន ម៉ាណែត និងប្រធានព្រឹទ្ធសភាលោក ហ៊ុន សែន បានប្រកាសថា នឹងប្រើយន្តការផ្សះផ្សាដោយចាប់បង្ខំ នៃអនុសញ្ញាអង្គការសហប្រជាជាតិ ស្តីពីនីតិសមុទ្រ (UNCLOS) ដើម្បីដោះស្រាយដែនសមុទ្រត្រួតស៊ីគ្នា បន្ទាប់ពីរដ្ឋាភិបាលថៃបានសម្រេចលុបចោលអនុស្សរណៈយោគយល់គ្នាឆ្នាំ២០០១ ដោយឯកតោភាគី។

យន្តការផ្សះផ្សាដោយចាប់បង្ខំ នៃអនុសញ្ញាអង្គការសហប្រជាជាតិ ស្តីពីនីតិសមុទ្រ នឹងមិនអាចចាប់បង្ខំឱ្យភាគីណាមួយត្រូវអនុវត្តតាមសេចក្ដីសម្រេចរបស់ខ្លួន ដូចទៅនឹងសេចក្ដីសម្រេចរបស់តុលាការយុត្តិធម៌អន្តរជាតិ ឬតុលាការអន្តរជាតិសម្រាប់ច្បាប់សមុទ្រឡើយ។

លោក សេង វណ្ណលី បានបន្តថា លោក ហ៊ុន ម៉ាណែត ចង់អូសថៃវិលមកតុចរចាគ្នាតាមទ្វេភាគីវិញនៅពេលនេះ ដើម្បីប្រាប់ពលរដ្ឋថា ខ្លូនបានធ្វើសកម្មភាពការពារជាតិផង និងដើម្បីចៀសផុតការបង្កបញ្ហាស្មុកស្មាញដល់វៀតណាមផង។ លោកបានបន្ថែមថា បើទោះបីជាយន្តការនេះ មានហានិភ័យធំ ប្រសិនបើប្រទេសថៃគ្រាន់តែចូលរួមបង្គ្រប់កិច្ច ហើយនឹងមិនអនុវត្តតាមសេចក្ដីសម្រេចចុងក្រោយក្ដី។

ចំណែកមន្ត្រីកិច្ចការព្រំដែននៃរដ្ឋាភិបាលកម្ពុជាឯករាជ្យ ២៣តុលាលោក អ៊ុំ សំអាន បានយល់ឃើញថា ការប្រើប្រាស់អនុសញ្ញាអង្គការសហប្រជាជាតិ ស្តីពីនីតិសមុទ្រ គឺគ្រាន់បើជាងការចរចាទ្វេភាគី។ ប៉ុន្តែលោកថា ដោយសារកម្ពុជាជាប្រទេសទន់ខ្សោយជាងថៃ នឹងធ្វើឱ្យការផ្សះផ្សាឬចរចាទ្វេភាគី ចាញ់ប្រៀបថៃ ដូច្នេះ កម្ពុជាត្រូវប្ដឹងទៅតុលាការយុត្តិធម៌អន្តរជាតិ និងតុលាការអន្តរជាតិសម្រាប់ច្បាប់សមុទ្រ ទើបអាចទាមទារដែនសមុទ្រត្រួតស៊ីគ្នាទំហំ២៦០០០គីឡូម៉ែត្រការ៉េ ដែលមានធនធានរ៉ែប្រេងនិងឧស្ម័នតម្លៃប្រហែល៣០០ពាន់លានដុល្លារ និងពាក់កណ្ដាលនៃកោះគជ់មកវិញ។

ហើយថា នឹងប្រើយន្តការផ្សះផ្សាដោយចាប់បង្ខំហ្នឹង មិនដឹងថាប្រើឬក៏អត់ផង។ ពីព្រោះដូចកន្លងមក លោក ហ៊ុន សែន និងលោក ហ៊ុន ម៉ាណែត ថានឹងប្ដឹងទៅ ICJ រហូតមកដល់ពេលនេះ អត់ទាន់បានប្ដឹង។ អ៊ីចឹង គ្រាន់តែនិយាយចោល ហើយមិនប្រើយន្តការហ្នឹង ក៏អាចថាបាន។
មន្ត្រីរដ្ឋាភិបាលកម្ពុជាឯករាជ្យ ២៣តុលាលោក អ៊ុំ សំអាន

ជុំវិញបញ្ហានេះ នាយករដ្ឋមន្ត្រីថៃលោក អានុទីន ចាន់វីរៈគុល (Anutin Chanvirarkul) បានប្រកាសក្រោយពីជួបលោកនាយករដ្ឋមន្ត្រី ហ៊ុន ម៉ាណែត នៅអំឡុងកិច្ចប្រជុំកំពូលអាស៊ាននៅក្នុងប្រទេសហ្វីលីពីនថា កោះគជ់នៅតែជាកម្មសិទ្ធិរបស់ប្រទេសថៃ បើទោះបីជាបានលុបចោលអនុស្សរណៈយោគយល់គ្នាឆ្នាំ២០០១ ជាមួយកម្ពុជាក្ដី៕

លោក ហ៊ុន ម៉ាណែត នឹងមិនចាត់ការលោក ហ៊ុន តូ ឱ្យសងលុយអតិថិជនក្រុមហ៊ុន ហួយវ័ន ផេ ទេ

ប្រាជ្ញ ចេវ — Sat, 02 May 2026 13:29:38 +0000

អ្នកនាំពាក្យរដ្ឋាភិបាលកម្ពុជាឯករាជ្យ ២៣តុលាលោក គឹម សុខ បានប្រាប់វិទ្យុអាស៊ីសេរីថា រដ្ឋាភិបាលត្រកូល «ហ៊ុន» គ្មានសមត្ថភាពដោះស្រាយរឿងលុយកាក់ឱ្យអតិថិជនក្រុមហ៊ុន ហួយវ័ន ផេ ឡើយ ទើបប្រើកងកម្លាំងវាយបង្ក្រាបយ៉ាងហិង្សា ដើម្បីកុំឱ្យមានសកម្មភាពចេញតវ៉ាតទៅទៀត។ លោកបន្តថា ម្យ៉ាងទៀត រដ្ឋាភិបាលត្រកូល «ហ៊ុន» និងធនាគារជាតិ ក៏ជាអ្នកគប់គិតជាមួយឧកញ៉ា ហ៊ុន តូ ឱ្យបន្តធ្វើសកម្មភាពរកស៊ីបោកប្រាស់ដែរ បើទោះជាក្រុមហ៊ុន ហួយវ័ន ផេ បានរងទណ្ឌកម្មពីសហរដ្ឋអាមេរិកយ៉ាងណាក្ដី។

ប្រសិនបើជនរងគ្រោះ ចង់ឱ្យមានដំណោះស្រាយប្រកបដោយប្រសិទ្ធភាពមួយ ពួកគាត់គួរតែបន្តតវ៉ារហូតទៅដល់ជំរុញឱ្យសហរដ្ឋអាមេរិក ចេញវិធានការតាមចាប់ឧកញ៉ាធំៗ របស់ក្រុមគ្រួសារហ៊ុននោះតែម្ដង ដូចជា លោក ហ៊ុន តូ លោក កុក អាន លោក លី យ៉ុងផាត់ និងលោក ទ្រី ភាព ជាដើម។ ទាល់តែដល់ដំណាក់កាល សហរដ្ឋអាមេរិកចេញវិធានការតាមចាប់ ទើបរដ្ឋាភិបាលលោក ហ៊ុន ម៉ាណែត អាចដោះស្រាយខ្លះ។
អ្នកនាំពាក្យរដ្ឋាភិបាលកម្ពុជាឯករាជ្យ ២៣តុលាលោក គឹម សុខ

ការលើកឡើងនេះ បានធ្វើឡើង បន្ទាប់ពីក្រុមអាជ្ញាធររាជធានីភ្នំពេញ អមដោយក្រុមកងសន្ដិសុខ បានចុះបង្ក្រាបវាយដំលើក្រុមអ្នកតវ៉ារឿងបាត់លុយនៅក្រុមហ៊ុន ហួយវ័ន ផេ និងបានបណ្ដាលឱ្យជនជាតិចិនពីរនាក់របួសធ្ងន់បែកក្បាលហូរឈាម និងដេកសន្លប់ស្ដូកស្ដឹង រហូតត្រូវបញ្ជូនទៅសង្គ្រោះនៅមន្ទីរពេទ្យ។

ចំណែកពលរដ្ឋខ្មែរពីរនាក់ទៀត ដែលជាអ្នកម៉ៅការសំណង់ និងជាកម្មករសំណង់ ក៏ត្រូវបានចាប់ខ្លួន ដោយអាជ្ញាធរចោទប្រកាន់ថា ជាអ្នកកៀរគរធ្វើបាតុកម្ម ទាំងដែលពួកគេចេញមកតវ៉ា ដើម្បីទាមទារលុយថ្លៃធ្វើសំណង់ ដែលតម្កល់ទុកនៅក្រុមហ៊ុន ហួយវ័ន ផេ។

ជុំវិញបញ្ហានេះ ទេសាភិបាលធនាគារជាតិនៃកម្ពុជា អ្នកស្រី ជា សិរី បានចេញសម្ដែងការសោកស្ដាយចំពោះអំពើហិង្សាកើតឡើងរវាងក្រុមអតិថិជនក្រុមហ៊ុន ហួយវ័ន ផេ និងកងកម្លាំងសមត្ថកិច្ច។ ទោះជាយ៉ាងណា អ្នកស្រីនៅតែជំរុញឱ្យក្រុមអតិថិជន នាំគ្នាប្ដឹងទៅតុលាការ និងឈប់លើកគ្នាមកតវ៉ានៅធនាគារជាតិទៀត ពីព្រោះសំណុំរឿងក្រុមហ៊ុន ហួយវ័ន ផេ លែងស្ថិតក្រោមសមត្ថកិច្ចរបស់ធនាគារជាតិហើយ ដោយសារបានដកអាជ្ញាបណ្ណតាំងពីឆ្នាំ២០២៥។

ប្រធានអង្គការប្រជាធិបតេយ្យខ្មែរនៅប្រទេសអូស្ត្រាលីលោក ស៊ឹង សែនករុណា បានលើកឡើងថា ការគេចវេះមិនទទួលខុសត្រូវរបស់ធនាគារជាតិ ហើយបន្តទុកឱ្យក្រុមអតិថិជនក្រុមហ៊ុន ហួយវ័ន ផេ ចេញតវ៉ាក្លាយជាបញ្ហារ៉ាំរ៉ៃ នឹងអាចធ្វើឱ្យប៉ះពាល់ដល់ប្រព័ន្ធធនាគារទាំងមូលនៅកម្ពុជា។

ជាធម្មតា ប្រព័ន្ធធនាគារនៅក្នុងប្រទេសយើង គ្មានធនាគារណាមួយ ដែលធ្វើប្រតិបត្តិការក្រៅពីការគ្រប់គ្រងរបស់ធនាគារជាតិទេ។ អ៊ីចឹង ខ្ញុំយល់ថា វាជារឿងមិនមានការទទួលខុសត្រូវ។ អ៊ីចឹង រាល់ប្រតិបត្តិការសាច់ប្រាក់ ទឹកប្រាក់ នៅក្នុងប្រព័ន្ធធនាគារនៅកម្ពុជា ធ្វើឱ្យគេមើលឃើញមានហានិភ័យចំពោះការទទួលខុសត្រូវ ធ្វើឱ្យអ្នកជំនួញ សេដ្ឋកិច្ច ពាណិជ្ជកម្ម មានការភ័យខ្លាចចំពោះប្រព័ន្ធធនាគារផ្សេងទៀត ប្រសិនបើធនាគារជាតិលើកឡើងបែបហ្នឹង៕
ប្រធានអង្គការប្រជាធិបតេយ្យខ្មែរលោក ស៊ឹង សែនករុណា

កាលពីខែមេសា ឆ្នាំ២០២៥ សហរដ្ឋអាមេរិកបានប្រកាសដាក់ទណ្ឌកម្មលើក្រុមហ៊ុន ហួយវ័ន ផេ ដោយអះអាងថា ពីចន្លោះឆ្នាំ២០២១ ដល់ឆ្នាំ២០២៥ ក្រុមហ៊ុននេះ បានជួយលាងលុយកខ្វក់ចំនួន៤ពាន់លានដុល្លារ ឱ្យក្រុមចោរបច្ចេកវិទ្យាប្រទេសកូរ៉េខាងជើង និងក្រុមឧក្រិដ្ឋកម្មឆបោកអន្តរជាតិនៅអាស៊ីអាគ្នេយ៍។

ក្រុមហ៊ុន ហួយវ័ន ផេ បានដាក់ឈ្មោះលោក ហ៊ុន តូ ដែលជាក្មួយប្រុសលោក ហ៊ុន សែន ធ្វើជាសហប្រធានដ៏សំខាន់ម្នាក់ ប៉ុន្តែចាប់តាំងពីមានការដាក់ទណ្ឌកម្មពីសហរដ្ឋអាមេរិកមក ពុំមានស្ថាប័នមានសមត្ថកិច្ចណារបស់កម្ពុជា បើកការស៊ើបអង្កេតឡើយ។ ផ្ទុយទៅវិញ គេគ្រាន់តែឃើញក្រុមអ្នកមានអំណាចនាំគ្នា យកស្រាថ្លៃៗ ផ្លែឈើ និងបាច់ផ្កាទៅជូនជាអំណោយដើម្បីអបអរខួបកំណើតឱ្យលោក ហ៊ុន តូ ប៉ុណ្ណោះ៕

ចិនប្រគល់នាវាចម្បាំងឱ្យកម្ពុជា ដើម្បីទុកជួយច្បាំងឱ្យចិន

ប្រាជ្ញ ចេវ — Tue, 21 Apr 2026 15:57:54 +0000

អ្នកនាំពាក្យរដ្ឋាភិបាលកម្ពុជាឯករាជ្យ ២៣តុលាលោក គឹម សុខ បានប្រាប់វិទ្យុអាស៊ីសេរីថា វាជារឿងល្អ នៅពេលកម្ពុជាទទួលបានយុទ្ធោបករណ៍ពីមហាអំណាច ទាំងពីប្រទេសចិន និងសហរដ្ឋអាមេរិក ប្រសិនបើយកលុយទៅទិញហើយមិនមែនជាជំនួយ ពីព្រោះកម្ពុជាអាចទុកប្រើឱ្យអស់ពីសមទ្ធភាព ដើម្បីការពារជាតិបាន។

អ្នកឃ្លាំមើលបានលើកឡើងថា ចិនបានប្រគល់នាវាចម្បាំងឱ្យកម្ពុជា ទុកសម្រាប់ជួយការពារចិន នៅពេលមានសង្គ្រាម៕

ប៉ុន្តែលោកបានលើកឡើងថា ប្រសិនបើកម្ពុជាទទួលបានអាវុធសង្គ្រាមតាមរយៈជំនួយ គឺមិនអាចយកទៅប្រើសម្រាប់ការពារខ្លួនបានឡើយ ជាក់ស្ដែងដូចនៅក្នុងសង្គ្រាមឈ្លានពានរបស់យោធាថៃ កម្ពុជាមិនអាចប្រើប្រាស់អាវុធទំនើបទទួលបានពីប្រទេសចិន ដើម្បីការពារខ្លួននោះទេ។

ដូច្នេះ នាវាចម្បាំងដែលជាជំនួយរបស់ចិន ក៏គ្រាន់តែជាយន្តសង្គ្រាមឱ្យកម្ពុជា ត្រៀមខ្លួនប្រើជួយច្បាំងចិនប៉ុណ្ណោះ ពេលដែលចិនមានសង្គ្រាម។ ជាពិសេស លទ្ធភាពនៃការប្រឈមសង្គ្រាមនៅសមុទ្រចិនខាងត្បូង ដែលចិនត្រូវត្រៀមខ្លួនទុកជាមុន ដូចដែលចិនជួយសាងសង់មូលដ្ឋានជើងទឹកសមុទ្ររាមឱ្យកម្ពុជា ដែលជាការត្រៀមខ្លួនរួចជាស្រេចទៅហើយរបស់ចិនលើទឹកដីកម្ពុជា។
អ្នកនាំពាក្យរដ្ឋាភិបាលកម្ពុជាឯករាជ្យ ២៣តុលាលោក គឹម សុខ

ការលើកឡើងនេះ បានធ្វើឡើងបន្ទាប់ពីនាវា ខវែត (Corvettes) ប្រភេទ០៥៦ (Type 056) ជានាវាចម្បាំងមួយគ្រឿងក្នុងចំណោមទាំង២គ្រឿង ដែលរដ្ឋាភិបាលចិនបានសម្រេចប្រគល់ឱ្យកម្ពុជាតាំងពីប៉ុន្មានឆ្នាំមុន បានធ្វើដំណើរមកដល់កំពង់ផែទ័ពរាម កាលពីថ្ងៃទី ០៤មេសា ហើយបានធ្វើពិធីប្រគល់-ទទួល កាលពីថ្ងៃទី០៨មេសា។ ពិធីប្រគល់-ទទួលនេះ មិនបានធ្វើឡើងជាសាធារណៈឡើយ ខណៈចិនគ្រោងបញ្ជូននាវាចម្បាំងគ្រឿងទី២ មកឱ្យកម្ពុជានៅក្នុងខែមិថុនាខាងមុខនេះ។

នាវាចម្បាំងទាំងពីរគ្រឿង ជាជានាវាផ្ទុកមីស៊ីល ប្រើសម្រាប់ល្បាត ឃ្លាំមើល និងធ្វើប្រតិបត្តិការការពារឆ្នេរ ហើយត្រូវបានគេអះអាងថា កងទ័ពចិនបានបណ្ដុះបណ្ដាលកងទ័ពជើងទឹកកម្ពុជា ពីរបៀបដំណើរការនាវាទាំងពីរគ្រឿងនេះ តាំងពីខែធ្នូ ឆ្នាំ២០២៣។

សារព័ត៌មានរដ្ឋចិន The Global Times ក៏បានរាយការណ៍នៅថ្ងៃទី០៩ មេសា ជុំវិញនាវាចម្បាំងគ្រឿងទី១ ដែលបានធ្វើដំណើរមកដល់មូលដ្ឋានទ័ពរាមរបស់កម្ពុជា។ សារព័ត៌មាននេះ ក៏បានដកស្រង់សម្ដីរបស់អ្នកនាំពាក្យក្រសួងការពារជាតិចិនលោក ចាង ស៊ាវហ្កាំ (Zhang Xiaogang) ដែលបានលើកឡើងថា ការប្រគល់នាវាចម្បាំងគ្រឿងទី១ ជាផ្លូវការឱ្យកម្ពុជា មិនមែនជាការប្រឆាំងទៅភាគីទី៣ឡើយ ប៉ុន្តែជាផ្នែកមួយនៃកិច្ចសហប្រតិបត្តិការមានស្រាប់រវាងយោធាកម្ពុជានិងចិន។

ចិនប្រគល់នាវាចម្បាំងពីរគ្រឿងឱ្យកម្ពុជា ជាជំនួយបន្ថែមពីលើការជួយធ្វើទំនើបកម្មមូលដ្ឋានកងទ័ពជើងទឹករាម ដែលបានបើកសម្ពោធជាផ្លូវការតាំងពីខែមេសា ឆ្នាំ២០២៥។ ការជួយធ្វើទំនើបកម្មមូលដ្ឋានទ័ពរាម បានធ្វើឱ្យមានក្ដីព្រួយបារម្ភ ក្នុងចំណោមប្រទេសមហាអំណាចធំៗ។ សហរដ្ឋអាមេរិកខ្លាចថា កងទ័ពចិនអាចប្រើប្រាស់មូលដ្ឋានទ័ពរាម ជាកន្លែងឈរជើងយុទ្ធសាស្ដ្ររបស់ខ្លួន ដែលធ្វើឱ្យប៉ះពាល់ដល់សន្ដិសុខក្នុងតំបន់៕

តើលោក ហ៊ុន សែន ស៊ុមគ្រលុំជាមួយ ចេន ហ្ស៊ី ឬទេ?

ប្រាជ្ញ ចេវ — Fri, 10 Apr 2026 14:59:05 +0000

នៅក្នុងសន្និសីទសារព័ត៌មាន ស្ដីពីការបង្កើតច្បាប់ប្រឆាំងការឆបោកតាមប្រព័ន្ធបច្ចេកវិទ្យា កាលពីថ្ងៃទី០៣ ខែមេសា រដ្ឋមន្ត្រីក្រសួងយុត្តិធម៌លោក កើត រិទ្ធ បានលើកឡើងថា បុគ្គលណា ដែលដឹងច្បាស់រួចទៅហើយ ថាជននោះជាមេឧក្រិដ្ឋជន ហើយនៅតែសេពគប់ផ្ដល់មធ្យោបាយ និងជួលទីតាំងឱ្យធ្វើសកម្មភាពខុសច្បាប់ ដើម្បីទទួលបានផលប្រយោជន៍ពីបទល្មើស បុគ្គលនោះ នឹងត្រូវចាត់ចូលជាអ្នកស៊ុមគ្រលុំជាមួយក្រុមឧក្រិដ្ឋជន។ លោក កើត រិទ្ធ បន្ថែមថា សមត្ថកិច្ចត្រូវតែស៊ើបអង្កេតជីកឱ្យដល់ឫសគល់ ដើម្បីអនុវត្តច្បាប់លើជនសង្ស័យសមគំនិតនោះ។

លោក កើត រិទ្ធ បានលើកឡើងថា ជនណាដែលដឹងថាបុគ្គលនោះជាឧក្រិដ្ឋជន ហើយនៅតែផ្ដល់មធ្យោយបាយធ្វើសកម្មភាពល្មើសច្បាប់ ជននោះនឹងត្រូវចាត់ទុកថា «សមគំនិត»៕

ប៉ុន្តែគាត់អត់ដឹងទេ ស្រាប់តែគេហៅតាក់ស៊ីជិះ គាត់ដឹកគេទៅហើយគេថា អូរ! ម្នាក់ហ្នឹងស្កេម (Scam) អាហ្នឹងគាត់អត់មានទោស។ សូម្បីកុំថាគាត់ស្កេម សូម្បីតែគាត់ដឹកអ្នកណា ជាមេគ្រឿងញៀន ដោយគាត់អត់ដឹងថា ម្នាក់ហ្នឹងជាមេគ្រឿងញៀនផង ក៏អត់មានទោសដែរ។ ប៉ុន្តែបើផ្ទុយទៅវិញ ស្រាប់តែម្នាក់ហ្នឹងជាមេគ្រឿងញៀន គេកំពុងតាមចាប់ខ្លួន ដឹងច្បាស់គ្រប់គ្នា គាត់ដឹង អ៊ីចឹងគាត់សម្រួលការរត់គេចខ្លួនរបស់មេគ្រឿងញៀន អាហ្នឹង គាត់អាចមានទោស។
រដ្ឋមន្ត្រីក្រសួងយុត្តិធម៌លោក កើត រិទ្ធ

បើតាមសម្ដីរបស់លោក កើត រិទ្ធ បានបង្ហាញថា លោក ហ៊ុន សែន អាចជាអ្នកស៊ុមគ្រលុំជាមួយមេឧក្រិដ្ឋជន ចេន ហ្ស៊ី ពីព្រោះលោក ហ៊ុន សែន បានយក ចេន ហ្ស៊ី ធ្វើជាទីប្រឹក្សា ក្រោយពីជនជាតិចិនរូបនេះ បានស្ថិតនៅក្នុងបញ្ជីជាឧក្រិដ្ឋជនទៅហើយ។

លោក ហ៊ុន សែន បានតែងតាំង ចេន ហ្ស៊ី ទីជាទីប្រឹក្សា តាមរយៈព្រះរាជក្រឹត្យ ចុះថ្ងៃទី១៩ ខែមេសា ឆ្នាំ២០២៤ គឺក្រោយពីសាលក្រមតុលាការឧក្រិដ្ឋកម្មនៃប្រទេសចិន បានពិពណ៌នាសម្ព័ន្ធក្រុមហ៊ុន ព្រីនស៍ គ្រុប (Prince Group) របស់លោក ចេន ហ្ស៊ី តាំងពីឆ្នាំ២០២០ ថា ជា «ក្រុមឧក្រិដ្ឋជនបនល្បែងអនឡាញឆ្លងដែនដ៏អាក្រក់» ដែលរកប្រាក់ចំណូលបានយ៉ាងហោចណាស់ ៧០០លានដុល្លារ ជាចំណូលមិនស្របច្បាប់។

ច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យា ដែលត្រូវរដ្ឋាភិបាលបង្កើតឡើងជាប្រញាប់ ត្រូវបានប្រមុខរដ្ឋស្ដីទីលោក ហ៊ុន សែន ចេញព្រះរាជក្រមតំណាងឱ្យព្រះមហាក្សត្រ ដាក់ឱ្យអនុវត្តកាលពីថ្ងៃទី០៦ ខែមេសា។ ច្បាប់ថ្មី មាន៥ជំពូក និង២៤មាត្រា និងត្រូវរដ្ឋាភិបាលអះអាងថា ធ្វើឡើងដើម្បីបោសសម្អាតឱ្យអស់ការឆបោកពីកម្ពុជា ដោយសារកន្លងមក កម្ពុជានៅខ្វះច្បាប់សម្រាប់បង្ក្រាបលើក្រុមឆបោកនេះ។

ទោះជាយ៉ាងណាក្ដី អ្នកឃ្លាំមើលបានយល់ឃើញថា ការលើកឡើងថា ការឆបោកអនឡាញ បានរីករាលដាលនៅកម្ពុជា ដោយសារតែមិនទាន់មានច្បាប់ គឺជាលេសប៉ុណ្ណោះ។ លោកបន្តថា ច្បាប់ថ្មីនេះ នឹងមិនអាចប្រឆាំងការឆបោកអនឡាញបានជោគជ័យឡើយ ប្រសិនបើមន្ត្រីធំៗ មានអំណច ដែលសង្ស័យថា ជាមេក្លោងនិងម្ចាស់ទីតាំង មិនត្រូវបានស៊ើបអង្កេតនិងអនុវត្តតាមច្បាប់។

ចំពោះច្បាប់ថ្មីនេះ វាអាចជោគជ័យបាន លុះត្រាតែរដ្ឋាភិបាលមានឆន្ទៈពិតប្រាកដ ក្នុងការប្រើប្រាស់វា ដើម្បីចាត់វិធានការលើមេក្លោងធំៗ និងម្ចាស់ទីតាំងដែលមានអំណាច ជាជាងតែដេញចាប់បុគ្គលិកកម្រិតទាប។ បញ្ហាប្រឈមបំផុត ដែលច្បាប់មិនអាចដើរទៅមុខបាន គឺអំពើពុករលួយក្នុងជួរមន្ត្រីអនុវត្តច្បាប់ផ្ទាល់។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិកលោក សេង វណ្ណលី

ចំណែកមន្ត្រីរដ្ឋាភិបាលកម្ពុជាក្រៅប្រទេសបានលើកឡើងដែរថា ដើម្បីបោសសម្អាតឱ្យអស់ឧក្រិដ្ឋកម្មឆបោកអនឡាញពីកម្ពុជា គឺអាជ្ញាធរគួរមានការស៊ើបអង្កេត លើលោក ហ៊ុន សែន ពីព្រោះ ការឆបោកអនឡាញ គឺជាជំនួញប្រមូលលុយ យកទៅចិញ្ចឹមគណបក្សប្រជាជនកម្ពុជា និងអំណាចក្រុមគ្រួសារត្រកូល «ហ៊ុន»។

ប្រសិនបើរដ្ឋាភិបាលលោក ហ៊ុន ម៉ាណែត ចង់កម្ចាត់ឧក្រិដ្ឋកម្មអនឡាញឱ្យអស់ពីកម្ពុជា មិនចាំបាច់ទៅធ្វើច្បាប់បន្ថែមនាំតែឱ្យខាតពេលទេ គឺព្យួរអភ័យឯកសិទ្ធរបស់លោក ហ៊ុន សែន ដកតំណែងប្រធានព្រឹទ្ធសភារបស់ពួកគាត់ ហើយនាំគាត់ទៅសាកសួរ ឱ្យប្រឈមចំពោះមុខច្បាប់ រួមទាំងស៊ើបអង្កេតបណ្ដាញពាក់ព័ទ្ធនឹងគាត់ឱ្យអស់។ ពីព្រោះរបាយការណ៍របស់សហគមន៍អន្តរជាតិនិយាយច្បាស់ណាស់ថា ឧក្រិដ្ឋកម្មឆបោកនៅកម្ពុជា ជាជំនួញប្រមូលលុយចិញ្ចឹមគណបក្សប្រជាជនកម្ពុជា និងអំណាចក្រុមគ្រួសារត្រកូល ហ៊ុន។
អ្នកនាំពាក្យរដ្ឋាភិបាលកម្ពុជាឯករាជ្យ ២៣តុលាលោក គឹម សុខ

កាលពីខែឧសភា ឆ្នាំ២០២៥ វិទ្យាស្ថានស្រាវជ្រាវរបស់អង់គ្លេសឈ្មោះ Humanity Research Consultancy បានរកឃើញថា ឧស្សាហកម្មឆបោកតាមអនឡាញនៅក្នុងប្រទេសកម្ពុជា ដែលមិនអាចបង្ក្រាបបាន ដោយសារក្រុមឧក្រិដ្ឋជនជាជនជាតិចិន មានទំនាក់ទំនងជិតស្និទ្ធជាមួយមន្ត្រីជាន់ខ្ពស់ និងក្រុមឧកញ៉ាមានឥទ្ធិពល ដែលសុទ្ធសឹងជាអ្នកនៅជុំវិញខ្លួនលោក ហ៊ុន សែន ដើម្បីធ្វើជាខ្នងបង្អែក ហើយពួកឧក្រិដ្ឋជនបានដើរតួនាទីយ៉ាងសំខាន់ ធ្វើជាប្រភពផ្គត់ផ្គង់លុយទៅរដ្ឋាភិបាល និងគណបក្សប្រជាជនកម្ពុជា ដើម្បីគេចផុតពីការប្រឈមមុខផ្លូវច្បាប់៕

លោក ហ៊ុន សែន និងលោក ហ៊ុន ម៉ាណែត »គួរព្យួរតំណែង» ជំុំវិញរឿងឆបោកអនឡាញ

ប្រាជ្ញ ចេវ — Fri, 03 Apr 2026 15:09:33 +0000

អ្នកឃ្លាំមើលបានលើកឡើងថា ប្រសិនបើលោកនាយករដ្ឋមន្ត្រី ហ៊ុន ម៉ាណែត ចង់បោសសម្អាតក្រុមឆបោកតាមអនឡាញឱ្យអស់ពីកម្ពុជា គឺត្រូវបង្ក្រាបឱ្យចំគោលដៅលើមេក្លោងធំៗ ដែលសហរដ្ឋអាមេរិក និងប្រទេសជាច្រើនទៀតរកឃើញថា ជាអ្នកផ្ដល់ទីតាំងឱ្យក្រុមឧក្រិដ្ឋជន ធ្វើសកម្មភាពឆបោក និងលាងលុយកខ្វក់។

អ្នកឃ្លាំមើលបានសង្កេតឃើញថា វិធានការបោសសម្អាតឱ្យអស់ក្រុមឧក្រិដ្ឋជនឆបោកអនឡាញពីកម្ពុជារបស់លោក ហ៊ុន ម៉ាណែត នឹងមិនទទួលបានជោគជ័យឡើយ៕

ការបង្ក្រាបកន្លងមក វាអត់ទាន់បានទៅដល់ចំគោលដៅ នៃមេឧក្រិដ្ឋជនទាំងអស់ហ្នឹងទេ។ អ៊ីចឹង មេឧក្រិដ្ឋជនទាំងអស់ហ្នឹង ដែលយើងសង្ស័យ ក៏ដូចជា ខាងសារព័ត៌មានអន្តរជាតិ គេស៊ើបអង្កេត គឺមានជាប់ពាក់ព័ន្ធនឹងក្មួយប្រុសលោក ហ៊ុន សែន គឺលោក ហ៊ុន តូ ហើយមេឧកញ៉ាគ្រាក់ៗ ដែលស្និទ្ធនឹងលោក ហ៊ុន សែន ទៅទៀត គឺលោក លី យ៉ុងផាត់ និងលោក កុក អាន និងឧកញ៉ា និងមន្ត្រីពាក់ព័ន្ធមួយចំនូនធំទៀត ដែលយើងអត់ទាន់ឃើញមានវិធានការចំពោះបុគ្គលទាំងនោះនៅឡើយទេ។
ប្រធានអង្គការប្រជាធិបតេយ្យខ្មែរលោក ស៊ឹង សែនករុណា

សហរដ្ឋអាមេរិក និងចក្រភពអង់គ្លេស កាលពីខែតុលា ឆ្នាំ២០២៥ បានប្រកាសដាក់ទណ្ឌកម្មរួមគ្នាលើបណ្ដាញឧក្រិដ្ឋកម្មឆ្លងដែននៃក្រុមហ៊ុន ព្រីនស៍ គ្រុប (Prince Group) របស់ឧកញ៉ាជនជាតិចិន ចេន ហ្ស៊ី និងបក្ខពួក រួមទាំងក្រុមហ៊ុន ហូយវ័ន ផេ (Huione Pay) របស់ឧកញ៉ា ហ៊ុន តូ ដោយសារពាក់ព័ន្ធនឹងការធ្វើជួញដូរនិងធ្វើទារុណកម្មមនុស្សឱ្យបម្រើការឆបោកអនឡាញ និងការលាងលុយកខ្វក់ ដែលធ្វើឱ្យសហរដ្ឋអាមេរិកបាត់បង់ប្រាក់ជាង១៦ពាន់លានដុល្លារ។

កាលពីដើមខែមីនា លោក ហ៊ុន ម៉ាណែត បានប្រកាសថា នឹងលុបបំបាត់ទាំងស្រុងទីតាំងឆបោកអនឡាញនៅត្រឹមខែមេសានេះ ក្រោយពីរដ្ឋាភិបាលបើកយុទ្ធនាការទ្រង់ទ្រាយធំ ឆ្មក់ចូលបង្ក្រាបទីតាំងឆបោកបានប្រហែល ២.៥០០កន្លែង។ ចំណែករដ្ឋមន្ត្រីក្រសួងមហាផ្ទៃលោក ស សុខា ក៏ធ្លាប់អះអាងកាលពីខែកុម្ភៈថា មានជនបរទេសរាប់ម៉ឺននាក់ ត្រូវបានបណ្ដេញចេញពីកម្ពុជា និងប្រហែលជាង ២សែននាក់ទៀត បានចាកចេញពីកម្ពុជាដោយខ្លួនឯង ដោយសារការបង្ក្រាបលើទីតាំងឆបោកអនឡាញ។

ទោះជាយ៉ាងណា ការបង្ក្រាបទាំងនោះ ត្រូវបានគេមើលឃើញថា មិនបានបញ្ឈប់សកម្មភាពឆបោកនៅកម្ពុជាឡើយ។

ចង់បោសសម្អាតឱ្យស្អាត ទាល់តែសមត្ថកិច្ច សភា និងតុលាការ ពិនិត្យលទ្ធភាពព្យួរតំណែងលោក ហ៊ុន សែន និងតំណែងលោក ហ៊ុន ម៉ាណែត ហើយហៅអ្នកទាំងពីរទៅសាកសួរ ព្រមទាំងធ្វើការស៊ើបអង្កេតឱ្យស៊ីជម្រៅ ពីព្រោះរបាយការណ៍ពីសហគមន៍អន្តរជាតិ សុទ្ធតែបានបញ្ជាក់ថា ឧក្រិដ្ឋកម្មអនឡាញនៅប្រទេសកម្ពុជា ជាជំនួញកខ្វក់ ប្រមូលលុយចិញ្ចឹមគណបក្សប្រជាជនកម្ពុជា និងអំណាចក្រុមគ្រួសារ ហ៊ុន។ ម៉្លោះហើយ គឺពាក់ព័ទ្ធទៅនឹងតំណែងរបស់លោក ហ៊ុន សែន និងលោក ហ៊ុន ម៉ាណែត ដែលជាមេគណបក្សប្រជាជនកម្ពុជា និងមេក្រុមគ្រួសារ ហ៊ុន។
អ្នកនាំពាក្យរដ្ឋាភិបាលកម្ពុជាឯករាជ្យ ២៣តុលាលោក គឹម សុខ

កាលពីថ្ងៃទី២៦ ខែមីនា ចក្រភពអង់គ្លេស បានប្រកាសដាក់ទណ្ឌកម្មថ្មីបន្ថែម លើជនជាតិខ្មែរនិងចិនចំនួន៣រូបទៀត ដែលបើកទីតាំងឆបោកអនឡាញដ៏ធំបំផុត ស្ថិតនៅទីក្រុងពាណិជ្ជកម្មម៉ឺនជ័យ ក្នុងខេត្តព្រៃវែង ជាប់ព្រំដែនប្រទេសវៀតណាម។ ចក្រភពអង់គ្លេសបញ្ជាក់ថា ទីតាំងនេះ មានការជួញដូរមនុស្សឱ្យធ្វើជាកម្មករប្រហែល ២ម៉ឺននាក់ និងជាប់ពាក់ព័ន្ធជាមួយក្រុមហ៊ុន ព្រីនស៍ គ្រុប ហើយកំពុងបន្តបើកដំណើរការ ទោះកំពុងមានការបង្ក្រាបពីរដ្ឋាភិបាលក្ដី៕

អ្នកឃ្លាំមើលថា បើរដ្ឋាភិបាលមិនបង្ក្រាបមេខ្លោងឆបោកអនឡាញទេកម្ពុជានឺងជួបគ្រោះធំ។

RFA Khmer — Wed, 04 Mar 2026 14:47:39 +0000

រដ្ឋាភិបាល ត្រូវចាប់មេខ្លោងធំៗ និងមន្ត្រីរដ្ឋាភិបាល មួយចំនួន ពាក់ព័ន្ធឧក្រិដ្ឋកម្ម ឆបោកតាមអនឡាញ យកមកផ្ដន្ទាទោសដើម្បីបោសសម្អាត ឱ្យមានប្រសិទ្ធភាព។

សេចក្ដីជូនដំណឹង!

ប្រាជ្ញ ចេវ — Wed, 08 Oct 2025 12:02:11 +0000

ដោយសារតែមានការប្រែប្រួលគោលនយោបាយនៅសហរដ្ឋអាមេរិក វិទ្យុអាស៊ីសេរី មិនអាចបន្តបេសកកម្មរបស់ខ្លួនបានទៀតឡើយ។

យើងខ្ញុំសូមអរគុណប្រជាពលរដ្ឋខ្មែរ ដែលបានផ្តល់កិត្តិយសដល់យើង ក្នុងការពាំនាំព័ត៌មានពិត ជូនលោក អ្នកនាងជិត ៣០ ឆ្នាំកន្លងមក។

យើងខ្ញុំសូមថ្លែងអំណរគុណយ៉ាងជ្រាលជ្រៅ ដល់បុគ្គលិក និងអតីតបុគ្គលិកទាំងអស់ ដែលបានលះបង់សព្វបែបយ៉ាង ក្នុងការនាំព័ត៌មានពិតជូនប្រជាពលរដ្ឋខ្មែរ ដើម្បីជាប្រយោជន៍ដល់ប្រទេសកម្ពុជា។

យើងក៏សូមថ្លែងអំណរគុណដល់មិត្តរួមការងារ និងថ្នាក់ដឹកនាំគ្រប់គ្រង ក្នុងការគាំទ្រ មិត្តភាព និងការលើកទឹកចិត្ត ក្នុងបេសកកម្មនាំសំឡេងឱ្យអ្នកគ្មានសំឡេងនៅកម្ពុជា។

យើងសូមជម្រាបលា មួយគ្រាសិន។ យើងនឹងបន្តស្វែងរកវិធីសាស្ត្រថ្មី ដើម្បីបន្តបេសកកម្មរបស់យើង ក្នុងពេលឆាប់ៗខាងមុខនេះ។

ជាចុងបញ្ចប់នេះ យើងខ្ញុំសូមជូនពរដល់លោកអ្នកនាងឱ្យជួបតែសេចក្ដីសុខចម្រើន និងមានសុខភាពល្អជានិច្ចកាល កុំបីឃ្លៀងឃ្លាតឡើយ៕

កម្ពុជាស្នើក្នុងមហាសន្និបាតUNឱ្យជួយជំរុញដំណោះស្រាយជម្លោះព្រំដែនជាមួយថៃដោយសន្ដិវិធី

ប្រាជ្ញ ចេវ — Tue, 30 Sep 2025 08:03:40 +0000

នៅក្នុងសម័យប្រជុំលើកទី៨០ នៃមហាសន្និបាតអង្គការសហប្រជាជាតិ កាលពីថ្ងៃទី២៧ ខែកញ្ញា រដ្ឋមន្ត្រីក្រសួងការបរទេសកម្ពុជាលោក ប្រាក់ សុខុន បានលើកឡើងថា សន្ដិភាពរបស់កម្ពុជាកំពុងរងការគំរាមកំហែងជាថ្មី ដោយសារជម្លោះព្រំដែនជាមួយប្រទេសថៃ ហើយបទឈប់បាញ់ដែលកើតឡើងតាមរយៈការសម្របសម្រួលពីប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) កំពុងស្ថិតក្នុងភាពផុយស្រួយ ដោយសារតែថៃអនុវត្តតែមាត់ ប៉ុន្តែគ្មានសកម្មភាពជាក់ស្ដែង។

លោក ប្រាក់ សុខុន បានបន្តថា ជារឿងសោកស្ដាយដែលថៃប្រើផែនទីឯកតោភាគីជំនួសឱ្យផែនទីដែលទទួលស្គាល់ជាអន្តរជាតិ និងធ្វើសកម្មភាពរាប់មិនអស់បំផ្លាញដល់ការកសាងទំនុកចិត្តនិងសន្ដិភាពរវាងប្រទេសទាំងពីរ ហើយរឿងគួរព្រួយបារម្ភបំផុតសម្រាប់កម្ពុជា គឺថៃគំរាមប្រើច្បាប់អាជ្ញាសឹក ដើម្បីបណ្ដេញពលរដ្ឋខ្មែររាប់រយគ្រួសារបន្ថែមទៀតពីភូមិដ្ឋានដែលអាស្រ័យផលរាប់ទសវត្សមកហើយ។ លោកក៏បានបញ្ជាក់ពីសកម្មភាពក្រុមកងកម្លាំងថៃ បានចូលកាន់កាប់ពីតំបន់មួយទៅតំបន់មួយ រំលោភលើដែនអធិបតេយ្យភាព និងបូរណភាពទឹកដីកម្ពុជា រួមទាំងបំពានលើសិទ្ធិ និងសេចក្ដីថ្លៃថ្នូររបស់ពលរដ្ឋកម្ពុជា។

លោក ប្រាក់ សុខុន បានប្រាប់ទៅមហាសន្និបាតអង្គការសហប្រជាជាតិថា កម្ពុជាចង់ឱ្យមានកិច្ចសន្ទនាដោះស្រាយជម្លោះព្រំដែនដោយសន្ដិវិធី គោរពពេញលេញតាមបទឈប់បាញ់ កិច្ចព្រមព្រៀងទ្វេភាគី ច្បាប់អន្តរជាតិ និងធម្មនុញ្ញអង្គការសហប្រជាជាតិនិងអាស៊ាន ហើយកម្ពុជានៅតែបន្តគាំទ្រការសម្របសម្រួលពីអាស៊ាន និងមេដឹកនាំជុំវិញពិភពលោក ដើម្បីជួយបន្ធូរបន្ថយភាពតានតឹងជាមួយថៃ ក្នុងការបញ្ចៀសការប្រយុទ្ធគ្នាជាថ្មី ដែលនាំឱ្យមានសោកនាដកម្មទាំងសងខាង។

ប៉ុន្តែរដ្ឋមន្ត្រីក្រសួងការបរទេសថៃលោក ស៊ីហាសាក់ ភួងកេតកែវ (Sihasak Phuangketkeow) បានឆ្លើយប្រាប់ទៅមហាសន្និបាតអង្គការសហប្រជាជាតិ ដោយច្រានចោលការលើកឡើងពីភាគីកម្ពុជា និងបានអះអាងថា ថៃគឺជាជនរងគ្រោះពិតប្រាកដ។

ជុំវិញបញ្ហានេះ អ្នកតាមដានបញ្ហាសង្គមនិងនយោបាយលោក ប៉ោ មករា បានមើលឃើញថា នយោបាយការទូតរបស់កម្ពុជាហាក់បន្តមានប្រៀបលើថៃលើឆាកអន្តរជាតិជុំវិញជម្លោះព្រំដែន ប៉ុន្តែលោកបានយល់ឃើញថា ដើម្បីឱ្យអន្តរជាតិ ជាពិសេសសហរដ្ឋអាមេរិកអាចជួយដោះស្រាយបញ្ចប់ជម្លោះព្រំដែនជាមួយថៃបាន គឺត្រូវពឹងលើកម្ពុជាដែលត្រូវស្ដារទំនាក់ទំនងល្អជាមួយសហរដ្ឋអាមេរិក។ លោកបានបញ្ជាក់ថា សហរដ្ឋអាមេរិកតែងចង់ឱ្យកម្ពុជាបើកចំហសិទ្ធិសេរីភាពដល់ពលរដ្ឋ និងស្ដារលទ្ធិប្រជាធិបតេយ្យឡើងវិញ។

អ្វីដែលខ្ញុំសង្កេតឃើញជារួម ហាក់បីដូចជាមានការលូកដៃពីសហរដ្ឋអាមេរិក ដូចជាប្រធានាធិបតី ដូណាល់ ត្រាំ កំពុងតែចាប់អារម្មណ៍ កំពុងតែតាមដានរឿងនេះ ដូច្នេះអ្វីដែលកម្ពុជាគួរតែគិតគូរ និងធ្វើជាមួយសហរដ្ឋអាមេរិក គួរតែបោះដៃទៅសហរដ្ឋអាមេរិក ឬចាប់យកសហរដ្ឋអាមេរិកក្នុងការដោះស្រាយបញ្ហាព្រំដែននេះ។
លោក ប៉ោ មករា

នៅមហាសន្និបាតអង្គការសហប្រជាជាតិលោក ប្រាក់ សុខុន ក៏បានលើកឡើងពីព្រឹត្តិការណ៍ថ្ងៃទី២៧ ខែកញ្ញា ដែលទាហានថៃរំលោភបទឈប់បាញ់ ដោយការបាញ់ប្រហារដោយកាំភ្លើងដៃនិងកាំភ្លើងត្បាល់មកលើទីតាំងឈរជើងរបស់កងទ័ពកម្ពុជានៅតំបន់អានសេះ ក្នុងឃុំជាំក្សាន្ត ស្រុកជាំក្សាន្ត ខេត្តព្រះវិហារ ហើយបានផ្អាកទៅវិញ ក្រោយពីកងទ័ពកម្ពុជាអត់ធ្មត់មិនបានបាញ់តបត។

ក្រោយមានករណីនេះក្រុមអ្នកសង្កេតការណ៍អាស៊ានបណ្ដោះអាសន្នដឹកនាំដោយម៉ាឡេស៊ីបានពិនិត្យផ្ទៀងផ្ទាត់ទីតាំងរងផលប៉ះពាល់ពីការបាញ់ប្រហារដោយកងទ័ពថៃខណៈកម្ពុជាបានអំពាវនាវឱ្យបង្កើតក្រុមអ្នកសង្កេតការណ៍អាស៊ានផ្លូវការឱ្យបានឆាប់ដើម្បីឱ្យភាគីថៃគោរពតាមបទឈប់បាញ់ពិតប្រាដកនិងស្មោះត្រង់៕

ប្រធានអាស៊ាននិយាយបញ្ហាជម្លោះព្រំដែនកម្ពុជា-ថៃជាមួយប្រធានាធិបតីអាមេរិក

ប្រាជ្ញ ចេវ — Mon, 29 Sep 2025 09:05:12 +0000

ស្របពេលបទឈប់បាញ់រវាងកងទ័ពកម្ពុជា-ថៃ កាន់តែផុយស្រួច ប្រធានប្ដូរវេនអាស៊ានលោកនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម (Anwar Ibrahim) បានបង្ហោះសារលើហ្វេសប៊ុកថា លោកបានជជែកគ្នាតាមទូរស័ព្ទជាមួយប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) ហើយលោកបានបញ្ជាក់ជាថ្មីនូវការប្ដេជ្ញាចិត្តរបស់ម៉ាឡេស៊ី ដើម្បីបន្តដើរតួនាទីយ៉ាងសកម្មក្នុងការធានាសន្ដិភាពនៅក្នុងតំបន់ ជាពិសេសពាក់ព័ន្ធនឹងបញ្ហាព្រំដែនកម្ពុជា-ថៃ។

ប្រធានអាស៊ាន បាននិយាយទូរស័ព្ទជាមួយប្រធានាធិបតីសហរដ្ឋអាមេរិក រឿងជម្លោះព្រំដែនកម្ពុជា-ថៃ ស្របពេលកងទ័ពថៃកំពុងព្យាយាមបង្កើនសកម្មភាពបង្កហេតុ ដើម្បីផ្ទុះអាវុធជាថ្មី។

លោក អាន់វ៉ា អ៊ីប្រាហ៊ីម បានបន្តថា ប្រធានាធិបតីសហរដ្ឋអាមេរិកបានទទួលស្គាល់ភាពជោគជ័យរបស់ម៉ាឡេស៊ី ដើម្បីសម្របសម្រួលឱ្យមានកិច្ចព្រមព្រៀងឈប់បាញ់គ្នារវាងកម្ពុជា-ថៃ ហើយបានចាត់ទុកថា វាជាសមិទ្ធផលដ៏អស្ចារ្យមួយ ដែលបង្ហាញពីភាពរឹងមាំរបស់អាស៊ាននិងអធិបតេយ្យភាពរបស់ម៉ាឡេស៊ី។

នៅក្នុងកិច្ចសន្ទនាតាមទូរស័ព្ទ កាលពីថ្ងៃទី២៥ ខែកញ្ញានោះ លោក អាន់វ៉ា អ៊ីប្រាហ៊ីម ក៏បានលើកឡើងពីការចូលរួមរបស់សហរដ្ឋអាមេរិក ដែលកំពុងដើរតួនាទីក្នុងការធានាឱ្យបទឈប់បាញ់របស់កម្ពុជា-ថៃ ត្រូវបានអនុវត្តឱ្យបានជោគជ័យ ហើយលោកសង្ឃឹមថា លោក ដូណាល់ ត្រាំ នឹងអញ្ជើញចូលរួមកិច្ចប្រជុំកំពូលអាស៊ាននៅខែតុលា ខាងមុខ ដើម្បីឱ្យជំរុញកិច្ចសហប្របត្តិការសម្រាប់ស្ថិរភាពនិងសន្ដិភាពនៅក្នុងតំបន់បន្ថែមទៀត។

កិច្ចសន្ទនារបស់មេដឹកនាំអាស៊ាននិងប្រធានាធិបតីសហរដ្ឋអាមេរិកនេះ បានកើតឡើងស្របពេលកងទ័ពថៃ បន្តធ្វើសកម្មភាពបង្កហេតុនៅតាមព្រំដែន ដើម្បីយកលេសផ្ទុះអាវុធជាមួយកងទ័ពកម្ពុជាជាថ្មី រាប់ចាប់តាំងពីការចល័តទ័ពដើររាយបន្លាលួសតាមព្រំដែន ការបាញ់គ្រាប់ជំពាមកូនឃ្លីមកលើទីតាំងកងទ័ពកម្ពុជា ការបណ្ដេញពលរដ្ឋខ្មែរនៅភូមិព្រៃចាន់ និងភូមិជោគជ័យចេញពីផ្ទះសម្បែង និងចុងក្រោយនេះ កងទ័ពថៃបានបាញ់កាំភ្លើងធន់តូចនៅក្នុងទឹកដីខ្លួនដើម្បីញុះឱ្យកងទ័ពកម្ពុជាផ្ទុះអាវុធ។

អ្នកនាំពាក្យក្រសួងការពារជាតិកម្ពុជាអ្នកស្រី ម៉ាលី សុជាតា បានលើកឡើងនៅក្នុងសេចក្ដីប្រកាសព័ត៌មានថា ចាប់តាំងពីម៉ោង២ទាបភ្លឺរហូតដល់ម៉ោង៥ល្ងាចថ្ងៃទី ២៥ ខែកញ្ញា ទាហានថៃបានកាំភ្លើងជិត៤០គ្រាប់ក្នុងទឹកដីរបស់ខ្លួន ដែលស្ថិតនៅទល់ជាមួយកងទ័ពកម្ពុជា ដើម្បីបង្កហេតុ និងជាសកម្មភាពរំលោភលើបទឈប់បាញ់គ្នា។

ជុំវិញបញ្ហានេះ អ្នកនាំពាក្យក្រុមប្រឹក្សាជាតិតស៊ូលោក គឹម សុខ បានមើលឃើញថា មូលហេតុដែលថៃបានចិត្តមិនញញើតឈ្លានពានទឹកដីកម្ពុជា ដោយសារនៅពេលនេះ ចិនបានលូកដៃកាន់តែជ្រៅក្នុងការបង្កើនសកម្មភាពពាណិជ្ជកម្មជាមួយថៃ និងការធ្វើសមយុទ្ធយោធាជាមួយថៃ ដែលធ្វើឱ្យសហរដ្ឋអាមេរិកត្រូវយកចិត្តថៃដើម្បីទប់ទល់ជាមួយចិនវិញ។ លោកបានបន្តថា ម្យ៉ាងវិញទៀត ដោយសាររដ្ឋាភិបាលលោក ហ៊ុន ម៉ាណែត មិនយកកិច្ចព្រមព្រៀងសន្ដិភាពទីក្រុងប៉ារីសមកប្រើ ទើបធ្វើឱ្យជម្លោះព្រំដែនជាមួយថៃពិបាកដោះស្រាយ។

ទាល់តែរដ្ឋាភិបាលលោក ហ៊ុន ម៉ាណែត ប្រើកិច្ចព្រមព្រៀងសន្ដិភាពទីក្រុងប៉ារីស ទើបសហរដ្ឋអាមេរិក និងប្រធានអាស៊ានស្រួលធ្វើការងារ មានន័យថា បញ្ហាដែលថៃឈ្លានពាននេះ មិនមែនជាគ្រាន់តែភារកិច្ចជួយដោះស្រាយរបស់សហរដ្ឋអាមេរិក និងប្រធានអាស៊ានប៉ុណ្ណឹងទេ។ ប៉ុន្តែនៅពេលប្រើកិច្ចព្រមព្រៀងសន្ដិភាពទីក្រុងប៉ារីស ក៏វាកម្លាំងសង្កត់ជាអន្តរជាតិលើថៃ ឱ្យឈប់ឈ្លានពានលើកម្ពុជា នោះទើបមានឥទ្ធិពល។
លោក គឹម សុខ

ការបង្កហេតុជាបន្តបន្ទាប់ពីកងទ័ពថៃ បានកើតឡើងស្របពេលលោកនាយករដ្ឋមន្ត្រី ហ៊ុន ម៉ាណែត បានដាក់លិខិតទៅមេដឹកនាំអាស៊ាន ចិន បារាំង អាមេរិក និងអង្គការសហប្រជាជាតិស្នើសុំកិច្ចអន្តរាគមន៍បន្ទាន់ ខណៈលោកបានលើកឡើងថា កងទ័ពថៃត្រៀមបើកការវាយប្រហារដណ្ដើមយកទីតាំងកម្ពុជាចំនួន១៧ផ្សេងទៀត ចាប់ពីខេត្តកោះកុងដល់ខេត្តពោធិ៍សាត់។

នាយករដ្ឋមន្ត្រីម៉ាឡេស៊ី ក៏បានហៅទូរស័ព្ទទៅនាយករដ្ឋមន្ត្រីរបស់ថៃលោក អនុធីន ឆានវីរៈគូល (Anutin Charnvirakul)ស្នើឱ្យបញ្ឈប់ភាពតានតឹងតាមព្រំដែនជាមួយកម្ពុជា និងត្រូវដោះស្រាយបញ្ហាព្រំដែនតាមតុចរចា តាមរយៈគណៈកម្មការចម្រុះខណ្ឌសីមា និងបោះបង្គោលព្រំដែនគោកកម្ពុជា-ថៃ (JBC)៕

កងទ័ពថៃបើកការបាញ់ប្រហារមកលើកងទ័ពកម្ពុជា រំលោភលើកិច្ចព្រមព្រៀងឈប់បាញ់

បុគ្គលិក — Sat, 27 Sep 2025 15:36:48 +0000

អ្នកនាំពាក្យក្រសួងការពារជាតិបានបញ្ជាក់ថា កងទ័ពថៃបានចាប់ផ្ដើមបើកការវាយហារនៅម៉ោងជាង១១ រហូតដល់ម៉ោងជាង១២ថ្ងៃត្រង់ មកលើទីតាំងឈរជើងរបស់កងទ័ពកម្ពុជា និងបានធ្វើឱ្យខូចខាតសំណង់មួយចំនួន ប៉ុន្តែមិនបានបញ្ជាក់ថា មានកងទ័ពរបួសឬស្លាប់នោះទេ។

អ្នកនាំពាក្យក្រសួងការពារជាតិ បានបញ្ជាក់ថា កងទ័ពថៃបានចាប់ផ្ដើមបាញ់មកលើកងទ័ពកម្ពុជាជាថ្មី អំឡុងពេលអនុវត្តបទឈប់បាញ់ នៅតំបន់អានសេះ នៅថ្ងៃទី២៧ ខែកញ្ញា។

បណ្ដាញសារព័ត៌មានថៃបានចុះផ្សាយដោយដកស្រង់សេចក្ដីប្រកាសរបស់កងទ័ពថៃថា កងទ័ពកម្ពុជាជាអ្នកប្រើកាំភ្លើងធុនស្រាល និងគប់គ្រាប់បែកចូលក្នុងទឹកដីថៃ ទើបធ្វើឱ្យកងកម្លាំងថៃបានបាញ់តបតវិញ។

ទោះជាយ៉ាងណា អ្នកនាំពាក្យក្រសួងការពារជាតិអ្នកស្រី ម៉ាលី សុជាតា បានបញ្ជាក់ថា កងទ័ពកម្ពុជាបានប្រកាន់យកគោលការណ៍អត់ធ្មត់កម្រិតខ្ពស់ ដើម្បីអនុវត្តកិច្ចព្រមព្រៀងបទឈប់បាញ់ចាប់តាំងពីថ្ងៃទី២៨ ខែកក្កដាមក។ អ្នកស្រីបានបញ្ជាក់ថា ការរំលោភបទឈប់បាញ់របស់កងទ័ពថៃ បានធ្វើឱ្យស្ថានភាពកាន់តែតានតឹង និងស្មុគស្មាញ។

ជុំវិញបញ្ហានេះ ប្រធានព្រឹទ្ធសភាលោក ហ៊ុន សែន ក៏បានបង្ហោះហ្វេសប៊ុកដែរថា ដោយសារតែភាគីកម្ពុជា-ថៃ ចោទប្រកាន់គ្នាទៅវិញទៅមក រឿងអ្នកបង្កឱ្យផ្ទុះអាវុធចុងក្រោយនេះ គឺលោកបានស្នើឱ្យថ្នាក់ដឹកនាំកងទ័ពម៉ាឡេស៊ី ដែលជាប្រធានក្រុមអ្នកសង្កេតការណ៍អាស៊ានបណ្ដោះអាសន្ន គួរតែធ្វើវិនិច្ឆយគ្រាប់ ព្រោះកងទ័ពកម្ពុជា-ថៃប្រើប្រាស់គ្រាប់ខុសគ្នា និងត្រូវចុះពិនិត្យដល់ទីតាំងរណ្ដៅគ្រាប់ធ្នាក់ ដើម្បីកំណត់ថាតើគ្រាប់បាញ់ចេញពីទិសខាងណា។

លោក ហ៊ុន សែន បានណែនាំឱ្យកងទ័ពកម្ពុជាត្រូវរក្សាទុករណ្ដៅគ្រាប់ឱ្យបានល្អ សម្រាប់ក្រុមអ្នកសង្កេតការណ៍អាស៊ាន ចុះពិនិត្យដើម្បីធ្វើវិនិច្ឆយគ្រាប់ និងពិនិត្យរណ្ដៅគ្រាប់ឱ្យបានល្អត្រឹមត្រូវ និងច្បាស់លាស់ ហើយលោកសង្ឃឹមថា ភាគីថៃគួរតែហ៊ានធ្វើដូចកម្ពុជាដែរ ដើម្បីបង្ហាញថា មាសសុទ្ធមិនខ្លាចភ្លើង។

ការបាញ់ប្រហាររបស់កងទ័ពថៃមកលើទីតាំងឈរជើងកងទ័ពកម្ពុជានៅថ្ងៃទី២៧ ខែកញ្ញា បានកើតឡើងក្រោយពីរថ្ងៃ បន្ទាប់ពីកងទ័ពថៃបានបាញ់កាំភ្លើងធុនស្រាលក្នុងដីរបស់ខ្លួនកាលពីថ្ងៃទី២៥ ខែកញ្ញា ចាប់តាំងពីម៉ោង២ទាបភ្លឺ រហូតដល់ម៉ោង៥ល្ងាច ក្នុងចេតនាព្យាយាមបង្កហេតុ ដើម្បីកុំឱ្យកងទ័ពកម្ពុជាអត់ធ្មត់តទៅទៀត។

ការព្យាយាមបង្កហេតុឱ្យកងទ័ពកម្ពុជាផ្ទុះអាវុធនេះ បានកើតឡើងក្រោយពីលោកនាយករដ្ឋមន្ត្រី ហ៊ុន ម៉ាណែត បានប្រាប់ទៅមេដឹកនាំអង្គការសហប្រជាជាតិ អាមេរិក ចិន បារាំង និងប្រធានអាស៊ានថា កងទ័ពថៃត្រៀមបើកការវាយលុកឈ្លានពានយកទឹកដីកម្ពុជា១៧ទីតាំងផ្សេងទៀត ចាប់ពីខេត្តពោធិ៍សាត់ដល់ខេត្តកោះកុង៕

ខ្មែរ

#រូបត្លុកនយោបាយ៖ «កម្ពុជាលែងមានស្កេម នៅសល់តែមេស្កេម»

#រូបត្លុកនយោបាយ៖ «សមិទ្ធផល ៣ឆ្នាំរបស់លោក ហ៊ុន ម៉ាណែត»

#រូបត្លុកនយោបាយ៖ «ជួយជាតិ ឬជួយជនផ្ដាច់ការ»

#រូបត្លុកនយោបាយ៖ តើកម្ពុជានឹងខាតបង់ទេ ប្រសិនបើបដិសេធដូចថៃ?

#រូបត្លុកនយោបាយ៖ «មានលុយ មិនបាច់ជាប់គុក»

#រូបត្លុកនយោបាយ៖ «ជារឿងបុគ្គលរវាងអាមេរិក ជាមួយ កុក អាន និង លី យ៉ុងផាត»

#រូបត្លុកនយោបាយ៖ «ចិនហាមកម្ពុជាមិនឲ្យប្រើអាវុធរបស់ខ្លួនវាយប្រហាថៃ»

ហ៊ុន តូ៖​ «ទុកលុយ ហួយវ័ន ធ្វើវិមាន និងទីលានវាយកូនហ្គោល»

#គំនូជីវចល៖ «ស្រមោលយុត្តិធម៌ និងឃាតករសិប្បនិម្មិត»

#រូបត្លុកនយោបាយ៖ ចំណាត់ការ Facebook លើសារគំរាមលោក ហ៊ុន សែន

តើវិស័យការពារជាតិខ្សោយ ដោយសារអំពើពុករលួយ ឬការអភិវឌ្ឍ?

អង្គការជាតិនិងអន្តរជាតិ៧០ស្ថាប័នទាមទារឲ្យលោក ហ៊ុន ម៉ាណែត ដោះលែងយុវជនចលនាមាតាធម្មជាតិ

ការលើកលែងទោសជាប់ឃុំលោក កឹម សុខា «មិនមែនជាការបង្រួបបង្រួមជាតិ»

#រូបត្លុកនយោបាយ៖ ភាពផ្ទុយគ្នារវាង «ពាក្យសម្ដី និង ការពិត»

មន្ត្រីបក្សប្រឆាំងថា ថៃអុកឡុកត្រកូល ហ៊ុន ឱ្យទទួលយកកិច្ចព្រមព្រៀងថ្មី មុនចូលតុចរចា

អ្នកឃ្លាំមើលថា លោក ហ៊ុន ម៉ាណែត មិនប្ដឹងថៃទៅតុលាការអន្តរជាតិ ព្រោះចង់រក្សាអំណាច

លោក ហ៊ុន ម៉ាណែត នឹងមិនចាត់ការលោក ហ៊ុន តូ ឱ្យសងលុយអតិថិជនក្រុមហ៊ុន ហួយវ័ន ផេ ទេ

ចិនប្រគល់នាវាចម្បាំងឱ្យកម្ពុជា ដើម្បីទុកជួយច្បាំងឱ្យចិន

តើលោក ហ៊ុន សែន ស៊ុមគ្រលុំជាមួយ ចេន ហ្ស៊ី ឬទេ?

លោក ហ៊ុន សែន និងលោក ហ៊ុន ម៉ាណែត »គួរព្យួរតំណែង» ជំុំវិញរឿងឆបោកអនឡាញ

អ្នកឃ្លាំមើលថា បើរដ្ឋាភិបាលមិនបង្ក្រាបមេខ្លោងឆបោកអនឡាញទេកម្ពុជានឺងជួបគ្រោះធំ។

សេចក្ដីជូនដំណឹង!

កម្ពុជាស្នើក្នុងមហាសន្និបាតUNឱ្យជួយជំរុញដំណោះស្រាយជម្លោះព្រំដែនជាមួយថៃដោយសន្ដិវិធី

ប្រធានអាស៊ាននិយាយបញ្ហាជម្លោះព្រំដែនកម្ពុជា-ថៃជាមួយប្រធានាធិបតីអាមេរិក

កងទ័ពថៃបើកការបាញ់ប្រហារមកលើកងទ័ពកម្ពុជា រំលោភលើកិច្ចព្រមព្រៀងឈប់បាញ់

ហ៊ុន តូ៖ «ទុកលុយ ហួយវ័ន ធ្វើវិមាន និងទីលានវាយកូនហ្គោល»