លោក ហ៊ុយ វណ្ណៈ អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជា ពីថ្ងៃ ១៧ ដល់ ២៣ សីហា ឆ្នាំ២០០៩។
ត្រាក់ប្រឆាំង ហ៊ុន សែន ត្រូវជនមួយក្រុមបាចនៅក្នុងខណ្ឌដូនពេញ
ជនមួយក្រុមបានបាចត្រាក់ជាច្រើនសន្លឹកដែលមានខ្លឹមសារជេរប្រមាថលោកនាយករដ្ឋមន្រ្តី ហ៊ុន សែន ប្រមុខរដ្ឋាភិបាលខ្មែរ ហើយត្រាក់ទាំងនោះត្រូវគេប្រទះឃើញនៅក្នុងខណ្ឌដូនពេញ រាជធានីភ្នំពេញ នាវេលាម៉ោង៤ជិតភ្លឺ នាថៃ្ងពុធ ទី១៩ ខែសីហា។
ត្រាក់ទាំងនោះគឺមានរូបថតរបស់លោកនាយករដ្ឋមន្រ្តី ហ៊ុន សែន និងបានសរសេរចោទថា "លោក ហ៊ុន សែន គឺជាមេដឹកនាំផ្តាច់ការនៃប្រទេសកម្ពុជា ដែលជាកញ្ជះដាច់ថៃ្លរបស់អាយ៉ងយួន"។
ខ្លឹមសារត្រាក់ក៏បានបញ្ជាក់ទៀតថា "ខ្ញុំមានមោទនភាពណាស់ដែលបានកើតមកជាកូនខ្មែរ គឺពូជខែ្មរសាងអង្គរ។ ខ្ញុំនឹកឃើញយុគសម័យប្រទេសខែ្មរដ៏រុងរឿងល្បីល្បាញខ្ទរខ្ទារទូទាំងពិភពលោក តែពេលនេះរលាយអស់ហើយ ដោយសារតែរបបផ្តាច់ការរបស់រដ្ឋាភិបាលសព្វថៃ្ងនេះ ហើយដោយសារអំពើពុករលួយនិងការឈ្លានពានពីសំណាក់យួនហាណូយ នៅថៃ្ងទី៧ ខែមករា ឆ្នាំ១៩៧៩ ដោយប្រើពាក្យថា វាមករំដោះកូនខែ្មរនិងរំដោះប្រជាជនខែ្មរ"។
លោក ទូច ណារ៉ុថ ស្នងការនគរបាលរាជធានីភ្នំពេញ ថ្លែងថា សមត្ថកិច្ចកំពុងបើកការស្រាវជា្រវលើករណីនេះ ហើយសមត្ថកិច្ចនៅមិនទាន់កំណត់បាននូវមុខសញ្ញានៃក្រុមជនសង្ស័យនោះនៅឡើយទេ។
ថៃកាត់បន្ថយចំនួនកងទ័ពជើងទឹកនិងកប៉ាល់ចម្បាំងនៅខែត្រត្រាត
មន្ត្រីនាំពាក្យនៃក្រសួងការពារជាតិខ្មែរបានថ្លែងក្នុងសប្តាហ៍នេះថា ថៃបានកាត់បន្ថយចំនួនកងទ័ពជើងទឹកនិងកប៉ាល់ចម្បាំងរបស់ខ្លួនដែលល្បាតនៅឯកោះកូតនៃខេត្តត្រាតរបស់ថៃនោះហើយ ដោយបានកាត់បន្ថយពីចំនួន១០គ្រឿងមកនៅត្រឹម៣គ្រឿង។
លោកឧត្តមសេនីយ៍ឯក ឈុំ សុជាតិ ជាអនុរដ្ឋលេខាធិការក្រសួងការពារជាតិ និងជាអ្នកនាំពាក្យរបស់ក្រសួងផងនោះ ថ្លែងទៀតថា ថៃមិនបានចល័តកម្លាំងចូលមកដែនទឹកកម្ពុជានោះទេ ហើយសកម្មភាពរបស់កងទ័ពជើងទឹកនៃកប៉ាល់ចម្បាំងថៃក៏មិនបានបង្ហាញនូវសញ្ញាណនៃការគំរាមកំហែងដល់សន្តិសុខកម្ពុជានោះដែរ។
ប៉ុន្តែមន្ត្រីយោធាដដែលគូសបញ្ជាក់ទៀតថា កម្ពុជាក៏នៅតែឃ្លាំមើលសកម្មភាពចល័តកងទ័ពរបស់ថៃជាបន្តដែរ។
សមាជិកព្រឹទ្ធសភាអាមេរិក Jim Webb មកទស្សនកិច្ចប្រទេសកម្ពុជា
សមាជិកព្រឹទ្ធសភាអាមេរិកមួយរូបគឺលោក Jim Webb បានមកបំពេញទស្សនកិច្ចមួយថ្ងៃនៅប្រទេសកម្ពុជា ដែលដំណើរទស្សនកិច្ចនេះគឺបានផ្តោតជាសំខាន់លើការជំរុញវិស័យពាណិជ្ជកម្មអាមេរិកកម្ពុជាឲ្យកាន់តែប្រសើរឡើង និងដើម្បីស្វែងយល់អំពីការវិវត្តន៍ថ្មីៗនៃស្ថានការណ៍នយោបាយរបស់កម្ពុជា។
ក្នុងដំណើរទស្សនកិច្ចនៅកម្ពុជានេះ លោកសមាជិកព្រឹទ្ធសភាអាមេរិក Jim Webb បានជួបសន្ទនាជាមួយលោកនាយករដ្ឋមន្ត្រី ហ៊ុន សែន, លោក ចម ប្រសិទ្ធ ជារដ្ឋមន្ត្រីក្រសួងពាណិជ្ជកម្ម ហើយលោកក៏បានជួបសន្ទនាផងដែរជាមួយមេដឹកនាំបក្សប្រឆាំងពីរ គឺលោក សម រង្ស៊ី ជាប្រធានគណបក្សសមរង្ស៊ី និងលោក កឹម សុខា ជាប្រធានគណបក្សសិទ្ធិមនុស្ស។
សូមបញ្ជាក់ថា ដំណើរទស្សនកិច្ចរបស់សមាជិកព្រឹទ្ធសភាអាមេរិក Jim Webb ពីរដ្ឋ Virginia នៃគណបក្សប្រជាធិបតេយ្យ គឺជាផ្នែកមួយនៃដំណើរទស្សនកិច្ចផ្លូវការរបស់លោកមកកាន់ប្រទេសចំនួន៥នៅក្នុងតំបន់អាស៊ី ដែលរួមមានប្រទេសថៃ ភូមា លាវ កម្ពុជានិងវៀតណាម។
កម្ពុជានិងវៀតណាមបើកសម្ពោធតំបន់សេដ្ឋកិច្ចពិសេស
មន្ត្រីក្រសួងពាណិជ្ជកម្មកម្ពុជានិងប្រតិភូពាណិជ្ជកម្មមកពីខេត្តអានយ៉ាងនៃប្រទេសវៀតណាម បានប្រកាសរួមគ្នាក្នុងសប្តាហ៍នេះបើកសម្ពោធតំបន់សេដ្ឋកិច្ចពិសេសមួយដើម្បីផ្លាស់ប្តូរទំនិញរួចពន្ធ។
លោក ម៉ៅ ថូរ៉ា ជារដ្ឋលេខាធិការនៃក្រសួងពាណិជ្ជកម្មនៅក្នុងប្រទេសកម្ពុជា ថ្លែងនៅក្នុងសន្និសីទកាសែតនៅក្នុងទីក្រុងភ្នំពេញជាមួយនឹងប្រតិភូប្រទេសវៀតណាមមកពីខេត្តអានយ៉ាងថា កម្ពុជាកំពុងតែជំរុញការនាំចេញទំនិញកសិផលទៅកាន់ប្រទេសវៀតណាមចំនួន៤ប្រភេទ ដូចជាអង្ករ ដំទ្បូង ពោតនិងស្វាយចន្ទី។
មន្រ្តីខ្មែរដដែលចាត់ទុកថា នេះជាជំហានមួយទៀតក្នុងការពង្រីកទំនាក់ទំនងពាណិជ្ជកម្មខ្មែរនិងវៀតណាម ដែលគេរំពឹងទុកថា នឹងមានតម្លៃជាទឹកប្រាក់កើនឡើងដល់ទៅ២ពាន់លានដុល្លារនៅឆ្នាំ២០១០។
មន្ត្រីដដែលបានថ្លែងទៀតថា នៅថៃ្ងអនាគតកម្ពុជានិងវៀតណាមនឹងជំរុញការធ្វើពាណិជ្ជកម្មរវាងប្រទេសទាំងពីរឲ្យកើនរហូតដល់កម្រិតខ្ពស់មួយ គឺតម្លៃ៤ពាន់លានដុល្លារអាមេរិក។
ពលរដ្ឋភូមិ២និងភូមិ៤សុំបន្តរស់នៅតំបន់បឹងកក់តទៅទៀត
អ្នករស់នៅចុងក្រោយនៅភូមិ២និងភូមិ៤នៃតំបន់បឹងកក់ ក្រុងភ្នំពេញ បាននាំគ្នាបន្តតវ៉ានៅសាលារាជធានីភ្នំពេញ និងបានដាក់ពាក្យទៅទីស្តីការគណៈរដ្ឋមន្រ្តី ដោយសុំឲ្យអាជ្ញាធរសង់រោងឲ្យពួកគាត់រស់នៅលើដីបឹងកក់បន្តទៀត។ ក្រុមពលរដ្ឋថ្លែងថា ពួកគាត់មិនចង់ប្តូរទៅរស់នៅដំណាក់ត្រយឹង ក្នុងខណ្ឌដង្កោនោះទេ។
ពលរដ្ឋនៃភូមិទាំងពីរនោះក៏បានបន្តសុំឲ្យអភិវឌ្ឍនៅនឹងកន្លែងដូចសហគមន៍បុរីកីឡាដែរ ប៉ុន្តែក្រុមហ៊ុនស៊ូកាគូវិញបានស្នើសុំអ្នកភូមិចាកចេញពីបឹងកក់ ដោយសំអាងថា អ្នកស្រុកអាចនឹងរងនូវការប៉ះពាល់ដោយការបូមខ្សាច់ចាក់បំពេញបឹងនោះ។
ដីទីតាំងបឹងកក់ដែលមានទំហំ១៣៣ហិកតារ មានប្រជាជនរស់នៅចំនួន៤.២៥២គ្រួសារត្រូវសាលារាជធានីភ្នំពេញបានសម្រេចជួលទៅឲ្យក្រុមហ៊ុនស៊ូកាគូក្នុងរយៈពេល៩៩ឆ្នាំ ដើម្បីអភិវឌ្ឍជាមជ្ឈមណ្ឌលពាណិជ្ជកម្មទំនើប ជាតំបន់លំនៅឋាន ជាកន្លែងសេវាកម្ម និងជាកន្លែងកម្សាន្ត។
អ្នកភូមិជនជាតិភាគតិចរស់នៅតាមដងទន្លេសុំឲ្យរដ្ឋាភិបាលគិតគូរពីបញ្ហាបរិស្ថានធម្មជាតិ
អ្នកភូមិជនជាតិដើមភាគតិចរស់នៅតាមដងទន្លេចំនួនបីនៅខេត្តរតនគិរីនិងខេត្តស្ទឹងត្រែង បានសុំឲ្យរាជរដ្ឋាភិបាលខ្មែរយកចិត្តទុកដាក់លើផលប៉ះពាល់ផ្នែកជីវភាពរបស់ពួកគាត់ ក៏ដូចជាផលប៉ះពាល់ផ្នែកបរិស្ថានធម្មជាតិដែលបណ្តាលមកពីគម្រោងអភិវឌ្ឍន៍វារីអគ្គិសនីរបស់កម្ពុជានិងរបស់ប្រទេសវៀតណាមផងនោះ។
ចាប់តាំងពីឆ្នាំ១៩៩៣មក ប្រទេសវៀតណាមដែលឋិតនៅខ្សែទឹកខាងលើនៃទន្លេសេសានបានសាងសង់ទំនប់វារីអគ្គិសនីយ៉ាលីដំបូងបង្អស់ ហើយបានបង្កើតឲ្យមានផលប៉ះពាល់ជាច្រើនដល់ជីវភាពនិងសុខភាពពលរដ្ឋ ហើយធ្វើឲ្យខូចគុណភាពទឹកនិងបង្កឲ្យប៉ះពាល់ដល់ជីវចម្រុះ ជាពិសេសមច្ឆាជាតិនៅក្នុងទន្លេ។
ជាមួយគ្នានេះ គម្រោងសាងសង់ទំនប់វារីអគ្គិសនីសេសានក្រោម២របស់កម្ពុជាក៏កំពុងធ្វើឲ្យអ្នកភូមិប្រតិកម្មថា មានផលប៉ះពាល់កាន់តែធ្ងន់ធ្ងរផងដែរ។
ក្រុមពលរដ្ឋនៅក្នុងស្រុកសេសាន ខេត្តស្ទឹងត្រែង ថ្លែងថា អ្នកភូមិប្រមាណ១ពាន់គ្រួសារនឹងរងផលប៉ះពាល់ដោយផ្ទាល់ដោយសារតែគម្រោងអភិវឌ្ឍន៍វារីអគ្គិសនីនោះ។
រដ្ឋាភិបាលនិងក្រសួងមហាផៃ្ទររៀបចំប្តឹង ជា មុនី ពីបទផ្សាយព័ត៌មានមិនពិត
ក្រុមមន្ត្រីថ្លែងថា រដ្ឋាភិបាល និង ក្រសួងមហាផៃ្ទ កំពុងតែកសាងសំណុំរឿង និង រកមេធាវីប្រមូលភស្តុតាងនានាដើម្បីប្តឹង លោក ជា មុនី ប្រធានសហជីពសេរីកម្មករកម្ពុជា ក្រោមបទផ្សាយព័ត៌មានមិនពិតនិងបទញុះញង់បំភ្លៃការពិត ក៏ប៉ុន្តែ លោក ជា មុនី ថ្លែងថា លោកមិនតក់ស្លុតចំពោះការប្តឹងនេះទេ៕