សង្ខេបព័ត៌មានប្រចាំសប្ដាហ៍ ថ្ងៃ ២៨ កញ្ញា ដល់ ៤ តុលា ២០០៩
ដោយ អ៊ួន ឈិន
2009-10-04
ព័ត៌មានសំខាន់ៗប្រចាំសប្ដាហ៍នេះរួមមាន រដ្ឋសភាលើកយកសេចក្ដីព្រាងច្បាប់ស្ដីពីក្រមព្រហ្មទណ្ឌមកពិភាក្សា និងព័ត៌មានផ្សេងៗដទៃទៀត។
០១-១០-០៩: សមាជិកសភាចូលរួមពិភាក្សាដើម្បីអនុម័តលើសេចក្ដីព្រាងច្បាប់ក្រមព្រហ្មទណ្ឌក្នុងសម័យប្រជុំលើកទី៣ នីតិកាលទី៤(រូបភាពថតចេញពីកញ្ចក់ទូរទស្សន៍នៅរដ្ឋសភា)។
លោក អ៊ួន ឈិន អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជា ពីថ្ងៃ ២៨ កញ្ញា ដល់ ៤ តុលា ឆ្នាំ២០០៩។
រដ្ឋសភាលើកយកសេចក្ដីព្រាងច្បាប់ស្ដីពីក្រមព្រហ្មទណ្ឌមកពិភាក្សា
រដ្ឋសភានៃព្រះរាជាណាចក្រកម្ពុជាបានសម្រេចដោយសំឡេងគាំទ្រស្មើនឹង៩៩ ក្នុងចំណោមតំណាងរាស្ត្រ១០១រូបដែលបានចូលរួមក្នុងសម័យប្រជុំរដ្ឋសភាលើកទី៣ នីតិកាលទី៤ នៅថ្ងៃទី១ តុលា ដើម្បីដាក់បញ្ចូលសេចក្ដីព្រាងច្បាប់ស្ដីពីក្រមព្រហ្មទណ្ឌក្នុងការពិភាក្សានិងអនុម័ត។
លោក ហេង សំរិន ប្រធានរដ្ឋសភា បានមានប្រសាសន៍ថា មានសំណើពីតំណាងរាស្ត្រគណបក្សសមរង្ស៊ីចំនួន៤រូបតាមរយៈលិខិតចុះថ្ងៃទី១ កញ្ញា ឆ្នាំ២០០៩ ដោយសុំឲ្យមានវិសោធនកម្មលើមាត្រាចំនួន៤៣ ក្នុងចំណោម៦៧២មាត្រានៃសេចក្ដីព្រាងច្បាប់ស្ដីពីក្រមព្រហ្មទណ្ឌនេះ។ ទោះយ៉ាងណា សំណើនេះត្រូវបានរដ្ឋសភាបដិសេធដោយសំឡេង៨៣លើ១០១ ក្នុងសម័យប្រជុំរដ្ឋសភាលើកទី៣។
ស៊ូរិយ៉ា ស៊ូប៊េឌី៖ សេរីភាពក្នុងការបញ្ចេញមតិនៅកម្ពុជាកំពុងធ្លាក់ចុះ
តំណាងពិសេសផ្នែកសិទ្ធិមនុស្សប្រចាំនៅកម្ពុជារបស់អគ្គលេខាធិការអង្គការសហប្រជាជាតិ លោក ស៊ូរិយ៉ា ស៊ូប៊េឌី (Surya Subedi) បានមានប្រសាសន៍ថា សេរីភាពក្នុងការសម្ដែងមតិយោបល់នៅក្នុងប្រទេសកម្ពុជាកំពុងធ្លាក់ចុះគួរឲ្យព្រួយបារម្ភ។
លោក ស៊ូរិយ៉ា ស៊ូប៊េឌី បានថ្លែងយ៉ាងដូច្នេះពីទីក្រុងហ្សឺណែវ ប្រទេសស្វ៊ីស កាលពីថ្ងៃព្រហស្បតិ៍ ទី១ តុលា បន្ទាប់ពីសង្កេតឃើញថា ក្រុមមនុស្សដែលនិយាយរិះគន់រដ្ឋាភិបាល ឬមន្ត្រីជាន់ខ្ពស់រដ្ឋាភិបាល បានរងការចោទប្រកាន់និងសម្រេចដាក់ទោសដោយតុលាការកម្ពុជា ក្រោមបទផ្សាយព័ត៌មានមិនពិតឬបទបរិហារកេរ្តិ៍។
ទោះជាយ៉ាងណាក៏ដោយ នៅក្នុងបទសម្ភាសន៍ជាមួយវិទ្យុអាស៊ីសេរី កាលពីពេលថ្មីៗនេះ លោក ហោ ណាំហុង ឧបនាយករដ្ឋមន្ត្រី និងជារដ្ឋមន្រ្តីក្រសួងការបរទេស បានមានប្រសាសន៍ថា ការដែលនិយាយថា រដ្ឋាភិបាលកម្ពុជារឹតត្បិតសេរីភាពក្នុងការបញ្ចេញមតិយោបល់នោះ គឺជារឿងមិនត្រឹមត្រូវទេ ពីព្រោះសព្វថ្ងៃនេះអ្នករិះគន់រាជរដ្ឋាភិបាលមិនត្រឹមតែអាចរិះគន់នៅក្នុងប្រទេសប៉ុណ្ណោះទេ ប៉ុន្តែថែមទាំងអាចដើរចេញទៅក្រៅប្រទេសហើយនិយាយរិះគន់រាជរដ្ឋាភិបាលថែមទៀតផង។
ការលើកឡើងរបស់មន្រ្តីអ.ស.បអំពីសេរីភាពក្នុងការបញ្ចេញមតិនៅកម្ពុជាបាននាំឲ្យមានប្រតិកម្មពីរដ្ឋសភានៃប្រទេសកម្ពុជា។
លោក ងួន ញ៉ិល អនុប្រធានរដ្ឋសភាបានឲ្យដឹងថា រដ្ឋសភាមិនអាចទទួលយកមកពិភាក្សាក្នុងសម័យប្រជុំរដ្ឋសភាបានទេនូវការលើកឡើងរបស់បេសកជនពិសេសទទួលបន្ទុកសិទ្ធិមនុស្សនៃអគ្គលេខាធិការអង្គការសហប្រជាជាតិប្រចាំនៅកម្ពុជា គឺលោក ស៊ូរិយ៉ា សូប៊េឌី ដែលបានលើកឡើងថា សេរីភាពក្នុងការបញ្ចេញមតិនៅកម្ពុជាកំពុងធ្លាក់ចុះ ហើយអ្នកដែលរិះគន់រដ្ឋាភិបាលត្រូវបានចោទប្រកាន់ពីបទផ្សាយព័ត៌មានមិនពិតនោះ។
លោក ងួន ញ៉ិល បានថ្លែងយ៉ាងដូច្នេះនៅក្នុងសម័យប្រជុំរដ្ឋសភាលើកទី៣ នីតិកាលទី៤ កាលពីព្រឹកថ្ងៃទី២ តុលា ស្តីពីការពិភាក្សានិងអនុម័តសេចក្តីព្រាងច្បាប់ក្រមព្រហ្មទណ្ឌ បន្ទាប់ពីតំណាងរាស្ត្រគណបក្សជំទាស់ គឺលោក យឹម សុវណ្ណ បានស្នើឲ្យរដ្ឋសភាដកមាត្រាមួយចំនួនចេញពីសេចក្ដីព្រាងក្រមព្រហ្មទណ្ឌ ដូចជាការបរិហារកេរ្តិ៍និងការជេរប្រមាថ ដើម្បីយកទៅធ្វើក្នុងសេចក្តីព្រាងច្បាប់មួយថ្មី ឬដាក់បញ្ចូលចូលក្នុងក្រមរដ្ឋប្បវេណីផ្អែកតាមការលើកឡើងរបស់លោក ស៊ូរិយា ស៊ូប៊េឌី។
ហ៊ុន សែន៖ ដី៤,៦គីឡូម៉ែត្រក្រឡានៅតំបន់ប្រាសាទព្រះវិហារគឺជាដីខ្មែរ
នាយករដ្ឋមន្ត្រីនៃប្រទេសកម្ពុជា លោក ហ៊ុន សែន បានអះអាងជាសាធារណៈថា ដីទំហំ៤,៦គីឡូម៉ែត្រក្រឡានៅតំបន់ប្រាសាទព្រះវិហារគឺជាដីរបស់ខ្មែរយ៉ាងពិតប្រាកដ ពុំមាននរណាអាចកាឡៃឬកែប្រែបានឡើយ។
លោក ហ៊ុន សែន បានអះអាងយ៉ាងដូច្នេះនៅក្នុងពិធីបើកសម្ពោធឲ្យប្រើប្រាស់ជាផ្លូវការទីស្នាក់ការក្រសួងទេសចរណ៍ ដែលមានទីតាំងក្នុងខណ្ឌ៧មករា រាជធានីភ្នំពេញ កាលពីព្រឹកថ្ងៃទី២៨ កញ្ញា។
ថ្លែងក្នុងឱកាសនោះដែរ លោកនាយករដ្ឋមន្រ្តី ហ៊ុន សែន ក៏បានព្រមានក្រុមបាតុករអាវលឿងថៃដែលបាននាំគ្នាធ្វើបាតុកម្មទាមទារយកដីនៅតំបន់ប្រាសាទព្រះវិហាររបស់ខ្មែរនោះថា "ដោយសារតែជនជាតិសៀមបីនាក់បួននាក់ហ្នឹងហើយ បានជាកងទ័ពសៀមឈ្លានពានចូលមកវត្តកែវសិខាគិរីស្វរៈ គឺជនជាតិថៃចូលមក៣នាក់ លោកសង្ឃមួយអង្គ យាយជីម្នាក់ អាចារ្យម្នាក់។ លុះដល់ពេលភាគីកម្ពុជាចាប់ធ្វើកំណត់ហេតុ ភាគីថៃយកហេតុផលបញ្ជូនទ័ពចូលតែម្ដង"។
លោកនាយករដ្ឋមន្ត្រីបានបន្តថា "អ៊ីចឹងមិនបាច់ចាប់ទេ កុំឆ្ងល់ ដីខ្មែរទេតើ! មកដោយល្បិចកល ហើយមកនេះមិនមែនត្រឹមទាមទារដីទំនាស់៤,៦គីឡូម៉ែត្រក្រឡាទេ គឺយកប្រាសាទ"។
នាយករដ្ឋមន្ត្រីថៃប្រតិកម្មតបនឹងប្រសាសន៍របស់នាយករដ្ឋមន្ត្រីខ្មែរ
ប្រតិកម្មតបទៅនឹងប្រសាសន៍ព្រមានរបស់លោកនាយករដ្ឋមន្រ្តី ហ៊ុន សែន ដកស្រង់ដោយទីភ្នាក់ងារសារព័ត៌មានបារាំង AFP ដែលបានបញ្ជាឲ្យបាញ់សម្លាប់ពលរដ្ឋថៃណាដែលឆ្លងព្រំដែនចូលមកតំបន់ក្បែរប្រាសាទព្រះវិហារនោះ នាយករដ្ឋមន្រ្តីថៃ លោក អាភីស៊ិត វេតឆាឈីវ៉ាក់ (Abhisit Vejjajiva) បានថ្លែងនៅថ្ងៃអង្គារ ទី២៩ កញ្ញា ថា លោក ហ៊ុន សែន មានបំណងចង់សងសឹងតបតទៅនឹងក្រុមបាតុករថៃដែលបានធ្វើការតវ៉ាទាមទារកាលពីថ្ងៃទី១៩ ខែកញ្ញា។
ប៉ុន្តែនាយករដ្ឋមន្រ្តីថៃបានថ្លែងបញ្ជាក់យ៉ាងទទូចថា ប្រទេសថៃនៅតែចង់ស្វែងរកដំណោះស្រាយដោយសន្តិវិធីចំពោះបញ្ហាជម្លោះប្រាសាទព្រះវិហារ តាមរយៈគណៈកម្មាធិការព្រំដែនរួមដែលបង្កើតឡើងដោយប្រទេសទាំងពីរ។
មន្ត្រីយោធាថៃទទួលស្គាល់ថាបានដុតសាកសពកុមារខ្មែរមួយរូបមែន
មន្ត្រីយោធានៃប្រទេសថៃបានទទួលស្គាល់ថា ទាហានរបស់ខ្លួនបានដុតសាកសពកុមារាខ្មែរមួយរូបពិតប្រាកដមែន ប៉ុន្តែបញ្ជាក់ថា មិនបានដុតទាំងរស់ដូចការចោទប្រកាន់របស់ភាគីខ្មែរនោះទេ។
សូមជម្រាបថា សាកសពរបស់កុមារា សាំង រិទ្ធ ដែលមានសភាពធ្លុះធ្លាយនិងស្លាកស្នាមដុតរោលខ្លួននោះត្រូវបានឪពុកនិងអ្នកភូមិរំដោះយកចេញពីដីថៃមកវិញ។ ឪពុករបស់កុមារារងគ្រោះបានអំពាវនាវដល់រដ្ឋាភិបាលនិងអង្គការអន្តរជាតិឲ្យជួយរកយុត្តិធម៌ជូនកូនប្រុសរបស់ខ្លួន ហើយរាជរដ្ឋាភិបាលខ្មែរក៏កំពុងស៊ើបអង្កេតរកការពិតអំពីរឿងនេះដែរ។
យ៉ាងហោចណាស់មនុស្ស១៧នាក់បានស្លាប់ដោយសារខ្យល់ព្យុះនៅកម្ពុជា
តាមព័ត៌មានដែលវិទ្យុអាស៊ីសេរីទទួលបាន រហូតមកដល់ពេលនេះ យ៉ាងហោចណាស់មនុស្ស១៧នាក់បានស្លាប់និងជាច្រើននាក់ទៀតរងរបួស ហើយផ្ទះសម្បែងរាប់រយខ្នងត្រូវបានបំផ្លាញ សត្វពាហនៈ ដីស្រែចម្ការ ត្រូវទឹកជន់លិច ដោយសារខ្យល់ព្យុះកំបុតត្បូងបោកបក់ប៉ះត្រូវខេត្តមួយចំនួននៅកម្ពុជា។
សូមបញ្ជាក់ថា ទូរទស្សន៍កម្ពុជាបានចាក់ផ្សាយការប្រកាសរបស់រាជរដ្ឋាភិបាលកាលពីថ្ងៃទី២៨ ខែកញ្ញាកន្លងមក ឲ្យប្រជាពលរដ្ឋនិងមន្ត្រីរដ្ឋាភិបាលប្រុងប្រយ័ត្នចំពោះខ្យល់ព្យុះកំបុតត្បូង ដែលនឹងអាចបោកបក់ចំខេត្តមួយចំនួនភាគឦសាន និងតាមតំបន់ទន្លេសាបនៃប្រទេសកម្ពុជា។
មន្ត្រីរដ្ឋាភិបាលប្រតិកម្មទៅនឹងការចោទថាបិទសិទ្ធិសេរីភាពអ្នកកាសែត
អ្នកនាំពាក្យអង្គភាពប្រតិកម្មរហ័សនៃទីស្តីការគណៈរដ្ឋមន្ត្រី កាលពីថ្ងៃអង្គារកន្លងទៅនេះបានបញ្ចេញប្រតិកម្មថា រដ្ឋាភិបាលខ្មែរមិនដែលបិទសេរីភាពអ្នកសារព័ត៌មានឡើយ។
ប្រតិកម្មនេះត្រូវបានធ្វើឡើងនៅក្រោយពេលដែលវិទ្យុអាស៊ីសេរីបានផ្សព្វផ្សាយកាលពីពេលថ្មីៗនេះនូវទស្សនៈរបស់អ្នកកាសែតមួយចំនួនថា នៅពេលនេះពួកគេកំពុងមានការរារែកខ្លាចរអាក្នុងការសរសេរអត្ថបទទាំងឡាយរិះគន់ ខណៈដែលពួកគេឃើញអ្នកកាសែតខ្លះត្រូវបានគេចាប់ដាក់គុក និងអ្នកកាសែត ឌឹ ឃែមបូឌា ដេលី (The Cambodia Daily) ពីររូបត្រូវបានគេផាកពិន័យជាច្រើនលានរៀល៕
អត្ថបទដែលទាក់ទង
សង្ខេបព័ត៌មានប្រចាំសប្ដាហ៍ ថ្ងៃ ៥ ដល់ ១១ តុលា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ២១ ដល់ ២៧ កញ្ញា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ១៤ ដល់ ២០ កញ្ញា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ៧ ដល់ ១៣ កញ្ញា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ៣១ សីហា ដល់ ៦ កញ្ញា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ២៤ ដល់ ៣០ សីហា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ១៧ ដល់ ២៣ សីហា ២០០៩
