លោក ជា មករា អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗ នៅកម្ពុជា ពីថ្ងៃ ៥ ដល់ ១១ ឧសភា ឆ្នាំ២០០៨ ។
កិច្ចជួបប្រជុំគ្នាពិនិត្យមើលស្ថានការណ៍ទំនិញឡើងថ្លៃ
មន្ត្រីរដ្ឋាភិបាលក្រុមអ្នកជំនាញតាមបណ្តាអង្គការក្រៅរដ្ឋាភិបាល តំណាងសមាគមក្រុមនិស្សិតនិងកម្មករផងដែរបានជួបប្រជុំគ្នាកាលពីថ្ងៃអង្គារ ទី៦ ឧសភា ដើម្បីពិនិត្យមើលស្ថានការណ៍ទំនិញឡើងថ្លៃ និងការមធ្យោបាយទប់ទល់ ។
ក្រុមអ្នកចូលរួមបានលើកឡើងពីកង្វល់រៀងៗខ្លួននិងគំនិតសម្រាប់ជាមធ្យោបាយផលិតលើកិច្ចការងារផ្សេងៗ ដើម្បីជាការទប់ទល់នឹងចំណោទទំនិញឡើងថ្លៃ រីឯមន្ត្រីរដ្ឋាភិបាលក៏បានរំពឹងថា អតិផរណានឹងអាចធ្លាក់ចុះខ្លះនៅចុងឆ្នាំនេះ ។
តម្លៃទំនិញនៅតែមានសភាពខ្ពស់ដដែល
តម្លៃទំនិញនៅក្នុងប្រទេសក្នុងសប្តាហ៍នេះនៅតែមានសភាពខ្ពស់ដដែលដូចថ្ងៃមុនៗ ប៉ុន្តែតម្លៃនៅភ្នំពេញមានលក្ខណៈខ្ពស់ជាងនៅបណ្តាខេត្ត ។
នៅភ្នំពេញអង្ករល្អលេខ១ ថ្លៃមួយគីឡូក្រាម ៤០០០រៀល បើប្រៀបធៀបទៅនឹងខេត្តពោធិ៍សាត់ និងខេត្តបន្ទាយមានជ័យដែលមួយគីឡូក្រាមថ្លៃតែ៣២០០រៀលទេ ។
តម្លៃប្រេងសាំងនោះទៀត គឺសាំងធម្មតាមួយលីត្រថ្លៃ៥ពាន់រៀល សាំងស៊ុបពែរថ្លៃ៥១០០រៀល និងប្រេងម៉ាស៊ូត ១លីត្រ ៤៨០០រៀល ។
ប្រទេសកម្ពុជាផ្ដល់ប្រាក់ជំនួយ៥ម៉ឺនដុល្លារដល់ប្រទេសភូមា
ប្រទេសកម្ពុជាកាលពីថ្ងៃពុធ ទី៧ ឧសភា កន្លងទៅ បានរួមវិភាគទានប្រាក់ជំនួយចំនួន៥ម៉ឺនដុល្លារអាមេរិក ដល់ប្រទេសភូមាដែលកំពុងតែមានមនុស្សស្លាប់ច្រើនម៉ឺននាក់ និងរងការខូចខាតយ៉ាងដំណំដោយសារតែគ្រោះថ្នាក់ខ្យល់ព្យុះ ។
វិភាគទាននោះបានផ្តល់តាមរយៈស្ថានទូតភូមាប្រចាំប្រទេសកម្ពុជា ។ កាកបាទក្រហមកម្ពុជា ក៏បានជួយដល់ប្រទេសភូមាជាទឹកប្រាក់ចំនួន ១ម៉ឺនដុល្លារផងដែរ ។
នាយករដ្ឋមន្ត្រីខ្មែរសរសើររដ្ឋាភិបាលកូរ៉េខាងត្បូង
លោកនាយករដ្ឋមន្ត្រី ហ៊ុន សែន បានសរសើរដល់រដ្ឋាភិបាលកូរ៉េខាងត្បូង ចំពោះការជួយអភិវឌ្ឍប្រទេសកម្ពុជា ។
នៅក្នុងប្រសាសន៍កាលពីថ្ងៃអង្គារ ៦ ឧសភា ក្នុងពិធីសម្ពោធផ្លូវជាតិលេខ៣ ដែលបានទទួលប្រាក់ជំនួយកសាងពីប្រទេសកូរ៉េខាងត្បូង លោកនាយករដ្ឋមន្ត្រីបានឲ្យដឹងថា ប្រវែងកំណាត់ផ្លូវប្រមាណ១៣៧គីឡូម៉ែត្រ ដែលកំពុងសម្ពោធកាលពីថ្ងៃអង្គារនោះ បានទទួលប្រាក់ជំនួយពីកូរ៉េខាងត្បូងចំនួន៣៦លាន៩សែនដុល្លារ ។
កម្ពុជានឹងអនុញ្ញាតឲ្យកាតាធ្វើវិនិយោគលើវិស័យកសិកម្ម
រដ្ឋាភិបាលខ្មែរនឹងអនុញ្ញាតឲ្យប្រទេសកាតាធ្វើវិនិយោគលើវិស័យកសិកម្មនៅកម្ពុជា ដែលទឹកប្រាក់ធ្វើវិនិយោគនឹងមានចំនួនដល់ ២០០លានដុល្លារ ។
លោកឧបនាយករដ្ឋមន្ត្រី ហោ ណាំហុង ដែលជារដ្ឋមន្ត្រីក្រសួងការបរទេសផងដែរនោះ បានមានប្រសាសន៍យ៉ាងនេះ ក្រោយដំណើរទស្សនកិច្ចមួយរបស់នាយករដ្ឋមន្ត្រីកាតា លោក Al Thani ដែលបានបំពេញទស្សនកិច្ចនៅកម្ពុជាកាលពីខែមុន ។
លោកឧបនាយករដ្ឋមន្ត្រី ហោ ណាំហុង បានមានប្រសាសន៍កាលពីថ្ងៃពុធ ទី៧ ឧសភា ថាប្រទេសកាតាបានផ្តល់ឯកសារធ្វើវិនិយោគចំនួន៦មកកម្ពុជា ហើយការចុះហត្ថលេខាលើកិច្ចសហប្រតិបត្តិការលើវិស័យកសិកម្ម ពាណិជ្ជកម្ម សេដ្ឋកិច្ច និងបច្ចេកទេស នឹងធ្វើនៅក្នុងសប្តាហ៍នេះ ។
គ.ជ.ប.ប្រកាសឲ្យគណបក្សនយោបាយគោរពបទបញ្ជា
គណៈកម្មាធិការជាតិរៀបចំការបោះឆ្នោត (គ.ជ.ប.) បានជូនដំណឹងដល់គ្រប់គណបក្សនយោបាយចូលរួមការប្រកួតប្រជែងការបោះឆ្នោត ត្រូវគោរពបទបញ្ជារបស់គ.ជ.ប. បើពុំដូច្នោះទេ នឹងត្រូវទទួលការដាក់ទណ្ឌកម្ម ។
មន្ត្រីគ.ជ.ប.បានឲ្យដឹងថា ការដាក់ទណ្ឌកម្មគឺបន្ទាប់ពីការព្រមានរួចលែងស្តាប់ ទើបគេនឹងអាចសម្រេចដោយដកសិទ្ធិបោះឆ្នោត ដកសិទ្ធិជាបេក្ខជន ឬនឹងត្រូវផាកពិន័យជាប្រាក់៥ទៅ១០លានរៀលថែមទៀត ។
ការចេញបញ្ជាផាកពិន័យបានធ្វើឡើងប្រមាណជាងមួយខែមុនដំណើរការយុទ្ធនាការឃោសនាបោះឆ្នោត ដែលនឹងប្រព្រឹត្តទៅរវាងពីថ្ងៃទី២៦ មិថុនា ដល់២៦កក្កដា ។
ហោ ណាំហុង មិនបោះបង់ចោលការប្តឹង សម រង្ស៊ី
ឧបនាយករដ្ឋមន្ត្រី លោក ហោ ណាំហុង បានមានប្រសាសន៍កាលពីថ្ងៃពុធ ទី៧ ឧសភា ថា លោកមិនបោះបង់ចោលការប្តឹងប្រធានគណបក្សប្រឆាំង លោក សម រង្ស៊ី ទាក់ទងនឹងការចោទថា លោក សម រង្ស៊ី បានហៅរូបលោកថាជាអតីតមេគុកខ្មែរក្រហមនៅបឹងត្របែកនោះឡើយ ។
លោក ហោ ណាំហុង បានថ្លែងថាមានអតីតមេដឹកនាំខ្មែរក្រហមកំពូលម្នាក់ដែលកំពុងជាប់ឃុំបណ្ដោះអាសន្ន ក្នុងតុលាការកាត់ទោសខ្មែរក្រហម អាចជាសាក្សីថាលោកជាជនរងគ្រោះក្នុងរបបខ្មែរក្រហមនោះដែរ ។
លោក សម រង្ស៊ី បានថ្លែងមុននេះថា លោកមិនបាននិយាយចំឈ្មោះថា អ្នកណាជាមេគុកបឹងត្របែកក្នុងរបបខ្មែរក្រហមនោះទេ ប៉ុន្តែលោកថា លោកត្រៀមប្រឈមមុខនឹងការតទល់គ្នាក្នុងតុលាការឯករាជ្យ និងថាលោកក៏មានឯកសារនិងភស្តុតាងតទល់ផងដែរ ។
ការប្តឹងលោក សម រង្ស៊ី គឺនៅគ្រាដែលកម្ពុជាកំពុងមានដំណើរការរៀបចំបោះឆ្នោតដែលការប្ដឹងនេះ បានធ្វើឲ្យមានក្តីបារម្ភខ្លះពីមជ្ឈដ្ឋានមួយចំនួន ។
អាជ្ញាធរចាប់ខ្លួនអតីតជនសង្ស័យខ្មែរក្រហមម្នាក់ទៀត
អាជ្ញាធរខ្មែរបានចាប់ខ្លួនអតីតជនសង្ស័យខ្មែរក្រហមម្នាក់ទៀត ដែលបានជាប់ពាក់ព័ន្ធនឹងករណីសម្លាប់អ្នកដោះមីនជាតិអង់គ្លេសម្នាក់ជាមួយនឹងអ្នកបកប្រែរបស់គាត់ក្រោយឃាតកម្មអស់រយៈពេល១២ឆ្នាំកន្លងមក ។
អតីតទាហានខ្មែរក្រហមឈ្មោះ ស៊ិន ដន អាយុ ៥២ឆ្នាំ ត្រូវតុលាការចោទប្រកាន់កាលពីថ្ងៃអង្គារ ទី៦ ឧសភា កន្លងមកនេះ ពីបទសម្លាប់លោក Christopher Howesនៃអង្គការមីនឈ្មោះ Mines Advisory Group និងអ្នកបកប្រែជាតិខ្មែរម្នាក់ កាលពីឆ្នាំ១៩៩៦ នៅក្នុងខេត្តសៀមរាប ។ ឈ្មោះ ស៊ិន ដន ត្រូវគេតាមរកជាច្រើនឆ្នាំមកហើយ ប៉ុន្តែទើបតែបានជួបប្រទះរស់លាក់ខ្លួននៅក្នុងអតីតភូមិខ្មែរក្រហមអន្លង់វែង ។ ប្រទេសអង់គ្លេសបានស្វាគមន៍កម្ពុជាចំពោះការចាប់ខ្លួននេះ ។
កិច្ចប្រជុំស្ដីពីបញ្ហារីករាលដាលនៃជំងឺអេដស៍
ក្រុមអ្នកធ្វើយុទ្ធនាការប្រឆាំងនឹងជំងឺអេដស៍នៃអង្គការក្រៅរដ្ឋាភិបាលចំនួន២១ប្រទេស និងមន្ត្រីអាជ្ញាធរបានធ្វើកិច្ចប្រជុំចំនួន៤ថ្ងៃ គឺពីថ្ងៃទី៦ ដល់ទី៩ ខែឧសភាកន្លងទៅ ដើម្បីរកវិធីទប់ស្កាត់បញ្ហារីករាលដាលនៃជំងឺអេដស៍ដែលពាក់ព័ន្ធនឹងមនុស្សដែលប្រើគ្រឿងញៀន ។
ក្រុមអ្នកចូលរួមបានមើលឃើញថា ការឆ្លងជំងឺអេដស៍ចេះតែរីករាលដាល ជាពិសេសនៅតាមបណ្តាប្រទេសនានាក្នុងសកលលោក គឺដោយសារតែការប្រើម្ជុលស៊ីរ៉ាំងចាក់គ្រឿងញៀនតាមសរសៃ ។
មន្ត្រីគណៈសង្ឃម្នាក់រងការចោទថាវាយតប់ព្រះសង្ឃ
នៅឯខេត្តតាកែវ មន្ត្រីគណៈសង្ឃថ្នាក់ស្រុកម្នាក់បានរងការចោទថាវាយព្រះសង្ឃចំនួន២អង្គ ដោយសារតែអ្នកស្រុកមិននិមន្តមន្ត្រីគណៈសង្ឃនោះធ្វើពិធី ប៉ុន្តែបែរជានិមន្តព្រះសង្ឃដែលគង់នៅឆ្ងាយនោះទៅវិញ ។
សេចក្តីរាយការណ៍កាលពីថ្ងៃពុធ ទី៧ ឧសភា បានឲ្យដឹងថាអ្នកភូមិច្រើនរយនាក់នៅស្រុកទ្រាំង ខេត្តកែវ បានលើកគ្នាធ្វើការតវ៉ាជំទាស់ដោយសារតែខឹងនឹងមន្ត្រីគណៈសង្ឃ ព្រះនាម ខាត់ យស នៃវត្តខ្លែងនោះពេក ។
កម្ពុជាគ្រោងពង្រីកនិងស្តារព្រលានយន្តហោះរតនគិរី
កម្ពុជាគ្រោងពង្រីកនិងស្តារព្រលានយន្តហោះរតនគិរី ប៉ុន្តែចាំបាច់ត្រូវបណ្តេញមនុស្សជាច្រើនដែលគេបានចោទថា មកវាតទីតាំងទីលំនៅខុសច្បាប់នៅកន្លែងបម្រុងអភិវឌ្ឍនោះ ។
ប្រជាពលរដ្ឋដែលមានទីលំនៅប៉ះពាល់ដល់គម្រោងនោះបានតវ៉ាថា ពួកគាត់បានមករស់នៅទីនោះ ប្រមាណ១៣ឆ្នាំមកហើយ ដែលគាត់ត្រូវទាមទារសំណងខ្លះបើសិនជាមានការបណ្តេញមែននោះ ។
ម៉ុងតាញ៉ា១៧នាក់កំពុងលាក់ខ្លួនក្នុងព្រៃភាគឦសានកម្ពុជា
នៅឯខេត្តរតនគិរីនោះទៀតដែរមានសេចក្តីរាយការណ៍ថា មានជនភៀសខ្លួនវៀតណាមម៉ុងតាញ៉ាចំនួន១៧នាក់ផ្សេងទៀត ដែលបានរត់គេចពីប្រទេសវៀតណាម កំពុងតែលាក់ខ្លួនក្នុងព្រៃភាគឦសានកម្ពុជា ដើម្បីរកការជួយសង្គ្រោះពីមន្ត្រីអ.ស.ប. ក្នុងប្រទេសកម្ពុជា ។
នៅមិនទាន់មានសេចក្តីរាយការណ៍បញ្ជាក់ថា តើអ្នកទាំងនោះបានទទួលយកអាសារហើយឬនៅទេនៅក្នុងសប្តាហ៍នេះ ។
បទល្មើសព្រៃឈើនៅស្រុកវ៉ារិន ខេត្តសៀមរាប នៅតែបន្តកើតមាន
សកម្មភាពកាប់ដឹកជញ្ជូននិងអារឈើខុសច្បាប់ នៅឃុំស្រែណូយ ស្រុកវ៉ារិន ខេត្តសៀមរាប នៅតែបន្តមានដែលគ្មានការអើពើណាមួយពីក្រុមអាជ្ញាធរនោះឡើយ ។
សាក្សីជាអ្នកស្រុកដែលគេជួលឲ្យទៅធ្វើសម្មភាពទាំងនោះបានបញ្ជាក់ថា ពិតជាមានរឿងហេតុនោះកើតឡើងមែន ។ ប្រភពបានរាយការណ៍ថា សកម្មភាពខុសច្បាប់ទាំងនោះ មានជាប់ពាក់ព័ន្ធនឹងអាជ្ញាធរមូលដ្ឋានមេព្រៃ និងទាហានខ្លះផងដែរ ។
អភិបាលខេត្តសៀមរាបលោក ស៊ូ ភីរិន្ទ បានមានប្រសាសន៍ថា ការគ្រប់គ្រងព្រៃឈើ គឺមិនមែនជាការងារដែលមន្ត្រីខេត្តគ្រប់គ្រងទេ គឺវាហួសនឹងសមត្ថភាពរបស់ខេត្តទៅទៀត ៕