សង្ខេបព័ត៌មានប្រចាំសប្ដាហ៍ ថ្ងៃ ២២ ដល់ ២៨ កញ្ញា ២០០៨
ដោយ ជា មករា
2008-09-28
ព័ត៌មានសំខាន់ៗប្រចាំសប្ដាហ៍នេះរួមមាន រដ្ឋសភាអាណត្តិថ្មីរបស់ប្រទេសកម្ពុជាបានបើកសម័យប្រជុំពេញអង្គរបស់ខ្លួនជាលើកដំបូងកាលពីថ្ងៃទី២៤ កញ្ញានេះ និងព័ត៌មានផ្សេងៗដទៃទៀត។
សមាជិករដ្ឋសភាថ្មីចេញពីកិច្ចប្រជុំពេញអង្គលើកដំបូង នាថ្ងៃទី២៤ ខែកញ្ញា ឆ្នាំ២០០៨។
លោក ជា មករា អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជា ពីថ្ងៃ ២២ ដល់ ២៨ កញ្ញា ឆ្នាំ២០០៨។
រដ្ឋសភាអាណត្តិថ្មីបើកសម័យប្រជុំពេញអង្គរបស់ខ្លួនជាលើកដំបូង
រដ្ឋសភាអាណត្តិថ្មីនីតិកាលទី៤របស់ប្រទេសកម្ពុជាបានបើកសម័យប្រជុំពេញអង្គរបស់ខ្លួនជាលើកដំបូងកាលពីថ្ងៃទី២៤ ខែកញ្ញា ក្រោមព្រះរាជអធិបតីភាពរបស់ព្រះមហាក្សត្រ ព្រះបរមនាថ នរោត្តម សីហមុនី ដោយប្រកាសសុពលភាពរបស់តំណាងរាស្ត្រចំនួន១២៣រូបដែលបានជាប់ឆ្នោតកាលពីថ្ងៃទី២៧ ខែកក្កដាកន្លងទៅ។
ក្នុងកិច្ចប្រជុំនោះមានសមាជិកសភាអវត្តមានចំនួន៤រូប មួយរូបគឺមកពីគណបក្សសមរង្ស៊ី និងបីរូបមកពីគណបក្សសិទ្ធិមនុស្ស។ បន្ទាប់ពីមានកិច្ចប្រជុំរដ្ឋសភារួចហើយ សមាជិកសភាថ្មីបានធ្វើការស្បថចូលកាន់តំណែងនៅរសៀលថ្ងៃពុធដដែលនោះនៅឯព្រះបរមរាជវាំង។
នៅថ្ងៃទី២៥ កញ្ញា រដ្ឋសភាថ្មីបានបោះឆ្នោតជាកញ្ចប់ជ្រើសតាំង លោក ហ៊ុន សែន ជានាយករដ្ឋមន្ត្រី និងលោក ហេង សំរិន ជាប្រធានរដ្ឋសភានាអាណត្តិថ្មីនេះ។ អនុប្រធានរដ្ឋសភាទី១ដែលត្រូវបានបោះឆ្នោតតែងតាំងថ្មី គឺលោក ងួន ញ៉ិល និងអនុប្រធានទី២ គឺលោក សាយ ឈុំ។
នៅក្នុងកិច្ចប្រជុំបោះឆ្នោតកញ្ចប់នោះមានសមាជិកសភាចូលរួមចំនួន៩៤រូប មកពីគណបក្សប្រជាជនកម្ពុជា ៩០រូប គណបក្ស នរោត្តម រណឫទ្ធិ ២រូប និងគណបក្សហ៊្វុនស៊ិនប៉ិច ២រូប ហើយសមាជិកសភាទាំង៩៤រូបបានលើកដៃយល់ព្រមចំពោះការតែងតាំងនាយករដ្ឋមន្ត្រី ប្រធាន និងអនុប្រធានរដ្ឋសភា និងប្រធាន និងអនុប្រធានគណៈកម្មការជំនាញទាំង៩របស់រដ្ឋសភា ហើយលើកដៃបោះឆ្នោតផ្ដល់សេចក្ដីទុកចិត្តដល់សមាសភាពរដ្ឋាភិបាលថ្មី។
ដោយឡែកសមាជិកសភាគណបក្សសមរង្ស៊ីចំនួន២៦រូប និងគណបក្សសិទ្ធិមនុស្សចំនួន៣រូបមិនបានចូលរួមក្នុងកិច្ចប្រជុំបោះឆ្នោតនោះឡើយ។
រដ្ឋាភិបាលថ្មីនឹងជំរុញឲ្យមានការអនុម័តច្បាប់ប្រឆាំងអំពើពុករលួយ
លោកនាយករដ្ឋមន្ត្រី ហ៊ុន សែន បានមានប្រសាសន៍នៅឯអង្គប្រជុំគណៈរដ្ឋមន្ត្រីលើកទីមួយ កាលពីថ្ងៃទី២៦ កញ្ញា ថា រដ្ឋាភិបាលអាណត្តិថ្មីនឹងជំរុញឲ្យមានការអនុម័តច្បាប់ប្រឆាំងអំពើពុករលួយ។
លោកនាយករដ្ឋមន្ត្រីបានបំភ្លឺក្នុងសុន្ទរកថា ដាក់ឲ្យអនុវត្តយុទ្ធសាស្ត្រចតុកោណដំណាក់កាលទីពីរថា ច្បាប់ប្រឆាំងអំពើពុករលួយនឹងត្រូវបញ្ជូនទៅរដ្ឋសភាដើម្បីការអនុម័តបន្ទាប់ពីរដ្ឋសភាអនុម័តក្រមព្រហ្មទណ្ឌរួចរាល់។
ទោះជាយ៉ាងណាលោកនាយករដ្ឋមន្ត្រី ហ៊ុន សែន បានមានប្រសាសន៍ថា ច្បាប់ប្រឆាំងអំពើពុករលួយតែមួយមិនអាចទប់ស្កាត់អំពើពុករលួយនោះបានឡើយ ហើយទាមទារឲ្យមានការអនុវត្តរាល់ច្បាប់ទាំងអស់ឲ្យមានប្រសិទ្ធភាព។
ច្បាប់ប្រឆាំងអំពើពុករលួយត្រូវបានព្រាងតាំងពីឆ្នាំ១៩៩៤ មកម៉្លេះ ហើយរហូតមកទល់នឹងពេលនេះរដ្ឋាភិបាលនៅតែទទួលរងការរិះគន់ថា មិនព្រមអនុម័តច្បាប់នេះដើម្បីលុបបំបាត់អំពើពុករលួយ។
បើតាមរបាយការណ៍របស់អង្គការតម្លាភាពអន្តរជាតិ ឬ Transparency International ដែលមានមូលដ្ឋាននៅទីក្រុងប៊ែកឡាំង ប្រទេសអាល្លឺម៉ង់ ដែលបានចេញផ្សាយកាលពីថ្ងៃទី២៣ កញ្ញា ២០០៨ ថ្មីៗនេះ បានឲ្យដឹងថា ស្ថានភាពនៃអំពើពុករលួយនៅកម្ពុជាកាន់តែមានសភាពធ្ងន់ធ្ងរតបន្ថែមទៀត ដោយស្ថិតក្នុងលេខរៀងទី១៦៦ ក្នុងចំណោម១៨០ប្រទេស ដែលកាលពីឆ្នាំ២០០៧ ប្រទេសកម្ពុជាស្ថិតក្នុងលំដាប់ថ្នាក់ទី១៦២។
ព្រះមហាក្សត្រចេញរាជក្រឹត្យលើកលែងទោសដល់សម្ដេចក្រុមព្រះ
ព្រះមហាក្សត្រខ្មែរ ព្រះបាទ សម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យកាលពីថ្ងៃទី២៥ កញ្ញា ដោយសម្រេចលើកលែងទោសព្រះរាមរបស់ព្រះអង្គ គឺព្រះអង្គម្ចាស់ នរោត្តម រណឫទ្ធិ តាមការស្នើសុំរបស់លោកនាយករដ្ឋមន្ត្រី ហ៊ុន សែន។
យោងតាមព្រះរាជក្រឹត្យរបស់ព្រះមហាក្សត្របានត្រាស់បង្គាប់ថា ត្រូវលើកលែងទោសទណ្ឌិតឈ្មោះ នរោត្តម រណឫទ្ធិ ដែលត្រូវតុលាការសម្រេចផ្តន្ទាទោសដាក់ពន្ធនាគារ១៨ខែ។
មន្រ្តីគណបក្ស នរោត្តម រណឫទ្ធិ បានឲ្យដឹងថា ក្រោយពីទទួលបានការលើកលែងទោសនេះ ព្រះអង្គម្ចាស់ នរោត្តម រណឫទ្ធិ ដែលកំពុងគង់និរទេសជាច្រើនឆ្នាំមកហើយនោះនឹងយាងត្រឡប់មកប្រទេសកម្ពុជាវិញនាថ្ងៃអាទិត្យដែលត្រូវនឹងថ្ងៃបុណ្យភ្ជុំបិណ្ឌនេះ។
អាល្លឺម៉ង់នឹងបន្តគាំទ្រតុលាការខ្មែរក្រហម
ស្ថានទូតអាល្លឺម៉ង់នៅប្រទេសកម្ពុជាបានចេញសេចក្តីប្រកាសព័ត៌មានមួយកាលពីថ្ងៃសុក្រ ទី២៦ កញ្ញា ថា ប្រទេសអាល្លឺម៉ង់នឹងបន្តការគាំទ្រអង្គជំនុំជម្រះវិសាមញ្ញក្នុងតុលាការកម្ពុជា ឬតុលាការខ្មែរក្រហមតទៅទៀត ដោយផ្តល់ថវិកាចំនួន៤លាន៣សែនដុល្លារអាមេរិកសម្រាប់ប្រើប្រាស់ក្នុងឆ្នាំ២០០៩ និង ២០១០។
ថវិកានេះរួមជាមួយថវិកាដែលប្រទេសអាល្លឺម៉ង់ផ្តល់ឲ្យតុលាការខ្មែរក្រហមក្នុងឆ្នាំ២០០៨ផង គឺមានចំនួនជិត១០លានដុល្លារអាមេរិកហើយ។
សង្គមស៊ីវិលទាមទារឲ្យតុលាការដោះលែង ប៊ន សំណាង និង សុខ សំអឿន
ក្រុមសកម្មជនការពារសិទ្ធិមនុស្សជាតិនិងអន្តរជាតិចំនួនជិត១០០នាក់មកពីអង្គការនិងសមាគមនានាក្នុងប្រទេសកម្ពុជា ព្រមទាំងក្រុមគ្រួសាររបស់ ប៊ន សំណាង និង សុខ សំអឿន កាលពីថ្ងៃទី២៣ កញ្ញា បានទទូចសុំឲ្យតុលាការកំពូលក្នុងប្រទេសកម្ពុជាលើកយកសំណុំរឿង ប៊ន សំណាង និង សុខ សំអឿន មកបើកសវនាការឲ្យបានឆាប់ជាមួយនឹងការទាមទារឲ្យតុលាការកំពូលដោះលែងអ្នកទាំងពីរឲ្យមានសេរីភាពវិញ។
ការអំពាវនាវនេះបានធ្វើទ្បើងនៅក្នុងពិធីប្រមូលផ្តុំគ្នាដោយសន្តិវិធីនៅក្បែរពន្ធនាគារប៉េហ្ស៊ី ជាយទីក្រុងភ្នំពេញដើម្បីបង្ហោះប៉េងប៉ោងពណ៌សចំនួន១៧០០ប៉េងប៉ោងជានិមិត្តសញ្ញាថា ប៊ន សំណាង និង សុខ សំអឿន កំពុងជាប់ក្នុងពន្ធនាគារប៉េហ្ស៊ីចំនួន១៧០០ថៃ្ងដោយអយុត្តិធម៌។
ប៊ន សំណាង និង សុខ សំអឿន ត្រូវបានតុលាការក្រុងភ្នំពេញបានកាត់ទោសឲ្យជាប់គុកម្នាក់ៗ២០ឆ្នាំក្រោមបទចោទប្រកាន់ថា ពួកគេបានបាញ់សម្លាប់លោក ជា វិជ្ជា មេដឹកនាំសហជីពសេរីកម្មករកម្ពុជា កាលពីឆ្នាំ២០០៤។
ប្រធានសណ្ឋាគាររណសិរ្សប្រឈមមុខនឹងការបណ្តេញចេញ
ប្រធានសណ្ឋាគាររណសិរ្សដែលគណបក្សប្រជាជនកម្ពុជាបានដកហូត ហើយបានលក់ទីតាំងនោះឲ្យទៅអ្នកផ្សេងវិញកំពុងតែប្រឈមមុខនឹងការបណ្តេញចេញពីសណ្ឋាគារនេះមិនឲ្យហួសដំណាច់ខែកញ្ញានេះជាកំហិត។
លោកស្រី កឹម ចន្ថា ប្រធានសណ្ឋាគាររណសិរ្ស ស្ថិតនៅទល់មុខព្រះបរមរាជវាំងក្នុងទីក្រុងភ្នំពេញ បានមានប្រសាសន៍ថា មន្រ្តីនៃទីស្តីការគណៈរដ្ឋមន្រ្តីបានប្រគល់លិខិតស.ជ.ណ.មកឲ្យលោកស្រី កាលពីថ្ងៃព្រហស្បតិ៍ ទី២៥ កញ្ញា តម្រូវឲ្យលោកស្រីប្រគល់សណ្ឋាគារនេះឲ្យទៅក្រុមហ៊ុនឈ្មោះ អាទ្បិចសាន់អ៊ិន។
ផ្អែកតាមប្រភពនិងឯកសារមួយចំនួនបានឲ្យដឹងថា ម្ចាស់ក្រុមហ៊ុនអាទ្បិចសាន់អ៊ិន គឺមានឈ្មោះ ជីង សុគន្ធាវី ដែលជាកូនស្រីរបស់យាយភូ ភរិយារបស់លោក ទ្បៅ ម៉េងខីន ប្រធានក្រុមហ៊ុនស៊ូកាគូ។
លោកស្រី កឹម ចន្ថា ប្រធានសណ្ឋាគាររណសិរ្សបានឲ្យដឹងថា លោកស្រីបានជួលសណ្ឋាគារនេះពីគណបក្សប្រជាជនកម្ពុជាបើកសេវាកម្មទទួលភ្ញៀវស្នាក់នៅចាប់តាំងពីឆ្នាំ១៩៨៩មកម៉្លេះក្នុងតម្លៃទឹកប្រាក់២៦៤០០ដុល្លារអាមេរិកក្នុងមួយឆ្នាំ ហើយកិច្ចសន្យាជួលនោះកំពុងតែនៅជាធរមាននៅទ្បើយ។
គ្រួសារកូរ៉េខាងត្បូងប្ដឹងក្រុមហ៊ុនអាកាសចរណ៍ PMT Air
គ្រួសាររបស់ទេសចរកូរ៉េខាងត្បូងចំនួន១១នាក់ដែលស្លាប់កាលពីឆ្នាំ២០០៧ ដោយសារគ្រោះថ្នាក់ធ្លាក់យន្តហោះនៅក្នុងព្រៃភ្នំនាភាគខាងត្បូងកម្ពុជាកំពុងតែប្តឹងក្រុមហ៊ុនអាកាសចរណ៍ PMT Air ទាមទារសំណងចំនួន ៣លាន៨សែន៨ម៉ឺនដុល្លារអាមេរិក ដោយចោទថា ក្រុមហ៊ុននេះបរាជ័យក្នុងការការពារជីវិតមនុស្សនិងការបង្ការមិនឲ្យម៉ាស៊ីនខូច។
គ្រួសារទាំងនោះបានដាក់ពាក្យបណ្តឹងទារឲ្យទូទាត់ជួសជុលការបាត់បង់ចំណូល សោហ៊ុយបូជាសពនិងការតានតឹងអារម្មណ៍។
គ្រួសារទាំងនោះបញ្ជាក់ថា ក្រុមហ៊ុនអាកាសចរណ៍ PMT Air ត្រូវតែទទួលខុសត្រូវក្នុងការទូទាត់ការខូចខាតដែលកើតឡើងដោយសារគ្រោះថ្នាក់នេះ។
កាលពីក្នុងខែមិថុនា ឆ្នាំ២០០៧ ក្នុងពេលហោះហើរពីសៀមរាបទៅក្រុងព្រះសីហនុ យន្តហោះធុន AN-24 បានធ្លាក់នៅម្តុំព្រៃភ្នំនៅកំពត បណ្តាលឲ្យមនុស្សក្នុងយន្តហោះទំាងអស់២២នាក់ស្លាប់៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
សង្ខេបព័ត៌មានប្រចាំសប្ដាហ៍ ថ្ងៃ ២៤ ដល់ ៣០ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១៧ ដល់ ២៣ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១០ ដល់ ១៦ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ៣-៩ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ២៧ តុលា ដល់ ២ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ២០ ដល់ ២៦ តុលា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១៣ ដល់ ១៩ តុលា ២០០៨
