សង្ខេបព័ត៌មានប្រចាំសប្ដាហ៍ ថ្ងៃ២៨ កក្កដា ដល់ ៣ សីហា ២០០៨
ដោយ ជា មករា
2008-08-03
ព័ត៌មានសំខាន់ៗប្រចាំសប្ដាហ៍នេះរួមមាន សាលាក្តីខ្មែរក្រហមបានពន្យារពេលសវនាការលើបណ្តឹងឧទ្ធរណ៍របស់លោក ខៀវ សំផន និងព័ត៌មានផ្សេងៗដទៃទៀត ។
អតីតព្រះមហាក្សត្រ សម្តេចព្រះ នរោត្តម សីហនុ (ខាងស្ដាំ) ព្រះអគ្គមហេសី នរោត្តម មុនីនាថ សីហនុ (កណ្ដាល) និងព្រះមហាក្សត្រ ព្រះបរមនាថ នរោត្តម សីហមុនី នៅមុនពេលយាងចេញដំណើរពីព្រលានយន្តហោះអន្តរជាតិភ្នំពេញ នាថ្ងៃ ២៨ វិច្ឆិកា ២០០៧ ។
លោក ជា មករា អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជា ពីថ្ងៃ២៨ កក្កដា ដល់ ៣ សីហា ឆ្នាំ២០០៨ ។
ព្រះមហាវីរក្សត្រ ព្រះមហាក្សត្រ និងសម្ដេចម៉ែ យាងទៅប្រទេសចិន
ព្រះមហាវីរក្សត្រ ព្រះមហាក្សត្រ និងសម្ដេចម៉ែ បានយាងធ្វើដំណើរទៅកាន់ប្រទេសចិន នៅថ្ងៃសុក្រ ទី១ សីហាកន្លងទៅនេះ ក្រោមការយាងពីរដ្ឋាភិបាលចិន ដើម្បីយាងចូលរួមក្នុងពិធីបើកកីឡាអូឡាំពិកនៅទីក្រុងប៉េកាំង ។
មន្ត្រីខុទ្ទកាល័យព្រះបរមរាជវាំង លោក អ៊ុំ តារាវុធ បានឲ្យដឹងថាព្រះមហាក្សត្រ ព្រះបរមនាថ នរោត្តម សីហមុនី នឹងយាងចូលរួមជាមួយនឹងប្រមុខរដ្ឋនៃប្រទេសដទៃទៀតក្នុងពិធីបើកកីឡាអូឡាំពិក ទីក្រុងប៉េកាំង នៅថ្ងៃទី៨ ខែសីហាខាងមុខនេះ ហើយបន្ទាប់មកទ្រង់នឹងធ្វើការត្រួតពិនិត្យព្រះរាជសុខភាពរបស់ព្រះអង្គ ។
លោក អ៊ុំ តារាវុធ បានមានប្រសាសន៍ថា ព្រះបរមនាថ នរោត្តម សីហមុនី នឹងយាងត្រឡប់មកកាន់ប្រទេសកម្ពុជាវិញយ៉ាងយូរ២សប្ដាហ៍ខាងមុខ ។ ទាក់ទងនឹងព្រះមហាវីរក្សត្រ នរោត្តម សីហនុ និងសម្ដេចម៉ែ លោក អ៊ុំ តារាវុធ បានមានប្រសាសន៍ថាទ្រង់នឹងគង់នៅប្រទេសចិនមួយរយៈដើម្បីត្រួតពិនិត្យព្រះរាជសុខភាព ។
នាយករដ្ឋមន្ត្រីប៉ះសម្ដីជាមួយនឹងប្រធានគណបក្សសមរង្ស៊ី
លោកនាយករដ្ឋមន្ត្រី ហ៊ុន សែន បានប៉ះសម្ដីជាមួយនឹងប្រធានគណបក្សប្រឆាំង លោក សម រង្ស៊ី កាលពីព្រឹកថ្ងៃសុក្រកន្លងទៅ នៅគ្រាដែលអ្នកនយោបាយនានាបានដង្ហែដំណើរព្រះមហាវីរក្សត្រ សម្ដេចម៉ែ និងព្រះមហាក្សត្រ យាងទៅកាន់ទីក្រុងប៉េកាំង ប្រទេសចិន ។
លោកនាយករដ្ឋមន្ត្រី ហ៊ុន សែន បានព្រមានលោក សម រង្ស៊ី នៅចំពោះមុខមន្ត្រីរដ្ឋាភិបាល មន្ត្រីអង្គទូត និងអ្នកកាសែត ដែលមានវត្តមាននៅឯព្រលានយន្តហោះភ្នំពេញថា លោក សម រង្ស៊ី នឹងអាចបាត់បង់អាសនៈក្នុងរដ្ឋសភា បើសិនជាគណបក្សសមរង្ស៊ីមិនព្រមស្បថចូលកាន់តំណែងតំណាងរាស្ត្រដើម្បីបង្កើតរដ្ឋសភាថ្មីនោះ ។
លោកនាយករដ្ឋមន្ត្រី ហ៊ុន សែន បានមានប្រសាសន៍ថាកិច្ចប្រជុំចូលស្បថនឹងអាចធ្វើឡើងនៅថ្ងៃទី២៤ សីហានេះ ហើយបើសិនជាលោក សម រង្ស៊ី មិនព្រមចូលរួមទេនោះអាសនៈសភានឹងបានទៅអ្នកដទៃ ។
ទោះជាយ៉ាងណាលោក សម រង្ស៊ី មិនទាន់បានសម្រេចចិត្តថាតើលោកនឹងចូលឬមិនចូលកិច្ចប្រជុំនោះទេ ប៉ុន្តែលោកបញ្ជាក់ថាគណបក្សសមរង្ស៊ីក៏តំណាងឲ្យប្រជាពលរដ្ឋជាង២លាននាក់ដែលបោះឆ្នោតគាំទ្រលោកដែរ ។
កម្ពុជាត្រៀមខ្លួនក្នុងការដកទ័ពចេញពីតំបន់ប្រាសាទព្រះវិហារ
លោកនាយករដ្ឋមន្ត្រី ហ៊ុន សែន បានមានប្រសាសន៍កាលពីថ្ងៃអង្គារ ទី២៩ កក្កដា ថាប្រទេសកម្ពុជាត្រៀមខ្លួនរួចជាស្រេចក្នុងការដកទ័ពចេញពីតំបន់ប្រាសាទព្រះវិហារ តែកាលបរិច្ឆេទនៃការដកទ័ពនោះគឺអាស្រ័យខាងភាគីថៃជាមុន ។
ប្រសាសន៍របស់លោកនាយករដ្ឋមន្ត្រីបានធ្វើឡើងមួយថ្ងៃបន្ទាប់ពីមានកិច្ចប្រជុំរវាងមន្ត្រីការបរទេសនៃប្រទេសទាំងពីរ ដើម្បីស្វែងរកវិធីបន្ធូរបន្ថយភាពតានតឹងខាងផ្នែកយោធានោះ ។
នៅក្នុងកិច្ចប្រជុំកាលពីថ្ងៃច័ន្ទ ទី២៨ កក្កដា រដ្ឋមន្ត្រីការបរទេសនៃប្រទេសទាំងពីរបានសម្រេចយល់ព្រមដកទ័ពរៀងៗខ្លួន ។
ទោះជាយ៉ាងណាសេចក្ដីរាយការណ៍ពីប្រាសាទព្រះវិហារបានឲ្យដឹងថា រហូតមកទល់នឹងពេលនេះគ្មានភាគីណាបានដកទ័ពនៅឡើយទេ ។
ភរិយានាយករដ្ឋមន្ត្រីធ្វើពិធីបួងសួងនៅប្រាសាទព្រះវិហារ
ភរិយារបស់នាយករដ្ឋមន្ត្រីនៃប្រទេសកម្ពុជា គឺលោកជំទាវ ប៊ុន រ៉ានី ហ៊ុន សែន បានធ្វើពិធីបួងសួងមួយនៅឯប្រាសាទព្រះវិហារ កាលពីព្រឹកថ្ងៃសុក្រ ទី១ សីហា ដោយបានអន្ទងហៅព្រះវិញ្ញាណក្ខន្ធអតីតព្រះមហាក្សត្រកសាងអង្គរ និងវិញ្ញាណក្ខន្ធមេទ័ពខ្លាំងពូកែមកសណ្ឋិតនៅប្រាសាទព្រះវិហារ ដើម្បីសម្ដែងឫទ្ធិបារមីឲ្យមានសន្តិភាពនិងសេចក្ដីសុខ ។
ព្រះសង្ឃថ្នាក់រាជាគណៈ មន្ត្រីរដ្ឋាភិបាលកំពូលៗ កម្លាំងប្រដាប់អាវុធ យោធា ប៉ូលិស ប៉េអឹម និងប្រជាពលរដ្ឋប្រមាណ១ពាន់នាក់បានចូលរួមក្នុងពិធីបួងសួងនោះ ។
តំណាងឲ្យក្រសួងធម្មការនិងសាសនា និងជាប្រធានគណៈកម្មការរៀបចំពិធីបុណ្យជាតិនិងអន្តរជាតិ លោក មិន ឃិន បានមានប្រសាសន៍ថាពិធីដ៏សម្បើមកាលពីព្រឹកមិញ គឺជាការបួងសួងសុំសេចក្ដីសុខចម្រើនដល់ប្រាសាទព្រះវិហារ ។
ការទាមទារយកប្រាសាទព្រះវិហារពីថៃសំខាន់ជាងការដាក់ជាបេតិកភណ្ឌពិភពលោក
ព្រះមហាវីរក្សត្រខ្មែរបានឲ្យដឹងថា ការទាមទារយកប្រាសាទព្រះវិហារមកពីប្រទេសថៃវិញ កាលពីឆ្នាំ១៩៦២ មានភាពសំខាន់ជាងការដាក់បញ្ចូលប្រាសាទនេះក្នុងបញ្ជីបេតិកភណ្ឌពិភពលោក ។
មន្ត្រីខុទ្ទកាល័យព្រះមហាក្សត្រ លោក អ៊ុំ តារាវុធ បានមានប្រសាសន៍ថាបើគ្មានថ្ងៃទី១៥ មិថុនា ឆ្នាំ១៩៦២ ពេលដែលតុលាការយុត្តិធម៌អន្តរជាតិក្រុងឡាអេ សម្រេចថាប្រាសាទព្រះវិហារជារបស់ខ្មែរនោះទេ នោះក៏គ្មានថ្ងៃទី៧ ខែកក្កដា ឆ្នាំ២០០៨ ពេលដែលប្រាសាទព្រះវិហារត្រូវបានអង្គការយូណេស្កូ សម្រេចដាក់ក្នុងបញ្ជីបេតិកភណ្ឌពិភពលោកនោះដែរ ។
មន្ត្រីព្រះបរមរាជវាំង លោក អ៊ុំ តារាវុធ បានបញ្ជាក់ឲ្យដឹងថា ព្រះមហាវីរក្សត្រ នរោត្ដម សីហនុ មិនបានអំពាវនាវឲ្យប្រជាពលរដ្ឋខ្មែររត់ចូលព្រៃម៉ាគី តស៊ូប្រឆាំងនឹងការឈ្លានពានរបស់សៀមនោះឡើយ ។
លោកបានឲ្យដឹងទៀតថា ព្រះមហាវីរក្សត្រ នរោត្តម សីហនុ នឹងជួយដោះស្រាយជុំវិញបញ្ហាជម្លោះនៅតំបន់ប្រាសាទព្រះវិហារជាមួយនឹងប្រទេសសៀម បើសិនណាជាមានកិច្ចសុំអន្តរាគមន៍ពីរដ្ឋាភិបាលខ្មែរ ។
លោក អ៊ុំ តារាវុធ បានបញ្ជាក់ថារហូតមកទល់នឹងពេលនេះ ព្រះមហាវីរក្សត្រនៅមិនទាន់បានទទួលកិច្ចស្នើឲ្យព្រះអង្គជួយដោះស្រាយជម្លោះនោះពីរដ្ឋាភិបាលនៅឡើយទេ ។
អង្គការក្រៅរដ្ឋាភិបាលអំពាវនាវឲ្យរដ្ឋាភិបាលបញ្ឈប់ការចរចាជាមួយថៃ
មន្រ្តីអង្គការក្រៅរដ្ឋាភិបាលនានាបានអំពាវនាវកាលពីថ្ងៃទី២៩ កក្កដា សុំឲ្យរដ្ឋាភិបាលខ្មែរបញ្ឈប់ការចរចាជាមួយថៃក្នុងជម្លោះព្រំដែននៅតំបន់ក្បែរប្រាសាទព្រះវិហារ ហើយចង់ឲ្យមានការដោះស្រាយបញ្ហានេះជាលក្ខណៈអន្តរជាតិ ។
ប្រធានអង្គការមូលនិធិទ្រទ្រង់អរិយធម៌ខ្មែរ លោក មឿង សុន បានមានប្រសាសន៍ថា វាជាការចាញ់ប្រៀបមួយនៅពេលដែលកម្ពុជាសុខចិត្តចរចាជាមួយប្រទេសមួយដែលមានកម្លាំងទ័ពចូលក្នុងទឹកដីរបស់ខ្លួនទៅហើយនោះ ។
ថៃនាំមន្ត្រីយោធាអមស្ថានទូត១១ប្រទេសមកពិនិត្យមើលតំបន់ជម្លោះជាមួយខ្មែរ
មន្ត្រីយោធាអមស្ថានទូតមកពី១១ប្រទេសប្រចាំទីក្រុងបាងកក ត្រូវបានកងទាហានថៃដឹកនាំមកពិនិត្យស្ថានភាពប្រឈមមុខដាក់គ្នាដោយយោធារវាងថៃខ្មែរ នៅតំបន់ជម្លោះខ្សែត្រៀមទី១ក្នុងទឹកដីថៃនៃបរិវេណប្រាសាទព្រះវិហារ កាលពីព្រឹកថ្ងៃច័ន្ទ ទី២៨ ខែកក្កដា ។
អ្នកនាំពាក្យរាជរដ្ឋាភិបាលកម្ពុជា លោក ខៀវ កាញារីទ្ធ បានមានប្រសាសន៍ថាវាជាការប្រសើរដែលមន្ត្រីយោធាថៃបាននាំមន្ត្រីយោធាអមស្ថានទូតបរទេសទៅពិនិត្យស្ថានការណ៍ជាក់ស្ដែងក្នុងតំបន់ប្រឈមមុខដាក់គ្នារវាងកងទាហានខ្មែរនិងថៃនោះ ។
ពលរដ្ឋប្រមាណ៤០០នាក់ជំទាស់នឹងលទ្ធផលនៃការបោះឆ្នោត
ប្រជាពលរដ្ឋប្រមាណ៤០០នាក់បាននាំគ្នាប្រមូលផ្ដុំនៅទីស្នាក់ការគណបក្សសមរង្ស៊ី កាលពីព្រឹកថ្ងៃពុធ ទី៣០ កក្កដា ធ្វើការជំទាស់ទៅនឹងលទ្ធផលបណ្ដោះអាសន្ននៃការបោះឆ្នោតជ្រើសរើសតំណាងរាស្ត្រអាណត្តិទី៤ ហើយទាមទារឲ្យមានការបោះឆ្នោតឡើងវិញ ។
ប្រធានគណបក្សសមរង្ស៊ី គឺលោក សម រង្ស៊ី បានមានប្រសាសន៍ប្រាប់ដល់ប្រជាពលរដ្ឋដែលនាំគ្នាមកតវ៉ានោះថា លោកមិនអាចទទួលយកលទ្ធផលនៃការបោះឆ្នោតនោះបានទេ ដោយសារមានមនុស្សប្រមាណ១លាននាក់ មិនបានបោះឆ្នោត ។
តាមលទ្ធផលបណ្ដោះអាសន្នក្រៅផ្លូវការនៃការបោះឆ្នោត ឆ្នាំ២០០៨នេះ បានបង្ហាញថា គណបក្សប្រជាជនកម្ពុជា ទទួលបាន ៩០អាសនៈ គណបក្សសមរង្ស៊ី ២៦អាសនៈ គណបក្សសិទ្ធិមនុស្ស ៣អាសនៈ គណបក្ស នរោត្តម រណឫទ្ធិ ២អាសនៈ និងគណបក្សហ៊្វុនស៊ិនប៉ិច ២អាសនៈ ដែលលទ្ធផលនេះ ត្រូវបានជំទាស់ដោយគណបក្សធំៗបី គឺគណបក្សសមរង្ស៊ី គណបក្ស នរោត្តម រណឬទ្ធិ និងគណបក្សសិទ្ធិមនុស្ស ។
តុលាការកំពូលសម្រេចតម្កល់សាលដីកាផ្ដន្ទាទោសសម្ដេចក្រុមព្រះ
តុលាការកំពូលនៃប្រទេសកម្ពុជា កាលពីថៃ្ងពុធ ទី៣០ កក្កដា បានសម្រេចតម្កល់សាលដីការបស់តុលាការសាលាឧទ្ធរណ៍ក្នុងការផ្តន្ទាទោសសមេ្តចក្រុមព្រះ នរោត្តម រណឫទ្ធិ ឲ្យជាប់ទោស១៨ខែ និងផាកពិន័យជាប្រាក់១៥ម៉ឺនដុល្លារអាមេរិក ក្រោមបទចោទថាព្រះអង្គបានរំលោភលើសេចក្តីទុកចិត្តក្នុងការលក់ទីស្នាក់ការកណ្ដាលរបស់គណបក្សហ៊្វុនស៊ិនប៉ិចកាលពីឆ្នាំ២០០៥កន្លងទៅនេះ ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
សង្ខេបព័ត៌មានប្រចាំសប្ដាហ៍ ថ្ងៃ ២៤ ដល់ ៣០ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១៧ ដល់ ២៣ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១០ ដល់ ១៦ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ៣-៩ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ២៧ តុលា ដល់ ២ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ២០ ដល់ ២៦ តុលា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១៣ ដល់ ១៩ តុលា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ៦ ដល់ ១២ តុលា ២០០៨
