សង្ខេបព័ត៌មានប្រចាំសប្ដាហ៍ ថ្ងៃ២៨ មេសា ដល់ ៤ ឧសភា ២០០៨
ដោយ ជា មករា
2008-05-04
ព័ត៌មានសំខាន់ៗប្រចាំសប្ដាហ៍នេះរួមមាន ប្រធានគណបក្សប្រឆាំង លោក សម រង្ស៊ី បានដឹកនាំកម្មករប្រមាណ ៤០០នាក់ ធ្វើបាតុកម្ម និងព័ត៌មានផ្សេងៗដទៃទៀត ។
លោក សម រង្ស៊ី ប្រធានគណបក្សសមរង្ស៊ី ដឹកនាំបាតុកម្មតវ៉ាទាមទារឲ្យរដ្ឋាភិបាលបញ្ចុះតម្លៃទំនិញ កាលពីថ្ងៃទី៦ មេសា ២០០៨ ។
លោក ជា មករា អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗ នៅកម្ពុជា ពីថ្ងៃ២៨ មេសា ដល់ថ្ងៃ ៤ ឧសភា ឆ្នាំ២០០៨ ។
ពលករដើរដង្ហែក្បួនអបអរទិវាពលកម្មអន្តរជាតិនៅសៀមរាប
ពលករជាច្រើនរយនាក់នៅក្នុងខេត្តសៀមរាបបាននាំគ្នាដើរដង្ហែជាក្បួនតាមថ្នល់ក្នុងទីរួមខេត្ត ដើម្បីចូលរួមក្នុងទិវាពលកម្មអន្តរជាតិ ១ ឧសភា ។
អ្នកចូលរួមមានចម្រុះដោយស្ត្រីនិងបុរសបានអំពាវនាវសុំឲ្យថៅកែរោងចក្រគោរពសិទ្ធិការងារពួកគេ និងបំបាត់អំពើកេងប្រវ័ញ្ច ។
ការប្រារព្ធទិវាពលកម្មអន្តរជាតិនៅក្រុងភ្នំពេញ
នៅក្រុងភ្នំពេញឯណេះវិញ កម្មករក្នុងរោងចក្រនិងគណបក្សប្រឆាំងខ្លះបានប្រារព្ធទិវាពលកម្មអន្តរជាតិ ១ ឧសភានោះផ្សេៗពីគ្នាដែរ ប៉ុន្តែការធ្វើនោះមិនបានបង្ហាញតាមរយៈការដើរដង្ហែដូចមាននៅក្នុងខេត្តសៀមរាបនោះឡើយ ។
សម រង្ស៊ី ដឹកនាំកម្មករប្រមាណ ៤០០នាក់ ធ្វើបាតុកម្ម
ប្រធានគណបក្សប្រឆាំង លោក សម រង្ស៊ី បានដឹកនាំកម្មករប្រមាណ ៤០០នាក់ ធ្វើបាតុកម្មអហិង្សាកាលពីថ្ងៃសុក្រ ២ ឧសភា ដើម្បីទាមទាររកប្រយោជន៍ជូនកម្មករកាត់ដេរនៃរោងចក្រ City News ។
បាតុកម្មបានធ្វើឡើងបន្ទាប់ពីមិនទាន់មានការចុះសម្រុងគ្នារវាងកម្មករ និងប្រធានរោងចក្រដែលចង់ប្តូរទីតាំងរោងចក្រពីខណ្ឌឫស្សីកែវ ទៅកន្លែងឆ្ងាយមួយ និងការទាមទាររបស់កម្មកររកការបើកប្រាក់បំណាច់ចំនួនពី ៥០ដុល្លារទៅ១០០ដុល្លារអាមេរិក ។អនុរដ្ឋលេខាធិការក្រសួងការងារ លោក អ៊ុំ មាន បានមានប្រសាសន៍រិះគន់ថា លោក សម រង្ស៊ី បានឆ្លៀតឱកាសរកភាពចំណេញនយោបាយ នៅក្នុងរឿងវិវាទនេះ ។
គ.ជ.ប.៖ នឹងមានបក្សនយោបាយជាច្រើនទៀត មកចុះឈ្មោះចូលរួមប្រកួតប្រជែង
អគ្គលេខាធិការគណៈកម្មាធិការរៀបចំការបោះឆ្នោត លោក ទេព នីថា បានមានប្រសាសន៍ដោយសេចក្ដីសង្ឃឹមថា នឹងមានគណបក្សនយោបាយនានាជាច្រើនទៀត នឹងមកចុះឈ្មោះចូលរួមប្រកួតប្រជែង ក្នុងដំណើរការបោះឆ្នោតខែកក្កដាខាងមុខ ។
សូមជម្រាបថា គណបក្សដែលបានមកចុះឈ្មោះចំនួន ៤ថ្ងៃរួចមកហើយនោះ មានគណបក្សប្រជាជនកម្ពុជា គណបក្សសង្គមខ្មែរនិយម និងគណបក្សហង្សដារ៉ាចលនាប្រជាធិបតេយ្យតែប៉ុណ្ណោះ ។
ស្ពានស្រែពកនៅខែត្រស្ទឹងត្រែងបាក់
ស្ពានដឹកជញ្ជូនដ៏សំខាន់មួយតភ្ជាប់គមនាគមន៍ពីខេត្តស្ទឹងត្រែង ទៅកាន់ខេត្តរតនគិរី បានបាក់ដោយសារតែមិនអាចទ្រាំនឹងទម្ងន់រថយន្តដែលដឹកឈើហួសចំណុះ ។
ស្ពានស្រែពកដែលមានប្រវែង ៣០០ម៉ែត្រ បានបាក់កាលពីថ្ងៃពុធ ៣០ មេសា ជាមួយនឹងរថយន្តដឹកឈើមួយគ្រឿងបានធ្លាក់ចុះទៅក្រោមផងដែរ ប៉ុន្តែមិនមានសេចក្តីរាយការណ៍អំពីការបាត់បង់ជីវិតឡើយ ។ នៅមិនទាន់មានការជួសជុលស្ពាននោះសាឡើងវិញទេមកទល់នឹងចុងសប្តាហ៍នេះ ។
អង្គការស្បៀងអាហារពិភពលោក ផ្អាកកម្មវិធីផ្គត់ផ្គង់អាហារពេលព្រឹក
ការកើនឡើងនៃតម្លៃអង្ករទូទាំងពិភពលោក បានបង្ខំឲ្យអង្គការស្បៀងអាហារពិភពលោក ផ្អាកការផ្តល់កម្មវិធីផ្គត់ផ្គង់ស្បៀងអាហារពេលព្រឹក ចំពោះកុមារក្រីក្រខ្មែរចំនួន ៤សែន៥ម៉ឺននាក់ ។
នាយកកម្មវិធីស្បៀងអាហារពិភពលោកប្រចាំកម្ពុជា លោក Thomas Keusters បានមានប្រសាសន៍បញ្ជាក់ថា ការផ្អាកស្បៀងនោះគឺបណ្តាលមកពីតម្លៃអង្ករឡើងថ្លៃតែម្តង ។
សកម្មភាពផ្អាកស្បៀងទាក់ទងនឹងអាហារពេលព្រឹកដល់កុមារក្រីក្រកម្ពុជានោះ បានធ្វើឲ្យមានការព្រួយបារម្ភដល់អ្នកគ្រប់គ្រងអង្គការកុមារទាំងនោះ ។ ទោះជាយ៉ាងណា លោក Thomas Keustersបានមានប្រសាសន៍កាលពីថ្ងៃ១ ឧសភា ផងដែរថា រដ្ឋាភិបាលកម្ពុជាបានសន្យាថា នឹងផ្ដល់ស្រូវប្រមាណ ៣ពាន់តោន នៅបំណាច់ខែឧសភានេះ សម្រាប់បន្តកម្មវិធីអាហារពេលព្រឹកនេះ ។
នាយករដ្ឋមន្ត្រីខ្មែរផ្តួចផ្តើមគំនិតបង្កើតសមាគមនាំស្រូវចេញ
មន្ត្រីខ្មែរបានថ្លែងក្នុងសប្តាហ៍នេះថា នាយករដ្ឋមន្ត្រីខ្មែរ លោក ហ៊ុន សែន បានផ្តួចផ្តើមគំនិតបង្កើតសមាគមក្នុងតំបន់មួយ ដើម្បីធ្វើជំនួញស្រូវទៅលក់ក្នុងពិភពលោក ។
សមាគមដែលគ្រោងនឹងបង្កើតនោះ នឹងមានប្រទេសយ៉ាងហោចចំនួន ៥ដែរដែលនឹងចូលរួម ក្នុងនោះគឺមាន កម្ពុជា ភូមា វៀតណាម ថៃ និងលាវ ។
ជម្លោះដីធ្លីនៅបាត់ដំបងឈានដល់ការប្រឈមមុខដាក់គ្នា
នៅឯខេត្តបាត់ដំបង មនុស្សជាច្រើននាក់បានប្រឈមមុខគ្នាក្នុងទំនាស់ដី ១២០០ហិកតា ក្នុងឃុំដូនបា ស្រុកគាស់ក្រឡ ។ សេចក្តីរាយការណ៍បានឲ្យដឹងថា មនុស្សទាំង២ក្រុមដែលបានប្រឈមមុខគ្នាដណ្តើមដីគ្នានោះ សុទ្ធតែមានខ្នងបង្អែកជាទាហាននិងប៉ូលិសផ្សេងៗពីគ្នា ។
មនុស្សមួយក្រុមដែលមានគ្នាប្រមាណ៣៥០នាក់ នៅថ្ងៃអង្គារនិងពុធក្នុងសប្តាហ៍នេះ បានលើកគ្នាមកធ្វើការតវ៉ាជំទាស់ យ៉ាងហោចណាស់២ថ្ងៃជាប់គ្នារួចហើយទាមទារឲ្យអាជ្ញាធរធ្វើការដោះស្រាយទំនាស់ឲ្យបានឆាប់រហ័ស ជាមួយនឹងការគំរាមថានឹងរុះរើលំនៅរបស់មនុស្សមួយក្រុមទៀត ដែលមានគ្នាចំនួន ១៥៧គ្រួសារ ដែលកំពុងតាំងទីលំនៅក្នុងភូមិគោករកា ឃុំដូនបា ស្រុកគាស់ក្រឡនោះដែរ ។
ទំនាស់ដីធ្លី នៅស្រុកស្រែអំបិល ខេត្តកោះកុង
នៅខេត្តកោះកុង អ្នកស្រុកឃុំជីខលើ ស្រុកស្រែអំបិល បានចោទអាជ្ញាធរមូលដ្ឋាន ថាបានការពារឈ្មួញមានអំណាច និងបានប្រើអំពើហិង្សាបង្រ្កាបអ្នកតវ៉ាក្នុងជម្លោះដីមួយទំហំ ១៥៩ហិកតា ។
អ្នកស្រុកទាំងនោះបានលើកគ្នាធ្វើដំណើរមកដល់រាជធានីភ្នំពេញ កាលពីថ្ងៃទី ១ ឧសភា ដើម្បីសុំរកការជួយធ្វើអន្តរាគមន៍ ពីលោកនាយករដ្ឋមន្ត្រី ហ៊ុន សែន នៅឯគេហដ្ឋាន ប៉ុន្តែមិនបានជួបលោកនាយករដ្ឋមន្ត្រីទេ ដោយសារតែលោកនាយករដ្ឋមន្ត្រី បានធ្វើដំណើរទៅកាន់ក្រុងព្រះសីហនុ ។
អ្នកកាសែតThe Cambodia Daily ម្នាក់ត្រូវបានបណ្ដញចេញពីការងារ
អ្នកកាសែតThe Cambodia Daily ម្នាក់បានរងការបណ្តេញចេញពីអង្គភាព ដោយសារតែបញ្ហាទំនាស់បុគ្គល ។ ការបណ្តេញលោក ថេត សម្បត្តិ ដែលបម្រើការឲ្យកាសែតThe Cambodia Daily ចំនួន៨ឆ្នាំមកហើយនោះ បានធ្វើឡើងមួយថ្ងៃមុនកិច្ចប្រារព្ធទិវាសេរីភាពសារព័ត៌មាន ថ្ងៃទី៣ ឧសភា ។
អ្នកកាសែតដែលគេបានបណ្តេញចោលនោះ បានថ្លែងថាលោកនឹងប្តឹងបណ្ណាធិការកាសែត The Cambodia Daily នោះ ជាមួយការចោទថាការបណ្តេញបានធ្វើដោយបំពានលើច្បាប់គ្មានសំណង និងគ្មានការព្រមានជាមុននោះឡើយ ។
មេឃុំម្នាក់នៅព្រៃវែងរងការចោទថារារាំងសកម្មភាពអ្នកគាំទ្រគណបក្ស នរោត្តម រណឫទ្ធិ
នៅខេត្តព្រៃវែង មេឃុំម្នាក់នៅក្នុងស្រុកកំចាយមា កាលពីថ្ងៃ១ ឧសភាកន្លងទៅ បានរងការចោទថា រារាំងសកម្មភាពធ្វើកិច្ចការរបស់ក្រុមអ្នកគាំទ្រគណបក្ស នរោត្តម រណឫទ្ធិ នៅមុនការត្រៀមរៀបចំបោះឆ្នោតសកល ខែកក្កដា ។
ទោះជាយ៉ាងណាក្តីមេឃុំស៊ាងខ្វៀន នៃគណបក្សប្រជាជនកម្ពុជាក្នុងស្រុកកំចាយមា បានថ្លែងបដិសេធចំពោះការចោទនោះ ។
សកម្មភាពកាប់ព្រៃឈើរានយកដីនៅខេត្តរតនគិរីនៅតែបន្តកើតមាន
នៅខេត្តរតនគិរី សកម្មភាពកាប់ព្រៃឈើដើម្បីវាតដីយកជាកម្មសិទ្ធិ នៅតែបន្តមាននៅក្នុងឃុំកិចុង ស្រុកបរកែវ ។ ទន្ទឹមនឹងនោះមានសេចក្តីរាយការណ៍ កាលពីថ្ងៃ២៨ មេសា ថាមន្ត្រីឃុំម្នាក់នៅទីនោះ ក៏រងការគំរាមផងដែរ ដោយសារតែសកម្មភាពរារាំងមិនឲ្យមានការកាប់ព្រៃឈើនៅតំបន់នោះ ។
នៅឯខេត្តរតនគិរីដដែលនោះទៀត អ្នកស្រុកនៅតែត្អូញត្អែរអំពីតម្លៃទំនិញមិនព្រមចុះថោក តាំងពីបានដំឡើងកាលពីមុនបុណ្យចូលឆ្នាំខ្មែរមកម្ល៉េះ ។ អ្នកស្រុកសុំឲ្យរដ្ឋាភិបាលចាត់វិធានការជួយបញ្ចុះតម្លៃទំនិញ ។
ចិនផ្តល់ប្រាក់៦សែនដុល្លារដល់កម្ពុជាដើម្បីការដោះមីន
ប្រទេសចិនបានផ្តល់ប្រាក់៦សែនដុល្លារចំពោះកម្ពុជា ដើម្បីការដោះមីននៅតាមផ្លូវជាតិលេខ៧ ពីខេត្តក្រចេះមកកាន់ខេត្តស្ទឹងត្រែង ។
រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានមានប្រសាសន៍នៅថ្ងៃអង្គារ ២៩ មេសា កន្លងទៅនេះ ថាជំនួយរបស់ចិនក្នុងការសម្អាតមីន លើផ្លូវជាតិលេខ៧ ដែលមានប្រវែងជាង ១៨៦គីឡូម៉ែត្រ គឺជាការជួយប្រជាជនខ្មែរឲ្យរួចចៀសផុតពីគ្រោះថ្នាក់ដល់ជីវិតដោយសារមីន ។
ក្រសួងអប់រំសន្យានឹងផ្តល់ការសិក្សាជាទូទៅដល់កុមារក្រោមគំរោងការថ្មី
ក្រសួងអប់រំ យុវជន និងកីឡា បានសន្យាថានឹងផ្តល់ការសិក្សាជាទូទៅដល់កុមារកម្ពុជា ក្រោមគំរោងការ៥ឆ្នាំថ្មីរបស់ខ្លួន ។
រដ្ឋលេខាធិការក្រសួងអប់រំ យុវជន និងកីឡា លោក អ៊ឹម សិទ្ធី បានមានប្រសាសន៍ថា ក្រសួងមានផែនការជំរុញឲ្យមានកុមារកាន់តែច្រើន នៅតាមតំបន់ទីជនបទ ដើម្បីទៅរៀននៅឯសាលា ហើយនិងមានផែនការជួយកុមារទាំងនោះ ឲ្យមានលទ្ធភាពរៀនដល់ថ្នាក់ឧត្តមសិក្សាប្រកបដោយគុណភាពខ្ពស់ថែមទៀត ។
លោកបានថ្លែងថាផែនការចម្បងដែលមានការជំរុញកិច្ចការនេះឲ្យមានប្រសិទ្ធភាព គឺទីមួយ កុមារទាំងអស់នឹងទទួលបានការអនុញ្ញាតឲ្យចូលទៅរៀន, ទី២ ការរៀនសូត្រត្រូវតែមានគុណភាព និងប្រសិទ្ធភាពខ្ពស់ និងទី៣ ចាំបាច់ត្រូវតែមានការថែរក្សា និងគាំពារសុខភាពនិងសុវត្ថិភាពដល់កុមារ ៕
ឧបករណ៍រឿង
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
សង្ខេបព័ត៌មានប្រចាំសប្ដាហ៍ ថ្ងៃ ១៨ ដល់ ២៤ សីហា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១១ ដល់ ១៧ សីហា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ៤ ដល់ ១០ សីហា ២០០៨
សង្ខេបព័ត៌មានប្រចាំសប្ដាហ៍ ថ្ងៃ២៨ កក្កដា ដល់ ៣ សីហា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ២១ ដល់ ២៧ កក្កដា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១៤ ដល់ ២០ កក្កដា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ៧ ដល់ ១៣ កក្កដា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ៣០ មិថុនា ដល់ ៦ កក្កដា ២០០៨
